pangasaw-unon ug pamanhunon diha sa mga nataran sa templo

Nobyembre 7–13

Oseas 1–6; 10–14; Joel

“Sila Higugmaon Ko sa Walay Bayad”

Dapita ang Espiritu nga mahimong kabahin sa imong pagtuon sa Oseas ug Joel. Paghimo og mubo nga mga sulat sa mga mensahe nga gipabati sa Espiritu diha sa imong kasingkasing ug hunahuna.

Irekord ang Imong mga Impresyon

Ang pakigsaad sa Israel uban sa Ginoo gituyo nga tinuoray ug makahuloganon nga gitandi kini sa Ginoo ngadto sa usa ka kaminyoon. Ang pakigsaad, sama sa kaminyoon, naglakip og mahangtoron nga pasalig, gipakigbahin nga mga kasinatian, pagtambayayong sa pagtukod og kinabuhi, hingpit nga pagkamatinuoron ug labaw sa tanan, kinasingkasing nga gugma. Kini nga matang sa pagkamaunongon moabot uban ang taas nga mga gipaabot––ug makalolooy nga mga sangpotanan sa pagluib. Pinaagi ni propeta Oseas, gihulagway sa Dios ang pipila sa mga sangpotanan nga giatubang sa mga Israelita tungod sa paglapas sa ilang pakigsaad. Ug bisan pa niana ang Iyang mensahe dili “Ako mosalikway kaninyo sa hangt[o]d tungod sa pagkadili matinud-anon.” Hinoon kini mao ang “Dapiton ko ikaw pagbalik” (tan-awa sa Oseas 2:14–15). “Ikaw pangasaw-on ko nga kanako gay[o]d sa pagkamatar[o]ng,” mipahayag ang Ginoo (Oseas 2:19). “Ayohon ko ang ilang mga pagsuki, sila higugmaon ko sa walay bayad” (Oseas 14:4). Mao kini ang samang mensahe nga Iyang gihatag kanato karon samtang kita naningkamot sa pagpuyo sa atong mga pakigsaad uban sa gugma ug pagkamaunongon.

Mipakigbahin si Joel og usa ka susama nga mensahe: “Bumalik kamo sa Ginoo nga inyong Dios: kay siya napuno sa grasya ug maloloy-on, mahinay sa kasuko, ug madagayaon sa mahigugmaong kalolot.”(Joel 2:13). “Ang Ginoo mahimong dalangpanan sa iyang katawhan, ug usa ka salipdanan alang sa mga anak sa Israel” (Joel 3:16). Samtang ikaw magbasa sa Oseas ug Joel, palandonga ang imong kaugalingong relasyon uban sa Ginoo. Hunahunaa ang mahitungod kon giunsa sa Iyang pagkamatinud-anon pagdasig kanimo nga mahimong matinud-anon ngadto Kaniya.

Alang sa kinatibuk-ang pagpasabot sa mga basahon sa Oseas ug Joel, tan-awa ang “Oseas” ug “Joel” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

Oseas 1–3; 14

Ang Ginoo kanunay nga nagdapit kanako sa pagbalik ngadto Kaniya.

Ang asawa ni Oseas, si Gomer, nagluib kaniya, ug ang Dios mihisgot ngadto niining subo nga hitabo sa pagtudlo sa mga Israelita kon unsa ang Iyang gibati mahitungod kanila ug sa ilang mga pakigsaad uban Kaniya. Samtang ikaw magbasa sa Oseas 1–3, palandonga kon giunsa sa Ginoo paghunahuna ang Iyang relasyon ngadto sa Iyang mga katawhan sa pakigsaad. Mahimo tingali nga ikaw mamalandong og mga paagi nga ikaw, sama sa mga Israelita, tingali nahimong maluibon ngadto sa Ginoo ug giunsa Niya pagtabang kanimo. Sama pananglit, unsa ang gitudlo sa Oseas 2:14–23 ug Oseas 14 kanimo mahitungod sa gugma ug kalooy sa Ginoo? Giunsa nimo pagpakita Kaniya ang imong gugma ug pagkamaunongon?

Tan-awa usab sa Dieter F. Uchtdorf, “Punto sa Luwas nga Pagbalik,” Liahona, Mayo 2007, 99–101.

babaye naglingkod sa yuta nga may lalaki nga nagbutang sa kamot diha sa ulo

Ang makasasala nga si Gomer, kinsa nagrepresentar sa Israel, gitanyagan og kaluwasan sa Ginoo. Paghulagway ni Deb Minnard, lisensya gikan sa goodsalt.com

Oseas 6:4–7; Joel 2:12–13

Ang pagkamaunongon ngadto sa Dios kinahanglan gayod nga bation sa sulod, dili lamang nga ipahayag sa gawas nga paagi.

