Marso 13

Sa Unsang Paagi Ako Makaatubang sa Kalisdanan uban sa Hugot nga Pagtuo?

Genesis 37–41

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Giunsa nato pagsinati ang kamot sa Ginoo diha sa atong kinabuhi?

• Moatiman sa mga nanginahanglan. Unsaon nato sa pagsuporta ang matag usa sa mga butang nga atong giatubang?

• Modapit sa tanan sa pagdawat sa ebanghelyo. Sa unsa nga paagi atong magamit sa mas maayong paagi ang teknolohiya isip himan sa pagpaambit sa ebanghelyo?

• Mohiusa sa mga pamilya alang sa kahangtoran. Unsa may atong gibuhat sa pagtabang sa atong mga pamilya aron makaduol kang Kristo?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Sa batan-on pa, si Jose sa Ehipto nagsagobang og daghang matang sa kalisdanan. Nag-atubang siya og panagbingkil sa iyang pamilya ug dili maayong pagtagad sa iyang mga igsoon. Nag-atubang siya og mga pagtintal aron masupak ang balaod sa kaputli. Apan imbis tahuron tungod sa iyang integridad, gibalhog siya sa bilanggoan. Ang mga sakop sa imong klase o korum posibling mag-atubang og susama nga mga pagsulay ug daghan pa. Samtang magtuon ka sa mga kasinatian ni Jose Genesis 37–41, hunahuna ang imong mga gitudloan. Pamalandongi unsa ang bililhong mga leksiyon sa kinabuhi ni Jose nga tingali anaa alang kanila (tan-awa usab sa Ether 12:27; Henry B. Eyring, “Sulayi, Sulayi, Sulayi,” Liahona, Nob. 2018, 90–93). Ang asoy ni Jose modasig sa mga sakop sa klase o korum sa pagpangutana, “Sa unsang paagi ako makaatubang sa akong mga kalisdanan uban sa hugot nga pagtuo, ug sa unsang paagi ang Dios motabang kanako?”

Pinaagi sa pagpunting sa atong hugot nga pagtuo kang Jesukristo, makakaplag kita og kalig-on pinaagi sa atong mga kalisdanan.

Magdungan sa Pagkat-on

Ikonsiderar ang paghangyo sa mga sakop sa klase o korum sa paglista diha sa pisara sa pipila ka hitabo gikan sa kinabuhi ni Jose sa Ehipto, sigon sa gihulagway sa Genesis 37 ug 39–41. Ang pagpakita og mga litrato, sama sa anaa sa Dali, Sunod Kanako—Alang sa mga Indibidwal ug mga Pamilya, makatabang kanila sa paghinumdom niini nga mga hitabo. Sa unsang paagi ang mga pagsulay ni Jose susama sa mga hagit nga giatubang sa batan-ong mga tawo karon? Kon si Jose buhi pa karon, unsa kaha nga tambag ang iyang ihatag kanato mahitungod sa pag-atubang sa kalisdanan? Unsa kahay iyang isulti mahitungod kon sa unsang paagi ang iyang relasyon uban sa Ginoo nakatabang Kaniya? Gamita ang mga kalihokan sama sa mosunod aron makatabang sa kabatan-onan sa paghunahuna mahitungod kon sa unsang paagi nila maatubang ang ilang mga hagit uban sa pagtuo diha ni Jesukristo.

• Ang pagtuon kon sa unsang paagi giatubang sa Manluluwas ang kalisdanan makatabang nato sa pag-atubang sa atong mga kalisdanan uban sa hugot nga pagtuo. Ang kabatan-onan tingali makasugyot og pipila ka ehemplo sa kalisdanan nga giatubang sa Manluluwas ug idungan kini sa pagrebyo (tan-awa sa “Suporta nga mga Kapanguhaan” alang sa pipila ka mga ideya). Unsa ang nakahatag kanato og pagdayeg sa gihimong pagsanong sa Manluluwas sa Iyang mga panahon sa kalisdanan? Sa unsang paagi kita makasunod sa Iyang ehemplo samtang mag-atubang kita sa atong kaugalingon nga kalisdanan?

