pamilya nga nagtuon sa mga kasulatan

Hunyo 12

Unsaon Nako sa Pagpaminaw ang Tingog sa Ginoo?

Ruth; 1 Samuel 1–3

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Moatiman sa mga nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdasig ang atong gibati nga angay buhaton aron sa pagtabang kanila?

• Modapit sa tanan sa pagdawat sa ebanghelyo. Sa unsa nga paagi kita mamahimong kahayag ngadto sa mga sakop sa pamilya o mga higala nga lahi kanato og mga gituohan?

• Mohiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Tingali daghang sakop sa imong klase o korum mobati sama sa bata nga si Samuel. Sa dihang ang Ginoo namulong kaniya, si Samuel wala pay igong kasinatian bahin sa pagpadayag sa pag-ila sa tingog sa Ginoo. Ang tiggiya ni Samuel, nga si Eli, nakahimo sa pagtabang ni Samuel sa pagkat-on unsaon sa pag-ila niini nga tingog. Sama ni Eli, ikaw adunay oportunidad sa pagpamatuod ngadto niadtong imong mga gitudloan nga ang Ginoo gusto nga mamulong ngadto kanila. Matabangan nimo sila nga makat-on sa pag-ila sa tingog sa Ginoo, sama usab sa imong pagkat-on sa pagpaminaw Kaniya. Kamo, mahimong magdungan sa pagtuon sa unsay gitudlo sa Iyang mga propeta mahitungod sa personal nga pagpadayag. Ug ikaw makakat-on sa pagsulti ngadto sa Ginoo, sama sa gihimo ni Samuel, “Sulti, O Ginoo, kay ang imong alagad mamati kanimo” (1 Samuel 3:10).

Agi og dugang sa pagbasa sa 1 Samuel 3 karong semanaha, mahimo ka nga mangandam sa pagtudlo pinaagi sa pagbasa sa mensahe ni Presidente Russell M. Nelson nga “Paminaw Kaniya” (Liahona, Mayo 2020, 88–92).

batan-ong lalaki nga nagtuon sa mga kasulatan

Si Presidente Russell M. Nelson mihangyo kanato sa “pagpalambo sa [atong] espirituhanong kapasidad sa pagdawat og pagpadayag.”

Magdungan sa Pagkat-on

Aron maandam kadtong imong mga gitudloan alang sa diskusyon karon, ikonsiderar ang paghangyo kanila sa pagrebyo sa 1 Samuel 3:1–14. Dapita sila sa pagpaambit unsay ilang nakat-onan gikan niini nga asoy mahitungod sa pagpamati sa tingog sa Ginoo. Unsa ang pipila ka dugang nga mga paagi nga ang Ginoo makigsulti kanato? Ang mosunod nga mga kalihokan makatabang sa kabatan-onan nga mapalawman pa ang ilang panabot bahin sa personal nga pagpadayag.

• Aniay usa ka paagi sa pagtabang niadtong imong mga gitudloan aron mas makasabot unsaon sa pagdawat og pagpadayag. Mahimo nimong isulat sa pisara ang mga pakisayran sa kasulatan nga gisugyot diha sa “Suporta nga mga Kapanguhaan” (o sa uban pa nga imong nahibaloan). Dapita ang kabatan-onan sa pagbasa sa matag kasulatan. Dayon mahimo nilang isulat diha sa pisara tapad sa matag pakisayran kon unsa ang gitudlo niana nga kasulatan mahitungod sa pagdawat og personal nga pagpadayag. Dapita sila sa pagpaambit sa ilang nasinati nga mga kasinatian mahitungod sa pagtinguha ug pagdawat og pagpadayag. Kon angay, ipaambit ang kaugalingon nimong mga kasinatian.

• Makadawat kita og dagkong panalangin kon magkat-on kita sa pagpaminaw sa tingog sa Ginoo. Mahimo nimong sugdan sa usa ka diskusyon pinaagi sa paghangyo sa kabatan-onan sa pagpaambit og mga rason nganong sila tingali nagkinahanglan og pagpadayag. Dayon hangyoa sila sa pagsiksik sa mensahe ni Presidente Russell M. Nelson nga “Paminaw Kaniya.” Dapita sila sa pagpangita og tambag nga makatabang kanila sa pagsabot kon unsaon sa pagpaminaw sa tingog sa Ginoo. Ngano nga importante kaayo kanato nga magkat-on sa pagpamati sa tingog sa Ginoo? Awhaga ang kabatan-onan sa pagrekord diha sa ilang mga journal o diha sa mga papel sa unsay ilang nakat-onan aron ilang ikabitay [display] sa ilang mga panimalay.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• 1 Mga Hari 19:9–12; Helaman 5:29–31; Doktrina ug mga Pakigsaad 6:14–16, 21–23; 8:2–3; 11:12–14 (Mga Paagi nga ang Ginoo mamulong kanato)

• Doktrina ug mga Pakigsaad 9:7–9 (Ang pagpadayag nanginahanglan sa kaugalingon natong paghunahuna ug pagtuon)

• Ronald A. Rasband, “Tug[o]ti ang Balaang Espiritu nga mao ang Mogiya,” Liahona, Mayo 2017, 93–96

• Si Presidente Russell M. Nelson mitudlo, “Sa umaab[o]t nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo. Akong minahal nga mga kaigsoonan, mohangyo ko kaninyo sa pagpagpalambo sa inyong espirituhanong kapasidad sa pagdawat og pagpadayag.” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).