Magpadayon
Ang buhat sa Ginoo makanunayon nga magpadayon.
Akong minahal nga mga kaigsoonan, pagkadakong kalipay ang makig-uban kaninyo samtang magsugod kita sa ika-190 nga Semiannual nga Kinatibuk-ang Komperensya sa Ang Simbahan ni Jesukristo sa mga Santos sa Ulahing mga Adlaw. Ganahan kong makig-uban kaninyo sa inyong mga panimalay o kon asa man kamo aron magdungan sa pagpaminaw sa mga mensahe sa mga propeta, mga manalagna, ug mga tigpadayag ug ubang mga lider sa Simbahan.
Mapasalamaton kita alang sa mga teknolohiya nga nagtugot kanato nga makonektar isip usa ka dakong tibuok kalibutan nga panagpundok sa mga disipulo ni Jesukristo. Ang Kinatibuk-ang komperensya sa miaging Abril gitan-aw sa mas daghang mga tawo kay sa bisan hain sa nag-una niini, ug dako ang among paglaum nga mahitabo kadto pag-usab.
Atol sa nangaging pipila ka bulan, usa ka tibuok kalibutan nga pandemya, bangis nga mga sunog sa kakahoyan, ug ubang natural nga mga kalamidad ang nakaapekto sa kalibutan. Nagbangutan ako uban sa matag usa kaninyo kinsa nawad-an og minahal atol niining panahona. Ug ako nag-ampo alang sa tanan nga kasamtangang nag-antus.
Sa samang higayon, ang buhat sa Ginoo makanunayon nga magpadayon. Taliwala sa sosyal nga pagpalayo, mga face mask, ug mga Zoom miting, nakakat-on kita og pipila ka butang nga lahi ug ang uban mas epektibo pa gani. Ang talagsaon nga panahon makahatag og talagsaon nga mga ganti.
Ang atong mga misyonaryo ug mga lider sa misyon nahimong matinguhaon, lig-on, ug talagsaon gayud. Bisan tuod kadaghanan sa mga misyonaryo kinahanglang mangita og bag-o, mamugnaon nga mga paagi sa paghimo sa ilang buhat, daghan nga mga misyon ang mireport nga nakahimo og mas daghan nga pagtudlo kay sa kaniadto.
Kita kinahanglan manira sa mga templo sa kasamtangan, ug ang ubang pipila ka konstruksyon nga mga proyekto sa makadiyot gidilatar usa, apan karon kining tanan magpadayon. Sa tuig 2020, kita makasugod sa pagtukod og 20 ka bag-ong templo!
Ang buhat sa family history milambo pag-ayo. Daghang bag-o nga mga ward ug mga stake ang natukod. Ug kami malipayon nga moreport nga ang Simbahan nakahatag og humanitarian nga tabang sa pandemya alang sa 895 ka mga proyekto diha sa 150 ka mga nasud.
Ang nagsaka nga gidaghanon sa mga nagtuon sa ebanghelyo dinha sa daghang mga panimalay miresulta sa mas lig-on nga mga pagpamatuod ug mga relasyon sa pamilya. Usa ka inahan ang misulat: “Kami mibati nga mas suod sa among mga anak ug mga apo karon nga kami magkapundok pinaagi sa Zoom matag Dominggo. Ang matag usa magbanus-banus og hatag sa ilang mga huna-huna bahin sa Dali, Sunod Kanako. Ang mga pag-ampo alang sa mga sakop sa among pamilya nausab tungod kay kami mas nakasabut kon unsay ilang panginahanglan.”
Ako nag-ampo nga kita isip usa ka katawhan naggamit niining talagsaon nga panahon sa paglambo sa espirituhanong paagi. Ania kita dinhi sa yuta aron pagasulayan, aron makita kon kita mopili sa pagsunod ni Jesukristo, maghinulsol kanunay, aron makakat-on, ug mouswag. Ang atong mga espiritu nagtinguha nga mouswag. Ug kita labing makahimo niana pinaagi sa pagpabiling lig-on diha sa dalan sa pakigsaad.
Latas niining tanan, ang atong Langitnong Amahan ug ang Iyang Anak, nga si Jesukristo, nahigugma kanato! Naghunahuna sila kanato! Sila ug ang balaan Nilang mga anghel nagbantay kanato. 1 Ako nasayud nga kana tinuod.
Samtang kita nagpundok aron maminaw sa mga pulong nga ang Ginoo midasig sa Iyang mga sulugoon sa paghatag, dapiton ko kamo sa pagpamalandong og usa ka saad nga gihimo sa Ginoo. Siya mipahayag “bisan kinsa ang motinguha mahimo nga mosagop diha sa pulong sa Dios, diin buhi ug gamhanan, nga mobuak sa kinahiladman sa tanan nga mga kaigmat … ug sa mga pagpanghaylo sa yawa, ug modala sa [disipulo] ni Kristo diha sa higpit ug pig-ot nga agianan.” 2
Ako nag-ampo nga kamo mopili sa paghupot sa pulong sa Dios ingon nga kini gipahayag atol niining kinatibuk-ang komperensya. Ug ako nag-ampo nga hinaut inyong mabati ang hingpit nga gugma sa Ginoo alang kaninyo, 3 sa sagrado nga ngalan ni Jesukristo, amen.