Pene 10

Ua bapetizohia o Iesu

E ora Ioane i roto i te medebara e rave rahi matahiti. E huruhuru kamela to’na ahu, e meli e te akaride ta’na maa. Ua haere mai te taata na te oire no te faaroo ia’na ia haapii. Ua itehia oia i te i‘oa ra o Ioane Bapetizo.

Mataio 3:1–5

Ua haapii Ioane Bapetizo i te taata i te parau no Iesu Mesia. Ua parau oia ia ratou ia tatarahapa i ta ratou mau hara e ia bapetizohia. Ua bapetizo Ioane i te feia tei tatarahapa i ta ratou mau hara.

Mataio 3:2–3, 5–6

Ua ui te taata ia Ioane Bapetizo nahea ia ora i te oraraa maitai a‘e. Ua parau oia ia ratou ia horo‘a na tei veve ra, ia parau i te parau mau, e ia hamani maitai ia vetahi ê ra. Ua parau maira oia e, e tae vave mai Iesu Mesia. E horo‘a Iesu ia ratou i te horo‘araa o te Varua Maitai.

Mataio 3:2, 11–12; Luka 3:10–14

I te hoê mahana te bapetizo ra Ioane Bapetizo i te taata i roto i te anavai no Ioridana, haere maira Iesu Mesia ia’na ra. Ua ani atu ra Oia ia Ioane ia bapetizo Ia’na. Ua ite o Ioane e, ua haapa‘o maite Iesu i te mau faaueraa a te Atua e aita i titauhia Ia’na ia tatarahapa. Ua mana‘o o Ioane e, aita e titauhia ia Iesu ia bapetizohia.

Mataio 3:13–15; 2 Nephi 31:5–7

Ua faaue râ te Atua i te mau taata atoa ia bapetizohia, no reira ua parau atu ra Iesu ia Ioane ia bapetizo Ia’na. Ua faaite mai Iesu i te hi‘oraa ia tatou na roto i te haapa‘oraa i te faaueraa a te Atua ia bapetizohia.

Mataio 3:16; 2 Nephi 31:7–9

Ia haere maira Iesu i ni‘a mai raro mai i te pape ra, ua pou maira te Varua Maitai maitai i ni‘a Ia’na. Ua parau maira te Atua mai te ra‘i mai na ô maira, « Ta‘u Tamaiti here teie, ua mauruuru roa vau Ia’na ». Ua faaite atoa Ioane Bapetizo e, e Tamaiti Iesu na te Atua.

Mataio 3:16–17; Ioane 1:33–36; Iesu te Mesia 150