Hulyo 24

Unsa nga mga Panalangin ang Moabot gikan sa Pagkadawat og mga Ordinansa sa Templo?

Esdras 1; 3–7; Nehemias 2; 4–6; 8

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Giunsa nato pagsinati ang kamot sa Ginoo diha sa atong kinabuhi?

• Moatiman sa mga nanginahanglan. Unsaon nato sa pagsuporta ang matag usa sa mga butang nga atong giatubang?

• Modapit sa tanan sa pagdawat sa ebanghelyo. Sa unsa nga paagi atong magamit sa mas maayong paagi ang teknolohiya isip himan sa pagpaambit sa ebanghelyo?

• Mohiusa sa mga pamilya alang sa kahangtoran. Unsa may atong gibuhat sa pagtabang sa atong mga pamilya aron makaduol kang Kristo?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Sa dihang ang mga Judeo namalik gikan sa pagpalayas ngadto sa Babelonia, ilang nakita ang Jerusalem ug ang templo niini nga nangaguba (tan-awa sa 2 Mga Hari 25:1–10; 2 Cronicas 36:17–19). Nangandoy ang mga tawo nga itukod og balik ang templo. Mao nga, sulod sa mubo nga panahon, gisugdan nila ang proseso sa pagtukod og balik ug nagmaya dihang nahuman ang templo (tan-awa sa Esdras 3:8–13; 6:16–22). Karon, isip mga tawo sa pakigsaad sa Dios, kita usab nagtukod og mga templo ug magmaya kon ang usa ka templo matukod. Ngano man? Tungod kay ang mga ordinansa sa templo mosangpot sa pinakatalagsaong mga panalangin sa Langitnong Amahan. Magdala kini og espirituhanong gahom. Mohatag kini kanato og direksyon. Ug kini makatabang kanato nga mamahimong sama sa Dios ug makadawat sa tanan nga anaa Kaniya. (Tan-awa sa Doktrina ug mga Pakigsaad 84:19–22; 109:22–26.)

Unsaon nimo sa pagtabang nga ang kabatan-onan mangandoy sa templo sama sa gihimo sa mga Israelite? Unsaon nimo sila sa pagtabang aron magtinguha sa tibuok nilang kasingkasing sa paghimo og mga pakigsaad uban sa Dios sulod sa Iyang balaan nga balay? Samtang mangandam ka sa pagtudlo, ikonsiderar ang pagrebyo sa mensahe ni Presidente Thomas S. Monson nga “Ang mga Panalangin sa Templo” (Liahona, Mayo 2015, 91–93)” sa temples.ChurchofJesusChrist.org.

Ang mga ordinansa sa templo makatabang kanato nga mamahimong sama sa Dios ug makadawat sa tanan nga anaa Kaniya.

Magdungan sa Pagkat-on

Aron matabangan ang mga sakop sa klase o korum nga makalantaw sa mga panalangin nga ilang madawat gikan sa mga ordinansa sa templo, mahimo nimo silang dapiton sa pagrebyo sa Esdras 3:10–13; 6:16, 21–22. Hangyoa sila sa pagpaambit og mga pulong o hugpong sa mga pulong nga nagpakita kon unsay gibati sa karaang mga Judeo mahitungod sa pagtukod og balik sa ilang templo. Nganong ang pagtukod og templo usa man ka butang nga isaulog? Sa unsang paagi ang atong mga templo karon ug ang buhat nga atong gihimo didto makatabang aron kita mas maduol sa Manluluwas? Aniay pipila sa ubang mga ideya sa pagtabang sa kabatan-onan nga makasabot sa mga panalangin nga ilang madawat sa templo.

• Dihang si Joseph Smith mipahinungod sa Templo sa Kirtland, gihatag niya ang pahinungod nga pag-ampo nga makita diha sa Doktrina ug mga Pakigsaad 109. Kini nga pag-ampo naghulagway sa mga panalangin nga atong madawat pinaagi sa mga ordinansa sa templo. Ang mga sakop sa klase o korum pwede nga mosiksik og mga porsiyon niini nga pag-ampo, ilabi na sa mga bersikulo 12–26, nga mangita sa mga panalangin nga giampo ni Joseph Smith. Mahimo nilang ilista kini nga mga panalangin diha sa pisara. Mahimo nimong hangyoon ang kabatan-onan sa paghisgot kon sa unsang paagi ang matag usa niini nga mga panalangin makalig-on kanila karon ug sa umaabot. Ipaambit ang imong pagpamatuod bahin sa mga panalangin nga imong nadawat pinaagi sa mga ordinansa sa templo.

• Aron matabangan nga makapaambit ang mga sakop sa klase o korum sa ilang mga pagbati mahitungod sa templo, hangyoa sila sa pagtiwas niini nga kapahayag: “Kon maghunahuna ko mahitungod sa templo, mobati ako og …” Mahimo nimo silang dapiton sa pagbasa sa nag-unang lima ka parapo sa mensahe ni Elder Kent F. Richards nga “Ang Gahum sa Pagkadiosnon” (Liahona, Mayo 2016, 118–20). Nganong nagkinahanglan man kita sa templo labaw kay sa bisan unsa nga butang? Unsa may atong nakat-onan mahitungod sa gahom nga gihatag sa Dios kanato pinaagi sa mga ordinansa sa templo? Ang mga batan-on dayon mahimong mosiksik hangtod sa kataposan sa mensahe ni Elder Richards, nga mangita sa mga panalangin nga moabot kanato kon kita moapil sa mga ordinansa sa templo. O makapangita sila niini nga mga panalangin diha sa mensahe ni Presidente Thomas S. Monson nga “Ang mga Panalangin sa Templo.”

• Ngano nga ang pamilya Mou Tham andam nga mohimo og ingon ka dako nga sakripisyo aron makaadto sa templo? (Tan-awa usab sa Thomas S. Monson, “Ang Balaan nga Templo—ang Suga sa Kalibutan,” Liahona, Mayo 2011, 90–94.) Unsa nga mga sakripisyo ang atong kinahanglang buhaton aron makadawat sa mga panalangin sa templo? Tingali ang usa ka tawo kinsa bag-o lang naadto sa templo mahimong moapil sa miting ug mopaambit sa iyang kasinatian. Mahimo nimong dapiton ang kabatan-onan sa pasiksik sa mensahe ni Elder Ronald A. Rasband nga “Girekomendar ngadto sa Ginoo” (Liahona, Nob. 2020, 22–25) ug pagpaambit sa mga panalangin sa pagkaangkon og rekomend sa templo. Mahimo usab kamong magdungan sa pagrebyo sa mga pangutana sa rekomend sa templo (tan-awa sa Russell M. Nelson nga, “Panapos nga Pakigpulong,” Liahona, Nob. 2019, 120–22).

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Quentin L. Cook, “Hunahunaa ang Inyong Kaugalingon nga anaa sa Templo,” Liahona, Mayo 2016, 97–100

Pagtudlo sumala sa Pamaagi sa Manluluwas

“Samtang magtudlo ka, imbis nga mohatag lamang og impormasyon, tabangi ang mga bata-on sa pagdiskobre sa mga kamatuoran sa ebanghelyo sa ilang mga kaugalingon diha sa mga kasulatan ug sa mga pulong sa mga propeta” (Pagtudlo sumala sa Pamaagi sa Manluluwas, 28).