Disyembre 11

Giuna ba Nako ang mga Butang sa Dios sa Akong Kinabuhi?

Hageo; Zacarias 1–3; 7–14

Pagtinambagay

Pangulohan sa usa ka sakop sa kapangulohan sa korum o sa klase; 10–20 minutos

Sa sinugdanan sa miting, magdungan sa pagsulti og balik sa Tema sa Young Women o sa Tema sa Korum sa Aaronic nga Pagkapari. Dayon pangulohi ang usa ka diskusyon mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa ang nahisgotan sa bishopric diha sa atong mga miting sa konseho sa kabatan-onan sa ward? Unsa nga mga aksiyon ang pwede natong lihokon base niana nga diskusyon?

• Moatiman sa mga nanginahanglan. Sa unsang paagi kita makatabang sa mga tawo sa Kristohanong mga paagi kon makakita kita og panginahanglan ug wala mahibalo unsay isulti?

• Modapit sa tanan sa pagdawat sa ebanghelyo. Unsa nga butang ang atong nakaplagan diha sa ebanghelyo ni Jesukristo nga naghatag kanato og kalipay? Sa unsang paagi nato mapaambit kana nga kalipay ngadto sa uban?

• Mohiusa sa mga pamilya alang sa kahangtoran. Unsay atong gihimo aron makakita og mga ngalan sa atong mga katigulangan kinsa nagkinahanglan og mga ordinansa sa templo? Unsay atong mahimo sa pagtabang sa uban aron makakita og mga ngalan sa ilang mga katigulangan?

Sa kataposan sa leksiyon, kon angay, buhata ang mosunod:

• Mopamatuod sa mga baroganan nga gitudlo.

• Mopahinumdom sa mga sakop sa klase o korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Pangulohan sa usa ka hamtong nga lider o batan-on; 25–35 minutos

Andama ang Imong Kaugalingon sa Espiritwal nga Paagi

Ang kinabuhi puno sa importanting mga butang nga buhatunon. Kon dili kita magmainampingon, ang pagkadaghan og buluhaton sa kinabuhi maoy hinungdan nga makalimot kita sa katuyoan sa kinabuhi. Nahibalo kita nga ang Manluluwas ug ang Iyang ebanghelyo kinahanglan nga mamahimo nga atong kinatas-ang prayoridad, apan ang uban nga butang dali rang mobalda kanato. Tingali mao kana nganong ang mga kasulatan nagtambag kanato nga “pataga ang alagianan sa imong mga tiil” (Mga Proverbio 4:26), “palandonga ang inyong mga dalan” (Hageo 1:5), ug “susiha ug hukmi ang inyong kaugalingon aron pagtino kon nagkinabuhi ba kamo diha sa pagtuo” (2 Mga Taga-Corinto 13:5).

Ang mga Israelite nga nagpuyo sa kapanahonan ni Hageo nagkinahanglan niini nga matang sa pagdapit. Diha sa ilang maayong mga paningkamot sa pagtukod og balik sa Jerusalem, gilangay nila ang pagtukod og balik sa balay sa Ginoo. Ikonsiderar kon sa unsang paagi ang mga pasidaan sa Ginoo diha sa Hageo 1 magamit diri kanato karon. Sa unsang paagi nimo madasig ang imong mga gitudloan sa pagtimbangtimbang sa ilang pasalig nga unahon ang mga butang sa Dios diha sa ilang kinabuhi? Mahimo nimong rebyohon ang mensahe ni Elder Dale G. Renlund nga “Walay Pagkapaling nga Pasalig ngadto Kang Jesukristo” (Liahona, Nob. 2019, 22–25) o ang mga pagtulon-an ni Presidente Ezra Taft Benson diha sa “Ang Dakong Sugo—Higugmaa ang Ginoo” (sa Mga Pagtul[o]n-an sa mga Presidente sa Simbahan: Ezra Taft Benson [2014], 43–52).

Mahimo natong himoon nga kinatas-ang prayoridad ang mga butang sa Dios.

