Dihay Tinapay
Samtang maninguha kita nga maandam sa temporal nga paagi, makasagubang kita sa mga pagsulay sa kinabuhi uban sa naglambo nga pagsalig.
Sa wala pa ang mga restriksyon sa pagbiyahe nga resulta sa kasamtangan nga pandemya, miuli ko gikan sa usa ka internasyonal nga buluhaton diin, tungod sa mga isyu sa iskedyul, wala dayon ko makalarga niana nga Dominggo. Ako adunay panahon sa wala pa ang mga paglupad [flight] aron makatambong og usa ka lokal nga panagtigum alang sa sakramento, diin nakahimo ko sa pagpaambit og mubo nga mensahe. Human sa panagtigum, usa ka madasigon nga deacon ang miduol nako ug nangutana kon nakaila ba ko ni Presidente Nelson ug kon nakalamano ba ko niya. Mitubag ko nga nakaila ko niya, nga nakalamano ko niya, ug nga, isip usa ka sakop sa Presiding Bishopric, ako adunay oportunidad nga mahimamat si Presidente Nelson ug ang iyang mga magtatambag pipila ka higayon matag semana.
Ang batan-on nga deacon milingkod dayon sa lingkuranan, miisa sa iyang mga kamot, ug misinggit, “Mao kini ang pinakanindot nga adlaw sa akong kinabuhi!” Mga kaigsoonan, dili man tuod ko moisa sa akong mga kamot ug mosinggit, apan mapasalamaton ko sa kahangturan alang sa usa ka buhi nga propeta ug alang sa direksyon nga atong nadawat gikan sa mga propeta, mga manalagna, ug mga tigpadayag, ilabi na niining mga panahon sa hagit.
Gikan sa sinugdanan sa panahon, ang Ginoo mihatag og direksyon aron tabangan ang Iyang katawhan nga makaandam sa espirituhanon ug sa temporal nga paagi batok sa mga kalamidad ug mga pagsulay nga Siya nasayud nga moabut isip kabahin niining mortal nga kasinatian. Kini nga mga kalamidad mahimo nga sa kaugalingon o sa kinatibuk-ang kahimtang, apan ang giya sa Ginoo makahatag og proteksyon ug suporta ngadto sa punto nga kinahanglan kitang mopatalinghug ug molihok sa Iyang tambag. Usa ka talagsaong ehemplo ang gihatag diha sa usa ka asoy gikan sa basahon sa Genesis, diin nahibalo kita bahin ni Jose sa Ehipto ug sa iyang dinasig nga interpretasyon sa damgo sa Paraon.
“Si Jose miingon kang Paraon, … gipadayag sa Dios kanimo ang iyang buhaton. …
“Mahitabo ang pito ka tuig nga hilabihan kaabunda ang abot sa mga kaumahan sa tibuok Ehipto:
“Unya mobanos ang pito usab ka tuig nga gutom; ug tungod niini hikalimtan ang mga tuig nga abunda kaayo ang mga pagkaon sa tibuok Ehipto.” 1
Ang Paraon naminaw kang Jose, misanong sa unsay gipakita sa Dios kaniya diha sa usa ka damgo, ug misugod dayon sa pagpangandam alang sa unsay moabut. Diha sa mga kasulatan narekord dayon:
“Sulod sa pito ka tuig nga kadagaya daghan kaayo ang abot sa kaumahan.
“Gitigum ni Jose ang tanang abot sulod sa pito ka tuig. …
“Ug labihan kadaghan ang iyang natigom nga kini daw mga balas sa baybayon, … hangtud nga giundangan niya ang pagtakos niini; kay dili na man kini matakos.” 2
Sa dihang milabay na ang pito ka tuig sa kaabunda, gisultihan kita nga “mibanos ang pito ka tuig nga gutom, sumala gayud sa giingon ni Jose: ug dihay gutom sa tanan nga kayutaan; apan sa tibuok nga yuta sa Ehipto dihay tinapay.” 3
Karon bulahan kita nga mapangulohan og mga propeta nga nakasabut nga kinahanglan kitang mangandam batok sa mga kalamidad “nga moabut” 4 ug kinsa nahibalo usab sa mga limitasyon o mga restriksyon nga mahimo natong masugatan diha sa pagpaningkamot nga mosunod sa ilang tambag.
Adunay klaro nga panabut nga ang mga epekto sa COVID-19, ingon man usab sa makahugno nga kinaiyanhong mga katalagman, walay gipili nga mga tawo ug mitadlas sa mga utlanan sa kaliwatan, katilingban, ug relihiyon sa matag kontinente. Ang mga trabaho nawala ug ang mga kinitaan mikunhod samtang ang oportunidad sa pagpanarbaho naapektuhan sa mga pagpanangtang ug ang abilidad sa pagpanarbaho naapektuhan sa mga hagit sa panglawas ug sa legal nga paagi.
