Oktubre 31–Nobyembre 6. Daniel 1–6: ‘Walay Laing Dios nga Makahimo sa Pagluwas,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)

Oktubre 31–Nobyembre 6. Daniel 1–6,” Dali, Sunod Kanako—Alang sa mga Indibidwal ug mga Pamilya: 2022

Imahe

Daniel naghubad sa damgo sa hari

Daniel Naghubad sa Damgo ni Nabucodonosor, ni Grant Romney Clawson

Oktubre 31–Nobyembre 6

Daniel 1–6

“Walay Laing Dios nga Makahimo sa Pagluwas”

Si Elder Richard G. Scott mipasabot nga ang pagsulat og inspirasyon “nagpakita sa Dios nga ang Iyang mga komunikasyon sagrado ngari nato. Ang pagsulat mopalambo usab sa atong abilidad sa paghinumdom sa pagpadayag” (“Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 46).

Irekord ang Imong mga Impresyon

Labing malagmit gyod nga walay mohulga nga ilabay ka ngadto sa hudno sa kalayo nga nagdilaab o sa langub sa mga leon tungod sa imong hugot nga pagtuo ni Jesukristo. Apan walay usa kanato nga makalahos niini nga kinabuhi nga walay pagsulay sa hugot nga pagtuo. Tanan kita makadawat og kaayohan gikan sa ehemplo sa mga tawo sama ni Daniel, Sadrach, Mesach, ug Abed-nego kinsa nabihag isip batan-ong mga lalaki sa gamhanang Emperyo sa Babelonia (tan-awa sa 2 Mga Hari 24:10–16). Kining batan-ong mga lalaki gilibotan sa dili pamilyar nga kultura nga may lahi nga mga mithi, ug ilang giatubang ang dagkong mga tentasyon sa pagbiya sa ilang mga tinuohan ug matarong nga mga tradisyon. Apan mipabilin sila nga matinuoron ngadto sa ilang mga pakigsaad. Sama ni Jose sa Ehipto ug Ester sa Persia, si Daniel ug ang iyang mga higala sa Babelonia mihupot sa ilang hugot nga pagtuo diha sa Dios, ug ang Dios mihimo og mga milagro nga sa gihapon nagdasig sa mga tumutuo hangtud niining adlawa.

Giunsa nila pagkaplag sa kalig-on nga magpabilin nga matinud-anon? Gibuhat nila kadtong gagmay ug yano nga mga butang nga gihangyo sa Dios nga buhaton natong tanan––pag-ampo, pagpuasa, pagpili og maayong mga higala, pagsalig diha sa Dios, ug paghimong kahayag ngadto sa uban. Samtang kita gilig-on pinaagi niining sama nga gagmay ug yano nga mga butang, makaatubang kita sa mga leon ug sa hudno sa kalayo nga nagdilaab diha sa atong kaugalingong mga kinabuhi uban sa hugot nga pagtuo.

Alang sa kinatibuk-ang pagsabot sa basahon ni Daniel, tan-awa ang “Daniel” diha sa Giya ngadto sa mga Kasulatan.

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

Daniel 1; 3; 6

Ako makasalig diha sa Ginoo kon ang akong hugot nga pagtuo sulayan.

Kon buot hunahunaon, tanan kita nagpuyo sa Babelonia. Ang kalibotan nga naglibot kanato napuno sa daghang mga tentasyon sa pagpaamong sa atong mga sumbanan ug sa pagduda sa atong hugot nga pagtuo diha ni Jesukristo. Samtang ikaw magbasa sa Daniel 1, 3, ug 6, timan-i ang mga paagi nga si Daniel, Sadrach, Mesach, ug Abed-nego gipugos sa pagbuhat og mga butang nga sila nahibalo nga sayop. Gibati ba nimo sukad nga gipugos sa pag-among sa imong mga tinuohan? Unsa ang imong nakat-onan gikan niini nga mga lalaki nga makatabang kanimo sa pagsalig diha sa Ginoo kon ikaw nag-atubang og oposisyon?

Ang basahon ni Daniel ug daghan pang uban nga mga kasulatan nagrekord og mga kasinatian diin ang lawom nga hugot nga pagtuo migiya ngadto sa dagkong mga milagro. Apan unsa kon ang atong hugot nga pagtuo dili mogiya ngadto sa mga milagro nga atong gipangita? (tan-awa, sama pananglit, sa Alma 14:8–13). Pinasikad sa unsay imong nabasa sa Daniel 3:13–18, sa unsa nga paagi kaha si Sadrach, Mesach, ug Abed-nego motubag unta niini nga pangutana? Sa unsang paagi ang ilang ehemplo makaapekto kon unsaon nimo sa pag-atubang ang imong mga pagsulay sa hugot nga pagtuo? Alang sa dugang pa mahitungod niini nga mga bersikulo tan-awa sa mensahe ni Elder Dennis E. Simmons, “Apan Kon Dili …” (Liahona, Mayo 2004, 73–75).

Ang basahon ni Daniel nagpakita usab kon unsaon sa matarong nga mga pagpili sa indibidwal makagiya sa uban ngadto sa mas lawom nga hugot nga pagtuo diha sa Ginoo. Unsa nga mga ehemplo kabahin niini ang imong makaplagan diha sa mga kapitulo 1, 3, ug 6? Palandonga ang mga epekto nga ang imong mga pagpili aduna diha sa uban (tan-awa sa Mateo 5:16).

