Agosto 14

Unsaon Nako sa Pagkaplag og Hingpit nga Kalipay pinaagi sa Pagsunod sa Manluluwas?

Mga Salmo 1–2; 8; 19–33; 40; 46

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita nagkaplag og kalipay pinaagi sa pagsunod ni Jesukristo?

• Moatiman sa mga nanginahanglan. Kinsa sa atong ward o komunidad ang nagkinahanglan sa atong tabang? Sa unsang paagi kita makatabang kanila?

• Modapit sa tanan sa pagdawat sa ebanghelyo. Sa unsang paagi kita makatabang sa usag usa nga maandam alang sa misyonaryo nga pagserbisyo?

• Mohiusa sa mga pamilya alang sa kahangtoran. Sa unsang paagi kita makasalmot sa mga paningkamot sa ward aron makahimo sa family history ug buhat sa templo?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Unsay nakahatag kanimo og kalipay? Ang mga tawo tingali moingon nga makakaplag sila og kalipay sa panahon nga kauban ang mga higala ug pamilya, paboritong kalingawan, o bisan sa usa ka adlaw nga walay mga pagsulay. Si Presidente Russell M. Nelson mitudlo, “Ang kalipay nga atong gibati dili kaayo konektado sa mga kahimtang sa atong kinabuhi apan konektado kaayo sa gitutokan sa atong kinabuhi. Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kamaya bisan unsa pay mahitabo—o wala manghitabo—sa atong kinabuhi. Ang kalipay moabut gikan ug tungod Kaniya” (Hingpit nga Kalipay ug Espirituhanon nga Pagsugakod,” Liahona, Nob. 2016, 82). Daghan diha sa Mga Salmo mipalanog sa sama nga mensahe: “Gitultolan mo ako sa dalan paingon sa kinabuhi; ang imong presensya naghatag kanakog tumang kalipay” (Mga Salmo 16:11).

Paghunahuna og pipila ka hagit nga tingali giatubang sa mga sakop sa imong klase o korum. Unsaon nimo sila sa pagtabang nga makasabot nga ang tinuod nga kalipay maggikan sa paggamit og hugot nga pagtuo sa Manluluwas—bisan sa lisod nga mga panahon? Pamalandonga kini nga mga pangutana samtang mangandam ka sa pagtudlo. Pangita og kasusama nga mga tudling nga imong ikapaambit sa imong klase o korum diha sa Mga Salmo o sa mensahe ni Presidente Nelson nga “Hingpit nga Kalipay ug Espirituhanon nga Pagsugakod.”

Ang tinuod nga kalipay maggikan sa hugot nga pagtuo diha sa Manluluwas, bisan sa lisod nga mga panahon.

Magdungan sa Pagkat-on

Ikonsiderar ang pagdapit sa mga sakop sa imong klase o korum sa pagrebyo sa pipila sa mosunod: Mga Salmo 1; 8; 19; 23; 27. Unsa may atong nakat-onan gikan niini nga Mga Salmo mahitungod sa unsay makahatag kanato og kalipay? Dayon mahimo kang mogamit og usa o daghan pa sa mosunod nga mga kalihokan sa pagtabang sa imong mga gitudloan nga mas makasabot nga ang tinuod nga kalipay maggikan sa pagsunod ni Ginoong Jesukristo.

• Kitang tanan gustong makakaplag og kalipay, apan nagkinahanglan kita nga makasabot unsay naghatag og tinuod nga kalipay ug kon unsa gayod ang magdala ngadto sa kasub-anan. Hangyoa ang kabatan-onan sa pagpaambit og pipila ka butang nga makahatag kanila og kalipay ug kon nganong kining mga butanga magdala sa ingon. Isulat sa pisara ang “Ang mga tawo naingon, nga unta sila makabaton og hingpit nga kalipay” (2 Nephi 2:25). Dayon dapita ang kabatan-onan, mga indibidwal o ginagmay nga grupo, sa pagrebyo og usa o mas daghan sa mga kasulatan diha sa “Suporta nga mga Kapanguhaan” ug ilista unsay ilang nakita nga modala ngadto sa kalipay. Unsa ang pipila ka paagi nga ang mga tawo mosulay sa pagpangita og kalipay nga modala gayod ngadto sa kasub-anan? Sa unsang paagi ang Manluluwas mihatag kanato og kalipay?

