Seksiyon 8
Pagpadayag nga gihatag pinaagi ni Joseph Smith ang Propeta ngadto kang Oliver Cowdery, didto sa Harmony, Pennsylvania, Abril 1829. Sa panahon sa paghubad sa Basahon ni Mormon, si Oliver, kinsa nagpadayon sa pag-alagad isip tigsulat, nagsulat samtang ang Propeta nagdikta ngadto kaniya, nagtinguha nga matugahan sa gasa sa paghubad. Ang Ginoo mitubag sa iyang hangyo pinaagi sa pagtugyan niini nga pagpadayag.
1–5, Ang pagpadayag moabot pinaagi sa gahom sa Espiritu Santo; 6–12, Ang kahibalo sa mga misteryo sa Dios ug sa gahom sa paghubad sa karaan nga mga talaan moabot pinaagi sa pagtuo.
1 Oliver Cowdery, sa pagkatinuod, sa pagkatinuod, sultihan ko ikaw, nga sama sa walay pagduhaduha nga ang Ginoo buhi, kinsa mao ang imong Dios ug ang imong Manunubos, gani sa walay pagduhaduha ikaw makadawat og kahibalo sa bisan unsang mga butang nga imong pangayoon pinaagi sa pagtuo, uban sa matinuoron nga kasingkasing, magatuo nga ikaw makadawat og kahibalo mahitungod sa mga kinulit sa daang mga talaan, nga mga karaan, nga naglakip niadtong mga bahin sa akong kasulatan nga gipamulong pinaagi sa pagpadayag sa akong Espiritu.
2 Oo, tan-awa, ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabot diha kanimo ug nga mopuyo diha sa imong kasingkasing.
3 Karon, tan-awa, kini mao ang espiritu sa pagpadayag; tan-awa, kini mao ang espiritu diin si Moises midala sa mga anak sa Israel agi sa Pulang Dagat sa uga nga yuta.
4 Busa, mao kini ang imong gasa; gamita kini, ug bulahan ikaw, kay moluwas kini kanimo gikan sa mga kamot sa imong mga kaaway, samtang, kon dili nimo kini gamiton, mopatay sila kanimo ug modala sa imong kalag ngadto sa kalaglagan.
5 O, hinumdomi kining mga pulong, ug tumana ang akong mga sugo. Hinumdomi, kini mao ang imong gasa.
6 Karon dili pa kini ang tanan nga imong gasa; kay ikaw aduna pay laing gasa, nga mao ang gasa ni Aaron; tan-awa, nakasulti kini kanimo og daghang butang;
7 Tan-awa, walay laing gahom, gawas sa gahom sa Dios, nga makapahimo niining gasa ni Aaron nga mag-uban kanimo.
8 Busa, ayaw pagduhaduha, kay mao kini ang gasa sa Dios; ug ikaw makagunit niini sa imong mga kamot, ug makahimo og katingalahan nga mga buhat; ug walay gahom nga makakuha niini gikan sa imong mga kamot, kay mao kini ang buhat sa Dios.
9 Ug, busa, bisan unsa ang imong pangayoon kanako nga isulti kanimo pinaagi niana, kana akong ihatag kanimo, ug ikaw makabaton og kahibalo mahitungod niini.
10 Hinumdomi nga kon wala ang pagtuo ikaw walay mahimo; busa pangayo pinaagi sa pagtuo. Ayaw pagtiaw-tiaw niining mga butanga; ayaw pangayo niana nga wala nimo kinahanglana.
11 Pangayo aron ikaw makahibalo sa mga misteryo sa Dios, ug nga ikaw makahubad ug makadawat og kahibalo gikan niadtong karaang mga talaan nga gitago, nga sagrado; ug sumala sa imong pagtuo kini pagabuhaton diha kanimo.
12 Tan-awa, ako ang namulong niini; ug ako ang namulong nganha kanimo sukad sa sinugdanan. Amen.