Ang Dios Mobuhat og Butang nga Dili Mahanduraw

Oktubre 2020 nga kinatibuk-ang komperensya

15:17

Ang Dios Mobuhat og Butang nga Dili Mahanduraw

Ni Elder Dieter F. Uchtdorf

Sa Korum sa Napulog Duha ka mga Apostoles

Ang Dios miandam sa Iyang mga anak ug sa Iyang Simbahan alang niini nga panahon.

Wala madugay human sa ilang pag-abut didto sa Walog sa Salt Lake, ang mga Santos sa Ulahing mga Adlaw misugod sa pagtukod sa ilang balaan nga templo. Gibati nila nga sa katapusan nakit-an na nila ang dapit diin sila makasimba sa Dios diha sa kalinaw ug mahimong luwas gikan sa pagpanggukod.

Hinoon, dihang hapit na mahuman ang pundasyon sa templo, usa ka pundok sa kasundalohan sa Estados Unidos miabot aron ipugos pag-instalar ang usa ka bag-ong gobernador.

Tungod kay wala masayud ang mga lider sa Simbahan kon unsa ka bangis ang mga sundalo, gisugo ni Brigham Young ang mga Santos sa pagbakwit ug paglubong sa pundasyon sa templo.

Nakasiguro ko nga pipila ka sakop sa Simbahan nahibulong nganong ang ilang mga paninguha sa pagtukod sa gingharian sa Dios kanunay nga gipakgang.

Sa katapusan, ang kakuyaw milabay, ug ang mga pundasyon sa templo gikalut ug gisusi. Didto dayon nadiskobre sa mga pioneer nga mga panday nga ang uban sa orihinal nga mga sandstone nangliki, naghimo niini nga dili angay isip usa ka pundasyon.

Tungod niini, si Brigham misugo kanila sa pag-ayo sa pundasyon aron igo kini nga makasupporta sa mga graninte¹ nga mga bongbong sa halangdon nga Templo sa Salt Lake.² Sa katapusan, ang mga Santos nakakanta sa Himno “Unsa Kalig-on ang Tukuranan”³ ug nasayud nga ang ilang balaang templo gitukod sa usa ka lig-on nga tukuranan nga molungtad sa daghang mga henerasyon.

Kini nga istorya makatudlo kanato kon giunsa sa Dios paggamit ang mga kalisdanan aron sa pagpahinabo sa Iyang mga katuyoan.

Tibuok Kalibutan nga Pandemya

Kon pamilyar kini basi sa mga sirkumstansya nga atong nasinati karon, tungod kay mao gayud kana.

Nagduhaduha ko nga adunay tawo nga nakadungog o nakabasa sa akong tingog kinsa wala maapektuhi niining tibuok kalibutan nga pandemya.

Niadtong kinsa nagsubo sa pagkawala sa pamilya ug mga higala, kami nagsubo uban kaninyo. Kami nangamuyo sa Langitnong Amahan sa paghupay ug pag-agak kaninyo.

Ang taas nga sangputanan niini nga virus lapas pa kay sa pisikal nga kahimsog. Daghang mga pamilya ang nawad-an og kinitaan ug gihulga sa kagutom, kawalay kasigurohan, ug kakulba. Kami midayeg sa dili para sa kaugalingon nga mga paningkamot sa kadaghanan aron mapugngan ang pagkatap niini nga sakit. Kami nagmapaubsanon sa hilum nga sakripisyo ug halangdon nga mga paningkamot niadtong kinsa mirisgo sa ilang kaugalingon nga kahilwasan aron sa pagtabang, pag-ayo, ug pagsuporta sa mga tawo nga nanginahanglan. Ang among mga kasingkasing puno sa pasalamat sa inyong kaayo ug kalooy.

Kami kusganong nag-ampo nga ang Dios moabli sa mga bintana sa langit ug mopuno sa inyong mga kinabuhi sa mahangturong mga panalangin sa Dios.

Kita Mga Binhi

Daghan pang wala mahibaloi bahin niini nga virus. Apan kon dunay usa ka butang nga ako nasayud gayud, mao nga kini nga virus wala gayud makasurprisa sa Langitnong Amahan. Wala Niya kinahanglana ang pagtawag og dugang mga batalyon sa mga anghel, pagtawag og emerhensya nga mga miting, o pagtipas sa mga kapanguhaan gikan sa dibisyon sa paghimo sa kalibutan aron sa pagtubag sa usa ka wala damha nga panginahanglan.

