“Nobyembre 14–20. Amos; Abdias: “Pangitaa Ninyo ang Ginoo, ug Kamo Mangabuhi,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Nobyembre 14–20. Amos; Abdias” Dali, Sunod Kanako—Alang sa mga Indibidwal ug mga Pamilya: 2022
Ang Pan sa Kinabuhi, ni Chris Young
Nobyembre 14–20
Amos; Abdias
“Pangitaa Ninyo ang Ginoo, ug Kamo Mabuhi”
Ang Espiritu Santo makaabli sa imong hunahuna ug kasingkasing ngadto sa mga mensahe sa pulong sa Dios nga gituyo alang lamang kanimo. Unsay imong gibati nga gusto sa Ginoo nga imong makat-onan niini nga semana?
Irekord ang Imong mga Impresyon
Gipili sa Dios ang kaliwat ni Abraham nga mahimo Niya nga mga tawo sa pakigsaad aron sila “mahimong panalangin” ngadto sa tanang katawhan (tan-awa sa Genesis 12:2–3). Apan hinoon, sa panahon sa pangalagad ni Amos, daghan sa mga tawo sa pakigsaad ang midaog-daog sa mga kabos ug gibale-wala ang mga propeta, naghimo sa ilang mga pagsimba nga walay espiritu ug walay kahulogan (tan-awa sa Amos 2:6–16). Tinuod, ang mga nasod nga nagpalibot kanila nakasala og dagko nga mga sala (tan-awa sa Amos 1; 2:1–5), apan kana wala sukad nahimong pasumangil alang sa mga katawhan sa Dios (tan-awa sa Amos 3:2). Busa ang Dios mipadala og usa ka magbalantay sa karnero nga ginganlan og Amos sa pagsangyaw og paghinulsol ngadto sa Gingharian sa Israel. Wala madugay, mipadayag usab ang Dios pinaagi ni propeta Abdias nga bisan tuod ang Gingharian sa Juda nalaglag, ang Ginoo mopundok ug mopanalangin pag-usab sa Iyang katawhan. Ang katawhan sa pakigsaad nahisalaag gikan sa Ginoo, ang duha ka mga propeta mipamatuod, apan dili sila isalikway sa hangtod. Kon ang Dios mopadayag sa Iyang mga tinago ngadto sa Iyang mga sulugoon nga mga propeta (tan-awa sa Amos 3:7), atong dawaton kini isip usa ka timaan nga Siya sa gihapon gusto nga motabang kanato sa pagbuhat sa mga pakigsaad nga atong gihimo uban Kaniya.
Alang sa dugang pa mahitungod sa mga basahon ni Amos ug Abdias, tan-awa sa “Amos” ug “Abdias” sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
Ang Ginoo nagpadayag sa kamatuoran pinaagi sa Iyang mga propeta.
Sa Amos 3:3–6, si propeta Amos mihatag og daghang mga ehemplo sa mga hinungdan ug mga epekto: tungod kay ang leon nakakita og tukbunon, mingulob ang leon; tungod kay usa ka lit-ag gipahimutang alang sa usa ka langgam, nalit-ag ang langgam. (Timan-i nga diha sa Joseph Smith Translation sa bersikulo 6, ang pulong nga “nagbuot” giilisan ngadto sa “nakahibalo”.) Sa mga bersikulo 7–8, si Amos migamit niini nga pangatarongan ngadto sa mga propeta. Unsa ang hinungdan nga ang usa ka propeta managna? Unsa pa ang imong nakat-onan mahitungod sa mga propeta samtang ikaw nagbasa sa Amos 7:10–15? Palandonga kon nganong ikaw mapasalamaton nga ang Ginoo sa gihapon “nagpadayag sa iyang tinago ngadto sa iyang mga sulugoon nga mga propeta” (Amos 3:7). Unsa ang gisugyot niini nga kamatuoran nganha kanimo mahitungod sa Dios?
Tan-awa usab sa Doktrina ug mga Pakigsaasd 1:38; 21:4–8; 35:13–14.
“Pangitaa ninyo ang Ginoo, ug kamo mangabuhi.”
Samtang ikaw nagbasa sa Amos 4:6–13, timan-i ang mga paghukom sa Ginoo nga gipadala diha sa mga katawhan sa Israel. Unsa ang gisugyot niini nga mga bersikulo mahitungod sa unsay gipaabot sa Ginoo nga mahitabo human sa matag usa niini nga mga kasinatian? (tan-awa usab sa Helaman 12:3). Paghunahuna mahitungod sa bag-ohay nga pagsulay nga imong nasinati. Bisan og ang imong pagsulay dili pinadala sa Dios, palandonga kon unsaon kaha unta niini sa paghatag kanimo og oportunidad sa paghangyo Kaniya.
Basaha ang Amos 5:4, 14–15, ug palandonga kon sa unsang paagi ang Ginoo “malooy” (bersikulo 15) nganha kanimo sa imong paghangyo Kaniya, bisan atol sa imong mga panahon sa pagsulay.
Tan-awa usab sa Donald L. Hallstrom, “Dang[o]p sa Ginoo,” Liahona, Mayo 2010, 78–80.
Ang pulong sa Ginoo makatagbaw sa espiritwal nga kagutom ug kauhaw.
