Managsuon nga mga Babaye sa Zion
Kamo mahimong usa ka mahinungdanon nga pwersa sa pagpundok sa Israel ug sa pagmugna og usa ka katawhan sa Zion.
Minahal ko nga mga sister, ako napanalanginan sa pagpamulong atol niining maanindot nga panahon sa kasaysayan sa kalibutan. Kada adlaw, kita nagkaduol ngadto sa mahimayaon nga higayon diin ang Manluluwas nga si Jesukristo moanhi pag-usab sa yuta. Kita adunay nahibaloan sa makalilisang nga mga katalagman nga mag-una sa Iyang pag-anhi, bisan pa niana ang atong mga kasingkasing buhong sa kalipay ug pagsalig nasayud usab sa mahimayaon nga mga saad nga matuman sa dili pa Siya mobalik.
Isip minahal nga anak nga mga babaye sa Langitnong Amahan, ug isip anak nga mga babaye ni Ginoong Jesukristo diha sa Iyang gingharian, 1 kamo adunay mahinungdanon nga tahas sa talagsaon nga mga panahon sa umaabot. Kita nasayud nga ang Manluluwas moabot ngadto sa usa ka katawhan kinsa gipundok ug giandam nga mopuyo sama sa katawhan sa siyudad ni Enoch. Ang mga tawo didto nahiusa sa pagtuo diha ni Jesukristo ug nahimong hingpit kaayo nga putli nga sila gidala ngadto sa langit.
Ania ang gipadayag sa Ginoo nga paghulagway kon unsa ang mahitabo sa katawhan ni Enoch ug kon unsa ang mahitabo niining katapusang dispensasyon sa kahingpitan sa mga panahon:
“Ug ang adlaw moabut nga ang yuta mopahulay, apan sa dili pa kana nga adlaw ang mga langit mongitngit, ug usa ka tabil sa kangitngit motabon sa yuta, ug ang mga langit mokurog, ug usab ang yuta; ug dako nga mga katalagman moabut taliwala sa mga katawhan, apan ang akong mga katawhan Ako mopatunhay;
“Ug pagkamatarung Ako mopakanaog gikan sa langit, ug kamatuoran Ako mopadala gikan sa yuta aron sa pagpamatuod sa akong Bugtong Anak; sa iyang pagkabanhaw gikan sa patay; oo, ug usab ang pagkabanhaw sa tanan nga mga tawo; ug pagkamatarung ug kamatuoran Ako mosugo nga mosilhig sa yuta ingon sa usa ka lunop, aron pagpundok sa akong pinili gikan sa upat ka mga suok sa yuta, ngadto sa usa ka dapit nga Ako moandam, usa ka Balaan nga Dakbayan, nga ang akong katawhan mobakus sa ilang mga bat-ang, ug magpaabut sa panahon sa akong pag-anhi kay diha ang akong tabernakulo, ug kini pagatawgon og Zion, usa ka Bag-ong Jerusalem.
“Ug ang Ginoo miingon ngadto ni Enoch: Unya ikaw ug ang imong tanan nga dakbayan makigkita kanila didto, ug kita modawat kanila ngari sa atong sabakan, ug sila makakita kanato; ug kita mogakus kanila, ug sila mogakus kanako, ug kita maghinagkanay sa usag usa;
Ug diha anaa ang akong pinuy-anan, ug kini mao ang Zion, diin mogula ang tanan nga mga linalang nga Ako mibuhat; ug sulod sa gidugayon nga usa ka libo ka mga tuig ang yuta mopahulay.” 2
Kamo mga sister, ang inyong anak nga mga babaye, inyong apo nga mga babaye, ug ang mga babaye nga inyong gialimahan adunay mahinungdanon nga bahin sa pagmugna niana nga katilingban sa katawhan kinsa moapil sa mahimayaon nga pakig-uban sa Manluluwas. Kamo mahimong usa ka mahinungdanon nga pwersa sa pagpundok sa Israel ug sa pagmugna og katawhan sa Zion kinsa magpuyo sa kalinaw diha sa Bag-ong Jerusalem.
Ang Ginoo, pinaagi sa Iyang mga propeta, mihimo og usa ka saad nganha kaninyo. Sa unang mga adlaw sa Relief Society, ang Propeta Joseph Smith misulti ngadto sa kaigsuonan nga mga babaye, “Kon kamo magpuyo sumala sa inyong mga pribilihiyo, ang mga anghel dili mapugngan nga mahimo ninyong mga kauban.” 3
Kana nga kahibulongan nga potensyal anaa kaninyo, ug kamo giandam alang niana.
Si Presidente Gordon B. Hinckley miingon:
“[Kamo] mga sister … dili ang ikaduhang dapit ang inyong gihuptan diha sa plano sa Amahan alang sa mahangturong kalipay ug kaayohan sa Iyang mga anak. Kamo mga mahinungdanon gayud nga bahin niana nga plano.
