mga batan-ong babaye diha sa klase

Paggamit sa Dali, Sunod Kanako—Alang sa mga Korum sa Aaronic nga Pagkapari ug mga Klase sa Young Women

Unsa Ang mga Katuyoan sa Atong mga Miting sa Klase ug Korum?

Ang Ginoo mihatag kaninyo og sagradong pagsalig: Siya mitawag kaninyo nga moserbisyo diha sa klase sa kapangulohan sa Young Women o kapangulohan sa korum sa Aaronic nga Pagkapari. Ang usa ka bahin sa inyong responsibilidad mao ang paggiya ug pagpahigayon sa Dominggo nga mga miting sa inyong klase o korum. Sa paghimo niini, makatabang ang pagsabot nganong aduna kita niini nga mga miting.

Ang mga miting sa Young Women ug korum sa Aaronic nga Pagkapari lahi kay sa mga klase sa Simbahan sama sa Sunday School o seminary. Diha sa mga miting sa klase o korum, mas daghan kita og buhaton kay sa magtuon og usa ka hilisgotan sa ebanghelyo. Magkat-on kita mahitungod sa buluhaton nga gihatag sa Dios kanato, ug kita moorganisar sa mga sakop sa atong klase o korum sa paghimo niana nga buluhaton diha sa atong mga panimalay, sa Simbahan, ug sa atong mga komunidad. Niini nga mga miting, dili lamang kita maghisgot mahitungod sa buluhaton—mohimo kita og mga plano aron matuman ang atong mga tahas isip kabahin sa batalyon sa kabatan-onan sa Ginoo, lakip ang pagtabang og pundok sa Israel.

mga batan-ong lalaki diha sa klase

Diha sa mga miting sa klase ug korum, mohimo kita og mga plano sa pagtuman sa atong mga tahas isip kabahin sa batalyon sa kabatan-onan.

Apan kini nga empasis bahin sa buluhaton wala magpasabot nga sa Sunday School lamang nato himoon ang mga diskusyon sa doktrina. Gani, ang pagkat-on sa doktrina diha sa mga klase sa Young Women ug mga miting sa Aaronic nga Pagkapari mahinungdanon—makatabang kini sa paglig-on sa atong pakigrelasyon ngadto ni Jesukristo, pagsabot sa plano sa Langitnong Amahan, ug pagsalmot sa Ilang buluhaton. Samtang mag-uban kitang magtuon sa ebanghelyo, ang mga kamatuoran nga atong makat-onan makausab sa atong mga kasingkasing ug makatabang kanato sa pagkahibalo unsaon sa paglihok sa mas Kristohanong mga paagi. Makadawat kita og mga pag-aghat mahitungod sa mga paagi sa pagpalambo “sa lawas ug sa kinaadman, ug [kahimut-an] sa Dios ug sa mga tawo” (Lucas 2:52). Samtang nagkadugang ang atong pagkakabig ngadto ni Jesukristo ug sa Iyang ebanghelyo, makakaplag kita og kalipay ug mobati sa mga tinguha sa pagtabang sa uban subay sa dalan sa pakigsaad.

Kinsa ang Mangulo Niini nga mga Miting?

Ang Dios mitawag kaninyo isip mga kapangulohan sa klase ug korum ug mihatag kaninyo og awtoridad nga mangulo. Mao nga ang matag miting sa inyong klase o korum kinahanglan nga ipahigayon sa usa ka sakop sa inyong kapangulohan sa klase o korum. Ang hamtong nga mga lider kinahanglang motanyag og giya ug suporta, apan dili sila mopuli kaninyo. Tan-awa ang seksiyon nga giulohan og “Pagtinambagay” dapit sa may sinugdanan sa matag outline niini nga kapanguhaan alang sa mga ideya aron matabangan kamo nga mahibalo unsaon sa pagpangulo sa usa ka miting ug pagtuman sa tinuod nga mga katuyoan niini. Gamita ang mga miting sa kapangulohan aron sa pagplano unsaon ninyo sa pagpahigayon niini nga mga miting sa Dominggo.

Kinsa ang Angay Motudlo sa Leksiyon?

