pamilya nga pagtuon sa kasulatan

Oktubre 23

Ang Ebanghelyo Nasulat ba sa Akong Kasingkasing?

Jeremias 30–33; 36; Mga Pagbangotan 1; 3

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa may atong gihisgotan sa miagi, ug unsa nga mga pagdapit o mga buluhaton ang gihimo? Unsa may atong gihimo aron malihok kadto nga mga pagdapit o mga buluhaton?

• Moatiman sa mga nanginahanglan. Unsa may atong buhaton o isulti aron makatabang niadtong tingali mibati nga nag-inusara o nahilayo sa Langitnong Amahan?

• Modapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Mohiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang Ginoo misulti kang propeta Jeremias nga sa mga adlaw nga moabot, Siya mopundok sa Israel ug mohimo og usa ka “bag-ong kasabotan” sa Iyang katawhan. Siya mipahayag, “ibutang ko ang akong sugo sa ilang kaisipan ug isulat ko sa ilang kasingkasing; ug mahimo ako nga ilang Dios ug sila akong katawhan.” (tan-awa sa Jeremias 31:31, 34). Kadto nga mga adlaw mao karon, ug kita mga katawhan sa Dios. Kini nga mga pagtulon-an tingali moaghat kaninyo—ug niadtong imong mga gitudloan—sa pagpangutana, Unsay ipasabot nga ang ebanghelyo masulat sa akong kasingkasing? Ang ebanghelyo nasulat ba sa akong kasingkasing? Kon wala, unsay akong mahimo mahitungod niini?

Ikonsiderar kon sa unsang paagi ikaw makatabang sa mga sakop sa imong klase o korum aron mamalandong niini nga mga pangutana sa ilang kaugalingon mismo. Aron makaandam sa pagtudlo, makita nimo ang mga mensahe nga ikapaambit gikan sa Jeremias 30–33; 36; gikan sa mensahe ni Presidente Russell M. Nelson nga “Ipatigbabaw ang Dios Labaw sa Tanan” (Liahona, Nob. 2020, 92–95); ug sa mensahe gikan ni Elder D. Todd Christofferson nga “Kon Kamo Nakabig” (Liahona, Mayo 2004, 11–13).

batan-ong mga babaye nga nagtuon sa mga kasulatan

Kon kita mohigugma sa Ginoo ug magtinguha sa pagkat-on bahin Kaniya, ang ebanghelyo masulat diha sa atong kasingkasing.

Magdungan sa Pagkat-on

Awhaga ang kabatan-onan sa paghisgot sa Jeremias 31:31–34. Sa paghimo niini, mahimong hatagan nimo sila og mga papel nga giporma og kasingkasing nga adunay nakasulat nga pipila ka pangutana mahitungod sa unsay ipasabot sa pagbaton sa ebanghelyo diha sa atong kasingkasing, sama sa mga anaa diha ubos sa “Andama ang Imong Kaugalingon sa Espiritwal nga Paagi.” Sa pagtrabaho nga magtinagsa, nga may kapares, o sa ginagmay nga grupo, ang kabatan-onan pwedeng mobasa niini nga mga bersikulo gikan sa Jeremias ug mamalandong kon unsaon nila sa pagtubag ang mga pangutana. Itugot nga ipaambit nila ang ilang mga pangutana ug mga tubag nga ilang nahunahunaan. Sa ubos mao ang daghan pang mga ideya nga makatabang kanimo sa pagtudlo sa kabatan-onan mahitungod sa kon sa unsang paagi ang ebanghelyo masulat diha ilang kasingkasing.

• Dihang si Moises mihatag sa pipila sa iyang kataposan nga mga pagtulon-an ngadto sa mga Israelite, siya miawhag kanila sa pagdawat sa mga pulong sa Dios diha sa ilang kasingkasing. Siya mitudlo usab kanila sa pipila ka mga paagi sa ilang paghimo niini, nga makita diha sa Deuteronomio 6:3–9. Isip usa ka klase o korum, basaha og dungan kini nga mga bersikulo ug hisgoti ang mga paagi nga atong mahimo kon unsa ang gitambag ni Moises. Mahimo usab nilang tun-an ang Alma 5:14, 26–35 aron makita kon unsay gitudlo ni Alma mahitungod kon sa unsang paagi atong mapabilin nga ang ebanghelyo nasulat sa atong kasingkasing.

• Diha sa iyang mensahe nga “Kon Kamo Nakabig,” si Elder D. Todd Christofferson mihulagway kon unsay atong mahimo aron ang ebanghelyo masulat sa atong kasingkasing. Unsa may atong nakat-onan gikan sa unang upat ka mga parapo mahitungod sa unsay ipasabot nga ang ebanghelyo masulat sa atong kasingkasing? Mahimo nimong dapiton ang matag batan-on sa pagbasa og usa o mas daghan sa nahibilin nga mga parapo ug sa pagpangita kon unsay atong kinahanglan nga buhaton aron mahitabo kini. Unsay kalabotan sa Manluluwas? Unsay atong kalabotan? Awhaga ang kabatan-onan sa pagpaambit sa ilang mga tubag, kauban sa ubang mga panabot nga ilang nakita. Unsa nga mga kasinatian ang nakatabang kanato aron ang ebanghelyo masulat diha sa atong kasingkasing? Unsay kalabotan sa pagtuman sa atong mga pakigsaad diha niini nga proseso?

• Si Presidente Russell M. Nelson mipasabot nga ang termino nga Israel “nagpasab[o]t og tawo kinsa andam nga ipatigbabaw ang Dios labaw sa tanan diha sa iyang kinabuhi.” (“Ipatigbabaw ang Dios Labaw sa Tanan,” 92). Mahimo kang modapit og mga batan-on sa pagsiksik sa unang unom ka mga parapo [paragraph] sa mensahe ni Presidente Nelson ug sa kataposang bahin sa mensahe nga nagsugod og “Ang pangutana alang sa matag usa kanato.” Hangyoa sila sa pagpangita og butang nga nakatabang nila sa pagsabot unsay ipasabot sa “ipatigbabaw ang Dios labaw sa tanan” diha sa ilang kinabuhi. Unsay atong bation ug buhaton kon ang Dios mopatigbabaw labaw sa tanan sa atong kinabuhi? Unsa ang gitudlo ni Presidente Nelson mahitungod kon sa unsang paagi nga ang pagsulat sa ebanghelyo diha sa atong kasingkasing makaapekto sa atong mga paningkamot sa pagpundok sa Israel?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Henry B. Eyring, “Write upon My Heart” (Liahona, Nob. 2000, 85–87)

• Linda K. Burton, “Ang Hugot nga Pagtuo sa Pag-ula ni Jesukristo Nahisulat ba sa Atong mga Kasingkasing?” (Liahona, Nob. 2012, 111–15)

Pagtudlo sumala sa Pamaagi sa Manluluwas

“Ang doktrina nga anaa sa mga kasulatan ug sa mga pulong sa mga propeta sa ulahing mga adlaw adunay gahom nga mousab sa mga kasingkasing ug pagdugang sa hugot nga pagtuo. Samtang ikaw ug ang imong mga gitudloan ‘mosulay sa hiyas sa pulong sa Dios,’ imong makaplagan nga aduna kini ‘dako nga kalagmitan sa pagdala sa mga katawhan sa pagbuhat niana nga diin makiangayon’ (Alma 31:5)” (Pagtudlo sumala sa Pamaagi sa Manluluwas, 5).