Agosto 28

Sa Unsang Paagi ang Manluluwas Makatabang Kanako panahon sa Akong mga Pagsulay?

Mga Salmo 102–103; 110; 116–119; 127–128; 135–139; 146–150

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nagdala kanato paduol sa Langitnong Amahan ug ni Jesukristo?

• Moatiman sa mga nanginahanglan. Aduna bay tawo nga bag-o lang mibalhin sa atong ward o mipasakop sa Simbahan? Sa unsang paagi kita makatabang nila aron mobati nga gihangop?

• Modapit sa tanan sa pagdawat sa ebanghelyo. Unsa ang umaabot nga mga kalihokan diin pwede natong madapit ang atong mga higala sa pagtambong?

• Mohiusa sa mga pamilya alang sa kahangtoran. Unsa nga mga paningkamot ang pwede natong himoon sa pagrekord sa atong personal nga mga kasaysayan?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang mga hagit nga atong giatubang posibling mopabati kanato og kaluya, kasagmuyo, kapildihan, ug pag-inusara. Ang mga tigsulat sa Mga Salmo nakasabot niana nga mga pagbati ug gipahayag kini sa impluwensyal kaayo nga paagi: “Nawad-an na akog kadasig daw laya nga sagbot; wala na akoy ganang mokaon; … Dili ako makatulog; sama ako sa nag-inusarang langgam diha sa atop sa balay.” (Mga Salmo 102:4, 7). Apan uban lamang sa mas dakong gahom, mipamatuod sila nga ang pagpaduol ngadto sa Manluluwas makahatag og kahupayan: “Dayga ang Ginoo, O akong kalag, ug ayaw kalimti ang iyang pagkamaluluy-on: gipasaylo niya ang tanan kong mga sala ug giayo niya ang tanan kong mga balatian; giluwas ako niya gikan sa lubnganan ug gipanalanginan ako sa iyang gugma ug kaluoy” (Mga Salmo 103:2–4).

Hunahunaa ang mga panalangin nga moabot sa mga sakop sa imong klase o korum samtang magkahingpit pa ang ilang pagsabot kon sa unsang paagi ang Manluluwas makatabang kanila. Sa unsang paagi ang Manluluwas nakatabang kanimo? Samtang mangandam ka sa pagtudlo, mahimo nimong rebyohon ang mensahe ni Presidente Henry B. Eyring “Nasulayan, Napamatud-an, ug Nahashasan” (Liahona, Nob. 2020, 96–99) ug “Adversity” diha sa Mga Hilisgotan sa Ebanghelyo (topics.ChurchofJesusChrist.org).

Ang Manluluwas motabang ug mohupay kanato sa atong mga pagsulay.

Magdungan sa Pagkat-on

Mahimo nimong sugdan pinaagi sa paghangyo nga rebyohon sa mga sakop sa klase o korum ang Mga Salmo 102, 103, ug 116, nga mangita kon sa unsang paagi ang Manluluwas motabang kanato diha sa atong mga paningkamot sa pagbuntog sa mga pagsulay. Mahimo silang magtrabaho nga magtinagsa o sa grupo sa pagsulat og pipila ka mga parapo mahitungod sa unsay ilang nakit-an ug dayon sa pagpaambit unsay ilang gisulat. Pagpili og usa o sobra pa sa mosunod nga mga kalihokan sa pagtabang aron mas masabtan nila og maayo kini nga hilisgotan.

• Ang mga himno makadapit sa Espiritu ug makatudlo sa doktrina sa mas impluwensyal nga paagi. Ikonsiderar ang pagrebyo og usa ka himno mahitungod kon sa unsang paagi ang Manluluwas motabang kanato sa atong mga pagsulay, sama sa “Unsa Kalig-on ang Tukuranan” (Mga Himno, nu. 44). Unsa ang gitudlo sa himno mahitungod sa tabang nga ikahatag sa Manluluwas kanato? Ang kabatan-onan mahimo dayon nga morebyo sa mga tudling sa kasulatan diha sa “Suporta nga mga Kapanguhaan.” Tingali mas makaayo kanila ang pagrekord og usa ka hugpong sa mga pulong gikan sa himno o usa sa mga kasulatan nga magpahinumdom kanila sa pagtinguha sa Manluluwas panahon sa ilang mga kalisdanan.