• Kitang tanan may nahibaloang mga tawo nga nag-atubang og mga hagit bisan og sila naningkamot sa pagpuyo sa ebanghelyo. Sa unsang paagi imong matabangan kadtong imong gitudloan sa pagsabot nga kita makakaplag og kalipay bisan og ang atong kinabuhi malisod? Mahimo usab nimo silang hangyoon sa pagrebyo sa mensahe ni Presidente Russell M. Nelson nga “Hingpit nga Kalipay ug Espirituhanon nga Pagsugakod” o sa mensahe ni Presidente Steven J. Lund nga “Pagkaplag og Kalipay diha kang Kristo” (Liahona, Nob. 2020, 35–37). Unsa nga mga ehemplo ang atong makita diha sa mga tawo kinsa nakakaplag og kalipay diha kang Kristo bisan sa ilang mga hagit? Unsa may atong nakat-onan gikan niini nga mga kasinatian? Unsa nga mga kasinatian ang mahimo natong ipaambit?

• Kitang tanan may kalagmitang mobati og kahingawa ug depresyon samtang mag-atubang kita og mga hagit sa kinabuhi. Alang sa uban, kini nga mga pagbati usa ka tibuok kinabuhi nga pagkigbugno. Ang imong klase o korum tingali makabenipisyo gikan sa usa ka diskusyon mahitungod niini nga mga hagit ug mahitungod sa kon sa unsang paagi ang Manluluwas makatabang niadtong nagsagubang og kahingawa ug depresyon. Sa pagsugod niini nga diskusyon, tingali pwede nimong hangyoon ang kabatan-onan sa pagrebyo sa mensahe ni Elder Jeffrey R. Holland nga “Sama sa Usa ka Sudlanan nga Nabuak,” ilabi na ang kataposang mga parapo (Liahona, Nob. 2013, 40–42), o sa mensahe ni Sister Reyna I. Aburto “Sa Dag-um ug Kahayag, Ginoo, Ubani Ako!” (Liahona, Nob. 2019, 57–59). Dapita ang mga sakop sa klase o korum sa pagpangita og mga kamatuoran nga makahuloganon kanila ug sa pagpaambit sa unsay ilang nakit-an. Awhaga ang kabatan-onan sa pagpakigsulti ngadto sa usa ka kasaligan nga ginikanan o lider o pagbisita sa mentalhealth.ChurchofJesusChrist.org kon mobati sila nga nagkinahanglan sila og tabang.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 5:1–12; 1 Pedro 4:12–13; 2 Nephi 2:25–27; Mosiah 2:41; 3:3–7; 4:2–3; Alma 36:16–22; 4 Nephi 1:15–16 (Unsaon sa pagkaplag og kalipay)

• D. Todd Christofferson, “Ang Hingpit nga Kalipay sa mga Santos,” Liahona, Nob. 2019, 15–18

• “Pagpakgang sa Hikog ug Pagpangalagad,” ChurchofJesusChrist.org/https://www.churchofjesuschrist.org/get-help/suicide?lang=ceb

Pagtudlo sumala sa Pamaagi sa Manluluwas

Ang Manluluwas personal nga nakaila niadtong Iyang gitudloan—ug kinsa unya sila sa umaabot. Sa dihang nakigbisog sila, Siya padayon nga mihigugma kanila. Sa unsa nga paagi ikaw makapakita niana nga gugma ug suporta sa imong mga gitudloan?