mga batan-on nga nanagbarog sa gawas sa templo

Septyembre 25

Unsa ang Atong mga Responsibilidad sa Buhat sa Kaluwasan ug Kahimayaan?

Isaias 40–49

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa may atong gihisgotan sa miagi, ug unsa nga mga pagdapit o mga buluhaton ang gihimo? Unsa may atong gihimo aron malihok kadto nga mga pagdapit o mga buluhaton?

• Moatiman sa mga nanginahanglan. Unsa may atong buhaton o isulti aron makatabang niadtong tingali mibati nga nag-inusara o nahilayo sa Langitnong Amahan?

• Modapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Mohiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Tataw gikan sa mga kasulatan nga ang pagtabang sa buhat sa Ginoo dili lamang alang sa mga hamtong. Si Samuel usa pa ka bata sa una dihang ang Ginoo namulong kaniya. Si Maria lagmit nga usa ka batan-ong babaye dihang mibisita ang usa ka anghel kaniya, nga nagpahibalo nga siya mamahimong inahan sa Manluluwas. Ug si Joseph Smith 14 anyos ang edad sa dihang ang Ginoo mitawag kaniya sa pagpahiuli sa ebanghelyo. Sa bag-ohay lang gayod, si Presidente Russell M. Nelson midapit sa tanang batan-on nga mga tawo nga “moapil sa grupo sa kabatan-onan sa Ginoo aron motabang sa pagpundok sa Israel (“Paglaom sa Israel” [tibuok kalibotan nga debosyonal, Hunyo 3, 2018], ChurchofJesusChrist.org). Sa piho, dihang ang Ginoo miingon, “Ikaw, Israel, akong alagad” (Isaias 41:8), naglakip kini sa Iyang tanan nga katawhan sa pakigsaad, lakip sa mga anaa sa imong klase o korum.

Bisan og kitang tanan nakigsaad nga moserbisyo sa Dios dihang kita gibunyagan, dili tanan nga batan-ong mga tawo nakakita sa ilang kaugalingon isip mga alagad sa Ginoo. Tingali dili nila mamatikdan ang lahi nga mga paagi nga sila makatabang sa Iyang buhat. Pangitaa ang mga tudling diha sa Isaias 41–44 ug seksiyon 1.2 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw nga makatabang sa kabatan-onan sa pagsabot unsay ipasabot sa pagkahimong mga alagad sa Ginoo.

batan-ong mga babaye sa gawas sa templo

Ang matag batan-ong tawo sa lahi nga paagi makahimo sa pagsalmot sa buhat sa kaluwasan ug kahimayaan.

Magdungan sa Pagkat-on

Ang Isaias 41–44 makatabang sa kabatan-onan sa pagsabot unsay ipasabot sa pagkahimong alagad sa Ginoo. Sa pagsugod sa diskusyon, mahimo kang magsulat og mga pakisayran sama niining ania sa pisara: Isaias 41:8–10; 42:6–7; 43:9–12; 44:21. Ang matag tawo mahimong mopili og usa ka tudling, mobasa niini, ug mopaambit unsay iyang nakat-onan mahitungod sa pagkaalagad sa Ginoo. Sa unsang mga paagi kita mga alagad sa Ginoo? Unsa nga mga panalangin ang moabot kon kita anaa sa Iyang pagserbisyo? Aniay ubang mga paagi sa pagtabang sa imong mga gitudloan sa pagdala sa katawhan ngadto kang Kristo isip aktibong mga partisipante sa Iyang buhat.

• Ang imong mga gitudloan nakasabot ba kon unsa “ang buhat sa kaluwasan ug kahimayaan? Aron sa pagtabang kanila, pwedeng sangonan nimo sila nga tun-an (sa tinagsa-tagsang paagi o sa gagmay nga grupo) ang usa sa upat ka gibahin-bahin nga mga seksiyon sa seksiyon 1.2 sa Kinatibuk-ang Tamdanan nga Basahon. Ang matag gibahin-bahin nga seksiyon naghulagway sa aspeto sa buluhaton. Hangyoa ang kabatan-onan nga pamalandongan ang mga pangutana sama niini: Unsa ang pihong mga butang ang mahimo sa usa ka tawo nga sama nako og edad aron makaapil niini nga aspeto sa buhat sa kaluwasan? Unsa ang mahimo sa atong klase o korum? Ang matag tawo o grupo makahimo sa pagpaambit unsay ilang nakat-onan, inubanan sa mga tubag sa mga pangutana.

• Kadtong imong gitudloan tingali makabenepisyo pinaagi sa pagkat-on og daghan pa mahitungod sa upat ka aspeto sa buhat sa kaluwasan ug kahimayaan—pagsunod sa ebanghelyo ni Jesukristo, pag-atiman sa mga nanginahanglan, pagdapit sa tanan aron modawat sa ebanghelyo, ug paghiusa sa mga pamilya alang sa kahangtoran. Makahimo sila sa pagpili og usa ka aspeto nga ilang ganahan ug sa pagsuhid sa pipila ka mga aytem nga may kalabotan niini ubos sa “Suporta nga mga Kapanguhaan.” Itugot nga ang kabatan-onan makapaambit sa unsay ilang nakita nga nakadasig kanila sa pagkahimong mas nakabig sa Ginoo ug pagtabang sa uban sa paghimo sa samang butang. Dayon makahimo sila og mga plano sa paghimo og butang nga makatabang sa pagtuman niini nga buhat. Ang presidente sa klase o korum makapangulo niini nga diskusyon.

• Aron matabangan ang kabatan-onan nga makapamalandong sa unsang paagi ilang magamit ang ilang mga talento sa pagdala og mga kalag ngadto kang Kristo, pwede nimong hangyoon ang matag usa kanila nga tun-an ang seksiyon sa mensahe ni Elder John C. Pingree Jr. “Ako Adunay Buhat alang Kanimo” (Liahona, Nob. 2017, 32–35). Mahimo silang mopaambit kon sa unsang paagi ang ilang nakat-onan tingali makatabang og tawo kinsa wala makasiguro kon siya makatabang ba kaha sa buhat sa Ginoo. Mahimo usab kamong dungan nga morebyo sa seksiyon nga “Diskobrehi ug Palamboa ang Espirituhanong mga Gasa” sa mensahe ni Elder Pingree. Sa unsang paagi ang Ginoo motabang kanato sa pagdiskobre ug pagpalambo sa atong mga talento?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Magpuyo diha sa ebanghelyo ni Jesukristo: 2 Nephi 31:17–21; 3 Nephi 27:13–21

• Moatiman sa mga nanginahanglan: Mateo 25:34–40; Mosiah 18:8–9

• Modapit sa tanan sa pagdawat sa ebanghelyo: Mateo 5:14–16; 1 Pedro 3:15

• Mohiusa sa mga pamilya alang sa kahangtoran: Doktrina ug mga Pakigsaad 2; 128:18

Pagtudlo sumala sa Pamaagi sa Manluluwas

“Kon mobati ang kabatan-onan nga misalig ka kanila, ang ilang pagsalig sa ilang balaan nga potensyal motubo” (Pagtudlo sumala sa Pamaagi sa Manluluwas, 28).