Enero 9

Unsa ang Gusto sa Dios nga Akong Buhaton sa Pag-atiman sa Iyang mga Nilalang, lakip sa Akong Lawas?

Genesis 1–2; Moises 2–3; Abraham 4–5

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa may atong gihisgotan sa miagi, ug unsa nga mga pagdapit o mga buluhaton ang gihimo? Unsa may atong gihimo aron malihok kadto nga mga pagdapit o mga buluhaton?

• Moatiman sa mga nanginahanglan. Unsa may atong isulti o buhaton aron makatabang niadtong mga mibati nga nag-inusara o nahilayo sa Langitnong Amahan?

• Modapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Mohiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Magdungan sa Pagkat-on

Aron matabangan ang kabatan-onan sa paghunahuna unsay ilang mahimo sa mas maayong pag-atiman sa mga nilalang sa Dios, isulat ang mosunod nga mga ulohan diha sa pisara: Ang Tiglalang, Ang Paglalang ug Ang Atong mga Responsibilidad. Hangyoa sila sa pagrebyo sa Genesis 1–2 ug sa pagsulat unsay ilang nakat-onan mahitungod sa Tiglalang ug sa Paglalang. Unsa may atong nakat-onan mahitungod sa atong mga responsibilidad? (tan-awa sa ilabi na ang Genesis 1:26–28; 2:15). Ang mosunod nga mga ideya makatabang sa kabatan-onan sa paghisgot mahitungod sa atong responsibilidad sa pag-atiman sa mga nilalang sa Dios.

• Sa unsang paagi ikaw makatabang sa imong mga gitudloan nga makasabot nga ang ilang lawas sagrado nga mga nilalang sa Dios? Sama pananglit, mahimo nimo silang pangutan-on kon unsay atong makat-onan mahitungod sa atong lawas gikan sa 1 Mga Taga-Corinto 6:19–20; Moises 2:26–27; Abraham 4:26–27. Unsay buot ipasabot sa mga pulong nga “hitsura” ug “panagway”? Magtinabangay sa paghimo og lista sa pipila ka mga butang nga atong mahimo sa pag-atiman sa atong lawas. (Tan-awa sa “Pisikal ug Emosyonal nga Kahimsog,” diha sa Alang sa Kalig-on sa mga Kabatan-onan [booklet, 2011], 25–27.)

• Ang batan-ong mga tawo sa kasagaran makasugat og mga mensahe nga mopabati kanila og kadili sigurado bahin sa ilang lawas. Hangyoa sila sa pagpangita og mga mensahe nga makatabang nga sila mobati og kamapasalamaton sa ilang lawas (tan-awa usab sa Russell M. Nelson, “Your Body: A Magnificent Gift to Cherish,” New Era, Ago. 2019, 2–7). Unsay mahimo natong ipaambit aron makatabang sa usa ka higala o sakop sa pamilya kinsa mibati og dili sigurado mahitungod sa iyang lawas?

• Dapita ang kabatan-onan nga mobasa sa hilom sa usa o mas daghan sa mosunod nga mga bersikulo, nga mangita og mga pagtulon-an mahitungod kon nganong ang Dios milalang sa yuta ug kon unsa ang gusto Niya nga paagi nga kita moatiman niini: Genesis 1:26–28; 2:15; 1 Nephi 17:36; Doktrina ug mga Pakigsaad 49:19–21; 59:15–20; 104:13–18; Moises 2:26–31; 3:15. Hangyoa sila sa pagpaambit sa ilang mga hunahuna mahitungod sa matag tudling sa kasulatan. Dayon dapita sila nga magtinabangay sa paghimo og lista sa mga butang nga pwede nilang buhaton nga magtinagsa-tagsa o isip usa ka grupo sa pagtuman sa ilang mga responsiblidad sa pag-atiman sa yuta (tan-awa ang mga ideya diha sa “Suporta nga mga Kapanguhaan”). Unsa nga mga kausaban ang atong gikinahanglan nga buhaton diha sa atong mga hunahuna ug mga buhat aron maatiman og maayo ang yuta?

• Ikonsiderar ang pagdapit sa mga sakop sa klase o korum sa pag-adto sa miting nga magdala og butang nga nagpakita sa katahom sa yuta nga gilalang sa Dios, sama sa usa ka drowing, litrato, o balak. Dapita sila sa pagpaambit sa unsay ilang gidala ug sa ilang mga pagbati alang sa mga nilalang sa Dios.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

Mga paagi nga kita makaatiman sa yuta:

• Mananom og mga liso, mga kahoy, o mag-garden.

• Mamunit og sagbot sa inyong komunidad.

• Mag-organisar og proyekto sa pagpanglimpyo o pagpang-recycle diha sa kasilinganan.

• Maglakaw-lakaw ug maghunahuna og mga butang diin ikaw mapasalamaton.

• Magmugna og art gikan sa mga butang nga iglalabay na, ug ipaambit kini diha sa usa ka pasundayag sa art.

• Motino og mga paagi nga ikaw makadaginot og enerhiya ug tubig.

Pagtudlo sumala sa Pamaagi sa Manluluwas

Hatagi ang mga sakop sa klase o korum og daghang oportunidad nga makatudlo sa usag usa diha sa klase, kay sa kasagaran mas makakat-on sila gikan sa usag usa ug gikan sa kasinatian sa pagtudlo.