klase sa batan-ong mga babaye

November 13

Sa Unsang Paagi Ako Makadawat og usa ka Pagbubo sa Espiritu sa Ginoo?

Oseas 1–6; 10–14; Joel

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Moatiman sa mga nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdasig ang atong gibati nga angay buhaton aron sa pagtabang kanila?

• Modapit sa tanan sa pagdawat sa ebanghelyo. Sa unsa nga paagi kita mamahimong kahayag ngadto sa mga sakop sa pamilya o mga higala nga lahi kanato og mga gituohan?

• Mohiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Dili ikalimod nga nagpuyo kita sa panahon sa walay kasiguroan ug kahadlok. Ang propeta sa Daang Tugon nga si Joel mihulagway sa atong panahon—nga “adlaw sa Ginoo”—isip “ngitngit ug dulom nga adlaw” ug “makalilisang kaayo” (Joel 2:1–2, 11). Apan wala kana magpasabot nga walay kalaoman ang atong mga adlaw. Hunahunaa kini nga saad ni Elder Dieter F. Uchtdorf: “Bisan kon usahay kita mobati nga gilubong sa mga pagsulay sa kinabuhi o gilib[o]tan sa emosyonal nga kangitngit, ang gugma sa Dios ug ang mga panalangin sa gipahiuli nga ebanghelyo ni Jesukristo makahatag og usa ka butang nga halos dili nato mahanduraw” (“Ang Dios Mobuhat og Butang nga Dili Mahanduraw,” Liahona, Nob. 2020, 52).

Mao nga kon inyong mabantayan ang kangitngit ug ang kadulom sa atong panahon, hinumdomi nga ang Ginoo misaad usab og talagsaon—gani dili mahanduraw—nga mga panalangin: “ ibubo ko ang akong espiritu sa tanang katawhan; ang inyong mga anak nga lalaki ug babaye magsangyaw sa akong mensahe” (Joel 2:28; tan-awa usab sa Joseph Smith—Kasaysayan 1:41). Timan-i ang piho nga saad nga ang Espiritu sa Dios ibubo diha sa mga batan-ong lalaki ug mga batan-ong babaye. Ngano nga ikaw mibati nga importante niadtong imong gitudloan ang pagsabot niana? Pamalandongi kini nga pangutana samtang magbasa ka sa Joel 2 ug sa mensahe ni Elder Uchtdorf diha sa imong pagpangandam sa pagtudlo.

mga batan-ong lalaki nga nagtuon sa mga kasulatan

Ang Ginoo misaad nga sa kataposang mga adlaw, Siya mobubo sa Iyang Espiritu, ug “ang inyong mga anak nga lalaki ug babaye magsangyaw sa akong mensahe” (Joel 2:28).

Magdungan sa Pagkat-on

Aron matabangan kadtong imong gitudloan nga mas makasabot sa Joel 2:28–29, pwede kang magbutang og usa ka butang sulod sa panaksan ug magsugo og usa nga mobubo og tubig niini. Sa unsang paagi kini makatabang kanato sa pagsabot unsay ipasabot sa Ginoo sa “ibubo ko ang akong espiritu sa tanang katawhan”? Sa unsang paagi ang mga panagna sa Joel 2:28–29 natuman? Aniay pipila ka mga ideya nga makatabang nga ang kabatan-onan mas makasabot kon sa unsang paagi ang Ginoo nagabubo sa Iyang Espiritu karon.

• Ang mga kasulatan nagtala og daghang panahon dihang ang Ginoo mibubo sa Iyang Espiritu ngadto sa Iyang katawhan. Ang pagrebyo sa pipila niini makatabang nga ang kabatan-onan mas makasabot unsaon sa pagdawat og usa ka pagbubo sa Espiritu sa Dios sa ilang kinabuhi. Ikonsiderar ang pagdrowing diha sa pisara og usa ka dakong pitsel nga nagbubo og tubig ug sa paghangyo sa mga indibidwal o sa ginagmay nga mga grupo sa pagbasa og usa o mas daghang tudling sa kasulatan diha sa “Suporta nga mga Kapanguhaan.” Mahimo silang mosulat diha sa pisara libot sa pitsel unsay gibuhat sa mga tawo diha sa ilang tudling sa kasulatan aron ang Ginoo mobubo sa Iyang Espiritu ug unsa usab ang mga panalangin nga nagsunod. Kanus-a kita mibati sa Espiritu nga mihupay, migiya, o milimpyo kanato?

• Mahimo nimong isulat sa pisara kini nga mga pulong gikan ni Elder Dieter F. Uchtdorf: “Ang Dios naghunahuna og dili mahanduraw nga butang alang kaninyo sa personal ug sa tibuok Simbahan—usa ka kahibulongan nga buhat ug usa ka katingalahan” (“Ang Dios Mobuhat og Butang nga Dili Mahanduraw,” 53). Ikonsiderar ang paghangyo sa kabatan-onan sa pagpangita diha sa mensahe ni Elder Uchtdorf sa dili mahanduraw nga mga panalangin nga gihatag sa Dios ngadto sa Iyang katawhan diha sa mga kasulatan human sa mga panahon sa kalisdanan. Unsa ang gitudlo ni Elder Uchtdorf nga atong buhaton aron makahimo kita og maayong mga desisyon kon mag-atubang kita og kalisdanan? Dapita ang kabatan-onan sa paghimo og lista sa “dili mahanduraw” nga mga butang nga tingali gihunahuna sa Dios alang kanato. Dapita kadtong imong gitudloan sa pagpamalandong kon unsay andam nilang buhaton aron makadawat niini nga mga panalangin.

• Mahimo usab nilang rebyohon ang mensahe ni Presidente Russell M. Nelson nga “Pagpadayag alang sa Simbahan, Pagpadayag alang sa Atong mga Kinabuhi” (Liahona, Mayo 2018, 93–96). alang sa mga panabot kon sa unsang paagi ang Espiritu mamulong kanato ug sa unsang paagi Siya mopanalangin sa atong kinabuhi. Hangyoa sila sa pagpangita og mga tubag sa mga pangutana nga sama niini: Giunsa ni Presidente Nelson sa pagpangita ug pagdawat sa mga pag-aghat sa Espiritu? Unsa may atong nakat-onan gikan ni Joseph Smith mahitungod sa kaandam sa Dios nga mamulong sa Iyang mga anak? Unsa ang giawhag ni Presidente Nelson nga atong buhaton? Suginli ang kabatan-onan mahitungod sa panahon diin ikaw mibati sa Ginoo nga mibubo sa Iyang Espiritu. Dapita sila sa pagpamalandong og ilang mga kasinatian ug, sa pagpaambit niini, kon mobati sila nga komportable.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mga Buhat 2:1–6, 14–21; Jacob 7:1–8; Mosiah 4:1–3, 19–20; 18:7–11; Alma 19:14, 28–36; Helaman 6:34–36; Doktrina ug mga Pakigsaad 19:37–41

Pagtudlo sumala sa Pamaagi sa Manluluwas

“Agig dugang sa pagtabang sa mga nagkat-on nga mobati ug moila sa Espiritu, tabangi sila sa pagsunod sa mga pag-aghat nga ilang nadawat” (Pagtudlo sumala sa Pamaagi sa Manluluwas,10).