napulo ka sugo

Abril 24

Ngano nga ang Dios Mihatag Kanato og Mga Sugo?

Exodo 18–20

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nagdala kanato paduol sa Langitnong Amahan ug ni Jesukristo?

• Moatiman sa mga nanginahanglan. Aduna bay tawo nga bag-o lang mibalhin sa atong ward o mipasakop sa Simbahan? Sa unsang paagi kita makatabang nila aron mobati nga gihangop?

• Modapit sa tanan sa pagdawat sa ebanghelyo. Aduna bay bisan unsang umaabot nga mga kalihokan diin pwede natong madapit ang atong mga higala sa pagtambong?

• Mohiusa sa mga pamilya alang sa kahangtoran. Unsa nga mga paningkamot ang pwede natong himoon sa pagrekord sa atong personal nga mga kasaysayan?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang pagbasa sa Exodo 20 tingali moaghat kanimo sa paghunahuna mahitungod kon nganong kita adunay mga sugo. Ang ubang mga tawo nagtan-aw sa mga sugo isip pangrestriksiyon o isip pagsulay sa pagkontrolar kanato. Apan tungod kay kita nahibalo man nga ang Dios usa ka mahigugmaong Amahan, makasalig kita nga ang Iyang mga balaod anaa alang sa atong kaayohan, bisan og dili kita sa kanunay mahibalo sa mga rason niini. Misaad Siya kanato nga kita mahibalo nga ang Iyang mga sugo tinuod kon kita magsunod niini (tan-awa sa Juan 7:17).

Si Presidente Russell M. Nelson mitudlo: “Tungod kay ang Amahan ug ang Anak nahigugma kanato uban sa walay kinutoban, hingpit nga gugma ug tungod kay nasayod sila nga kita dili makakita sa tanan nga Ilang nakita, Sila mihatag kanato og mga balaod nga mogiya ug mopanalipod kanato. Adunay lig-on nga koneksyon tali sa gugma sa Dios ug sa Iyang mga balaod” (“The Love and Laws of God” [Brigham Young University nga debosyonal, Sept. 17, 2019], 2, speeches.byu.edu).

Nganong ikaw mapasalamaton sa mga sugo? Unsa ang gusto nimong masabtan sa imong mga sakop sa klase o korum mahitungod kon nganong ang Dios mihatag kanato og mga sugo? Makaandam ka sa pagtudlo pinaagi sa pagrebyo sa Exodo 20 ug sa mensahe ni Presidente Dallin H. Oaks nga “Paghigugma sa Uban ug Pagpakabuhi nga may mga Panaglahi” (Liahona, Nob. 2014, 25–28).

batan-ong lalaki nga nagtuon sa mga kasulatan

Makahibalo kita nga ang mga sugo sa Dios tinuod kon kita mosunod niini.

Magdungan sa Pagkat-on

Aron matabangan ang mga sakop sa klase o korum nga marebyo ang Napulo ka Sugo, mahimo nimo silang hangyoon sa paglista og daghan kutob sa mahimo niini nga mga sugo gikan sa ilang panumdoman. Kon magkinahanglan sila og tabang mahimo silang motan-aw sa Exodo 20:3–17. Ngano nga ang Dios mihatag kanato og mga sugo? Sa pagtabang nga matubag kini nga pangutana, mahimo silang maghisgot og pipila sa Napulo ka Sugo diha sa ginagmay nga grupo. Sa unsang paagi ang pagsunod niini nga mga sugo makatabang kanato sa pagkaplag og kalipay ug makapaduol sa Dios? Ang mosunod nga mga ideya makatabang sa imong mga gitudloan nga makat-on pa og dugang kon ngano nga ang Dios mihatag kanato og mga sugo.

• Ang mga kasulatan naglangkob sa mga tubag sa pangutana nga “Ngano nga ang Dios mihatag kanato og mga sugo?” Mahimo nimong dapiton ang mga sakop sa klase o korum sa pagpangita og mga tubag sa usa o mas daghan nga mga kasulatan nga anaa sa “Suporta nga mga Kapanguhaan.” Dayon hangyoa sila sa pagpaambit sa pipila ka butang nga ilang nakit-an.

• Aron matabangan ang mga sakop sa klase o korum nga makasabot ngano nga ang Dios mihatag kanato og mga sugo, mahimo kang magkumpara og mga sugo gikan sa Dios ngadto sa mga kasinatian nga ilang mahulagway. Sama pananglit, mahimo nimo silang hangyoon sa paghunahuna nga nagsakay sila og sakyanan subay sa lawom kaayo nga bung-aw ug adunay koral subay sa daplin sa karsada. Hangyoa sila sa paghisgot uban sa laing tawo sa mga pangutana sama sa mosunod: Sa unsang paagi ang mga sugo sa Dios susama sa koral? Sa unsang paagi nga ang pagsunod sa mga sugo nakapanalangin kanato? Unsa nga ubang mga pagtandi ang makatabang kanato sa pagsabot ngano nga ang Dios mihatag kanato og mga sugo ug ngano nga kinahanglan kita nga mosunod niini? Alang sa pipila ka mga ehemplo, mahimo nimo silang dapiton sa pagrebyo sa usa sa mga mensahe o video nga anaa sa “Suporta nga mga Kapanguhaan.” Hangyoa sila sa pagpaambit sa mga nakumpara nga ilang nakita ug sa paghisgot sa unsay ilang nakat-onan.

• Ang inyong diskusyon tingali mosangpot sa mga sakop sa klase o korum sa paghisgot kon unsaon gayod nato as pagtratar katong mga dili motuo o magsunod sa pipila ka mga sugo. Mahimo nimo silang dapiton sa pagtan-aw sa tambag diha sa mensahe ni Presidente Dallin H. Oaks nga “Paghigugma sa Uban ug Pagpakabuhi nga may mga Panaglahi.” Mahimo kang mangutana og susama niini: Unsaon nato sa pagtratar kadtong mga mopili sa pagpakabuhi sa lahi nga paagi kay sa atong gihimo? Sa unsang paagi kita makakita sa unsay maayo diha sa uban kon sila mohimo og lahi nga mga pagpili kay sa atong gihimo?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Deuteronomio 10:12–13; Alma 36:30; Doktrina ug mga Pakigsaad 1:24–28; 82:8–10; 93:20, 28; 130:18–21 (Ngano nga ang Dios mihatag kanato og mga sugo)

• Jeffrey R. Holland, “Apil Kitang Tanan” (Liahona, Nob. 2011, 44–47; Richard G. Scott, “Ang Pag-ula Makasiguro sa Inyong Kalinaw ug Kalipay” (Liahona, Nob. 2006, 40–42; Von G. Keetch, “Bulahan ug Malipayon Kadtong Nagtuman sa mga Sugo sa Dios” (Liahona, Nob. 2015, 115–17)

Pagtudlo sumala sa Pamaagi sa Manluluwas

“Sa imong mga paningkamot sa pagpakabuhi ug pagtudlo nga mas sama sa Manluluwas, dili kalikayan nga usahay masayop ka. Ayaw pagpakawala sa kadasig; hinoon, himoa ang imong mga sayop ug mga kahuyang nga mopadangup kanimo ngadto sa Langitnong Amahan ug sa Manluluwas” (Pagtudlo sumala sa Pamaagi sa Manluluwas, 14).