Mayo 22

Sa Unsang Paagi Ako Makapakita sa Akong Pasalamat ngadto sa Dios?

Deuteronomio 6–8; 15; 18; 29–30; 34

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa may atong gihisgotan sa miagi, ug unsa nga mga pagdapit o mga buluhaton ang gihimo? Unsa may atong gihimo aron malihok kadto nga mga pagdapit o mga buluhaton?

• Moatiman sa mga nanginahanglan. Unsa may atong buhaton o isulti aron makatabang niadtong tingali mibati nga nag-inusara o nahilayo sa Langitnong Amahan?

• Modapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Mohiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang Dios kanunay nga nagbantay kanato ug nanalangin kanato. Apan uban sa tanang mga pagbalda ug mga tentasyon nga atong giatubang, dali ra kitang mahikalimot mahitungod kaniya. Nahitabo kini sa mga Israelite sa daghang higayon, lakip sa mga lisod nga panahon sa ilang paglatagaw sa kamingawan. Apan ang Ginoo sa maloloy-ong paagi migiya kanila ngadto sa gisaad nga yuta—usa ka dapit sa mas dakong kahupayan ug daghang tentasyon, diin mahimo silang tentalon sa paghikalimot na usab Kaniya. Ang mga tambag sa Ginoo diha sa Deuteronomio 6 gituyo alang sa pagtabang nga ang mga Israelite kanunay nga mahinumdom Kaniya ug sa Iyang mga pulong (tan-awa sa mga bersikulo 6–9).

Sa unsang paagi ang Ginoo ug ang Iyang mga pulong magpadayon diha sa imong kasingkasing—“ayaw gayod ninyo hikalimti ang Ginoo”? (Deuteronomio 6:12). Sa unsang paagi nga ang paghinumdom sa Ginoo makatabang nga kita mobati sa pagpasalamat sa tanang kahimtang sa atong kinabuhi? Samtang mangandam ka sa pagtudlo, ikonsiderar ang pagrebyo sa Deuteronomio 12:6–9, 12 ug sa Lucas 17:11–19. Mahimo usab nimong rebyohon ang mensahe ni Presidente Dieter F. Uchtdorf nga “Mapasalamaton sa Bisan Unsang Kahimtang” (Liahona, Mayo 2014, 70–77).

Ang paghinumdom sa Ginoo makatabang aron kita mobati og pasalamat sa tanang kahimtang sa kinabuhi.

Magdungan sa Pagkat-on

Sa pagsugod sa usa ka diskusyon mahitungod sa paghinumdom sa Ginoo, mahimo nimong dapiton ang kabatan-onan sa pagpaambit sa ilang mga kasinatian dihang nakalimtan nila ang butang nga importante. Unsa ang mga resulta? Unsay mahitabo kon makalimtan nato ang mahinungdanon kaayong mga butang nga gihimo sa Ginoo kanato? Dapita ang imong klase o korum sa pagrebyo sa Deuteronomio 6:4–9, 20–25. Unsa ang gitudlo niini nga mga bersikulo mahitungod sa paghinumdom sa kamaayo sa Dios sa atong kinabuhi? Pagpili og usa o mas daghan nga mga kalihokan sa ubos aron sa pagtabang niadtong imong mga gitudloan sa pagkat-on unsaon nga mobati nga mas mapasalamaton sa kamaayo sa Dios ug mopadayag sa ilang pasalamat ngadto Kaniya.

• Ang pagbasa og dungan sa Lucas 17:11–19 makatabang sa kabatan-onan sa paghunahuna mahitungod kon nganong importante kanato nga mopakita sa atong pasalamat ngadto sa Dios. Ikonsiderar ang paghatag og mga pangutana nga makatabang kanila nga ikapahisama kini nga istorya sa ilang kinabuhi. Sama pananglit, unsa ang ubang posible nga mga rason nga ang siyam sa napulo ka sanglahon wala mopasalamat sa Manluluwas? Ngano nga usahay kita mapakyas sa pagpahayag sa atong pasalamat sa Dios? Hangyoa ang imong mga gitudloan sa paghunahuna mahitungod sa mga panahon sa dihang mibati sila nga mapasalamaton, bisan og kadto lisod. Unsa ang epekto sa pagpahayag og pasalamat ngari kanato? Ngano nga importante ang pagpahayag sa atong pagpasalamat sa Dios? (Tan-awa ang mga pakisayran sa kasulatan diha sa “Suporta nga mga Kapanguhaan” alang sa pipila ka mga tubag.) Unsay atong mahimo sa pagpakita sa atong pasalamat ngadto sa Dios?

• Adunay daghang himno sa pagdayeg ug pasalamat, sama sa “Gamhanan Ka” ug “Ipha ang Inyong Panalangin” (Mga Himno, mga nu. 45, 148). Mahimo nimong hangyoon ang mga batan-on sa pagsiksik sa mga pulong niini nga himno alang sa mga butang diin sila mibati nga mapasalamaton. Dapita sila sa pagpaambit sa mga butang nga ilang nakit-an ug sa pagpasabot nganong mapasalamaton sila niini. Mahimo nga magdungan kamo sa pagkanta og pipila niini nga mga himno.

• Ang mensahe ni Presidente Dieter F. Uchtdorf nga “Mapasalamaton sa Bisan Unsa nga Kahimtang” makatabang kanato sa pagsabot unsaon sa pagkahimong mas mapasalamaton. Usa ka paagi nga matabangan sa pagkat-on ang kabatan-onan gikan niini nga mensahe mao ang pagbahin kanila ngadto sa ginagmay nga grupo ug paghatag sa matag grupo og usa ka seksiyon sa mensahe. Hangyoa sila sa pagpaambit og usa ka hugpong sa mga pulong o kapahayag nga gibati nimo nga nag-summarize sa unsay gitudlo ni Presidente Uchtdorf. Dapita sila sa pagpaambit og butang nga ilang nakat-onan mahitungod sa pasalamat. Unsay atong mahimo aron mahimong “mapasalamaton sa bisan unsa nga kahimtang,” bisan unsa man kini? Unsa nga mga ehemplo ang atong nakita diha sa mga tawo nga mapasalamaton bisan sa ilang lisod nga mga kahimtang?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mosiah 2:19–24 (Kinahanglan nga kita modayeg ug magpasalamat sa Dios)

• Alma 34:38; 37:37; Doktrina ug mga Pakigsaad 46:32; 59:7, 15–21 (Kinahanglan nga magpasalamat kita sa tanan nga mga butang)

• Salmo 107:8–9; Mga Taga-Filipo 4:6–7; Doktrina ug mga Pakigsaad 78:19 (Mga panalangin sa pasalamat)

• Dale G. Renlund, “Hunahunaa ang Pagkamaayo ug Pagkahalangdon sa Dios,” Liahona, Mayo 2020, 41–44

• “Pasalamat,” sa Alang sa Kalig-on sa mga Kabatan-onan (booklet, 2011), 18

Pagtudlo sumala sa Pamaagi sa Manluluwas

Ang Manluluwas nakaila sa Iyang mga sumusunod ug kon kinsa unya sila sa umaabot. Kini nga kahibalo nag-impluwensya sa paagi sa Iyang pagtudlo kanila. Sa unsang paagi ikaw makakat-on mahitungod sa mga tinguha, panginahanglan, ug mga hagit niadtong imong mga gitudloan aron ikaw makatudlo kanila sa mas epektibo nga paagi?