mga batan-on nga nanglingkod sa taytayan

Hunyo 26

Ngano Nga ang Kaputli Importante sa Plano sa Dios?

2 Samuel 5–7; 11–12; 1 Mga Hari 3; 8; 11

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas nahiduol sa Manluluwas? Sa unsang paagi kita naningkamot sa pagkahimong mas mahisama Kaniya?

• Moatiman sa mga nanginahanglan. Kinsa man ang anaa sa atong hunahuna bag-ohay lang? Sa unsang paagi kita makatabang niini nga mga indibidwal?

• Modapit sa tanan sa pagdawat sa ebanghelyo. Sa unsang paagi nato matubag ang mga pangutana sa atong mga higala mahitungod sa Simbahan sa paagi nga makalig-on sa ilang hugot nga pagtuo sa Manluluwas?

• Mohiusa sa mga pamilya alang sa kahangtoran. Unsa ang pipila ka paagi nga kita mas makakonektar sa mga sakop sa kaliwatan sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang atong Langitnong Amahan, kinsa gusto nga kita magmalipayon, mihatag kanato sa balaod sa kaputli. Ug si Satanas, kinsa gusto nga kita magmiserable, nagtudlo nga kini nga balaod dili importante. Himoon niya ang tanan kutob sa iyang mahimo sa pagtintal kanato aron mohimo og sekswal nga sala. Ang batan-ong mga tawo maimpluwensya sa mga litrato ug mga mensahe nga nasupak sa unsay gitudlo sa Dios mahitungod sa sekswalidad. Ang matag usa kanato nagkinahanglan nga magmabinantayon sa maong mga tintasyon ug maningkamot nga ipadayong putli ang atong mga hunahuna, mga pulong, ug mga buhat sa tibuok natong kinabuhi. Nakakat-on kita niini nga leksiyon gikan sa subo nga kasinatian ni Hari David. Usa siya ka ehemplo sa talagsaong pagkamatinud-anon. Apan nagpadala siya sa tintasyon ug gilapas ang balaod sa kaputli (tan-awa sa 2 Samuel 11:1–5).

Makapangandam ka sa pagtudlo pinaagi sa pagbasa sa 2 Samuel 11, sa mensahe ni Elder David A. Bednar “Kita Nagtuo sa Pagkaputli” (Liahona, Mayo 2013, 41–44), ug sa ubang mga kapanguhaan mahitungod sa kaputli. Unsa kaha ang makadasig sa mga sakop sa klase o sa korum aron makita ang kaputli sa paagi kon unsay tan-aw sa Dios niini? Unsa kaha ang makatabang kanila sa pagsalikway sa paagi kon unsay tan-aw ni Satanas niini?

klase sa batan-ong mga lalaki

Aron magpabiling matinud-anon sa balaod sa Dios bahin sa kaputli, maningkamot gayod kita matag adlaw nga ipadayon nga putli ang atong mga hunahuna, mga pulong, ug mga buhat.

Magdungan sa Pagkat-on

Aniay usa ka paagi aron mapaila ang hilisgotan bahin sa kaputli samtang magtabang niadtong imong mga gitudloan sa pagrebyo unsay ilang nabasa sa mga kasulatan. Isulat sa pisara ang mga pulong nga David ug Jose. Dayon magdungan sa pagrebyo sa 2 Samuel 11:1–5 ug Genesis 39:7–12. Sa unsang paagi si David ug si Jose misanong sa tintasyon sa pagbuhat og sekswal nga sala? Unsa may atong nakat-onan gikan sa ilang mga ehemplo? Gamita ang mosunod nga mga kalihokan o pipila nga imong kaugalingon aron madasig sa dugang pa nga paghisgot mahitungod kon ngano nga ang kaputli importante sa plano sa Dios.