• Usahay mas sayon ang pag-atubang sa kalisdanan kon maningkamot kita sa pagtan-aw niini gikan sa panglantaw sa Ginoo. Aron sa pagtabang sa imong mga gitudloan sa pagsabot niini, hangyoa sila sa pagpangita og mga ehemplo sa kalainan nga mahimo niana nga panglantaw pinaagi sa pagrebyo sa mensahe ni Elder Rafael E. Pino nga “Ang Mahangturong Panglantaw sa Ebanghelyo” (Liahona, Mayo 2015, 117–19). Dapita sila sa pagpaambit kon unsa ang ilang nakit-an. Unsa ang gitudlo niini nga mga ehemplo mahitungod kon unsaon kaha nato sa pagtan-aw ug pag-atubang ang atong mga kalisdanan? Kon ang Manluluwas mosulti ngari kanato mahitungod sa atong mga hagit, unsa kaha ang Iyang isulti? Sa pagtabang nga matubag kini nga pangutana, mahimo nga rebyohon sa kabatan-onan ang mga kasulatan diha sa “Suporta nga mga Kapanguhaan.”

• Ikonsiderar ang paghangyo sa kabatan-onan sa pagpaambit og usa ka tawo isip ehemplo (tingali usa ka kagikan) kinsa midasig kanila kon giunsa niya sa pag-atubang ang usa ka lisod nga pagsulay. O mahimo kang mopaambit og makadasig nga mga ehemplo bahin sa mga tawo nga imong nailhan. Ang mga mensahe sa kinatibuk-ang komperensiya sa kasagaran maglakip sa mga istorya sa katawhan kinsa misanong sa kalisdanan pinaagi sa hugot nga pagtuo (tan-awa ang pipila ka ehemplo diha sa “Suporta nga mga Kapanguhaan”). Hunahunaa kon unsa kaha ang imong ikapaambit gikan sa ingon niana nga mga mensahe nga tingali makahuluganon alang sa imong mga gitudloan. Samtang hisgotan ninyo kini nga mga ehemplo, isugyot nga ang mga sakop sa korum o klase makatutok kon sa unsang paagi ang hugot nga pagtuo diha kang Jesukristo nakatabang sa katawhan panahon niini nga mga kalisdanan. Mahimo usab nga ipaambit nimo ang lista ni Bishop W. Christopher Waddell sa mga kapanguhaan nga gihatag sa Ginoo aron makatabang kanato panahon sa atong mga hagit, nga anaa makita duol sa kataposan sa iyang mensahe nga “Dangop sa Ginoo” (Liahona, Nob. 2017, 94–96).

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 4:1–11 (Ang Manluluwas adunay hugot nga pagtuo atol sa kalisdanan)

• Mateo 14:10–21; Lucas 23:33–34; Juan 19:25–27 (Ang Manluluwas mialagad sa uban atol sa Iyang kalisdanan)

• Mateo 27:45–46; Lucas 23:44–46 (Ang Manluluwas mibati nga nag-inusara atol sa kalisdanan apan misalig sa Dios)

• Mateo 5:38–45; Mosiah 24:8–15; Doktina ug mga Pakigsaad 121:1–8; 122:5–9 (Ang mga pagtulon-an sa Manluluwas mahitungod sa pag-atubang sa kalisdanan)

• Neil L. Andersen, “Nasamdan,” Liahona, Nob. 2018, 83–86

• L. Todd Budge, “Makanunayon ug Lig-on nga Pagsalig,” Liahona, Nob. 2019, 47–49

• Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 85–87

Pagtudlo sumala sa Pamaagi sa Manluluwas

“Sa imong pagpangandam, himoa ang imong pagsabot sa mga tawo nga imong gitudloan nga maoy mogiya sa imong mga plano” (Pagtudlo sumala sa Pamaagi sa Manluluwas, 7). Sama pananglit, magplano sa mainampoong paagi og mga kalihokan gamit ang mga kasulatan ug ubang mga kapanguhaan nga makatabang sa mga hagit nga atubangon sa mga sakop sa klase o korum.