Ang akong mensahe karon mao nga bisan kon kini nga pandemya dili mao ang atong ganahan o gilauman, ang Dios miandam sa Iyang mga anak ug sa Iyang Simbahan alang niini nga panahon.

Kita molahutay niini, oo. Apan mobuhat kita og sobra pa kay sa pagpakagot sa atong ngipon, pag-agwanta, ug paghulat hangtud mabalik ang tanan sa karaang normal. Kita magpadayon, ug mahimong mas maayo isip resulta.

Sa usa ka paagi, kita mga binhi. Ug aron ang mga binhi moabut sa ilang potensyal, kini kinahanglan nga ilubong sa dili pa moturok. Akong ipamatuod nga bisan kon usahay kita mobati nga gilubong sa mga pagsulay sa kinabuhi o gilibutan sa emosyonal nga kangitngit, ang gugma sa Dios ug ang mga panalangin sa gipahiuli nga ebanghelyo ni Jesukristo makahatag og usa ka butang nga halos dili nato mahanduraw.

Ang mga Panalangin Nagagikan sa mga Kalisdanan

Ang matag dispensasyon miatubang sa mga panahon sa pagsulay ug mga kalisdanan.

Si Enoch ug ang iyang katawhan nagpuyo sa panahon sa kadautan, mga gubat, ug panagpatay. “Apan ang Ginoo miabut ug mipuyo uban sa iyang mga katawhan.” Siya naghunahuna og usa ka butang nga dili mahanduraw alang kanila. Siya mitabang kanila sa pagtukod sa Zion—usa ka katawhan nga “usa sa kasingkasing ug usa sa hunahuna”, kinsa “nagpuyo diha sa pagkamatarung”⁴

Ang batan-ong Jose, anak ni Jacob, gilabay sa kimba, gibaligya sa pagkaulipon, gibudhian, ug gipasagdan.⁵ Si Jose siguro nangutana kon ang Dios nakalimot ba kaniya. Ang Dios naghunahuna og usa ka butang nga dili mahanduraw alang kang Jose. Gigamit niya kining panahon sa pagsulay aron sa paglig-on sa kinaiya ni Jose ug sa pagbutang niya sa sitwasyon nga siya makaluwas sa iyang pamilya.⁶

Hunahunaa si Joseph Smith nga Propeta samtang gibilanggo didto sa Bilanggoan sa Liberty, giunsa niya paghangyo og kahupayan alang sa nag-antus nga mga Santos. Siya siguro naghunahuna kon unsaon kaha sa pagkatukod sa Zion niadto nga mga sirkumstansya. Apan ang Ginoo namulong og kalinaw ngadto kaniya, ug ang mahimayaon nga pagpadayag nga misunod mihatag og kalinaw ngadto sa mga Santos—ug kini nagpadayon sa paghatag og kalinaw nganha kaninyo ug kanako.⁷

Pila ka higayon sa unang mga tuig sa Simbahan ni Jesukristo sa mga Santos sa Ulahing mga Adlaw ang mga Santos naluya ug naghunahuna kon ang Dios nakalimot ba kanila? Apan latas sa mga pagpanggukod, kakuyaw, ug mga hulga nga hutdon sa pagpatay, ang Ginoong Dios sa Israel naghunahuna og laing butang alang sa Iyang gamay nga panon. Usa ka butang nga dili mahanduraw.

Unsa ang atong nakat-unan gikan niini nga mga ehemplo—ug sa ubang gatusan pa diha sa kasulatan?

Una, ang mga matarung wala hatagi og libre nga pasis nga motugot kanila sa paglikay sa mga walog sa kalisdanan. Kitang tanan kinahanglan nga molabang sa malisud nga mga panahon, kay dinhi niini nga mga panahon sa kalisdanan nga kita makat-on sa mga baruganan nga makalig-on sa atong mga kinaiya ug makadasig kanato sa pagpaduol ngadto sa Dios.

Ikaduha, ang atong Langitnong Amahan nasayud nga kita mag-antus, ug tungod kay kita Iyang mga anak, Siya dili motalikod kanato.⁸

Hunahunaa ang usa nga maloloy-on, ang Manluluwas, kinsa migahin og dakong bahin sa Iyang kinabuhi sa pagpangalagad sa masakiton, sa magul-anon, sa nagduha-duha, sa nagkaluya.⁹ Kamo naghunahuna ba nga mas minus ang Iyang pagpakabana kaninyo karon?

