Pene 34
Te tamaiti i uruhia i te varua ino
I te hoê mahana ua ani atu ra te hoê taata i te Faaora ia tauturu i ta’na tamaiti. E varua ino tei roto i taua tamaiti ra. Ua tamata te mau pĭpĭ i te faaora i ta’na tamaiti, aita râ i ora ia ratou.
Ua ani Iesu i taua taata ra ia afa‘i mai i ta’na tamaiti Ia’na ra. Ia haere maira te tamaiti ra, ua faahi‘a te varua ino ia’na i ni‘a i te repo.
Ua ui te Faaora eaha te maororaa te parahiraa te varua ino i roto i te tamaiti. Ua parau te metua tane e, mai to’na tamariiraa mai â.
Ua parau Iesu e, e nehenehe Ta’na e faaora i te tamaiti mai te peu e, e faaroo to te metua tane. Ua haamata a‘e ra te metua tane i te ta‘i. Ua parau maira oia e, e faaroo to’na. Ua ani râ oia ia Iesu ia tauturu ia’na ia rahi atu to’na faaroo.
Ua faaue atu ra Iesu i te varua ino ia haere i rapae au i te tamaiti ra e eiaha roa’tu e tomo faahou i roto ia’na. Ua riri te varua ino. Ua mauiui faahou te tamaiti. E ua haapa‘o te varua ino i te parau a Iesu e ua haere i rapae.
Ua vai te tamaiti ma te maniania ore e e rave rahi tei parau e, ua pohe oia. Ua rave maira Iesu i to’na rima e ua tauturu ia’na ia ti‘a i ni‘a. Ua ora te tamaiti. Ua reva ê te varua ino.
I muri a‘e ra ua ui atu te mau pĭpĭ ia Iesu e, no te aha aita i ti‘a ia ratou ia tiahi i te varua ino i rapae i te tamaiti. Ua parau Iesu ia ratou e, i te tahi taime, titauhia ia ratou ia haapae i te maa e ia pure ia ora te hoê taata.