Septyembre 11

Sa Unsang Paagi Ako Mamahimong Limpyo ug Magmalipayon na Usab human Ako Makasala?

Isaias 1–12

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi ang pagduol ngadto sa Ginoo makatabang kanato sa pagsagubang sa atong mga hagit ug mga pagsulay?

• Moatiman sa mga nanginahanglan. Kinsay atong nailhan nga nagkinahanglan sa atong mga pag-ampo ug atong pagpakighigala?

• Modapit sa tanan sa pagdawat sa ebanghelyo. Unsa nga mga plano sa pagpaambit sa ebanghelyo ang nahisgotan na diha sa mga miting sa konseho sa kabatan-onan sa ward? Sa unsang paagi maapil ang atong klase o korum?

• Mohiusa sa mga pamilya alang sa kahangtoran. Sa unsang paagi ang paghimo sa buhat sa family history makalig-on sa atong mga relasyon uban sa Langitnong Amahan ug ni Jesus?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Kon mobati kita nga sad-an human makasala, kita adunay kapilian. Kini nga mga pagbati, samtang sakit, mamahimo nga usa ka panalangin kon kini mohatod kanato ngadto sa paghinulsol. Apan si Satanas nag-ingon kanato nga kini nga mga pagbati nagpasabot nga ang Dios wala mahigugma kanato ug maningkamot sa paghimo nga kita moabati og kasagmuyo ug kawalay paglaom. Adunay mga tawo nga imong tudloan kinsa nabug-atan sa ingon nianang mga pagbati. Maghunahuna sila kon mamahimo ba gayod silang limpyo ug magmalipayon na usab. Sa unsang paagi kaha sila imong matabangan sa pagkaplag og paglaom pinaagi sa Pag-ula sa Manluluwas?

Si propeta Isaias walay lipodlipod nga mipanton sa katawhan tungod sa ilang mga sala. Apan mimapatuod usab siya nga tungod sa Manluluwas, “Bisag unsa ka pula ang inyong sala, maputi kini kaayo” (Isaias 1:18). Pamalandonga kini samtang imong basahon ang Isaias 1–12 karong semanaha. Unsa kaha ang makadasig niadtong imong mga gitudloan sa pagduol ngadto ni Jesukristo uban sa hugot nga pagtuo aron mawala ang kabug-at sa ilang mga sala? Mahimo usab nimong tun-an ang pagpamatuod ni Sister Sharon Eubank diha sa iyang mensahe nga “Kristo: Ang Kahayag nga Nagdan-ag taliwala sa Kangitngit” (Liahona, Mayo 2019, 73–76).

Tungod ni Jesukristo, ang mga kabug-at sa sala mawala.

Magdungan sa Pagkat-on

Aron maandam alang sa usa ka diskusyon nga gikuha gikan sa Isaias 1–12, pwede nimong hangyoon ang matag batan-on sa pagdala ngadto sa miting og butang nga pula ug butang nga puti. Mahimo nimong ipakita kini nga mga butang samtang nagbasa og dungan sa Isaias 1:16–18. Dayon ang kabatan-onan mopaambit pinaagi sa kaugalingon nilang mga pulong sa unsay ilang nakat-onan gikan niini nga mga bersikulo. (Tan-awa ang diskusyon ni Sister Sharon Eubank sa bersikulo 18 sa “Kristo: Ang Kahayag nga Nagdan-ag taliwala sa Kangitngit.”) Aniay pipila ka kalihokan nga makapadasig og hugot nga pagtuo diha sa gahom sa Manluluwas sa paghimo kanatong limpyo sa espirituhanong paagi.

