Oktubre 9

Nganong Gikinahanglan nga si Jesukristo Mahimong Sentro sa Akong Kinabuhi?

Isaias 58–66

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon, agi og dugang ngadto sa pagtinambagay mahitungod sa piho nga mga panginahanglan sa klase o korum mahimo nimong hisgotan ang mga impresyon ug mga tema gikan sa kinatibuk-ang komperensiya. Ang mosunod nga mga pangutana tingali makatabang.

• Unsa nga mga tema o mga mensahe ang mahinungdanon ngari kanato? Unsa ang nakapalig-on sa atong hugot nga pagtuo kang Jesukristo?

• Unsa ang nakapalig-on sa atong mga pagpamatuod bahin sa buhing mga propeta? Unsa nga pag-aghat ang atong gibati nga buhaton tungod sa unsay atong nakat-onan o gibati?

• Unsay kinahanglan natong buhaton isip usa ka klase o korum aron makahinumdom ug malihok ang tambag nga atong nadungog sa kinatibuk-ang komperensiya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

“Magmalipayon ako pag-ayo tungod sa gihimo sa Ginoo; ang kalag ko magmaya tungod sa akong Dios; gibistihan niya ako sa bisti sa kaluwasan; gikupoan niya ako sa kupo sa pagkamatarong” (Isaias 61:10). Ngano nga ikaw “magmalipayon tungod sa Ginoo”? Sama ni Isaias, samtang moila kita sa unsay nahimo sa Ginoo kanato, kita magmalipayon, ug sa kanunay makapamulong kita sa “mahigugmaong kalolot sa Ginoo, ug [sa] mga pagdayeg sa Ginoo” (Isaias 63:7).

Unsay gibati niadtong imong gitudloan mahitungod sa Manluluwas? Unsa ang makatabang kanila nga mobati og mas dako nga gugma ug pagtahod Kaniya? Unsa kaha ang makatabang kanila aron mobati sa Iyang gugma? Samtang ikaw mamalandong niini nga mga pangutana ug mobasa sa Isaias 58–66, mahimo usab nimong rebyohon ang mensahe ni Elder Matthew S. Holland nga “Ang Talagsaon nga Kanindot nga Gasa sa Anak” (Liahona, Nob. 2020, 45–47) ug ang mensahe ni Sister Cristina B. Franco nga “Ang Makaayo nga Gah[o]m ni Kristo” (Liahona, Nob. 2020, 60–62).

Samtang magkat-on pa kita og dugang mahitungod sa Manluluwas, madasig kita sa paghimo Kaniya nga Sentro sa atong kinabuhi.

Magdungan sa Pagkat-on

Samtang ang mga sakop sa klase o korum magkat-on mahitungod sa misyon nga diin si Jesukristo gipadala aron buhaton, mas madasig sila sa paghimo sa Manluluwas nga sentro sa ilang kinabuhi. Tingali mahimo nilang siksikon ang Isaias 61:1–3 ug mohimo og lista diha sa pisara kon unsa ang gidihog nga maoy buhaton sa Manluluwas (tan-awa usab sa Lucas 4:16–20). Sa unsang paagi ang Manluluwas mituman niini nga mga aspeto sa Iyang misyon? Giunsa Niya sa pagtuman niini diha sa atong kinabuhi karon? Ang mga ideya diha sa ubos makatabang nga magpadayon ang diskusyon sa klase o korum kon nganong si Jesukristo kinahanglan nga mahimong sentro sa atong kinabuhi.

• Ang kinatibuk-ang komperensiya sa kanunay adunay mga mensahe nga nagpamatuod kang Jesukristo. Mahimo kang magdapit og pipila ka sakop sa klase o korum sa pagpaambit og butang nga ilang nakat-onan mahitungod sa Manluluwas atol sa kinatibuk-ang komperensiya. Awhaga sila sa pagpaambit kon unsay ilang gibati mahitungod sa Manluluwas tungod sa unsay ilang nakat-onan.

