batan-ong lalaki nga naggitara

Marso 27

Kinsa Ako, ug Kinsa ang Gusto sa Dios nga Ako Mahimo sa Umaabot?

Exodo 1–6

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita nagkaplag og kalipay pinaagi sa pagsunod ni Jesukristo?

• Moatiman sa mga nanginahanglan. Kinsa sa atong ward o komunidad ang nagkinahanglan sa atong tabang? Sa unsang paagi kita makatabang?

• Modapit sa tanan sa pagdawat sa ebanghelyo. Sa unsang paagi kita makatabang sa usag usa nga maandam alang sa misyonaryo nga pagserbisyo?

• Mohiusa sa mga pamilya alang sa kahangtoran. Sa unsang paagi kita makasalmot sa mga paningkamot sa ward aron makahimo sa family history ug buhat sa templo?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang usa ka nagdilaab nga sampinit nga wala maugdaw tingali usa ka makapadani nga talan-awon, ug nakakuha kini sa pagtagad ni Moises. Apan ang mas nakadani mao ang unsay sunod nga nahitabo. Ang Dios namulong kang Moises, ug si Moises nakakat-on sa pagtan-aw sa iyang kaugalingon sama sa pagtan-aw sa Dios kaniya. Uban niana nga panglantaw si Moises nakahimo og butang uban sa tabang sa Ginoo nga iyang gikonsiderar nga imposible; iyang giatubang ang Paraon ug giluwas ang katawhan sa Dios.

Kitang tanan nagkinahanglan og mga kasinatian nga makatabang nga atong mapulihan ang atong mga kaugalingong pagduhaduha ngadto sa panabot sa Dios kon si kinsa kita ug kang kinsa kita mahisama. Ang kabatan-onan, sa tinuod, nag-atubang og sayop nga mga mensahe mahitungod sa ilang personal nga bili. Ug sama kang Moises, ang Dios “adunay buluhaton alang [kanila] nga pagabuhaton” (Tema sa Korum sa Aaronic nga Pagkapari). Sila adunay kaugalingong mga Paraon nga atubangon ug ilang kaugalingong katawhan nga luwason. Sa unsang paagi ikaw makatabang kanila sa paghinumdom nga sila hinigugmang mga anak nga babaye ug mga anak nga lalaki sa langitnong mga ginikanan “nga adunay kinaiya sa pagkadios ug walay kataposan nga kapalaran”? (Tema sa Young Women). Pamalandonga kini samtang imong basahon ang Exodo 1–6. Ikonsiderar usab ang pagbasa sa Doktrina ug mga Pakigsaad 18:10–15 ug sa mensahe ni Presidente Dieter F. Uchtdorf nga “Kamo Importante ngadto Kaniya” (Liahona, Nob. 2011, 19–22).

grupo sa batan-ong mga babaye nga anaa sa gawas

Ang atong kinabuhi mausab kon kita makasabot sa atong tinuod nga pagkatawo isip anak sa Dios.

Magdungan sa Pagkat-on

Ang mga sakop sa imong klase o korum tingali nakabasa na sa Exodo 1–6 karong semanaha. Aron madasig sila nga mopaambit sa unsay ilang nakat-onan, mahimo nimo silang pangutan-on kon unsay gibati ni Moises mahitungod sa iyang tawag sa pagluwas sa mga anak ni Israel (tan-awa sa Exodo 3:11). Unsa nga mga kamatuoran ang gitudlo sa Ginoo kang Moises aron matabangan siya nga mausab ang iyang panglantaw? (tan-awa sa Exodo 3:4–15; 4:10–17; tan-awa usab sa Moises 1:3–11). Sa unsang paagi kaha kini nga mga kamatuoran nakatabang ni Moises? Sa unsang paagi kini makatabang kanato? Paggamit og usa ka kalihokan nga sama sa mosunod aron matabangan ang mga sakop sa korum sa pagdiskobre kon unsay gipadayag sa Dios mahitungod sa ilang tinuod nga pagkatawo, bili, ug potensyal.

