Enero 23

Sa Unsang Paagi ang Ginoo Makatabang Kanako nga Makaserbisyo sa Mas Matinud-anong Paagi?

Genesis 5; Moises 6

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Moatiman sa mga nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdasig ang atong gibati nga angay buhaton aron sa pagtabang kanila?

• Modapit sa tanan sa pagdawat sa ebanghelyo. Sa unsa nga paagi kita mamahimong kahayag ngadto sa mga sakop sa pamilya o mga higala nga lahi kanato og mga gituohan?

• Mohiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Dihang nadawat ni Enoch ang iyang tawag nga moserbisyo sa Ginoo, gibati niya ang hingpit nga kakulang (tan-awa sa Moises 6:31). Apan ang Ginoo wala lamang mopadala kang Enoch aron mohimo sa Iyang buluhaton: Iyang gisaaran si Enoch nga Siya manalipod ug motabang kaniya (tan-awa sa Moises 6:32–34).

Tingali makabatyag kamo sa mga gibati ni Enoch nga kakulang diha sa inyong mga paningkamot sa pagserbisyo. Ang pipila sa atong serbisyo gihatag pinaagi sa mga calling sa Simbahan. Sa ubang mga higayon, dayag natong makita ang panginahanglan ug mobati nga giaghat sa Espiritu aron sa pagpakita sa atong gugma ug suporta. Bisan sa unsang paagi man moabot ang oportunidad, makakuha kita og kaisog, sama sa gibuhat ni Enoch, nahibalo nga ang Ginoo motabang kanato samtang dawaton nato ang Iyang pagdapit sa “[pag]lakaw uban kanako” (Moises 6:34).

Samtang mangandam ka sa pagtudlo mahitungod sa tabang nga atong madawat gikan sa Ginoo samtang magserbisyo kita sa uban, rebyoha ang Moises 6 ug hunahunaa ang imong mga kasinatian sa imong pagserbisyo sa uban. Giunsa sa Ginoo sa pagtabang kanimo sa imong mga paningkamot? Unsa ang imong gilaoman nga makat-onan sa mga sakop sa imong klase o korum gikan sa mga ehemplo ni Enoch ug sa uban? Mahimo usab nimong basahon ang usa niini nga mga mensahe ni Presidente Henry B. Eyring: “Lakaw uban Kanako” (Liahona, Mayo 2017, 82–85) o “Kababayen-an sa Pakigsaad nga Nakigtambayayong sa Dios” (Liahona, Nob. 2019, 70–73).

Makasunod kita sa ehemplo sa Manluluwas samtang kita magserbisyo isip kabahin sa atong inadlaw adlaw nga pagpakabuhi.

Magdungan sa Pagkat-on

Ang pagserbisyo sa uban naghatag og oportunidad kanato sa “[pag]lakaw uban [sa Dios],” ug makadawat kita sa Iyang tabang kon kita moserbisyo (Moises 6:34). Aron matabangan nga makasugod ang mga sakop sa klase o korum sa paghisgot niini, mahimo nimo silang hangyoon sa pagsiksik sa Moises 6:32–39 alang sa mga paagi nga ang Ginoo nag-uban kang Moises sa iyang pagserbisyo. Sa unsang paagi ang Ginoo motabang kanato kon kita moserbisyo Kaniya? Ang mosunod nga mga ideya makatabang kanimo sa pagpapangulo og usa ka diskusyon mahitungod sa balaan nga tabang nga atong madawat samtang kita moserbisyo sa uban.

• Ang mga kasulatan puno sa mga pagtulon-an mahitungod sa serbisyo, (tan-awa, pananglitan ang, Mateo 25:31–40; Lucas 10:25–37; Mosiah 2:17). Ikonsiderar ang pagdapit sa imong mga gitudloan sa pagpaambit og mga tudling sa kasulatan nga makadasig kanila sa pagserbisyo sa uban. Mahimo nimo silang hangyoon daan nga motambong sa klase nga andam mopaambit og mga tudling sa kasulatan mahitungod sa serbisyo o mga ehemplo sa pagserbisyo. Kon nagkinahanglan sila og tabang, awhaga sila sa pagpangita diha ubos sa “Pag-alagad” sa Ang Giya ngadto sa mga Kasulatan (scriptures.ChurchofJesusChrist.org). Unsa nga pagdasig ang atong gibati nga buhaton tungod sa unsay atong nabasa?

• Ang Manluluwas miserbisyo sa uban sa tibuok Niya nga pagpangalagad. Unsa may atong nakat-onan gikan sa Iyang ehemplo nga makatabang kanato samtang kita magserbisyo? Aron matubag kini nga pangutana, ang matag sakop sa klase o korum pwedeng mobasa og usa sa mosunod nga mga kasulatan, nga mangita og butang nga gitudlo niini mahitungod sa ehemplo sa Manluluwas mahitungod sa serbisyo: Mateo 14:13–21; Juan 9:1–11, 35–38; 13:4–5, 12–17; 3 Nephi 17:5–9. Dapita ang tanan sa pagpaambit og butang nga ilang nakaplagan. Hatagi og panahon ang matag usa sa paghunahuna og usa ka tawo nga ilang maserbisyohan ug kon unsaon nila sa pagsunod ang ehemplo sa Manluluwas diha sa ilang pagserbisyo.

• Usahay maghunahuna kita nga ang serbisyo nagpasabot sa paghimo og dako nga butang ug mogahin og dakong panahon. Usa tingali kana ka rason nganong ang uban kanato dili moserbisyo kutob sa atong mahimo. Mahimo nimong ipasabot og maayo nga ang Manluluwas sa kasagaran miserbisyo og mga tawo nga Iyang nakita sa tibuok nga panaw sa Iyang inadlaw adlaw nga kinabuhi (tan-awa, pananglitan ang, Mateo 12:9–13; Marcos 5:21–34; Lucas 19:1–10; Juan 4:3–26). Hangyoa ang kabatan-onan sa pagpaambit sa ilang mga hunahuna. Unsang ginagmay nga mga buhat sa pagserbisyo ang nakita nato nga gipangbuhat sa uban? Unsa ang gidasig kanato nga buhaton? Dapita ang matag tawo sa pagsulat og mga paagi sa pagkompleto sa mosunod nga mga pamahayag: “Makaserbisyo ako sa uban pinaagi sa …” ug “ako magtinguha sa tabang sa Ginoo sa akong mga paningkamot nga makaserbisyo pinaagi sa …” Dayon hangyoa ang pipila sa pagpaambit unsay ilang gisulat.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Bonnie L. Oscarson, “Ang mga Panginahanglan nga Atong Giatubang” (Liahona, Nob. 2017, 25–27)

Pagtudlo sumala sa Pamaagi sa Manluluwas

“Agig dugang sa pagtabang sa mga nagkat-on nga mobati ug moila sa Espiritu, tabangi sila sa pagsunod sa mga pag-aghat nga ilang nadawat” (Pagtudlo sumala sa Pamaagi sa Manluluwas [2016], 10).