Pebrero 27

Nganong Importante ang Mahangturon nga Kaminyoon?

Genesis 24–27

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga mga hilisgotan ang nahisgotan sa bishopric sa atong mga miting sa konseho sa kabatan-onan sa ward? Unsay atong mahimo isip usa ka klase o korum base niana nga mga diskusyon?

• Moatiman sa mga nanginahanglan. Sa unsang paagi kita makatabang sa mga tawo sa Kristohanong mga paagi kon makakita kita og panginahanglan ug wala mahibalo unsay isulti?

• Modapit sa tanan sa pagdawat sa ebanghelyo. Unsa may atong nakaplagan diha sa ebanghelyo ni Jesukristo nga nagdala kanato og kalipay? Sa unsang paagi nato mapaambit kana nga kalipay ngadto sa uban?

• Mohiusa sa mga pamilya alang sa kahangtoran. Unsay atong gihimo aron makakita og mga ngalan sa atong mga katigulangan kinsa nagkinahanglan og mga ordinansa sa templo? Unsay atong mahimo sa pagtabang sa uban aron makakita og mga ngalan sa ilang mga katigulangan?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Dihang miabot ang panahon alang ni Isaac sa pagminyo, si Abraham mihangyo sa iyang sulugoon sa pagpangita og maasawa ni Isaac. Si Abraham ug Isaac gusto nga makakita og maasawa ni Isaac kinsa makahimo ug makatuman og mga pakigsaad uban sa Ginoo ug makatudlo niini ngadto sa iyang mga anak. Si Rebekah usa ka matinud-anong babaye kinsa misulod ngadto sa pakigsaad sa kaminyoon kang Isaac. Samtang ang mga kasulatan mihatag og katin-awan nga ang kaminyoon importante kaayo sa Dios, ang mga pagtulon-an sa Dios mahitungod sa kaminyoon gihagit sa atong panahon. Apan ang Iyang mga propeta mipahayag nga ang kaminyoon “gi-orden sa Dios” (“Ang Pamilya: Usa ka Pamahayag sa Kalib[o]tan,” ChurchofJesusChrist.org). Importante alang sa imong mga gitudloan nga makasabot sa mahangturong mga kamatuoran mahitungod sa kaminyoon. Ang paghimo sa ingon makatabang kanila sa pag-andam ug pagpamatuod mahitungod niining importante nga bahin sa plano sa atong Langitnong Amahan.

Unsa ang gibati sa kabatan-onan nga imong gitudloan mahitungod sa mahangturon nga kaminyoon? Sa unsang paagi sila imong matabangan sa paghunahuna nganong ang mahangturon nga kaminyoon maoy sentro sa plano sa Langitnong Amahan? Samtang mangandam ka sa pagtudlo, mahimo nimong rebyohon ang mensahe ni Elder D.Todd Christofferson nga “Nganong Kaminyoon, Nganong Pamilya” (Liahona, Mayo 2015, 50–53). Mahimo usab nimong rebyohon ang “Ang Pamilya: Usa ka Pamahayag ngadto sa Kalib[o]tan” (ChurchofJesusChrist.org).

Ang mahangturon nga mga kaminyooan ug mga pamilya mao ang sentro sa plano sa Langitnong Amahan.

Magdungan sa Pagkat-on

Ang kabatan-onan nga imong gitudloan tingali makapamalandong sa kaimportante sa kaminyoon samtang magbasa sila sa Genesis 24–27 karong semanaha. Dapita sila sa pagrebyo sa Genesis 24. Hangyoa sila sa pagpaambit og mga bersikulo nga nagpakita nga ang kaminyoon importante sa katawhan nga gihulagway dinhi niini nga kapitulo. Dapita sila sa paghunahuna nganong ang kaminyoon mao ang sentro sa plano sa Dios. Ang mga kalihokan sa ubos makatabang nila nga mas makasabot sa kaimportante sa kaminyoon.