• Si Presidente Dieter F. Uchtdorf miingon, “Ang Ginoo naggamit og timbangan nga lahi kaayo sa kalib[o]tan aron pagtimbang sa bili sa usa ka kalag.” (“Kamo Importante ngadto Kaniya,” 22). Sa paghisgot niini nga ideya, mahimo nimong isulat diha sa pisara ang Sa unsang paagi ang kalibotan mopakita diha sa usa ka tawo nga siya gipakabili? Dapita ang imong mga gitudloan sa pagsugyot og mga tubag. Kon hukman nato ang atong bili sa ingon niini nga paagi, sa unsang paagi kaha kini nga mga pagbati makaapekto sa atong mga pagpili? Dayon mahimo nimong isulat sa pisara ang Sa unsang paagi ang Dios makapakita sa usa ka tawo nga siya bililhon? Samtang ang mga batan-on mopaambit og mga tubag, awhaga sila sa pagbasa sa Juan 3:16; Doktrina ug mga Pakigsaad 18:10–15; Lucas 15:3–6, 11–32. Mahimo usab nilang basahon ang kataposang seksiyon sa mensahe ni Presidente Uchtdorf. Kon hukman nato ang atong bili sa ingon niini nga paagi, sa unsang paagi kaha kini nga mga pagbati makaapekto sa atong mga pagpili?

• Ang mga pagngalan makaapekto sa unsay atong gibati ug sa atong pagtagad sa atong kaugalingon ug sa uban. Aron matabangan ang mga sakop sa klase o korum ikonsiderar kon unsay ilang ingalan sa ilang mga kaugalingon, mahimo nga hatagan nimo ang matag usa kanila og daghang mga name tag nga blanko. Ang kada tag pwedeng adunay nakasulat nga “Hello, ako si …” sa ibabaw. Dapita sila sa paghunahuna og daghang lahi-lahi nga mga pulong o hugpong sa mga pulong nga ilang ikasulat diha sa ilang mga name tag. Kon ang Langitnong Amahan ang mosulat diha sa mga name tag, unsa kahay Iyang isulat? Unsa kahay Iyang isulat kon ang mga tag mag-ingon og “Hello, ako mamahimo nga …”? Ang mga sakop sa klase o korum mahimong mopamalandong niini nga mga pangutana samtang nagbasa og pipila sa mosunod nga mga kasulatan: 1 Juan 3:1–3; Moroni 10:32–33; Doktrina ug mga Pakigsaad 76:69–70; 84:37–38.

• Ang mga mensahe sa kinatibuk-ang komperensiya diha sa “Suporta nga mga Kapanguhaan” naglangkob og mga ehemplo sa katawhan kansang mga kinabuhi nausab tungod kay nakakat-on sila sa ilang tinuod nga pagkatawo isip mga anak sa Dios. Ikonsiderar ang paghatag sa matag sakop sa klase o korum og usa niini nga mga ehemplo nga mapamalandongan ug mapaambit diha sa grupo. Mahimo usab nga hisgotan nimo ang mahitungod kon sa unsang paagi ang pagkahibalo nga kitang tanan mga anak sa Dios nakaapekto sa imong kinabuhi. Dapita ang mga sakop sa klase o korum sa paghimo sa samang butang.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Joy D. Jones, “Bili nga Dili Masukod,” Liahona, Nob. 2017, 13–15

• Brian K. Taylor, “Ako Anak Ba sa Dios?” Liahona, Mayo 2018, 12–14

Pagtudlo sumala sa Pamaagi sa Manluluwas

“Kon mobati ang kabatan-onan nga misalig ka kanila, ang ilang pagsalig diha sa ilang balaan nga potensyal motubo, ug sila mosurprisa kanimo sa unsay ilang makab-ot” (Pagtudlo sumala sa Pamaagi sa Manluluwas, 28).