Akong mga higala, minahal nga kaigsoonan, ang Dios mobantay ug mogiya kaninyo niining mga panahon sa kawalay kasigurohan ug kahadlok. Siya nakaila kaninyo. Siya maminaw sa inyong mga pangaliya. Siya matinud-anon ug kasaligan. Siya motuman sa Iyang mga saad.

Ang Dios naghunahuna og dili mahanduraw nga butang alang kaninyo sa personal ug sa tibuok Simbahan—usa ka kahibulongan nga buhat ug usa ka katingalahan.

Salamat, O Dios, sa Propeta

Ang labing maayong mga adlaw anaa sa umaabot, wala sa nangagi. Kini ang hinungdan nga ang Dios naghatag kanato og bag-o nga pagpadayag! Kon wala kini, ang kinabuhi tingali mahisama sa pautaw-utaw nga paglupad, maghulat nga mahanaw ang gabon aron kita makatugpa nga luwas. Ang mga katuyoan sa Ginoo mas labaw pa kaayo kay sa niana. Tungod kay kini ang Simbahan sa buhing Kristo, ug tungod kay Siya nagdirekta sa Iyang mga propeta, kita nagpadayon ug nagpaibabaw, ngadto sa mga dapit nga wala pa nato maadto, sa mga kahabugon nga halos dili nato mahanduraw!

Karon, wala magpasabot nga kita dili makasinati og mga sagabal sa atong biyahe latas sa mortalidad. Wala magpasabot nga walay kalit nga mga kadaot sa mga instrumento, mga kadaot sa makina, ug grabe nga mga hagit sa panahon. Gani, ang mga panghitabo mahimong mas mograbe sa dili pa kini moarang-arang.

Isip usa ka manggugubat nga piloto [fighter pilot] ug kapitan sa airline, nakat-on ko nga samtang dili ko makapili sa kalisdanan nga akong ma-ingkwentro atol sa paglupad, makapili ko kon unsaon nako pagpangandam ug pagsugakod. Ang gikinahanglan sa mga panahon sa krisis mao ang kalma ug tin-aw sa pangisip nga pagsalig.

Unsaon nato sa pagbuhat niini?

Atong atubangon ang kamatuoran ug mobalik ngadto sa pinakauna, sa sukaranang mga baruganan sa ebanghelyo, sa unsay pinakamahinungdanon. Kamo mopalig-on sa inyong pribado nga relihiyoso nga kinaiya—sama sa pag-ampo ug pagtuon sa kasulatan ug pagtuman sa mga sugo sa Dios. Kamo mohimo og mga desisyon basi sa pinakamaayo nga naprobahan nga mga pamaagi.

Tutuki ang mga butang nga inyong mahimo ug dili ang mga butang nga dili ninyo mahimo.

Tiguma ang kusog sa inyong hugot nga pagtuo. Ug paminawa ninyo ang makagiya nga pulong sa Ginoo ug sa Iyang propeta nga modala ninyo ngadto sa kahilwasan.

Hinumdumi, kini Simbahan ni Ginoong Jesukristo—Siya ang nangulo niini.

Hunahunaa ang daghang dinasig nga kauswagan nga nahitabo sa miaging dekada lamang. Aron paghisgot sa pipila:

Ang sakramento gipaklaro pag-usab isip ang sentro sa atong pagsimba sa Igpapahulay.
Ang Dali, Sunod Kanako gisangkap isip nakasentro sa pamilya, gisuportahan sa Simbahan nga himan sa paglig-on sa mga indibidwal ug mga pamilya.
Atong gisugdan ang mas taas ug mas balaan nga paagi sa pagpangalagad sa tanan.
Ang paggamit sa teknolohiya sa pagpaambit sa ebanghelyo ug paglihok sa buhat sa Dios ningkatap sa tibuok Simbahan.

Bisan kini nga mga kinatibuk-ang komperensya dili mahimong posibli kon wala kining katingalahan nga mga himan sa teknolohiya.

Mga kaigsoonan, uban ni Kristo nga nagdala sa timon, dili lang kay ang tanan mainsakto; sobra pa kini kay sa atong mahanduraw.

