Motuo ko sa mga Anghel
Ang Ginoo nasayud sa mga hagit nga inyong giatubang. Siya nakaila kaninyo, Siya nahigugma kaninyo, ug ako mosaad, Siya mopadala og mga anghel aron motabang kaninyo.
Mga kaigsoonan, motuo ko sa mga anghel, ug gusto kong mopaambit kaninyo sa akong mga kasinatian kanila. Sa pagbuhat niini, ako nanghinaut ug nag-ampo nga kita makaila sa kaimportante sa mga anghel sa atong mga kinabuhi.
Ania ang mga pulong ni Elder Jeffrey R. Holland gikan sa milabay nga kinatibuk-ang komperensya: “Kon maghisgot kita niadtong mga gihimong mga instrumento sa Dios, kita napahinumduman nga dili tanang mga anghel gikan sa pikas bahin sa belo [tabil]. Ang uban kanila nakauban ug nakaistorya nato—dinhi, karon, sa matag adlaw. Ang uban kanila nagpuyo sa atong kasilinganan. … Sa tinuod, ang langit ingon og mas duol ra kon makita nato ang gugma sa Dios nga gipakita diha sa kabuotan ug debosyon sa mga tawo nga maayo ug putli kaayo nga anghel mao ang bugtong pulong nga moabut sa hunahuna” (“Ang Pagpangalagad sa mga Anghel,” Liahona, Nob. 2008, 30).
Mahitungod kini sa mga anghel dinhi nga bahin sa tabil nga gusto nakong hisgutan. Ang mga anghel nga naglakaw taliwala kanato sa atong inadlaw-adlaw nga mga kinabuhi mao ang gamhanang mga pahinumdom sa gugma sa Dios alang kanato.
Ang unang mga anghel nga akong hisgutan mao ang duha ka sister nga misyonaryo kinsa mitudlo kanako sa ebanghelyo dihang usa pa ako ka batan-on, si Sister Vilma Molina ug si Sister Ivonete Rivitti. Ang akong manghud nga babaye ug ako gidapit sa kalihokan sa Simbahan diin among nahimamat kining duha ka mga anghel. Wala gayud nako damha unsa ka dako ang mausab sa akong kinabuhi tungod niadtong yano nga kalihokan.
Akong mga ginikanan ug mga igsoon dili interesado sa pagkat-on pa og dugang mahitungod sa Simbahan niadtong higayuna. Sila dili gani mouyon bisan sa pagpabisita og mga misyonaryo sa among panimalay, mao nga ako mipahigayon sa mga leksyon sa misyonaryo diha sa sulod sa Simbahan. Kadtong gamay nga lawak sa chapel nahimong akong “sagrado nga kakahoyan.”
Usa ka bulan human gipaila ko niining mga anghel ngadto sa ebanghelyo, nabunyagan ko. Sa 16 anyos pa ako. Subo lang, wala ko’y litrato niadtong sagrado nga hitabo, apan ako adunay usa ka litrato sa akong igsoong babaye ug kanako sa panahon nga kami miapil niana nga kalihokan. Kinahanglan nakong klaruhon kinsa ang anaa niini nga litrato. Ako kanang mas taas nga naa sa tuo.
Kon inyong hunahunaon, ang pagpabiling aktibo sa Simbahan mahagiton alang sa usa ka tin-edyer kansang kinabuhi bag-ohay lang nausab ug kansang pamilya wala magsubay sa samang dalan.
Samtang naningkamot ko sa pagpahaum sa akong bag-o nga kinabuhi, bag-ong kultura ug bag-ong mga higala, mibati ko nga wala mahisakop. Ako mibati nga nag-inusara ug nawad-an og kadasig sa makadaghang higayon. Nasayud ko nga ang Simbahan tinuod, apan naglisud ko nga mobati nga kabahin niini. Samtang dili komportable ug walay kasigurohan samtang naningkamot ko nga mohaum sa akong bag-ong tinuohan, nakakaplag ako og kaisug sa pag-apil sa tulo ka adlaw nga komperensya sa mga kabatan-onan, nga sa akong hunahuna makatabang kanako sa paghimo og bag-ong mga higala. Mao kining higayona akong nahimamat ang laing makaluwas nga anghel nga ginganlan og Mônica Brandão.
Bag-o pa siya sa maong dapit, nga mibalhin gikan sa laing bahin sa Brazil. Dali siyang nakakuha sa akong pagtagad ug, swerte kaayo ko, gidawat ko niya isip usa ka higala. Tingali gitan-aw niya ang akong pagkatawo kaysa akong panagway.