• Ang mga kasulatan makatabang sa kabatan-onan nga makasabot nganong ang Manluluwas kinahanglan nga mahimong sentro sa atong kinabuhi. Mahimo nimong isulat sa pisara ang Nganong gikinahanglan nga si Jesukristo mahimong sentro sa akong kinabuhi? Hangyoa ang kabatan-onan sa pagpaambit sa ilang mga hunahuna. Dayon mahimo nimo silang hangyoon (tinagsa-tagsa o sa grupo) sa pagsiksik sa mga kasulatan ubos sa “Suporta nga mga Kapanguhaan” sa pagpangita og dugang nga mga tubag. Dapita ang mga batan-on sa pagpapaambit unsay ilang nakat-onan ug nganong makahuloganon kini kanila.

• Ikonsiderar ang paghangyo niadtong imong gitudloan sa paghulagway sa pinakaimportanting adlaw sa ilang kinabuhi. Unsa kaha ang pinakaimportanting adlaw sa kasaysayan? Dapita sila sa pagdiskobre sa unsay giingon ni Elder Dieter F. Uchtdorf nga pinakaimportanting adlaw pinaagi sa pagrebyo sa mensahe nga “Tan-awa ania ra ang Tawo” (Liahona, Mayo 2018, 107–10). Awhaga ang mga batan-on sa pagpangita sa mga panalangin nga gisaad ni Elder Uchtdorf niadtong kinsa “motan-aw” kang Jesukristo. Mahimo usab silang mopaambit kon unsay ilang gibuhat sa paghimo sa Manluluwas nga sentro sa ilang matag adlaw nga pagpakabuhi. Mahimo imo silang awhagon sa pagkonsiderar kon unsay ilang mahimo aron mas maduol kang Jesukristo ug sa pagtakda og usa ka tumong sa paghimo niini.

• Kon adunay tawo nga mangutana nganong mituo kita ni Jesukristo, unsa may atong isulti? Awhaga ang kabatan-onan sa pagpaambit sa ilang mga hunahuna ug sa pagsulat niini sa pisara. Mahimo usab nimo silang dapiton sa pagrebyo sa “Ang Buhi nga Kristo: Ang Pagpamatuod sa Apostoles” (ChurchofJesusChrist.org) o sa “Unsa May Akong Tun-an ug Itudlo?” sa kapitulo 3 sa Isangyaw ang Akong Ebanghelyo ([2004], 3). Awhaga sila sa pagpangita sa yanong mga kamatuoran nga gusto nila nga ipaambit aron mapasabot nganong ang Manluluwas importante kanila. Mahimo nilang idugang sa lista diha sa pisara ang mga kamatuoran nga ilang makit-an ug hisgotan kon sa unsang paagi ilang mapaambit kini nga mga kamatuoran ngadto sa mga tawo nga ilang nailhan.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Juan 8:12; 14:6; Mga Taga-Roma 8:35–39; 2 Nephi 2:3–9; 9:5–10; Alma 36:3, 27; 3 Nephi 27:14–16, 27; Ether 12:27 (Nganong gikinahanglan nga si Jesukristo mahimong sentro sa atong kinabuhi)

• Becky Craven, “Imo na ang Sukli” (Liahona, Nob. 2020, 58–60)

• “Nagtuo Ako kang Kristo,” “Ako Nagpabilin nga Natingala” (Mga Himno, mga nu.78, 114)

Pagtudlo sumala sa Pamaagi sa Manluluwas

“Ang matag indibidwal sa imong klase usa ka abunda nga tinubdan sa pagpamatuod, mga panabot, ug mga kasinatian sa pagsunod sa ebanghelyo. Dapita sila sa pagpakigbahin ug pagbayaw sa usag usa” (Pagtudlo sumala sa Pamaagi sa Manluluwas, 5).