Mayo 8

Unsaon Nako sa Pagkahibalo Nga Ang Ginoo Mipasaylo na Kanako?

Exodo 35–40; Levitico 1; 16; 19

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi ang pagduol ngadto sa Ginoo makatabang kanato sa pagsagubang sa atong mga hagit ug mga pagsulay?

• Moatiman sa mga nanginahanglan. Kinsay atong nailhan nga nagkinahanglan sa atong mga pag-ampo ug atong pagpakighigala?

• Modapit sa tanan sa pagdawat sa ebanghelyo. Unsa nga mga plano sa pagpaambit sa ebanghelyo ang nahisgotan na diha sa mga miting sa konseho sa kabatan-onan sa ward? Sa unsang paagi maapil ang atong klase o korum?

• Mohiusa sa mga pamilya alang sa kahangtoran. Sa unsang paagi ang paghimo sa buhat sa family history makalig-on sa atong mga relasyon uban sa Langitnong Amahan ug ni Jesukristo?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang mga tawo usahay maghunahuna kon “igo na ba ang ilang nahimo” aron mapasaylo sa mga sala. Bisan og nagkinahanglan og paningkamot ang paghinulsol, sa kataposan dili nga pasayloon kita tungod kay nakompleto nato ang listahan o nahimo nato ang pihong mga buluhaton. Mapasaylo kita kon kita modawat sa kalooy nga gitanyag ni Jesukristo. Niining paagiha ang atong pagkatawo mausab.

Sa karaang mga panahon, ang mga ritwal ug mga pagsakripisyo diha sa balaod ni Moises mipunting sa mga Israelite ngadto sa Pag-ula sa Manluluwas. Sigon sa gipasabot sa Ginoo diha sa Levitico 16:30, “Niining adlawa himoon alang kaninyo ang seremonyas sa pagpapas sa inyong sala, ug aron mahinlo kamo sa atubangan sa Ginoo.” Dayag lang, ang ritwal lamang dili makahatag kanato og kapasayloan sa sala. Ang pagpasaylo moabot gikan ni Jesukristo. Sa atong panahon, ang mga ordinansa sama sa bunyag ug sa sakramento nagpunting sa atong mga hunahuna ug kasingkasing ngadto sa Manluluwas. Magtabang kini kanato sa pagsabot nga Siya kanunay nga mopasaylo kanato kon kita maghinulsol.

Sa unsang paagi ang Langitnong Amahan mitabang kaninyo sa pagkahibalo nga kamo gipasaylo na? Mahimo ninyong tun-an ang Mosiah 4:1–3 ug ang mensahe ni Presidente Tad R. Callister “Ang Pag-ula ni Jesukristo” (Liahona, Mayo 2019, 85–87). Kini nga mensahe makatabang niadtong imong gitudloan sa pagsabot nga ang Langitnong Amahan mopasaylo kanato kon kita maghinulsol.

Mapasaylo kita kon kita modawat sa kalooy nga gitanyag ni Jesukristo.

Magdungan sa Pagkat-on

Mahimo nimong sugdan pinaagi sa pagpakita og mga litrato sa Manluluwas diha sa Getsemani ug sa krus (tan-awa sa Libro sa mga Hulagway sa Ebanghelyo, mga nu. 56–57). Dapita ang kabatan-onan sa pagsiksik sa Levitico 1:1–9; 16:15–16, 30. Hangyoa sila sa pagpaambit og hugpong sa mga pulong nga nagpahinumdom kanila bahin sa Pag-ula sa Manluluwas. Sa unsang paagi ang mga pagsakripisyo nga gihulagway diha sa mga bersikulo nakatabang sa mga Israelite sa pagpaabot sa Pag-ula sa Manluluwas? Unsa ang nagtabang kanato sa paghinumdom sa Pag-ula sa Manluluwas? Unsa ang nagtabang aron kita mobati sa gugma ug pasaylo sa Manluluwas? Ang mga kalihokan nga anaa sa ubos makatabang sa kabatan-onan nga mas makasabot nga ang Dios mopasaylo kanato.

• Daghang katawhan diha sa mga kasulatan mihulagway sa ilang mga pagbati sa dihang ang Langitnong Amahan mipasaylo kanila. Ang mga sakop sa imong klase o korum mahimong mobasa sa pipila ka ehemplo (tan-awa sa “Suporta nga mga Kapanguhaan”). Dapita sila sa paghimo og lista sa hugpong sa mga pulong gikan niini nga mga bersikulo nga naghulagway unsay bation nga napasaylo. Mahimo nimong hangyoon sila sa pagpahayag sa ilang kaugalingong mga pulong kon unsay mga pagbati kon mapasaylo. Unsay atong nakat-onan mahitungod sa Dios gikan niini nga mga pagbati? Tingali mahimo kang mopaambit sa imong kaugalingong mga pagbati mahitungod sa pagpasaylo.

• Usahay ang mga tawo dili makasiguro nga sila napasaylo tungod kay dili sila sigurado kon tinuoray ba silang naghinulsol. Ang mensahe ni Elder Dale G. Renlund nga “Paghinulsol: Usa ka Mahimayaon nga Pagpili,” nagpasabot kon unsaon sa paghinulsol sa tinuoray nga paagi ug pagdawat og kapasayloan sa Dios (Liahona, Nob. 2016, 121–24). Mahimo nimong isulat sa pisara ang mga ulohan nga Tiunuoray nga Paghinulsol ug Mga Butang nga Maghimong Lisod sa Paghinulsol. Hangyoa ang imong mga gitudloan sa pagpangita og mga pagtulon-an diha sa mensahe nga nasakop ubos sa mga ulohan. Unsa may atong nakat-onan mahitungod sa Manluluwas ug sa Iyang Kapasayloan gikan sa kataposang tulo ka parapo niini nga mensahe?

• Ang ubang mga tawo tingali naghinulsol apan wala mobati nga napasaylo. Kini tingali tungod kay sila wala makapasaylo mismo sa ilang kaugalingon. Ang tambag diha sa mensahe ni Presidente Tad R. Callister nga “Ang Pag-ula ni Jesukristo” tingali makatabang kanila. Ang imong klase o korum pwedeng mobasa sa seksiyon nga nagsugod og “2. Sala.” Hangyoa sila sa pagpangita og tambag nga ilang ikapaambit sa usa ka higala o sakop sa pamilya kinsa may pagbati gihapon nga may sala bisan human maghinulsol. Hatagi og panahon nga ang kabatan-onan makapaambit sa ilang mga pagbati mahitungod sa Manluluwas, kinsa naghimong posible aron kita makahinulsol ug mapasaylo.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Enos 1:1–8; Mosiah 4:1–3; Alma 24:7–10; 36:17–21 (Unsay gibati sa katawhan sa dihang gipasaylo sila)

• Isaias 1:18; Mosiah 26:30; Moroni 6:8; Doktrina ug mga Pakigsaad 58:42–43; 64:10 (Ang Ginoo misaad nga mopasaylo kanato)

• Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67–69

• Craig A. Cardon, “Ang Manluluwas Gusto nga Mopasaylo,” Liahona, Mayo 2013, 15–18

Pagtudlo sumala sa Pamaagi sa Manluluwas

Ang Manluluwas mitudlo kanato sa paggamit sa mga kasulatan sa pagpangita og mga tubag sa atong kaugalingong mga pangutana. Sa unsang paagi ikaw makatabang niadtong imong gitudloan aron magtinguha sa pagpakli sa mga kasulatan ug sa mga pulong sa mga propeta samtang magtinguha sila og mga tubag?