• Ang mga sakop sa imong klase o korum tingali adunay mga oportunidad sa pagpasabot nganong ang kaminyoon importante kanila. Dapita sila sa paghunahuna nga sila dunay higala nga nagtuo nga ang kaminyoon kinaraan ug wala na kinahanglana. Mahimo silang mohimo og mubo nga sulat ngadto niini nga higala nga mopasabot sa kaimportante sa kaminyoon diha sa plano sa Langitnong Amahan. Awhaga sila sa paglakip sa mga kamatuoran nga ilang nakit-an diha sa “Ang Pamilya: Usa ka Pamahayag ngadto sa Kalib[o]tan.” Mahimo usab silang mogamit sa mga kasulatan nga anaa sa “Suporta nga mga Kapanguhaan” o sa “Kaminyoon, Pagminyo” diha sa Ang Giya ngadto sa mga Kasulatan (scriptures.ChurchofJesusChrist.org). Dapita sila sa pagpaambit diha sa klase unsay ilang gisulat.

• Sa pagsugod og usa ka diskusyon mahitungod sa kaimportante sa kaminyoon, isulat sa pisara ang Nganong importante ang mahangturon nga kaminyoon? Hatagi ang kabatan-onan og pipila ka minutos sa pagsulat sa mga tubag sa pangutana. Dayon dapita sila sa pagpaambit sa ilang mga tubag. Mahimo silang mangita og dugang nga mga tubag diha sa mensahe ni Elder D. Todd Christofferson nga “Nganong Kaminyoon, Nganong Pamilya” (Liahona, Mayo 2015, 50–53). Dapita sila sa pagpaambit sa ilang mga pagpamatuod mahitungod sa kon nganong ang kaminyoon importante.

• Kon modawat kita sa mga pagtulon-an sa Dios mahitungod sa kaminyoon ug maningkamot sa pagpakabuhi subay niini, makadawat kita og daghang panalangin. Ang pipila ka mga tawo—lakip kadtong naghimo sa ilang pinakamaayo sa pagpuyo diha sa ebanghelyo—mag-atubang og mga hagit sa pagtukod og malipayon, mahangturon nga mga kaminyoon. Mahimo nimong hangyoon ang kabatan-onan sa paghisgot mahitungod sa pipila niana nga mga hagit. Unsay atong mahimo karon aron maandam niana nga mga hagit? Mahimo usab nimo silang dapiton sa pagbasa sa kataposang duha ka seksiyon sa mensahe ni Elder Neil L. Andersen nga “Ang Mata sa Hugot nga Pagtuo” (Liahona, Mayo 2019, 34–38). Ang mga sakop sa imong klase o korum pwedeng mohisgot og mga ehemplo nga ilang nakita sa ilang kinabuhi sa ilang mga kasaysayan sa pamilya bahin sa mga tawo nga matinud-anong misagubang sa ilang mga hagit sama sa gihisgotan ni Elder Andersen. Sa unsang paagi ang Manluluwas motabang sa tanan nga nag-atubang og mga hagit samtang nagtinguha sila sa mga panalangin sa usa ka mahangturon nga kaminyoon?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Doktrina ug mga Pakigsaad 49:16–17 (Ang kaminyoon makatabang sa pagtuman sa katuyoan sa Paglalang)

• Doktrina ug mga Pakigsaad 131:1–4; 132:15–21 (Ang Mahangturon nga Kaminyoon gikinahanglan alang sa kahimayaan)

Pagtudlo sumala sa Pamaagi sa Manluluwas

Ang Manluluwas midapit sa Iyang mga sumusunod nga molihok inubanan sa hugot nga pagtuo ug pagpakabuhi subay sa mga kamatuoran nga Iyang gitudlo. Sa unsang paagi ikaw makadapit sa imong mga gitudloan sa pagsunod sa mga kamatuoran nga ilang gikat-onan?