“Kon wala kamo ang plano dili makalihok. Kon wala kamo ang tibuok programa mapakyas. …
“Matag usa kaninyo anak nga babaye sa Dios, gitugahan sa balaang katungod sa pagkatawo.” 4
Ang atong propeta karon, si Presidente Russell M. Nelson, naghatag kanato niini nga paghulagway sa inyong tahas sa pagpangandam sa pag-anhi sa Manluluwas:
“Imposibleng masukod ang impluwensya sa … mga babaye, dili lamang sa mga pamilya apan sa Simbahan usab sa Ginoo, isip mga asawa, mga inahan, ug apohan nga mga babaye; isip mga igsoong babaye ug mga iyaan; isip mga magtutudlo ug mga lider; ug ilabi na isip mga ehemplo ug mahalarong mga tigpanalipod sa tinuohan.
“Kini tinuod sa matag dispensasyon sa ebanghelyo sukad sa panahon ni Adan ug Eva. Apan ang mga kababayen-an niini nga dispensasyon lahi kay sa mga kababayen-an sa bisan unsa pa tungod kay kini nga dispensasyon lahi kay sa uban. Kini nga kalainan nagdala og mga kahigayunan ug mga responsibilidad.” 5
Kini nga dispensasyon lahi tungod kay ang Ginoo mogiya kanato aron mahimong andam nga mahisama sa siyudad ni Enoch. Siya mihulagway pinaagi sa Iyang mga apostoles ug mga propeta kon unsa ang sangputanan nianang kausaban sa pagkahimong usa ka katawhan sa Zion.
Si Elder Bruce R. McConkie nagtudlo:
“[Ang kang Enoch] mao ang panahon sa kadaotan ug kayawan-on, panahon sa kangitngit ug rebelyon, usa ka panahon sa gubat ug kalaglagan, usa ka panahon nga nagpadulong ngadto sa paglimpyo sa kalibutan pinaagi sa tubig.
“Si Enoch, hinuon, matinud-anon. Siya ‘nakakita sa Ginoo,’ ug nakigsulti kaniya ‘nawong sa nawong’ ingon sa usa ka tawo nga nakigsulti sa lain. (Moises 7:4.) Ang Ginoo mipadala kaniya aron mosangyaw og paghinulsol ngadto sa kalibutan, ug mimando kaniya nga ‘mobunyag pinaagi sa ngalan sa Amahan ug sa Anak, nga puno sa grasya ug kamatuoran, ug sa Espiritu Santo, nga nagpamatuod sa Amahan ug sa Anak.’ (Moises 7:11.) Si Enoch mihimo og mga pakigsaad ug mipundok og usa ka kongregasyon sa tinuod nga mga tumutuo, tanan kanila, nahimong matinud-anon kaayo nga ‘ang Ginoo miabut ug mipuyo uban sa iyang mga katawhan, ug sila mipuyo diha sa pagkamatarung,’ ug gipanalanginan gikan sa kahitas-an. ‘Ug ang Ginoo mitawag sa iyang mga katawhan og Zion, tungod kay sila usa sa kasingkasing ug usa sa hunahuna, ug nagpuyo diha sa pagkamatarung; ug walay kabus taliwala kanila.’ (Moises 7:18.) …
“Human ang Ginoo mitawag sa iyang katawhan og Zion, ang kasulatan nagsulti nga si Enoch ‘mitukod og usa ka dakbayan nga gitawag og Dakbayan sa Pagkabalaan, gani ang Zion;’ kana nga Zion ‘gidala ngadto sa langit’ diin ang ‘Dios midawat niini ngadto sa iyang sabakan;’ ug nga “gikan didto gisangyaw ang panultihon, Ang Zion nawala.’ (Moises 7:19, 21, 69.) …
“Kining sama nga Zion nga gidala didto sa langit mobalik … dihang ang Ginoo modala pag-usab sa Zion, ug ang mga lumulupyo niini makig-uban sa bag-ong Jerusalem, diin kini dayon matukod.” 6
Kon ang nangagi kabahin sa karon, sa panahon sa pag-abot sa Manluluwas, ang anak nga mga babaye kinsa mapasaligon sa ilang mga pakigsaad ngadto sa Dios mas daghan pa kay sa katunga niadtong andam nga mohangup Kaniya dihang siya moabut. Apan bisan pila ang gidaghanon, ang inyong salmot sa pagpasiugda og kahiusahan taliwala sa katawhan nga giandam alang niana nga Zion mas daghan pa kaayo kay sa katunga.