• Ang mensahe ni Presidente Henry B. Eyring nga “Nasulayan, Napamatud-an, ug Nahashasan” makatabang niadtong imong gitudloan nga mas makasabot sa mga pangutana sama sa mosunod: Unsa ang pipila ka mga katuyoan sa atong mortal nga mga pagsulay? Sa unsang paagi nga ang Manluluwas makatabang kanato sa atong mga hagit? Unsay mahimo natong buhaton aron maangkon ang tabang ug gahom sa Manluluwas? Ikonsiderar ang pagsulat niini nga mga baroganan diha sa pisara. Ang mga sakop sa klase o korum mahimong makapangita og mga tubag diha sa mensahe ni Presidente Eyring. Sama pananglit, unsa may atong nakat-onan gikan sa mga istorya mahitungod sa inahan ni Presidente Eyring diha dapit sa sinugdanan ug kataposan sa mensahe? Mahimo nimong hangyoon ang matag tawo sa pagpamalandong unsaon nila sa paggamit unsay ilang nakat-onan diha sa kaugalingon nilang mga pagsulay. Ang pipila ka batan-on tingali andam nga mopaambit sa ilang mga hunahuna.

• Si Sister Lisa L. Harkness misaysay sa sugilanon sa Manluluwas nga mipahunong sa unos aron sa pagtudlo nga Siya makapahunong sa mga unos sa atong kinabuhi (tan-awa sa Marcos 4:35–41; “Hil[o]m, Hunong,” Liahona, Nob. 2020, 80–82). Mahimo kang magdapit og usa ka sakop sa klase o korum aron motambong siya nga andam mopaambit sa unsay iyang nakat-onan mahitungod sa Manluluwas gikan sa asoy diha sa kasulatan. Kini nga tawo mahimo usab nga mopakita og litrato (tan-awa sa Libro sa mga Hulagway sa Ebanghelyo, nu. 40). Ang kabatan-onan mahimo dayon nga morebyo sa unsay gitudlo ni Sister Harness kon sa unsang paagi ang Manluluwas “maanaa sa atong sakayan” kon mag-atubang kita og mga hagit. Mahimo nimong dapiton ang mga indibidwal sa pagpaambit kon sa unsang paagi ang Manluluwas mitabang kanila sa ilang mga pagsulay, lakip kon sa unsang paagi Siya mitabang kanila pinaagi sa ubang mga tawo. Awhaga ang mga batan-on sa pagpaambit sa ilang mga kasinatian nga kauban sa usa ka tawo nga ilang nailhan kinsa nagkinahanglan og kalinaw gikan sa Manluluwas.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Isaias 53:3–5; Mga Hebreohanon 2:17–18; Alma 7:11–13; 36:3; Ether 12:27 (Ang Manluluwas motabang kanato sa atong mga pagsulay)

• Dieter F. Uchtdorf, “Ang Dios Mobuhat og Butang nga Dili Mahanduraw,” Liahona, Nob. 2020, 51–54

• Cristina B. Franco, “Ang Makaayo nga Gah[o]m ni Jesukristo,” Liahona, Nob. 2020, 60–62

Pagtudlo sumala sa Pamaagi sa Manluluwas

“Ang pagpangutana og mga pangutana nga makaawhag sa mga tigkat-on sa pagpamatuod kabahin sa mga baroganan nga gitudlo mahimong usa ka impluwensyal kaayo nga paagi sa pagdapit sa Espiritu. … Ang ilang mga pagpamatuod—ug ang mga pagpamatuod sa uban diha sa klase—motubo samtang ang Espiritu mohatag og pagsaksi sa kamatuoran” (Pagtudlo sumala sa Pamaagi sa Manluluwas, 32).