Jesukristo

Abril 10

Sa Unsang Paagi Ako Makapalig-on sa Akong Hugot nga Pagtuo kang Jesukristo sa Matag Adlaw?

Exodo 14–17

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon, agi og dugang sa pagtinambagay mahitungod sa piho nga mga panginahanglan sa korum o sa klase, tingali gusto nimong hisgotan ang mga hunahuna ug mga tema gikan sa kinatibuk-ang komperensiya. Ang mosunod nga mga pangutana tingali makatabang.

• Unsa nga mga tema o mga mensahe ang mahinungdanon ngari kanato? Unsa ang nakapalig-on sa atong hugot nga pagtuo kang Jesukristo?

• Unsa ang nakapalig-on sa atong mga pagpamatuod bahin sa buhing mga propeta? Unsa nga pag-aghat ang atong gibati nga buhaton tungod sa unsay atong nakat-onan o gibati?

• Unsay kinahanglan natong buhaton isip usa ka klase o korum aron makahinumdom ug malihok ang tambag nga atong nadungog sa kinatibuk-ang komperensiya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Aron makalahutay didto sa kamingawan, ang mga anak ni Israel kinahanglan nga magkat-on unsaon sa pagsalig sa Ginoo. Sila misalig Kaniya alang sa makaluwas sa kinabuhi nga mga milagro, sama sa pagbahin sa Pulang Dagat, ug usab alang sa makasuporta sa kinabuhi nga mga milagro, sama sa mana gikan sa langit. Mao usab niadtong imong mga gitudloan. Kon gusto silang makalahutay sa ilang espirituhanon nga panaw sa kamingawan sa mortalidad, kinahanglan nga mag-ugmad sila og hugot nga pagtuo diha ni Jesukristo. Ug kinahanglan nga ugmaron nila kana nga hugot nga pagtuo matag adlaw, dili lang sa panagsang paagi. Ang uban sa imong mga gitudloan tingali dili mobati nga ang ilang hugot nga pagtuo tinuod nga lig-on. Imo silang matabangan aron sila makakita nga ang ilang hugot nga pagtuo anam-anam nga milambo, sa matag adlaw. Maalimahan kini pinaagi sa gagmay ug yano nga mga butang nga padayon natong gihimo. Palandonga kini nga mga butang samtang tun-an nimo ang Exodo 14–17 karong semanaha. Mahimo usab nimong tun-an ang mensahe ni Presidente Dallin H. Oaks “Gagmay ug Yano nga mga Butang” (Liahona, Mayo 2018, 89–92).

klase sa batan-ong mga babaye

Atong mapalig-on ang atong hugot nga pagtuo matag adlaw pinaagi sa gagmay ug yano nga mga paagi.

Magdungan sa Pagkat-on

Aron makasugod og usa ka diskusyon, mahimo nimong hangyoon ang kabatan-onan sa pagpaambit og pipila sa ilang inadlaw adlaw nga naandang buhaton nga nakatabang kanila sa paghimo og maayong mga butang. Kini nga mga butang posibling maglakip sa pagmentinar og maayong panglawas o pagpalig-on sa ilang mga pagpamatuod. Unsa kaha ang mahitabo kon dili nato mamentinar kini nga mga kinaiya? Sa unsang paagi ang atong inadlaw adlaw nga mga paningkamot sa paghimo og maayong mga butang ikakumpara sa mga instruksiyon nga gihatag sa Ginoo sa mga Israelite sa pagpundok og mana? (tan-awa sa Exodo 16:16–21). Mahimo nimong tabangan ang klase o korum nga makumpara ang kasinatian sa mga Israelite ngadto sa atong mga paningkamot sa pagpalig-on sa atong hugot nga pagtuo diha ni Jesukristo sa matag adlaw. Sama pananglit, unsa ang gihatag sa Ginoo kanato nga susama sa mana nga Iyang gihatag sa mga Israelite? Unsay atong mahimo nga susama sa pagpundok og mana? Aron makapadayon sa inyong diskusyon, paggamit og usa og mas daghan diha sa mga kalihokan sa ubos o usa nga imong kaugalingon.