Tanan kita nagsinati og mga panahon sa espiritwal nga kagutom ug kauhaw, apan walay kinahanglan alang kanato nga “maglaroy-laroy gikan sa usang dagat ngadto sa laing dagat” (Amos 8:12) mangita og usa ka butang nga motagbaw kanato. Nahibalo kita unsay motagbaw nianang espiritwal nga kagutom, ug napanalanginan kita uban sa pulong sa Ginoo sa kabuhong. Samtang ikaw nagbasa sa Amos 8:11–12, paghunahuna mahitungod kon ngano ang kagutom usa ka maayong itandi sa pagpuyo nga walay pulong sa Dios. Unsay dugang nga mga panabot ang imong nakaplagan sa Mateo 5:6; Juan 6:26–35; 2 Nephi 9:50–51; 32:3; Enos 1:4–8?
Gospel Topics, “Apostasy,” topics.ChurchofJesusChrist.org.
Mahimo kitang mga manluluwas sa Bukid sa Zion pinaagi sa paghimo og templo ug family history nga buhat.
Kinsa ang “mga manluluwas … sa bukid sa Zion”?
Si Presidente Gordon B. Hinckley mihatag og usa ka posible nga paghubad sa pundok sa mga pulong “mga manluluwas sa bukid sa Zion,” nagsumpay sa pundok sa mga pulong ngadto sa templo ug family history nga buhat: [Diha sa templo] literal kitang sa tinuod nahimo nga mga manluluwas sa Bukid sa Zion. Unsay ipasab[o]t niini? Sama sa atong Manunubos nga mihatag sa Iyang kinabuhi isip puli nga sakripisyo alang sa tanang mga tawo, ug sa pagbuhat sa ingon nahimong Manluluwas, mao usab kita, sa gamay nga paagi, kon kita mohimo sa proxy nga buhat didto sa templo, mahimo kitang mga manluluwas niadtong atua sa pikas bahin kinsa walay paagi sa pag-uswag gawas kon usa ka butang himoon alang sa ilang kaugalingon niadtong ania sa yuta” (“Panapos nga Pakigpulong,” Liahona, Nob. 2004, 105).
Mga Ideya alang sa Pamilya nga Pagtuon sa Kasulatan ug Home Evening
-
Amos 3:7.Mahimo tingali nga imong rebyohon ang daghang bag-ohay nga mga mensahe gikan sa Presidente sa Simbahan ug paghisgot kon unsa ang gipadayag sa Ginoo nganha sa imong pamilya pinaagi kaniya. Nganong importante ang pagbaton og propeta sa paggiya sa Simbahan? Giunsa nato pagkahibalo nga siya usa ka tinuod nga propeta? Unsay atong gibuhat aron sa pagsunod sa iyang tambag?
-
Amos 5:4.Mahimo nga ang imong pamilya magmugna og poster nga bitayon diha sa inyong panimalay uban niini nga bersikulo diha niini. Unsa ang gipasabot sa pagpangita sa Ginoo? Unsaon nato Siya pagpangita? Unsa nga mga panalangin ang atong madawat kon atong buhaton? Makadapit ka og mga sakop sa pamilya sa pakigbahin ug pakighisgot og ubang mga tudling nga nagtudlo mahitungod sa pagpangita sa Ginoo, sama sa Mateo 7:7–8; Ether 12:41; ug Doktrina ug mga Pakigsaad 88:63.
-
Amos 8:11–12.Tingali ang mga bata malingaw sa paghimo og mga aksyon nga mobagay sa mga hugpong sa mga pulong dinhi niini nga mga bersikulo. Kon ang atong mga lawas gigutom o giuhaw, unsa ang atong buhaton? Kon ang atong mga espiritu gigutom o giuhaw, unsa ang atong buhaton? Sa unsang paagi ang Pagpahiuli sa ebanghelyo nagtagbaw sa atong espiritwal nga kagutom?
-
Abdias 1:21.Unsa ang kahulogan sa mahimong “mga manluluwas … sa bukid sa Zion”? (Alang sa usa ka posible nga pagpasabot, tan-awa ang pahayag ni Presidente Gordon B. Hinckley sa “Mga Ideya alang sa Personal nga Pagtuon sa Kasulatan.”) Hain sa atong mga katigulangan ang nanginahanglan sa makaluwas nga mga ordinansa? Unsa ang atong buhaton sa pagtabang kanila?
Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.
Gisugyot nga awit: “Salamat, O Dios sa Propeta,” Mga Himno, nu. 13.
Pagpalambo sa Personal nga Pagtuon
Paggamit og musika aron sa pagdapit sa Espiritu ug pagkat-on sa doktrina. Ang pagpaminaw o pagbasa og usa ka himno makatabang kanimo sa pagkat-on og mga baroganan sa ebanghelyo. Sama pananglit, makapaminaw ka o makabasa sa “Salamat, O Dios sa Propeta” (Mga Himno, nu.13) aron sa pagdasig og mas dako nga hugot nga pagtuo diha sa buhing mga propeta. (Tan-awa sa Pagtudlo sumala sa Pamaagi sa Manluluwas, 22.)
Templo sa Santo Domingo Dominican Republic