Sa tanan nga naapektuhan, kami mopahayag sa among pagsabut ug kabalaka alang sa inyong sitwasyon, ingon man usab sa lig-on nga kombiksyon nga ang mas maayo nga mga adlaw moabut ra. Bulahan kamo nga adunay mga bishop ug mga presidente sa branch kinsa nangita sa mga sakop sa ilang mga kongregasyon nga adunay temporal nga mga panginahanglan ug kinsa adunay magamit nga mga himan ug mga kapanguhaan nga makatabang kaninyo aron maestablisar pag-usab ang inyong kinabuhi ug mopahimutang kaninyo diha sa dalan paingon sa pagbarug sa kinaugalingong paningkamot [self-reliance] samtang inyong gamiton ang mga baruganan sa pagpangandam.
Sa kahimtang karon, nga adunay pandemya nga mipahugno sa tibuok nga mga ekonomiya ug sa tagsa-tagsa nga mga kinabuhi, dili makatarunganon nga ang usa ka maloloy-on nga Manluluwas mobaliwala sa kamatuoran nga daghan ang nanglimbasug ug mohangyo kanila nga magsugod sa paghimo og usa ka reserba sa pagkaon ug kwarta alang sa umaabut. Hinoon, wala kana magpasabut nga kinahanglang permanente kitang mobaliwala sa mga baruganan sa pagpangandam—kinahanglan lamang nga kining mga baruganan gamiton “diha sa kaalam ug kahusay” 5 aron sa umaabut makaingon kita, sama sa gibuhat ni Jose sa Ehipto, “Dihay tinapay.” 6
Wala paabuta sa Ginoo nga mobuhat kita og labaw pa kay sa atong mahimo, apan gipaabut Niya nga kita mobuhat sa unsay atong mahimo, kon ato kanang mahimo. Sama sa gipahinumdom ni Presidente Nelson kanato sa atong katapusan nga kinatibuk-ang komperensya, “Ang Ginoo ganahan og paningkamot.” 7
Ang mga lider sa Simbahan kanunay nga nagdasig sa mga Santos sa Ulahing mga Adlaw “sa pagpangandam alang sa kalisdanan sa kinabuhi pinaagi sa pagbaton sa nag-una nga mga suplay sa pagkaon ug tubig ug pipila ka kwarta nga tinigom.” 8 Sa samang higayon, gi-awhag kita nga “magmaalamon” ug “[dili magpasulabi]” 9 sa atong mga paningkamot sa pag-establisar og suplay sa pagtipig og pagkaon ug tubig sa panimalay ug reserba nga kwarta. Usa ka kapanguhaan nga giulohan og Personal nga Panalapi alang sa Self-Reliance, nga gimantala niadtong 2017, ug anaa karon sa website sa Simbahan sa 36 ka pinulongan, gisugdan sa usa ka mensahe gikan sa Unang Kapangulohan, nga namahayag:
“Ang Ginoo namahayag, ‘Mao kini ang akong katuyoan sa paghatag sa akong mga santos’ [Doktrina ug mga Pakigsaad 104:15]. Kini nga pinadayag usa ka saad gikan sa Ginoo nga Siya mosangkap sa temporal nga mga panalangin ug moabli sa mga oportunidad sa pagkabarug sa kinaugalingong paningkamot [self-reliance]. …
“… Ang pagdawat ug pagsunod niining mga baruganan mas makapahimo ninyong makadawat sa temporal nga mga panalangin nga gisaad sa Ginoo.
“Amo kamong dapiton nga magkugi sa pagtuon ug mogamit niining mga baruganan ug motudlo niini sa mga sakop sa inyong pamilya. Sa pagbuhat ninyo sa ingon, ang inyong kinabuhi mapanalanginan … [tungod kay] kamo anak sa atong Amahan sa Langit. Nahigugma Siya kaninyo ug dili gayud mosalikway kaninyo. Nakaila Siya ninyo ug andam nga mopadangat diha ninyo sa espiritwal ug temporal nga mga panalangin sa pagka-self-reliant.” 10
Kini nga kapanguhaan naglakip sa mga kapitulo nga gipahinungod sa pagmugna ug pagsunod og usa ka badyet, pagpanalipod sa inyong pamilya batok sa kalisud, pagdumala sa usa ka pinansyal nga krisis, ug pagpamuhunan alang sa umaabut, ug daghan pa ug magamit sa tanan diha sa website sa Simbahan o pinaagi sa inyong lokal nga mga lider.
