young women talking

Nobyembre 27

Sa Unsang Paagi Ako Makapaambit sa Ebanghelyo?

Jonas; Miqueas

icon sa pagtinambagay

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas nahiduol sa Manluluwas? Sa unsang paagi kita naningkamot sa pagkahimong mas mahisama Kaniya?

• Moatiman sa mga nanginahanglan. Kinsa man ang anaa sa atong hunahuna bag-ohay lang? Sa unsang paagi kita makatabang niini nga mga indibidwal?

• Modapit sa tanan sa pagdawat sa ebanghelyo. Unsaon nato sa pagtubag ang mga pangutana sa atong mga higala mahitungod sa Simbahan?

• Mohiusa sa mga pamilya alang sa kahangtoran. Unsa ang pipila ka paagi nga kita mas makakonektar sa mga sakop sa kaliwatan sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Tingali adunay mga sakop sa imong klase o korum kinsa sa kanunay makakita og mga paagi nga makapaambit sa ebanghelyo. Tingali ikaw makahimo usab niini! Alang sa daghang tawo, hinoon, ang pagpaambit sa ebanghelyo lisod ug gani makahahadlok. Maayo na lang, kitang tanan mamahimong mas maayo sa pagpaambit sa atong hugot nga pagtuo diha kang Jesukristo. Tingali dili nimo madungog sa pisikal ang tingog sa Ginoo nga nagsugo kanimo sa paghimo og butang sama sa “lakaw ngadto sa dakong siyudad sa Ninibe ug badlonga ang katawhan didto kay nasayran ko nga hilabihan sila kadaotan,” sama sa gibuhat ni Jonas (Jonas 1:2). Apan ang hilom nga tingog sa Espiritu Santo makaaghat kanimo sa “[pag]lakaw” ngadto sa piho nga mga sakop sa pamilya ug mga higala kinsa giandam na aron maminaw sa imong pagmatuod. Pagmadayagon kon unsa man ang imong nakat-onan gikan sa kasinatian ni Jonas samtang magtuon ka karong semanaha, ug andama ang imong kaugalingon sa pagpaambit ngadto sa imong mga gitudloan unsay imong nakat-onan. Mahimo usab nimong basahon ang mensahe ni D. Todd Christofferson nga “Pagpaambit sa Mensahe sa Pagpahiuli ug sa Pagkabanhaw” samtang mangandam ka sa pagtudlo (Liahona, Mayo 2020, 110–13).

mga batan-ong lalaki nga nagtuon sa mga kasulatan

Ang Espiritu Santo makaaghat kanato sa pagpaambit sa ebanghelyo niadtong kinsa andam nga maminaw sa atong mga pagpamatuod.

Magdungan sa Pagkat-on

Aron matabangan ang imong mga gitudloan sa pagpaambit sa ilang mga impresyon gikan sa ilang pagtuon sa Jonas karong semanaha, mahimong ipakita nimo ang usa ka litrato ni Jonas (tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya). Dapita sila sa paghisgot sa unsay ilang nakat-onan mahitungod sa pagpaambit sa ebanghelyo gikan sa mga kasinatian ni Jonas. Mahimo nimo silang dapiton nga rebyohon sa piho nga paagi ang Jonas 1 ug 3 ug ipangutana: Unsa may atong nakat-onan mahitungod sa pagpaambit sa ebanghelyo ngadto niadtong ingon og dili andam nga mag-usab? Unsa may atong nakat-onan mahitungod sa kaandam sa Dios nga mopasaylo niadtong kinsa maghinulsol? Aron sa pagdasig sa mga sakop sa klase o korum sa pagpaambit sa ebanghelyo, gamita ang usa o dugang sa mosunod nga mga kalihokan o paghimo og usa nga imong kaugalingon.

• Aron makakuha og mga ideya kon sa unsang paagi mapaambit ang ebanghelyo sa Manluluwas ngadto sa uban, ang imong klase o korum pweding morebyo sa mosunod nga mga asoy diha sa mga kasulatan: Juan 4:3–26; Mga Buhat 16:25–33; Alma 19:14–18, 28–31. Mahimo dayon kamong magdungan sa paghisgot sa mga pangutana nga sama niini: Sa unsang paagi ang katawhan niini nga asoy giandam aron maminaw sa mensahe sa ebanghelyo? Unsay inyong namatikdan mahitungod kon sa unsang paagi gipaambit ang mensahe? Ngano kaha nga ang Langitnong Amahan ug si Jesukristo gusto nga kita mopaambit sa ebanghelyo? Mahimo dayon ninyong hisgotan diha sa tibuok klase o korum unsay gitudlo kanato niini nga mga asoy mahitungod kon sa unsang paagi kita makapaambit sa ebanghelyo karon.

• Ang pagbasa og makadasig nga mga ehemplo nga gihimo sa uban sa pagpaambit sa ebanghelyo makadasig sa kabatan-onan nga inyong gitudloan sa paghimo sa samang butang. Si Elder D. Todd Christofferson mipaambit og pipila ka ehemplo diha sa iyang mensahe nga “Pagpaambit sa Mensahe sa Pagpahiuli ug sa Pagkabanhaw.” Niini nga mensahe, si Elder Christofferson mitudlo nga tulo ka butang ang gikinahanglan aron ang atong mga pagdapit sa ebanghelyo mahimong madanihon: atong gugma, atong ehemplo, ug atong paggamit sa Basahon ni Mormon. Hisgoti ang mga ehemplo sa pagpaambit sa ebanghelyo niini nga mensahe, ug dapita ang imong mga gitudloan sa pagpaambit og lain pang mga ehemplo, lakip ang ilang personal nga mga kasinatian. Sa unsang paagi kini nga mga kasinatian makapakita sa tulo ka butang nga gitudlo ni Elder Christofferson?

• Sa unsang paagi ikaw makatabang niadtong imong mga gitudloan sa pagsabot nga ang pagpaambit sa ebanghelyo mamahimo nga natural ug dili makahadlok? Hangyoa ang kabatan-onan sa paghunahuna kon sa unsang paagi nila mapaambit ang ebanghelyo ngadto sa tawo nga ilang nailhan. Unsay atong mahimo sa pagdapit kanila sa pag-adto ug pagsusi? Unsa man ang ilang mga oportunidad sa pagduol ug pagtabang? Sa unsang paagi kita makatabang kanila nga mobati og usa ka tinguha sa pag-adto ug pagpabilin? Unsaon nato pagpaagi aron ang pagpaambit sa ebanghelyo mahimong kabahin sa atong inadlaw adlaw nga pagpakabuhi?

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Carlos A. Godoy, “Motuo ko sa mga Anghel,” Liahona, Nob. 2020, 86–88

• Makita nimo ang ubang mga kapanguhaan ubos sa “Pagpakigbahin sa Ebanghelyo,” Gospel Library

Pagtudlo sumala sa Pamaagi sa Manluluwas

“Ang mga tawo mas dali nga mohimo og makahuluganong mga kausaban sa ilang mga kinabuhi kon kana nga mga kausaban nagagikan sa ilang kaugalingong paggamit sa kabubut-on. Kon mohatag ka og mga pagdapit sa paglihok, siguroha ang pagtahod sa kabubut-on niadtong imong gitudloan” (Pagtudlo sumala sa Pamaagi sa Manluluwas, 35).