batan-ong babaye nga nagtuon

Pebrero 13

Sa Unsang Paagi Kita Magpabiling Matinuoron sa Manluluwas sa usa ka Daotan nga Kalibotan?

Genesis 12–17; Abraham 1–2

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas nahiduol sa Manluluwas? Sa unsang paagi kita naningkamot sa pagkahimong mas mahisama Kaniya?

• Moatiman sa mga nanginahanglan. Kinsa man ang anaa sa atong hunahuna bag-ohay lang? Sa unsang paagi kita makatabang niini nga mga indibidwal?

• Modapit sa tanan sa pagdawat sa ebanghelyo. Sa unsang paagi nato matubag ang mga pangutana sa atong mga higala mahitungod sa Simbahan sa paagi nga makalig-on sa ilang hugot nga pagtuo sa Manluluwas?

• Mohiusa sa mga pamilya alang sa kahangtoran. Unsa ang pipila ka paagi nga kita mas makakonektar sa mga sakop sa kaliwatan sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang pagpakabuhing matarong sa daotan nga kalibotan wala gayod sukad mahimong sayon. Alang kang Abraham, ang pagpamugos nga mopalayo sa Dios wala lamang maggikan sa gawas sa kalibotan—gani ang amahan ni Abraham mitalikod sa Ginoo (tan-awa sa Abraham 1:5–12; 2:5). Si Abraham ug Sara nag-atubang og mga kalisdanan, sa gihapon misalig sila sa mga saad sa Ginoo “ug gikahinangop nila ug miila sa dayag nga sila mga langyaw ug mga lumalabay dinhi sa kalibotan” (Mga Hebreohanon 11:13).

Sa unsang paagi imong matabangan ang mga sakop sa klase o korum sa pagpabiling matinud-anon kon mobati sila nga sama og “mga langyaw ug lumalabay” sa kalibotan tungod kay nagsunod sila sa mga sumbanan sa Ginoo? Sa unsang paagi sila imong madasig sa pagkamaisugon samtang magpakabuhi silang matinuoron sa Ginoo? Samtang mangandam ka sa pagtudlo, ikonsiderar ang pagrebyo sa Juan 15:18–20 ug sa mensahe ni Elder Neil L. Andersen nga “Pagbuntog sa Kalib[o]tan” (Liahona, Mayo 2017, 58–62).

batan-ong lalaki nga naglantaw sa linaw

Ang mga disipulo ni Jesukristo makakaplag og kalinaw kon magpakabuhi silang matinud-anon bisan sa oposisyon.

Magdungan sa Pagkat-on

Ang mga sakop sa imong klase o korum tingali nadasig sa ehemplo ni Abraham niining semanaha samtang gitun-an nila ang Genesis 12–17 ug Abraham 1–2. Mahimo nimo silang dapiton sa pagrebyo sa Abraham 1:1–19 ug pagpaambit sa unsay nakadasig kanila mahitungod sa ehemplo ni Abraham. Unsa nga mga similaridad ang atong makita tali sa mga hagit nga giatubang ni Abraham ug sa mga hagit nga atong giatubang karon? Pagpili og usa o mas daghan sa mga kalihokan diha sa ubos aron sa pag-awhag og diskusyon mahitungod kon unsaon nga kita magpabiling matinud-anon kang Jesukristo diha sa tanang kahimtang.