• Magbasa og dungan sa Alma 37:6–7. Isip usa ka klase o korum, ilista diha sa pisara ang pipila ka “ginagmay ug yano nga mga butang” nga gidapit sa Ginoo kanato nga buhaton matag adlaw sa pagduol Kaniya. Kadtong imong mga gitudloan morebyo dayon sa mensahe ni Presidente Dallin H. Oaks nga “Gagmay ug Yano nga mga Butang” sa pagpangita og dugang nga gagmayng mga butang nga makahatag og dakong impluwensya sa atong kinabuhi. Unsa ang mamahimong epekto niining mga butanga? Unsa ang gidasig ngari kanato nga buhaton aron kini nga mga butang mamahimo nga mas mapadayunon nga bahin sa atong inadlaw nga pagpakabuhi?

• Ngano nga ang atong hugot nga pagtuo diha ni Jesukristo angay nga maalimahan matag adlaw? Dapita ang imong mga gitudloan sa pagpaambit og mga butang nga ilang nakat-onan nga nagdasig kanila nga mapalambo ang ilang hugot nga pagtuo kang Jesukristo matag adlaw.

• Ang padayon nga inadlaw adlawng paningkamot maoy pinakamaayong paagi sa pagpalig-on sa atong hugot nga pagtuo kang Kristo. Sa paghisgot niini nga ideya, basaha og dungan ang ikatulong sugyot ni Elder David A. Bednar diha sa iyang mensahe nga (“Labaw nga Makugihon ug Mabuhaton diha sa Panimalay” (Liahona, Nob. 2009, 17–20). Unsa nga mga leksiyon ang atong makat-onan gikan sa iyang deskripsyon bahin sa painting nga anaa sa iyang opisina? Sa unsang paagi kini nga mga leksiyon magamit sa atong mga paningkamot sa pagtukod sa atong hugot nga pagtuo kang Jesukristo? Ang pagbasa og dungan sa Alma 32:21, 26–43 makadugang sa inyong diskusyon. Unsa nga mga panabot ang atong nakita kon unsaon sa pagpalig-on sa atong hugot nga pagtuo kang Jesukristo?

• Kita makapalambo sa atong hugot nga pagtuo kang Jesukristo pinaagi sa pagpili nga magkat-on gikan sa atong mga kasinatian nga nagsulay niini. Magdungan sa paghisgot unsay atong mahimo atol sa pagsulay sa pagpalig-on sa atong hugot nga pagtuo. (Tan-awa usab sa Neil L. Andersen, “Espirituhanong mga Alimpulos,” Liahona, Mayo 2014, 18–21.) Mahimo nimong hangyoon ang mga sakop sa klase o korum sa pagpaambit og mga panahon dihang mibati sila nga ang ilang hugot nga pagtuo kang Kristo gisulayan ug kon unsay ilang gihimo sa pagpalig-on sa ilang hugot nga pagtuo atol niana nga higayon. Ipasabot nga ang Exodo 14–17 naghulagway sa kanunayng pagbagulbol, o pagreklamo, sa mga Israelite dihang nagsinati sila og mga pagsulay. Sa unsang paagi ang pagbagulbol atol sa mga pagsulay makapahuyang sa atong hugot nga pagtuo? Unsa ang kalainan tali sa pagbagulbol ug sa pagpahayag sa atong mga kabalaka ngadto sa Langitnong Amahan atol sa lisod nga mga panahon?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

Pagtudlo sumala sa Pamaagi sa Manluluwas

Tabangi ang mga sakop sa klase o korum sa pagsabot kon unsaon nila sa pagdapit ang Espiritu aron maanaa sa ilang mga diskusyon. Makahimo sila niini pinaagi sa ilang “mga kinaiya …, sa paagi sa ilang pagtagad sa usag usa, ug unsa ang ilang pagbati kabahin sa ebanghelyo” (Pagtudlo sumala sa Pamaagi sa Manluluwas, 15).