Tungod kay siya nakighigala kanako, gipaila-ila ko sa iyang mga higala, kinsa wala madugay nahimo nakong mga higala samtang nalingaw kami sa daghang mga kalihokan sa kabatan-onan nga akong gitambungan. Kadtong mga kalihokan importante kaayo sa akong pagpadayon niining bag-o nga kinabuhi.
Kining maayong mga higala nakahimo og dakong kalainan, apan ang wala pagtudlo sa ebanghelyo diha sa akong panimalay uban sa mapaluyohon nga pamilya nakapahimo gihapon nga peligro sa proseso sa akong padayon nga pagkakabig. Ang akong mga inter-aksyon sa ebanghelyo diha sa Simbahan gani nahimong mas importante sa akong nagtubo nga pagkakabig. Dayon, duha ka dugang anghel ang gipadala sa Ginoo aron sa pagtabang.
Usa kanila mao si Leda Vettori, akong sayo sa buntag nga magtutudlo sa seminary. Pinaagi sa iyang maabi-abihong gugma ug makapadasig nga mga klase, siya mihatag kanako og matag-adlaw nga dosis sa “maayo nga pulong sa Dios” (Moroni 6:4), nga gikinahanglan kaayo sa akong tibuok adlaw. Kini nakatabang kanako sa pag-angkon og espirituhanong kalig-on sa pagpadayon.
Lain nga anghel nga gipadala aron sa pagtabang kanako mao ang presidente sa Young Men, si Marco Antônio Fusco. Siya usab gitahasan nga mahimong akong senyor home teaching nga kompanyon. Bisan pa sa akong kakulang sa kasinatian ug lahi nga hitsura, siya mihatag kanako og mga tulumanon sa pagtudlo diha sa among mga miting sa korum sa mga priest ug sa home teaching nga mga pagbisita. Siya mihatag kanako og kahigayunan sa paglihok ug sa pagkat-on ug dili tigpaminaw lamang sa ebanghelyo. Siya misalig kanako, labaw pa kay sa akong pagsalig sa akong kaugalingon.
Salamat sa tanan niini nga mga anghel, ug daghan pang uban nga akong nahimamat atol niadtong importante nga unang mga katuigan, nakadawat ko og igong kalig-on aron magpabilin sa dalan sa pakigsaad samtang nakabaton ako og usa ka espirituhanong saksi sa kamatuoran.
Ug diay, kadtong batan-ong anghel nga babaye, si Mônica? Human kaming duha makaserbisyo og mga misyon, siya nahimo nakong asawa.
Morag dili kadto sulagma nga ang maayong mga higala, mga responsibilidad sa Simbahan, ug pag-amuma pinaagi sa maayong pulong sa Dios nahimong kabahin niadto nga proseso. Si Presidente Gordon B. Hinckley maalamon nga mitudlo: “Dili sayon ang paghimo og kausaban nga may kalabutan sa pagkahimong miyembro niini nga Simbahan. Nagpasabut kini sa pagputol sa karaang mga relasyon. Nagpasabut kini sa pagbiya sa mga higala. Mahimong nagpasabut kini sa paghiklin sa gihambin nga mga tinuohan. Kini mahimong magkinahanglan og kausaban sa kinaiya ug pagpugong sa mga gana. Sa daghan kaayong mga sitwasyon kini nagpasabut nga mag-inusara ug gani mahadlok sa wala mahibaloi. Kinahanglan gayud nga adunay pag-amuma ug paglig-on niining lisud nga panahon sa kinabuhi sa kinabig” (There Must Be Messengers,” Ensign, Okt. 1987, 5).
Unya siya mitudlo usab nga, “Ang matag usa kanila nagkinahanglan og tulo ka butang: usa ka higala, usa ka responsibilidad, ug pag-amuma pinaagi sa ‘maayo nga pulong sa Dios’” (“Converts and Young Men,” Ensign, Mayo 1997, 47).
Nganong akong gipakigbahin kining mga kasinatian kaninyo?
Una, kini aron sa pagpadala og mensahe ngadto niadtong anaa sa sama nga proseso karon. Tingali dili kamo usa ka bag-ong kinabig, o nibalik sa Simbahan human sa pagkahisalaag sa makadiyot, o usa lang ka tawo nga nanlimbasug aron mobati nga nahisakop. Palihug, palihug, ayaw og hunong sa inyong mga paningkamot nga mahimong kabahin niining dako nga pamilya. Kini ang tinuod nga Simbahan ni Jesukristo!