• Ang Ginoo ug ang Iyang mga propeta sa kasagaran nag-awhag sa ilang mga gitudloan sa pagpakabuhing matinud-anon bisan sa kadaotan nga naglibot kanila. Unsa ang ubang mga paagi ni Satanas sa pagtintal sa batan-ong mga tawo aron masupak ang mga sugo sa Dios sa atong panahon? Ang imong mga gitudloan mahimong mobasa og pipila ka mga kasulatan nga nalista diha sa “Suporta nga mga Kapanguhaan.” Dapita sila sa paghisgot unsay ilang nakat-onan mahitungod sa pagpabiling matinuoron kang Kristo samtang ang kalibotan nagtintal kanato sa paghimo og sukwahi o mobugal-bugal kanato. Mahimo nilang ipaambit ang mga paagi nga ilang nakaplagan sa pagpakabuhing matinud-anon samtang ang uban wala. Kanus-a kita o ang uban nga atong nailhan nakahimo na niini? Mahimo usab nga ipasalida nimo ang usa o mas daghan nga video nga anaa sa “Suporta nga mga Kapanguhaan.”

• Aron matabangan nga makasabot ang imong klase o korum kon unsaon sa pagbuntog ang kalibotan ug makadawat sa mga panalangin nga moabot gumikan sa paghimo sa ingon, isulat sa pisara ang Ang pagbuntog sa kalibotan mao ang … ug Ang pagbuntog sa kalibotan mosangpot sa … Dayon pwede imong hangyoon ang kabatan-onan sa pagrebyo sa mensahe ni Elder Neil L. Andersen nga “Pagbuntog sa Kalib[o]tan.” Dapita sila sa pagpangita og mga paagi sa pagkompleto niini nga mga kapahayag [sentence], nga isulat unsay ilang nakat-onan diha sa pisara. Hisgoti kon unsa ang ilang mga nakat-onan. Pagdapit daan og usa ka tawo sa pagtambong nga andam mopaambit og usa ka istorya nga nagpakita kon sa unsang paagi si Jesukristo nagpabiling matinud-anon sa Iyang Amahan bisan sa oposisyon (tan-awa, alang sa pananglit ang, Mateo 4:1–11; Lucas 22:39–44). Unsa ang gikatabang ngari kanato sa ehemplo ni Jesukristo mahitungod sa pagbuntog sa kalibotan? (tan-awa sa Juan 16:33).

• Ang mga disipulo ni Jesukristo kinahanglan nga “maania sa kalibotan apan dili kalibotanon.” Ang “pagkaania sa kalibotan” posibling masabot nga kita mag-atubang og oposisyon kon nagsunod kita sa atong mga sumbanan. Apan nagpasabot usab kini nga kita makaimpluwensya sa uban alang sa kaayohan. Sa pagtudlo niini nga baroganan, pwede nimong hangyoon ang usa ka tawo nga motambong sa klase nga mangandam sa pagpaambit og usa o mas daghan nga istorya diha sa mensahe ni Presidente Bonnie H. Cordon nga “Aron Sila Makakita” (Liahona, Mayo 2020, 78–80). Unsa may atong nakat-onan gikan niini nga mga istorya mahitungod sa paggamit sa atong kahayag aron makatabang sa uban nga maduol ni Jesukristo? Dapita ang klase o korum sa pagpangita og mga kapahayag diha sa mensahe ni Presidente Cordon nga nagdasig kanila sa pagkahimong kahayag ngadto sa uban diha sa daotan nga kalibotan. Dapita sila sa pagbasa og kusog sa ilang mga kapahayag ug pagpaambit sa unsay ilang gibati nga nadasig sa pagbuhat.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 5:14–16; 1 Nephi 15:23–25; Helaman 5:12; Doktrina ug mga Pakigsaad 10:5; 27:15–18; 87:8 (Unsaon nga magpabiling matinud-anon diha kang Jesukristo diha sa daotan nga kalibotan)

Pagtudlo sumala sa Pamaagi sa Manluluwas

Ang Manluluwas midapit ni Pedro sa pagpamatuod pinaagi sa pagpangutana, “Unsa may inyong ikasulti? Kinsa man ako?” (Mateo 16:15). Dihang mitubag si Pedro, ang iyang pagpamatuod nalig-on. Unsa nga mga pangutana ang makadapit sa imong mga gitudloan sa pagpamatuod aron ang Espiritu makalig-on sa ilang mga pagpamatuod?