Kon magkonsiderar sa baruganan sa pagpangandam, mahimo natong balikan ang istorya bahin ni Jose sa Ehipto alang sa inspirasyon. Ang pagkasayud kon unsa ang mahitabo dili ra paigo aron makalatas sila sa katuigan sa “kagutom” nga walay igong sakripisyo panahon sa katuigan sa kaabunda. Imbis nga mohurot sa tanan nga abot sa mga ginsakupan sa Paraon, giestablisar ang mga limitasyon ug gisunod, nagsangkap og igo alang sa ilang hinanali, ingon man usab sa ilang umaabut, nga mga panginahanglan. Dili paigo nga masayud lang nga moabut ang mahagiton nga mga panahon. Kinahanglan silang molihok, ug tungod sa ilang paningkamot, “dihay tinapay.” 11
Mosangput kini sa usa ka importante nga pangutana: “Unya, unsa man?” Usa ka maayong dapit sa pagsugod mao ang pagsabut nga ang tanang butang espirituhanon ngadto sa Ginoo, “ug wala mahinabo sa bisan unsa nga panahon” nga mihatag Siya kanato og “balaod nga temporal.” 12 Nan, ang tanan, nagpunting ngadto kang Jesukristo isip ang pundasyon diin gikinahanglan gayud kita nga matukod bisan ang atong temporal nga pagpangandam.
Ang pagkahimong andam sa temporal nga paagi ug pagkahimong makabarug sa kinaugalingong paningkamot nagpasabut sa “pagtuo nga pinaagi sa grasya, o sa gahum ni Jesukristo nga makapahimo, ug pinaagi sa kaugalingon natong paningkamot, maangkon nato ang tanan nga espiritwal ug temporal nga panginahanglan sa kinabuhi nga gikinahanglan nato sa atong kaugalingon ug sa atong mga pamilya.” 13
Ang dugang nga mga aspeto sa usa ka espirituhanon nga pundasyon alang sa temporal nga pagpangandam naglakip sa paglihok “diha sa kaalam ug kahusay,” 14 nga nagpasabut og anam-anam nga pagtipig og pagkaon ug kwarta sa hinay-hinay, ingon man usab ang paghangup sa “gagmay ug yano” nga mga butang, 15 nga usa ka pagpakita sa hugot nga pagtuo nga ang Ginoo mopalambo sa atong ginagmay apan makanunayon nga mga paningkamot.
Uban sa usa ka espirituhanon nga pundasyon nga napahimutang na, malampuson dayon kitang makagamit sa duha ka importante nga mga elemento sa temporal nga pagpangandam—pagdumala sa panalapi ug pagtipig og pagkaon ug tubig sa panimalay.
Ang mahinungdanong mga baruganan sa pagdumala sa inyong panalapi naglakip sa pagbayad og mga ikapulo ug mga halad, pagtangtang ug paglikay sa utang, pag-andam ug pagsunod og usa ka badyet, ug pagtigum alang sa umaabut.
Ang mahinungdanong mga baruganan sa home storage naglakip sa pagtipig og pagkaon, pagpundo og tubig, ug sa pagtipig og ubang mga kinahanglanon base sa mga panginahanglan sa tagsa-tagsa ug sa pamilya, tanan tungod kay “ang labing maayo nga balay tipiganan” 16 mao ang panimalay, nga nahimong “labing magamit nga reserba sa panahon sa panginahanglan.” 17
Kon atong hangupon ang espirituhanon nga mga baruganan ug magtinguha og inspirasyon gikan sa Ginoo, magiyahan kita nga masayud sa kabubut-on sa Ginoo alang kanato, sa tagsa-tagsa ug isip mga pamilya, ug unsaon paggamit sa labing maayo nga paagi ang importante nga mga baruganan sa temporal nga pagpangandam. Ang labing importante nga lakang sa tanan mao ang pagsugod.
Si Elder Bednar mitudlo niini nga baruganan sa dihang siya miingon: “Ang paglihok mao ang pagpakita sa hugot nga pagtuo. … Ang tinuod nga pagtuo nagtutok ngadto sa Ginoong si Jesukristo ug kanunay nga mosangput sa paglihok.” 18
Mga kaigsoonan, sa usa ka kanunayng mausab-usab nga kalibutan, kinahanglan gayud kitang mangandam alang sa kawalay kasiguroan. Bisan pa man sa mas maayong mga adlaw nga moabut, nasayud kita nga ang maayong panahon ug lisud nga panahon sa mortalidad magpadayon. Samtang maninguha kita nga maandam sa temporal nga paagi, makasagubang kita sa mga pagsulay sa kinabuhi uban sa naglambo nga pagsalig, kalinaw sa atong kasingkasing, ug sama ni Jose sa Ehipto, makaingon kita, bisan sa lisud nga mga kahimtang, “Dihay tinapay.” 19 Sa ngalan ni Jesukristo, amen.