Sultihan ko kamo nganong nagtuo ko nga mao kana ang mahitabo. Ang Basahon ni Mormon naghatag og saysay mahitungod sa usa ka katawhan sa Zion. Mahinumdoman ninyo nga human kadto nga sila gitudloan, gihigugma, ug gipanalanginan sa nabanhaw nga Manluluwas nga: “walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan.” 7
Ang akong kasinatian nagtudlo nako nga ang anak nga mga babaye sa Langitnong Amahan adunay gasa sa pagpakunhod sa panagbingkil ug pagpasiugda og katarung pinaagi sa ilang gugma sa Dios ug sa gugma sa Dios nga ilang gipalambo niadtong ilang gialagaran.
Ako nakakita niini sa akong kabatan-on sa dihang ang among gamay nga branch nagpundok didto sa among balay sa akong pagkabata. Ang akong igsoong lalaki ug ako mao lang ang mga naghupot sa Aaronic nga Pagkapari, ang akong papa ang bugtong naghupot sa Melchizedek nga Pagkapari. Ang presidente sa Relief Society sa branch usa ka kinabig kansang bana wala malipay sa iyang pagserbisyo sa Simbahan. Ang mga miyembro pulos edaran nga mga sister nga walay naghupot sa pagkapari sa ilang panimalay. Naniid ko sa akong mama ug niadtong mga sister nga naghigugma, nagbayaw, ug nag-amuma sa usag usa sa walay pagkapakyas. Nakaamgo ko karon nga gihatagan ko og sayo nga panglantaw sa Zion.
Ang akong pagkat-on diha sa impluwensya sa matinud-anon nga mga babaye nagpadayon didto sa usa ka gamay nga branch sa Simbahan sa Albuquerque, New Mexico. Naniid ko sa asawa sa presidente sa branch, asawa sa presidente sa district, ug sa presidente sa Relief Society nga milipay sa kasingkasing sa matag bag-ong moabut ug kinabig. Sa Domingo nga mibiya ko sa Albuquerque, human sa duha ka tuig nga pagpaniid sa impluwensya sa mga sister didto, ang unang stake gihimo. Karon ang Ginoo nagbutang og templo didto.
Sunod mibalhin ko sa Boston, diin ako nagserbisyo sa kapangulohan sa district nga nagdumala sa gagmay nga mga branch nga nahimutang sa duha ka estado. Dihay mga panagbingkil nga labaw kay sa usa ka higayon nahusay sa mahigugmaon ug mapasayloon nga mga babaye kinsa mitabang sa pagpalukmay sa mga kasingkasing. Sa Domingo nga mibiya ko sa Boston, usa ka sakop sa Unang Kapangulohan miorganisar sa unang stake sa Massachussetts. Adunay templo didto karon, duol sa dapit diin nagpuyo sa una ang presidente sa district. Nahimo siya nga aktibo sa Simbahan ug sa kadugayan gitawag sa pagserbiyo isip usa ka presidente sa stake ug dayon isip usa ka presidente sa mission, naimpluwensya sa usa ka matinud-anon ug mahigugmaon nga asawa.
Mga sister, kamo gipanalanginan nga mahimong anak nga mga babaye nga adunay espesyal nga mga gasa. Inyong gidala uban kaninyo dinhi sa mortal nga kinabuhi ang espiritwal nga kapasidad sa pag-amuma sa uban ug sa pagbayaw kanila pataas ngadto sa gugma ug ka putli nga mohimo kanila nga sarang magpuyo nga magkauban diha sa usa ka Zion nga katilingban. Dili sulagma nga ang Relief Society, ang unang organisasyon sa Simbahan nga gihimo alang ra gayud sa anak nga mga babaye sa Langitnong Amahan, adunay bansilag [motto] nga “Ang Gugma nga Putli Dili Gayud Mapakyas.”
Ang gugma nga putli mao ang tiunay nga gugma ni Kristo. Ug ang hugot nga pagtuo diha Kaniya ug ang hingpit nga mga epekto sa Iyang walay kinutuban nga Pag-ula mao ang mohimo ninyo, ug niadtong inyong gihigugma ug giserbisyohan, nga sarang alang sa langitnong gasa sa pagpuyo niana nga panag-uban sa dugay nang gihulat ug gisaad sa Zion. Didto kamo mahimong managsuon nga mga babaye sa Zion, gihigugma sa personal gayud sa Ginoo ug niadtong inyong napanalanginan.
Ako mopamatuod nga kamo mga lumulupyo sa gingharian sa Ginoo dinhi sa kalibutan. Kamo anak nga mga babaye sa usa ka mahigugmaong Langitnong Amahan, kinsa mipadala kaninyo dinhi sa kalibutan uban sa talagsaong mga gasa nga inyong gisaad nga gamiton sa pagpanalangin sa uban. Mosaad ako kaninyo nga ang Ginoo mogiya kaninyo, pinaagi sa Espiritu Santo. Siya molakaw diha sa inyong atubangan samtang kamo motabang sa pag-andam sa Iyang katawhan nga mahimong ang Iyang gisaad nga Zion. Sa ingon ako mopamatuod pinaagi sa sagradong ngalan ni Jesukristo, amen.