Jonah on the Beach at Nineveh [Jonas diha sa Baybayon sa Ninive], ni Daniel A. Lewis

Nobyembre 21–27

Jonas; Miqueas

“Siya Nahimuot sa Mahigugmaong Kalolot”

Samtang irekord nimo ang imong mga impresyon, paghunahuna mahitungod sa unsang paagi ang mga baroganan diha sa Jonas ug Miqueas kalabot ngadto sa unsay imong kanunay nga gikat-onan diha sa mga kasulatan.

Irekord ang Imong mga Impresyon

Si Jonas diha sa usa ka sakayan paingon sa Tarsis. Walay daotan ang paglawig ngadto sa Tarsis, gawas nga kini layo gikan sa Ninive, diin ang adtoon unta ni Jonas aron sa pagdala sa mensahe sa Dios. Busa sa dihang ang sakayan nakasugat og makusog nga bagyo, nahibalo si Jonas nga kini tungod sa iyang pagkamasinupakon. Sa pagpamugos ni Jonas, ang iyang kauban nga mga pasahero mitambog kaniya ngadto sa mga kahiladman sa dagat aron sa pagpahunong sa bagyo. Kini ingon og mao na ang kataposan ni Jonas ug sa iyang pangalagad. Apan ang Ginoo wala mobiya ni Jonas––sama lamang nga Siya wala mobiya sa mga tawo sa Ninive ug ingon lamang nga Siya dili mobiya ni bisan kinsa kanato. Ingon sa gitudlo ni Miqueas, ang Ginoo dili mahimuot sa pagsilot kanato apan “siya nahimuot sa mahigugmaong kalolot.” Kon kita moduol ngadto Kaniya, “siya magabaton pag-usab ug kalooy kanato, siya magayatak sa atong mga kasal-anan; ug [iyang] isalibay ang tanan [natong] mga sala ngadto sa kahiladman sa dagat” (Miqueas 7:18–19).

Alang sa kinatibuk-ang pagpasabot sa mga basahon ni Jonas ug Miqueas, tan-awa ang “Jonas” ug “Miqueas” diha sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Jonas 1–4; Miqueas 7:18–19

Ang Ginoo maloloy-on ngadto sa tanan kinsa moduol ngadto Kaniya.

Ang basahon ni Jonas nagpakita, og pipila sa ubang mga butang, kon unsa ka maloloy-on ang Ginoo kon kita maghinulsol. Samtang ikaw magbasa sa Jonas, pangita og mga ehemplo sa Iyang kalooy. Pamalandonga kon giunsa nimo pagsinati kana nga kalooy diha sa imong kinabuhi. Unsa ang imong nakat-onan nga makatabang kanimo nga mahimong mas maloloy-on ngadto sa uban?

Ang pagkasaksi sa kalooy sa Ginoo kasagaran nagdasig og mga pagbati sa gugma ug pasalamat. Bisan pa niana, si Jonas “nagsubo” ug “nasuko” (Jonas 4:1) sa dihang ang Ginoo milugway og kalooy ngadto sa mga tawo sa Ninive, kinsa mga kaaway sa Israel. Ngano kaha nga si Jonas mibati niini nga paagi? Ikaw sukad aduna bay susama nga mga pagbati? Unsay imong gibati nga gitinguha sa Ginoo ang pagtabang ni Jonas nga masabtan sa kapitulo 4?

Pamalandonga ang mga pagtulon-an sa Miqueas 7:18–19. Sa unsang paagi kini nga mga kamatuoran nagtabang ni Jonas sa pag-usab sa iyang kinaiya mahitungod sa Ginoo ug sa mga tawo sa Ninive?

Tan-awa usab sa Lucas 15:11–32; Jeffrey R. Holland, “Ang Kaangayan ug Kalooy sa Dios,” Liahona, Sept. 2013, 16–21.

Makahimo kita sa pagpakigbahin sa ebanghelyo ngadto sa mga anak sa Dios.

Jonas1; 3–4

Ang tanang mga anak sa Dios kinahanglan nga makadungog sa ebanghelyo.

Ang Ninive kanhi bahin sa emperyo sa Asiria, usa ka kaaway sa Israel nga nailhan tungod sa kapintas ug kabangis. Ngadto ni Jonas, tingali kini ingon og sa hunahuna lamang nga ang mga tawo sa Ninive andam sa pagdawat sa pulong sa Dios ug maghinulsol. Apan, ingon sa gitudlo ni Presidente Dallin H. Oaks: “Kinahanglan nga dili nato ibutang ang atong mga kaugalingon isip mga maghuhukom kon kinsa ang andam ug kinsa ang dili. Ang Ginoo nahibalo sa mga kasingkasing sa tanan Niyang mga anak, ug kon kita mag-ampo alang sa inspirasyon, Siya motabang kanato sa pagpangita og mga tawo nga nahibaloan Niya nga ‘andam sa pagpamati sa pulong’ (Alma 32:6)” (“Pagpakigbahin sa Gipahiuli nga Ebanghelyo,” Liahona, Nob. 2016, 58–59). Unsa ang imong nakat-onan gikan sa Jonas 3 nga nagdasig kanimo sa pagpakigbahin sa ebanghelyo bisan niadto kinsa ingon og dili andam sa pag-usab?