Ang Buhat sa Pagpundok sa Israel Magpadayon

Sa sinugdan maingon nga ang tibuok kalibutan nga pandemya mahimong babag sa buhat sa Ginoo. Sama pananglit, ang tradisyonal nga mga paagi sa pagpaambit sa ebanghelyo dili na posibli. Hinuon, ang pandemya nagpadayag og bag-o ug maanindot nga mga paagi sa pagduol ngadto sa matinuoron og kasingkasing. Ang buhat sa pagpundok sa Israel nagkadugang sa gahum ug kadasig. Gatusan ug liboan ka mga istorya nagpamatuod niini.

Usa ka maayong higala nga nagpuyo sa matahum nga Norway nagsulat ngadto ni Harriet ug kanako bahin sa bag-ong pagdaghan sa mga bunyag. “Sa mga dapit diin gamay pa ang Simbahan,” siya misulat, “ang salingsing mahimong mga sanga [branch], ug ang mga branch mahimong mga ward!!”

Sa Latvia, usa ka babaye kinsa nakadiskobre sa Simbahan pinaagi sa pagklik sa usa ka pahinumdom sa internet naghinamhinam kaayo nga makat-on sa ebanghelyo ni Jesukristo nga siya nag-una og usa ka oras sa pag-adto sa iyang appointment, ug sa wala pa mahuman ang unang leksyon sa mga misyonaryo nangayo siya og petsa aron mabunyagan.

Sa Silangang Uropa [Eastern Europe], usa ka babaye kinsa nakadawat og tawag gikan sa mga misyonaryo mituaw, “Sisters, nganong wala man mo manawag sa una? Dugay na kong naghulat!”

Daghan sa atong mga misyonaryo mas nagkapuliki pa kay sa una. Daghan ang nagtudlo og mas daghan pang mga tawo kay sa una. Nagkadako ang koneksyon tali sa mga miyembro ug mga misyonaryo.

Kaniadto, basin naanad kaayo kita sa tradisyonal nga mga paagi nga nagkinahanglan og pandemya aron mabuka ang atong mga mata. Tingali nagpanday gihapon kita gamit ang sandstone dihang ang granite anaa na. Kay gikinahanglan, kita karon nagkat-on sa paggamit og lain-laing paagi, lakip sa teknolohiya, sa pagdapit og mga tawo—sa normal og natural nga mga paagi—sa pagduol ug pagtan-aw, pagduol ug pagtabang, ug pagduol ug pagpasakop.

Iyang Buhat, Iyang mga Paagi

Kini ang buhat sa Ginoo. Siya nagdapit kanato sa pagkaplag sa Iyang mga paagi sa pagbuhat niini, ug kini mahimong lahi kay sa atong kanhi nga mga kasinatian.

Nahitabo kini ni Simon Pedro ug sa ubang mga disipulo kinsa nangisda didto sa Lanaw sa Tiberias.

“Wala gayod silay nakuha tibuok gabii.

“Sa pagsubang na sa adlaw, nagtindog si Jesus didto sa lapyahan. …

“Siya miingon kanila, Itaktak ang inyong pukot [dapit sa tuo] sa sakayan ug makakuha kamo.”

Gitaktak nila ang ilang pukot dapit sa tuo ug “wala na sila makadaog pagbira niini kay daghan man kaayo ang ilang nakuha.”¹⁰

Ang Dios nagpadayag ug mopadayon sa pagpadayag sa Iyang makakagahum nga kamot. Ang adlaw moabut dihang kita molingi ug masayud nga sa panahon niini nga kalisud, ang Dios nagtabang kanato sa pagkaplag og mas maayong pamaagi—Iyang pamaagi—sa pagtukod sa Iyang gingharian ibabaw sa lig-on nga tukuranan.

Ako mosaksi nga buhat kini sa Dios ug Siya mopadayon sa paghimo og daghan nga dili nato mahanduraw nga mga butang taliwala sa Iyang mga anak, Iyang katawhan. Ang Dios naggunit kanato diha sa palad sa Iyang mapinanggaon ug maloloy-on nga mga kamot.

Ako mopamatuod nga si Presidente Russell M. Nelson mao ang propeta sa Dios alang sa atong panahon.

Isip usa ka Apostol sa Ginoo, ako modapit ug manalangin kaninyo nga “magmalipayon sa pagbuhat sa tanan nga mga butang nga ubos sa [inyong] gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag.”¹¹ Ug ako mosaad nga ang Ginoo mopahinabo sa dili mahanduraw nga mga butang nga moabut gikan sa inyong matarung nga mga paghago. Sa ngalan ni Jesukristo, amen.