Ang mga hamtong nga lider, usa ka sakop sa kapangulohan sa klase o korum, o si bisan kinsa nga laing sakop sa klase o korum mahimong motudlo sa mga leksiyon. Isip kapangulohan sa klase o korum, pakigkonsulta sa inyong hamtong nga mga lider mahitungod kon si kinsa ang angay sangonan nga motudlo sa mga leksiyon. Hinumdomi nga ang inyong hamtong nga mga lider adunay daghang ikatanyag. Tinguhaa ang pagkat-on gikan sa ilang kasinatian ug mga pagpamatuod. May mga bintaha usab ang paghangyo sa kabatan-onan nga maoy motudlo—ang pagtudlo makatabang sa pagpalawom sa ilang pagkakabig ug makatabang nga makapalambo sila og mas lig-ong mga pakigrelasyon ngadto sa mga sakop sa klase o korum. Mao nga hatagi sila og tukmang mga oportunidad sa pagtudlo sa tanan o sa usa ka bahin sa leksiyon, nga maghinumdom sa mga panginahanglan ug mga abilidad sa mga tawo sa inyong klase o korum. Sama pananglit, ang hamtong nga mga lider mahimong motudlo nga mas kanunay diha sa mga klase o mga korum nga adunay mas bata nga mga batan-on o mga batan-on kinsa minos pa ang mga kasinatian sa pagtudlo sa ebanghelyo. Kon ang mga batan-on dapiton sa pagtudlo, usa ka ginikanan o hamtong nga adviser kinahanglang motabang nila sa pagpangandam kon gikinahanglan.

Kadtong mga gisangonan sa pagtudlo makagamit sa seksiyon nga giulohan og “Itudlo ang Doktrina” diha sa matag outline niini nga kapanguhaan aron matabangan sila sa pagpangandam. Kini nga seksiyon naglangkob sa mga sugyot alang sa pagtudlo ug paghisgot sa doktrina alang niana nga semana, apan ang mga magtutudlo kinahanglang dili mobati nga kutob ra sila niining mga gisugyot. Sigon sa itudlo sa Espiritu, ang mga magtutudlo makapahiangay niining mga ideya o makagamit og ilang kaugalingon sa pagtudlo sa paagi nga pinakamaayo alang sa pagkab-ot sa panginahanglan sa mga sakop sa klase o korum ug pagtabang kanila sa pagsabot ug paggamit sa doktrina.

Unsa nga mga Hilisgotan sa Doktrina ang Atong Hisgotan diha sa Atong mga Miting?

Ang hilisgotan sa matag semana nga outline usa ka baroganan sa doktrina nga gipili nga motukma sa girekomendar nga basahonon niana nga semana sa Daang Tugon, nga makita sa Dali, Sunod Kanako—Alang sa mga Indibidwal ug mga Pamilya. Niini nga paagi, ang mga diskusyon sa doktrina diha sa mga miting sa klase o korum magsuporta unsay nakat-onan sa mga batan-on diha sa panimalay.

Bisan og ang mga outline itudlo atol sa piho nga mga Dominggo, may mga opsiyon gihapon kamo sa paghisgot og ubang mga hilisgotan sa doktrina base sa mga panginahanglan sa inyong klase o korum.

Kini nga kapanguhaan maglakip sa mga outline alang sa matag semana kon ipahigayon ang mga miting sa mga klase sa Young Women ug korum sa Aaronic nga Pagkapari. Sa panagsang higayon, tingali nagkinahanglan nga laktawan ninyo ang usa ka leksiyon tungod sa mga komperensiya sa stake o ubang mga rason.

Unsa ang Tahas sa Atong Hamtong nga mga Lider?

Ang inyong hamtong nga mga lider nagdala og importanting tahas sa mga klase sa Young Women ug mga korum sa Aaronic nga Pagkapari. Mogiya ug motambag sila kaninyo sa inyong mga calling sa pagkapangulo. Mosuporta sila ug moawhag kaninyo samtang magbuhat kamo sa buluhaton diha sa inyong klase o korum. Motudlo sila kaninyo sa doktrina, ug mopanalangin sila kaninyo pinaagi sa ilang ehemplo, kasinatian, ug pagpamatuod.