• Ang pagrebyo sa mga ehemplo sa kasulatan bahin sa paghinulsol makatabang sa imong mga gitudloan nga malig-on ang ilang hugot nga pagtuo nga si Jesukristo makahimo kanilang limpyo sa espirituhanong paagi. Mahimo nimong isulat diha sa pisara ang mga ngalan sama sa Saul (nga sa wala madugay nahimong Pablo), Alma nga Batan-on, Zeezrom, ug ang mga Anti-Nephi_Lehi. Mahimo usab nga magsulat ka og duha ka grupo sa mga pakisayran sa kasulatan: Mga Buhat 8:3; Mosiah 27:8–10; Alma 11:21–23; Alma 17:12–15 (kini nga katawhan sa ilang masalaypong kahimtang) ug ang Mga Buhat 9:13–20; Alma 36:17–24; Alma 15:5–12; Alma 23:6–12 (human kini nga katawhan miduol sa Manluluwas ug naghinulsol). Ang kabatan-onan mahimong motugma sa matag ngalan diha sa mga kasulatan nga maghulagway niana nga tawo. Unsay gihimo niining mga tawhana sa paghinulsol? Unsa ang gitudlo niini nga mga asoy mahitungod sa kaandam sa Manluluwas nga mopasaylo? Aduna ba kitay nakitang mga sundanan nga atong masunod?

• Aron matabangan ang imong mga gitudloan nga mas makasabot sa kapasayloan sa sala, mahimo kang mohatag sa matag tawo og usa ka may pagkasusama nga sugilanon [analogy] o sambingay nga matun-an. Posibling maglakip kini sa nawala nga anak (tan-awa sa Lucas 15:11–24); sa Manluluwas isip atong Magbalantay (mga 5–8 nga parapo sa mensahe ni Dale G. Renlund “Atong Maayong Magbalantay” [Liahona, Mayo 2017, 29–32]); ug usa ka piyano nga guba (ang sinugdanan sa mensahe ni Sister Cristina B. Franco “Ang Makaayo nga Gah[o]m ni Jesukristo” [Liahona, Nob. 2020, 60–62]). Ang mga batan-on mahimong mo-summarize sa matag may pagkasusama nga sugilanon [analogy] o sambingay ug hisgotan unsay gitudlo niini mahitungod sa gugma sa Manluluwas ug sa makatubos nga gahom.

• Ang pagbati og kasubo nga kita nakasala makatabang ug modala kanato ngadto sa paghinulsol. Ang pagbati nga mawad-an sa paglaom o kawala nay bili tungod sa atong mga sala dili makatabang ug makapugong kanato sa paghinulsol. Ang imong klase o korum mahimong mobasa og dungan sa seksiyon nga giulohan og “Diosnon nga Kasubo” sa mensahe ni Presidente Dieter F. Uchtdorf nga “Makahimo Kamo Niini Karon!” (Liahona, Nob. 2013, 55–57). Unsa ang kalainan tali sa kasubo alang sa sala nga modala ngadto sa paghinulsol ug sa kasubo nga modala ngadto sa pagkasagmuyo? (tan-awa usab sa 2 Mga Taga Corinto 7:9–10; Mormon 2:12–14). Kon adunay tawo nga mobati nga nabuntog tungod sa pagbati nga sad-an ug kasagmuyo tungod sa sala, unsa kaha ang atong isulti aron matabangan siya sa pagduol ngadto sa Manluluwas? Dapita ang kabatan-onan sa pagpaambit sa ilang mga pagpamatuod bahin sa Manluluwas ug sa Iyang kaluoy.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Dallin H. Oaks, “Malimpyo Pinaagi sa Paghinulsol,” Liahona, Mayo 2019, 91–94

• “Paghinulsol,” diha sa kapitulo 3 sa Isangyaw ang Akong Ebanghelyo (2004), 72–74.

Pagtudlo sumala sa Pamaagi sa Manluluwas

“Ang personal nga pagpamatuod sa Manluluwas naghatag og awtoridad sa Iyang mga pulong. … Samtang magpamatuod ka sa tinuod nga doktrina, ang Espiritu mopanghimatuod sa kamatuoran sa doktrina diha sa mga kasingkasing sa imong mga gitudloan” (Pagtudlo sumala sa Pamaagi sa Manluluwas, 21).