Kon kabahin na sa inyong kalipay ug kaluwasan, kanunay gayud nga takus lamang ang padayon nga pagpaningkamot. Takus lamang ang pagpaningkamot nga mapahiangay ang inyong istelo sa kinabuhi ug mga tradisyon. Ang Ginoo nasayud sa mga hagit nga inyong giatubang. Siya nakaila kaninyo, Siya nahigugma kaninyo, ug ako mosaad, Siya mopadala og mga anghel aron motabang kaninyo.
Sa Iyang kaugalingon nga mga pulong ang Manluluwas miingon: “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga [kasingkasing], ug ang akong mga anghel anaa libut kaninyo, aron sa pagtabang kaninyo” (Doktrina ug mga Pakigsaad 84:88).
Ang akong ikaduha nga katuyoan sa pagpakigbahin niini nga mga kasinatian mao ang pagpadala og mensahe sa tanang mga miyembro sa Simbahan—kanatong tanan. Kinahanglan natong hinumdoman nga dili sayon alang sa bag-o nga mga kinabig, mibalik nga mga higala, ug kadtong adunay lahi nga istelo sa kinabuhi nga diha-diha dayon mohaum. Ang Ginoo nahibalo sa mga hagit nga ilang giatubang, ug Siya nangita og mga anghel nga andam sa pagtabang. Ang Ginoo kanunay nangita og mga boluntaryo nga andam nga mahimong mga anghel sa kinabuhi sa uban.
Mga kaigsoonan, andam ba kamong mahimong instrumento sa mga kamot sa Ginoo? Andam ba kamong mahimong usa niini nga mga anghel? Mahimong usa ka mensahero, gipadala sa Dios, gikan niini nga bahin sa tabil, alang sa usa ka tawo nga Siya nabalaka? Siya nagkinahanglan kaninyo. Sila nagkinahanglan kaninyo.
Dayag lang, kita kanunay nga makasalig sa atong mga misyonaryo. Sila anaa kanunay, ang mag-una nga moapil niining gimbuhaton sa mga anghel. Apan dili sila igo.
Kon kamo mainampingong motan-aw sa palibut, inyong makaplagan nga daghan ang nagkinahanglan og tabang sa usa ka anghel. Kini nga mga tawo mahimong dili magsul-ob og puti nga polo, puti nga sinina, o bisan unsang igsusul-ob nga pang-Dominggo. Sila mahimong nag-inusarang naglingkod, dapit sa luyo sa chapel o sa klasehanan, usahay mobati sama nga sila wala makita. Tingali ang ilang istelo sa buhok naghinobra o ilang sinultihan lahi, apan anaa sila didto, ug naningkamot sila.
Ang uban tingali naghunahuna, “Magpadayon ba kaha ko og balik-balik? Magpadayon ba kaha ko og paningkamot?” Tingali ang uban naghunahuna kon sa usa ka adlaw mobati ba kaha sila nga gidawat ug gihigugma. Ang mga anghel gikinahanglan, karon; mga anghel nga andam sa pagbiya sa ilang komportabling pagkabutang aron sa paghangop kanila; “[mga tawo kinsa] maayo ug putli kaayo nga anghel mao ang bugtong pulong nga moabut sa hunahuna [sa paghulagway kanila]” (Jeffrey R. Holland, “Ang Pagpangalagad sa mga Anghel,” 30).
Mga kaigsoonan, motuo ko sa mga anghel! Kitang tanan ania dinhi karon, usa ka dakong kasundalohan sa mga anghel nga gi-set apart alang niining ulahing mga adlaw, aron sa pagpangalagad sa uban isip mga sumpay sa mga kamot sa usa ka mahigugmaong Tiglalang. Ako mosaad nga kon kita andam sa pagserbisyo, ang Ginoo mohatag kanato og mga oportunidad nga mahimong tigpangalagad nga mga anghel. Siya nasayud kinsa ang nagkinahanglan sa tabang sa anghel, ug Siya mobutang kanila diha sa atong agianan. Ang Ginoo mobutang niadto kinsa nagkinahanglan og tabang sa anghel diha sa atong agianan matag adlaw.
Mapasalamaton kaayo ko alang sa daghang anghel nga gibutang sa Ginoo diha sa akong agianan sa tibuok nakong kinabuhi. Sila gikinahanglan. Mapasalamaton usab ako alang sa Iyang ebanghelyo nga nakatabang kanato sa pag-usab ug naghatag kanato og kahigayunan nga mahimong mas maayo.
Kini usa ka ebanghelyo sa gugma, usa ka ebanghelyo sa pagpangalagad. Niini ako mopamatuod sa ngalan ni Jesukristo, amen.