Hulyo 10

Nganong Importante ang Pagsunod sa Buhing mga Propeta sa Dios?

2 Mga Hari 2–7

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa ang nahisgotan sa bishopric diha sa atong mga miting sa konseho sa kabatan-onan sa ward? Unsa nga mga aksiyon ang pwede natong lihokon base niana nga diskusyon?

• Moatiman sa mga nanginahanglan. Sa unsang paagi kita makatabang sa mga tawo sa Kristohanong mga paagi kon makakita kita og panginahanglan ug wala mahibalo unsay isulti?

• Modapit sa tanan sa pagdawat sa ebanghelyo. Unsa nga butang ang atong nakaplagan diha sa ebanghelyo ni Jesukristo nga naghatag kanato og kalipay? Sa unsang paagi nato mapaambit kana nga kalipay ngadto sa uban?

• Mohiusa sa mga pamilya alang sa kahangtoran. Unsa ang pipila ka paagi nga kita mas makakonektar sa mga sakop sa kaliwatan sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Tingali adunay tipik sa kinaiya sa sanlahon nga si Naaman nga anaa kanatong tanan (tan-awa sa 2 Mga Hari 5:1–15). Sama kang Naaman, kinsa napungot sa dihang ang propeta nga si Eliseo misulti kaniya nga manghugas lang ngadto sa suba ug mamaayo, tingali dili kita sa kanunay makasabot sa mga rason sa tambag sa atong propeta. Tingali maghunahuna kita nga ang pipila sa ilang gitambag walay kahulogan diri kanato ug busa walay gamit diri kanato. Apan ang Dios nagsaad og dagkong panalangin kon kita adunay igong pagpaubos sa pagsunod sa propeta (tan-awa sa Doktrina ug mga Pakigsaad 21:4–7). Sa unsang paagi ang pagsunod sa propeta nakatabang kaninyo nga mas maduol sa Ginoo? Unsa ang ubang ehemplo diha sa 2 Mga Hari 4–6 nga nagpakita kon giunsa kita sa pagpanalangin kon mosunod kita sa buhing mga propeta?

Samtang mangandam ka sa pagtudlo mahitungod sa mga panalangin nga moabot tungod sa pagsunod sa buhing propeta, hunahunaa ang mga hagit nga giatubang sa kabatan-onan. Sa unsang paagi ang pagsunod sa propeta makatabang nila mahitungod niini nga mga hagit? Mahimo usab nimong basahon ang mensahe ni Elder Neil L. Andersen “Ang Propeta sa Dios” (Liahona, Mayo 2018, 24–27) o ang mensahe ni Elder L.Whitney Clayton “Unsa ganiy Iyang Isugo Kaninyo, Buhata Ninyo” (Liahona, Mayo 2017, 97–99).

Ang pagsunod sa propeta makatabang sa batan-ong mga tawo diha sa mga hagit nga ilang giatubang.

Magdungan sa Pagkat-on

Sa pagsugod sa diskusyon, pwede nimong hangyoon ang matag sakop sa klase o korum (o ang ginagmayng grupo) sa pagrebyo sa usa o sa mosunod nga mga asoy: 2 Mga Hari 4:1–7; 5:6–14; 6:8, 13–17. Hangyoa sila sa pagpangita og butang nga nagdasig kanila sa pagbasa ug pagsunod sa mga pagtulon-an sa mga propeta ug mga apostoles karon. Human ang matag grupo makapaambit sa ilang nakit-an, mahimo nimong hangyoon ang pipila ka batan-on sa pagtiwas sa kapahayag [sentence]: “Kon ako mosunod sa buhing mga propeta ug mga apostoles, ako …” Sa pagpadayon sa diskusyon mahitungod sa pagsunod sa mga propeta, pagpili og usa o mas daghan sa mosunod nga mga ideya.

• Tungod kay ang buhing mga propeta diha lamang makita sa gipahiuli nga Simbahan sa Ginoo, ang mga sakop sa imong klase o korum tingali adunay oportunidad sa pagtubag sa mga pangutana sa uban mahitungod sa buhing mga propeta. Mahimo nimong isulat sa pisara ang mosunod nga mga pangutana nga posibling ipangutana sa mga tawo mahitungod sa buhing mga propeta: Nganong kamo aduna may buhi nga propeta? Unsa ang paagi sa pagpili og propeta? Unsaon ninyo sa pagkahibalo nga ang propeta namulong gayod alang sa Dios? Ang kabatan-onan mahimong mangita og mga tubag niini nga mga pangutana diha sa mga kapanguhaan ubos sa “Suporta nga mga Kapanguhaan.” Mahimo nilang praktison ang pagtubag niini nga mga pangutana ug ang uban pa gamit ang mga kamatuoran nga ilang nakit-an ug sa ilang kaugalingong mga hunahuna ug mga kasinatian.

• Sa unsang paagi ang pulong sa buhing propeta makatabang nato kon mag-atubang kita og personal nga mga hagit? Aron matabangan ang kabatan-onan sa pagtubag niini nga pangutana, pwede nimo silang dapiton sa paglista diha sa pisara og pipila ka tambag og mga pagdapit nga gihatag sa propeta atol sa pinakabag-o nga kinatibuk-ang komperensiya. Unsa may atong nahimo nga malihok ang iyang tambag ug mga pagdapit? Unsa nga mga hagit ang atong nakita sa atong kinabuhi tungod niini nga mga paningkamot? Mahimo kang modapit og usa nga mopaambit og personal nga kasinatian diin ang tambag sa propeta nakatabang kaniya bahin sa usa ka personal nga hagit.

• Sa unsang paagi ikaw makatabang niadtong imong gitudloan sa pagsabot nga ang pagsunod sa propeta makatabang kanila nga mas maduol sa Manluluwas? Ang usa ka paagi mao ang paghatag diha sa matag usa kanila og gamay nga kard ug dapiton sila sa pagbasa sa ubang bahin diha sa mensahe ni Elder Neil L. Andersen “Ang Propeta sa Dios.” Mahimo nilang isulat diha sa pikas bahin sa kard ang butang nga ilang nakat-onan mahitungod kon sa unsang paagi ang propeta makatabang kanila nga makapaduol kang Kristo. Diha sa pikas bahin sa kard, pwede nilang isulat ang gidasig kanila nga butang nga buhaton aron makasunod sa propeta. Dapita sila sa pagpaambit sa unsay ilang gisulat.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Amos 3:7; Doktrina ug mga Pakigsaad 1:4, 37–38; Moises 6:26–27, 32–36; Mga Hilisgotan sa Ebanghelyo, “Mga Propeta,” topics.ChurchofJesusChrist.org

• Gary E. Stevenson, “Ang Kasingkasing sa Usa ka Propeta,” Liahona, Mayo 2018, 17–20 (Giunsa sa pagpili ang usa ka propeta)

Pagtudlo sumala sa Pamaagi sa Manluluwas

“Ang tinuod nga pagkakabig naglangkob og sobra pa kay sa mobati nga ang Espiritu nagkumpirmar sa kamatuoran ngadto sa atong mga kalag; kinahanglan usab kita nga molihok sumala niadto nga mga kamatuoran. Agig dugang sa pagtabang sa mga nagkat-on nga mobati ug moila sa Espiritu, tabangi sila sa pagsunod sa mga pag-aghat nga ilang nadawat” (Pagtudlo sumala sa Pamaagi sa Manluluwas, 10).