• Ang kabatan-onan nga imong gitudloan tingali makabenipisyo gikan sa pagpasabot sa sumbanan sa Ginoo bahin sa sekswal nga kaputli. Dapita sila sa pagrebyo sa “Sekswal nga Kaputli” diha sa Alang sa Kalig-on sa mga Kabatan-onan ([booklet, 2011], 35–37) o sa ikaupat nga parapo sa “Ang Pamilya: Usa ka Pamahayag sa Kalib[o]tan” (ChurchofJesusChrist.org). Sa unsang paagi ang mga pagtulon-an sa Ginoo mahitungod sa sekswalidad lahi gikan sa unsay gusto ni Satanas nga atong tuohan? Ang kabatan-onan mahimong morebyo sa “Ang Pamilya: Usa ka Pamahayag ngadto sa Kalib[o]tan,” nga mangita sa mga pamahayag nga nagpasabot nganong ang sekswal nga kaputli importante sa plano sa Langitnong Amahan sa kalipay. Unsa may atong nakat-onan gikan niini nga mga pamahayag nga makatabang kanato sa pagpakabuhing matarong sa kalibotan karon?

• Usahay ang uban dili makasabot sa atong mga sumbanan sa moralidad, ilabi na tungod kay kini nga mga sumbanan lahi kaayo gikan sa unsay gituohan sa ubang tawo. Unsaon kaha nato sa pagtubag ang ilang mga pangutana? Ang kabatan-onan mahimo usab nga magsiksik sa mga kasulatan diha sa “Suporta nga mga Kapanguhaan” alang sa mga pamahayag nga naghulagway sa mga panalangin sa kaputli. Mahimo nimo silang hangyoon sa pagpaambit sa ilang mga hunahuna mahitungod kon nganong gipili nila ang pagsunod sa sumbanan sa Ginoo sa sekswal nga moralidad.

• Ang popular nga kultura sa kasagaran nagtudlo nga wala kinahanglana ang sekswal nga kaputli. Apan ang kultura mibaliwala sa mga kamatuoran mahitungod sa mga panalangin sa kaputli ug sa mga kakuyaw sa imoralidad. Aron makakat-on pa og daghan mahitungod niini nga mga kamatuoran, ang kabatan-onan mahimong magtuon sa mensahe ni Elder David A. Bednar nga “Kita Nagtuo sa Kaputli.” Ang uban mahimong magtuon sa seksiyon nga “Ang Tinguha sa Kaaway,” ug ang uban mahimong magtuon sa “Mga Panalangin sa Pagkaputli.” Dayon mahimo nilang ipaambit sa usag usa ang unsay ilang nakat-onan. Awhaga sila sa pagsulat og usa ka hugpong sa mga pulong gikan niini nga mensahe nga ilang gusto nga hinumdoman sa sunod higayon nga makasugat sila og sayop nga mga mensahe mahitungod sa sekswalidad. Mahimo usab nga pabasahon nimo sila sa seksiyon nga giulohan og “Ang Baroganan sa Paghinulsol.” Hisgoti kon sa unsang paagi ang Manluluwas makaayo sa tanan nga gustong maghinulsol sa sekswal nga sala. Pahinumdomi ang imong mga gitudloan nga mahimo silang makigsulti sa ilang mga ginikanan o sa bishop kon aduna silay mga pangutana o panginahanglan sa paghinulsol.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• 1 Mga Taga-Corinto 6:19–20 (Ang atong lawas mga templo)

• Alma 38:12 (Kon kita makapugong sa tanan nga atong mainit nga pagbati, kita mapuno sa gugma)

• Doktrina ug mga Pakigsaad 25:2; 121:45–46 (Ang mga panalangin sa hiyas)

Pagtudlo sumala sa Pamaagi sa Manluluwas

Sa tanang kahimtang, ang Manluluwas usa ka ehemplo ug tigtudlo. Mitudlo Siya sa Iyang mga disipulo sa pag-ampo pinaagi sa pag-ampo uban kanila. Mitudlo Siya kanila sa paghigugma ug pagserbisyo pinaagi sa Iyang paghigugma ug pagserbisyo kanila. Mitudlo siya kanila unsaon sa pagtudlo sa Iyang ebanghelyo pinaagi sa pamaagi sa Iyang pagtudlo niini.