Magdungan sa Pagkat-on

Mahimo nimong sugdan ang diskusyon pinaagi sa pagsulat sa hugpong sa mga pulong gikan sa Hageo 1:6 diha sa pisara. Unsay atong makat-onan gikan niini nga mga ideya—pagpugas og mga binhi nga walay pag-ani, pagkaon nga walay pagbati og katagbawan, o pagkaangkon og kwarta apan gisulod kini sa busloton nga sudlanan—mahitungod sa paggahin og panahon diha sa mga butang nga lahi kay sa unsay gusto sa Dios nga atong buhaton? Samtang ang Ginoo wala maghangyo nga magtutok kita sa pagtukod og templo, unsa diay ang gihangyo Niya nga atong tutokan? Sa unsang paagi nato mahimo kana nga mga butang nga usa ka taas nga prayoridad sa atong kinabuhi? Ang mosunod nga mga kalihokan makatabang sa kabatan-onan sa pagtimbang-timbang sa ilang pasalig sa pagbutang og una sa mga butang sa Dios sa atong kinabuhi.

• Ang pag-ambit sa sakramento usa ka maayo kaayong oportunidad nga matimbang-timbang ang atong pasalig ngadto ni Jesukristo. Sa unsang paagi kita makagamit sa sakramento sa paghunahuna kon kita ba nagkahimong mas sama sa Manluluwas? Tingali ang kabatan-onan mahimong mopaambit kon giunsa nila kini sa paghimo. Mahimo usab silang mohimo og usa ka listahan sa mga pangutana nga tingali ilang ipangutana sa ilang kaugalingon atol sa sakramento. Dapita sila sa pagpamalandong og usa o mas daghang mga kasulatan, mga mensahe, o ubang mga kapanguhaan ubos sa “Suporta nga mga Kapanguhaan” samtang maghimo sila sa ilang mga lista.

• Si Presidente Dieter F. Uchtdorf, sa iyang mensahe nga “Kabahin sa mga Butang nga Labing Mahinungdanon” (Liahona, Nob. 2010, 19–22), mipaambit og tambag nga makatabang sa kabatan-onan sa “[pag]hunahunaa [sa ilang] mga kahimtang” (Hageo 1:5). Mahimo kang magdapit og mga indibidwal o ginagmay nga grupo sa pagbasa sa kataposang tulo ka seksiyon sa pakigpulong (sugod sa seksyon nga “Ang Gah[o]m sa mga Sukaranan”), nga mangita sa unsay ipasabot sa pagtutok sa atong kinabuhi ngadto sa Manluluwas. Mahimo silang mopaambit og butang diin gibati nila ang pagdasig nga buhaton sa paglig-on sa ilang pasalig ngadto ni Jesukristo.

• Daghan kanato ang puno kaayo sa buluhaton sa pagbuhat og maayong mga butang. Apan dili diay kini mao kanunay ang pinakamaayong mga butang. Ikonsiderar ang pagpaambit sa pamahayag gikan sa unang seksiyon sa mensahe ni Presidente Dallin H. Oaks nga “Maayo, Mas Maayo, Labing Maayo” (Liahona, Nob. 2007, 104–8) nga makatabang sa kabatan-onan sa pagsabot niini nga baroganan. Mahimo usab nimong dapiton ang matag usa kanila sa paghimo og lista sa ilang inadlaw adlaw nga mga kalihokan. Hangyoa sila sa personal nga pagtimbang-timbang kon ang matag kalihokan ba “maayo,” “mas maayo,” o “labing maayo.” Unsa ang nakahimo sa usa ka kalihokan nga “labing maayo”? Awhaga ang kabatan-onan sa pagpaambit sa usag usa sa unsay ilang nakat-onan gikan niini nga pagtimbang-timbang sa kaugalingon.

Molihok inubanan sa Hugot nga Pagtuo

Awhaga ang mga sakop sa klase o korum sa pagpamalandong ug pagrekord unsay ilang buhaton aron malihok ang mga pagdasig nga ilang nadawat karon. Kon ganahan sila, mahimo nilang ipaambit ang ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga pagdasig makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Josue 24:14–15; Mateo 6:19–34; 22:36–40; Marcos 10:17–22; 1 Mga Taga-Corinto 11:23–28; 2 Mga Taga-Corinto 13:5; Mga Taga-Colossas 3:1–2 (Kinahanglan nga atong unahon ang mga butang sa Dios sa atong kinabuhi)

• Scott D. Whiting, “Pagkahimong Sama Kaniya,” Liahona, Nob. 2020, 12–15

• “Karon sa Atong Pag-ambit sa Sakramento,” Mga Himno, nu. 98

Pagtudlo sumala sa Pamaagi sa Manluluwas

“Dili kinahanglan nga matudlo ang tanan sa usa ka klasehan aron matandog ang kasingkasing sa usa ka tawo—kasagaran ang usa o duha ka importanting mga punto igo na” (Pagtudlo sumala sa Pamaagi sa Manluluwas, 7).