Tan-awa usab sa Dieter F. Uchtdorf, “Ayaw Kahadlok, Sumalig Lamang,” Liahona, Nob. 2015, 76–79; David R. Stone, “Zion Taliwala sa Babelonia,” Liahona, Mayo 2006, 90–93.

Paghulagway ni Daniel ug sa iyang mga higala nga midumili sa pagkaon sa hari, ni Bryan Call

Daniel 2

Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta.

Pinaagi sa pagpadayag, nakita ni Daniel nga ang damgo ni Nabucodonosor nagtagna sa umaabot nga kalibotanong mga gingharian, ingon man sa umaabot nga gingharian sa Dios, nga “dili gay[o]d malumpag” (Daniel 2:44). “Ang Simbahan mao ang gipanagna nga gingharian sa ulahing mga adlaw,” mitudlo si Elder D.Todd Christofferson, “wala gilalang og tawo apan gitukod sa Dios sa langit ug mikaylap sama sa bato nga ‘gisapsap nga walay kamot gikan sa bukid’ nga mopuno sa yuta” (“Nganong Anaa ang Simbahan,” Liahona, Nob. 2015, 111). Paghunahuna mahitungod sa gingharian sa Dios sa ulahing mga adlaw samtang ikaw nagbasa sa mga paghulagway sa bato diha sa Daniel 2:34–35, 44–45. Unsa nga pagkasusama ang imong nakita tali sa bato ug sa gingharian? Sa unsang paagi sa imong pagtan-aw ang gingharian sa Dios nagpuno sa yuta karon?

Tan-awa usab sa Gordon B. Hinckley, “Ang Bato nga Gipikas Gikan sa Bukid nga Walay Kamot nga Gigamit,” Liahona, Nob. 2007, 83–86; L.Whitney Clayton, “Ang Panahon Moab[o]t,” Liahona, Nob. 2011, 11–13.

Daniel 3:19–28

Ang Manluluwas mosangga kanako sa akong mga pagsulay.

Unsa nga mga panabot ang moabot kanimo samtang ikaw nagbasa mahitungod sa ikaupat nga tawo diha sa hudno sa kalayo nga nagdilaab uban ni Sadrach, Mesach, ug Abed-nego? Sa unsang paagi kini nga asoy makatabang kanimo sa mga hagit nga imong giatubang? Mahimong makakaplag ka og dugang nga mga panabot diha sa Mosiah 3:5–7; Alma 7:11–13; Doktrina ug mga Pakigsaad 61:36–37; 121:5–8.

Imahe

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Daniel 1–2.Samtang nagdungan mo og basa sa Daniel 1 ug 2 kamo makapangita sa mga panalangin nga nadawat ni Daniel ug sa iyang mga higala pinaagi sa paglikay gikan sa pagkaon sa karne ug bino sa hari. ( ChurchofJesusChrist.org.) Kamo makatandi niadto nga mga panalangin ngadto sa mga saad sa Ginoo kanato samtang kita nagsunod sa Iyang mga sugo sama sa Pulong sa Kaalam (tan-awa sa Doktrina ug mga Pakigsaad 89:18–21). Giunsa sa Ginoo sa pagpanalangin kanato tungod sa pagpuyo sa Pulong sa Kaalam?

Daniel 3.Unsaon nimo pagtabang sa imong pamilya sa pagkat-on mahitungod sa istorya sa Daniel 3? “Sadrach, Mesach, ug Abed-nego” sa Mga Istorya sa Daang Tugon makatabang. Unsa ang nagdani kanato mahitungod ni Sadrach, Mesach, ug Abed-nego? Unsa nga mga sitwasyon ang atong giatubang nga naghagit sa atong hugot nga pagtuo ug nagkinahanglan kanato sa pagpakita nga kita nagsalig sa Dios?

Daniel 6:1–23.Ang imong pamilya mahimong malingaw sa pag-aksyon sa mga bahin sa istorya diha sa Daniel 6:1–23 (sama pananglit, sa mga bersikulo 10–12 o 16–23). Unsa ang atong nakat-onan gikan sa ehemplo ni Daniel? Unsa ang atong mabuhat aron mas mahimong sama kaniya?

Daniel 6:25–27.Sumala niini nga mga bersikulo, sa unsa nga paagi naapektohan si Hari Dario sa dihang ang Ginoo miluwas ni Daniel gikan sa mga leon? Makabasa usab kamo sa Daniel 2:47; 3:28–29 mahitungod kon sa unsa nga paagi si Hari Nabucodonosor naapektohan sa samang paagi. Unsa nga mga oportunidad kita aduna sa pag-impluwensya sa uban? Paghisgot og mga ehemplo nga inyong nakita kon giunsa sa hugot nga pagtuo sa ubang mga tawo, lakip ang mga sakop sa pamilya, pag-impluwensya sa uban alang sa kaayohan.

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Gusto ko nga Mosunod sa Ebanghelyo,” Songbook sa mga Bata, 72.

Pagpalambo sa Atong Pagtudlo

Itudlo ang doktrina. Ang ebanghelyo sa Ginoo matahom sa kayano niini (tan-awa sa Doktrina ug mga Pakigsaad 133:57). Yano nga mga kalihokan ug mga panaghisgot nga gipunting sa doktrina makadapit sa Espiritu Santo sa pagdala sa mensahe sa ebanghelyo ngadto sa mga kasingkasing sa inyong pamilya.