Kini tingali makatabang sa pagtandi sa kinaiya ni Jonas (tan-awa sa Jonas 1; 3–4) ngadto sa mga pagbati ni Alma ug sa anak nga mga lalaki ni Mosiah (tan-awa sa Mosiah 28:1–5; Alma 17:23–25).

Tan-awa usab sa 3 Nephi 18:32.

Miqueas 4:11–13; 5:8–15; 7:5–7

Gikutlo ni Jesukristo ang mga sinulat ni Miqueas.

Kini nabantog nga ang Manluluwas mikutlo ni Isaias ug sa mga Salmo. Nakahibalo ka ba nga Siya mikutlo usab ni Miqueas sa makadaghang mga higayon? Hunahunaa ang mosunod nga mga ehemplo, ug pamalandonga kon nganong kini nga mga tudling nahimong importante ngadto sa Manluluwas. Nganong importante kini nganha kanimo?

Miqueas 4:11–13 (tan-awa sa 3 Nephi 20:18–20). Gitandi sa Ginoo ang ulahing adlaw nga pagpundok ngadto sa pag-ani sa trigo (tan-awa usab sa Alma 26:5–7; Doktrina ug mga Pakigsaad 11:3–4). Unsa ang gisugyot niining pagtandi nganha kanimo mahitungod sa pagpundok sa Israel?

Miqueas 5:8–15 (tan-awa sa 3 Nephi 21:12–21). Unsa ang gisugyot niini nga mga bersikulo nganha kanimo mahitungod sa mga katawhan sa Dios (“ang salin ni Jacob”) sa kataposang mga adlaw?

Miqueas 7:5-7 (tan-awa sa Mateo 10:35–36). Sumala niini nga mga bersikulo, nganong importante nga “magatan-aw ngadto sa Ginoo” og una? Nganong importante kini nga tambag karon?

Miqueas 6:1–8

“Unsa ang dad-on ko sa moduol ako sa atubangan sa Ginoo?”

Nagdapit si Miqueas kanato sa paghanduraw kon unsa kaha kini sama ang “moduol sa atubangan sa Ginoo, ug moyukbo … sa atubangan sa halangdon nga Dios” (Miqueas 6:6). Unsa ang gisugyot sa mga bersikulo 6–8 nganha kanimo mahitungod sa unsa ang importante ngadto sa Ginoo samtang Siya nagtimbang-timbang sa imong kinabuhi?

Tan-awa usab sa Mateo 7:21–23; 25:31–40; Dale G. Renlund, “Pagbuhat sa Kaangayan, Pagpakita sa Makanunayong Gugma, ug Pagkinabuhi diha sa Mapaubsanong Pakig-uban sa atong Dios,” Liahona, Nob. 2020, 109–12.

Mga Ideya alang sa Pamilya nga Pagtuon sa Kasulatan ug Home Evening

Jonas 1–4.Ang imong mga bata tingali malingaw sa paghimo og mga aksyon nga nagsaysay sa istorya kabahin ni Jonas, sama sa magpakaaron-ingnon nga mikagiw, maghimo og mga tingog sama sa gibagyo nga dagat, o magpakaaron-ingnon nga gilamoy sa usa ka dako nga isda (tan-awa sa “Jonas ang Propeta” sa Mga Istorya sa Daang Tugon). Hangyoa ang mga sakop sa pamilya kon unsa ang ilang nakat-onan gikan sa kasinatian ni Jonas. Alang sa usa ka ehemplo sa leksyon gikan ni Jonas, tan-awa ang bersikulo 7 sa “Sunda ang Propeta” (Songbook sa mga Bata, 58–59).

Jonas 3.Unsa ang nakat-onan ni Jonas mahitungod sa pagpakigbahin sa ebanghelyo? Kinsa ang atong nahibaloan nga mapanalanginan pinaagi sa pagpaminaw sa mensahe sa gipahiuli nga ebanghelyo ni Jesukristo?

Miqueas 4:1–5.Sumala niini nga mga bersikulo, unsa ang magdala sa kalinaw ug kauswagan ngadto sa mga katawhan sa Ginoo? Unsa ang atong mahimo sa pagtabang sa katumanan niini nga panagna diha sa atong panimalay?

Miqueas 5:2.Makapakita ka og usa ka hulagway ni Jesus isip usa ka gamay nga bata uban sa Iyang inahan (tan-awa sa Libro sa mga Hulagway sa Ebanghelyo, nu.33) diha sa usa ka kilid sa kwarto ug usa ka hulagway sa Maalamong mga Tawo sa lain. Pagbasa og dungan sa Miqueas 5:2 ug Mateo 2:1–6. Giunsa pagtabang sa panagna ni Miqueas ang Maalamong mga Tawo sa pagkaplag ni Jesus? Ang mga sakop sa panimalay makabalhin sa hulagway sa Maalamong mga Tawo ngadto tupad sa hulagway ni Jesus.

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Moadto Ako Bisan Asa sa Pagbuot Mo,” Mga Himno, nu. 168.

Pagpalambo sa Personal nga Pagtuon

Pangitaa ang gugma sa Dios. Samtang ikaw nagbasa sa mga kasulatan, paghunahuna sa pagtan-aw og mga ebidensya sa gugma sa Dios nga makahuloganon nganha kanimo. Sama pananglit, pangita kon giunsa sa Dios sa pagpakita sa Iyang gugma alang sa Iyang mga anak diha sa istorya ni Jonas.

Paghulagway ni Kevin Carden