Gimandoan sa Ginoo ang Iyang mga katawhan sa paghalad og mga sakripisyo nga hayop. Apan bisan tuod og ang mga katawhan sa panahon ni Oseas misunod niana nga balaod, sila milapas sa mga sugo nga mas dako og importansya (tan-awa sa Oseas 6:4–7). Unsa kaha ang gipasabot nga ang Ginoo “kalolot maoy gikinahanglan, ug dili ang halad; ug ang kahibalo kabahin sa Dios labaw kay sa sinunog nga mga halad”? (Oseas 6:6). Unsa kaha ang gipasabot sa pagkamatarong nga mahimong sama sa panganod o sama sa yamog? Kinahanglan sama sa unsa ang atong pagkamatarong? (tan-awa sa Isaias 48:18; 1Nephi 2:9–10).

Makabasa ka usab sa Mateo 9:10–13; 12:1–8 aron sa pagtan-aw kon giunsa sa Manluluwas paggamit ang Oseas 6:6 sa panahon sa Iyang pagpangalagad. Giunsa niini nga mga tudling pagtabang kanimo sa pagsabot sa mga pulong ni Oseas?

Kon magbasa sa Joel 2:12–13, kini tingali magtabang kanimo nga mahibalo nga ang pagwatas-watas o paggisi-gisi sa sapot sa usa ka tawo sa karaang paagi usa ka gawas nga timaan sa pagbangutan o pagmahay (sama pananglit, tan-awa sa 2 Mga Cronicas 34:14–21, 27). Sa unsang paagi nga ang pagwatas-watas sa atong mga kasingkasing lahi gikan sa pagwatas-watas sa atong mga sapot?

Tan-awa usab sa Isaias 1:11–17; Mateo 23:23; 1 Juan 3:17–18.

Joel 2

“Igabubo ko ang akong Espiritu ibabaw sa tanang unod.”

Sa dihang nanagna si Joel sa “adlaw sa Ginoo,” gihulagway niya kini isip “adlaw sa kangitngitan ug kadulom,” “dako sa hilabihan ug makalilisang gay[o]d” (Joel 2:1–2, 11). Nagsinati ang Israel og daghang dagko ug makalilisang nga mga adlaw sa tibuok niini nga kasaysayan, ug ang mga katawhan sa pakigsaad sa Dios mosinati pa og daghan sa umaabot. Unsa ang nakapadani kanimo mahitungod sa tambag nga gihatag sa Ginoo diha sa Joel 2:12–17? Alinggati usab ang mga panalangin nga iyang gisaad diha sa Joel 2:18–32. Ngano kaha ang mga panalangin nga gisaad diha sa mga bersikulo 27–32 mahimong ilabi ka bililhon sa mga adlaw sama niadtong gihulagway sa Joel 2, lakip sa atong adlaw?

Unsa kaha ang ipasabot nga ang Ginoo “igabu-bo ang [Iyang] Espiritu ibabaw sa tanang unod”? (Joel 2:28). Sa unsang paagi nga ang mga panagna sa Joel 2:28–29 nangatuman? (Tan-awa sa Mga Buhat 2:1–21; Joseph Smith—Kasaysayan 1:41.)

Mahimong mamalandong ka niini nga mga pulong gikan ni Presidente Russell M. Nelson: “Sa umab[o]t nga mga adlaw, dili na posible ang espirituhanong pagsugakod kon wala na ang giya, direksyon, ug makahupay nga impluwensya sa Espiritu Santo ” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96). Ngano nga ang pagpadayag mahinungdanon sa atong espirituhanong pagsugakod? Sa unsang paagi ikaw makadugang sa imong kapasidad sa pagdawat og personal nga pagpadayag?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Home Evening

Oseas 2:19–20.Ang Ginoo migamit sa pasumbingay sa kaminyoon sa paghulagway sa Iyang pakigsaad nga relasyon uban sa Israel (tan-awa usab ang Giya ngadto sa mga Kasulatan, “Pamanhunon,” scriptures.ChurchofJesusChrist.org). Mahimong makahisgot ang imong pamilya kon nganong ang kaminyoon mahimong maayo nga pasumbingay alang sa atong mga pakigsaad uban sa Dios. Unsaon sa Oseas 2:19–20 pagtabang kanato sa pagsabot mahitungod sa unsay gibati sa Dios kanato? Unsaon nato sa pagmatinud-anon ngadto sa atong mga pakigsaad uban Kaniya?

Oseas 10:12.Ang mga bata tingali malingaw sa pagdrowing og usa ka orasan ug sa pagplano og mga paagi nga sila makapangita sa Ginoo sa lain-laing oras sa tibuok adlaw.

Joel 2:12–13.Aron sa pagtabang sa imong pamilya sa paghisgot mahitungod sa Joel 2:12–13, makabutang ka og hulagway sa Manluluwas sa usa ka bahin sa kwarto ug ang pulong nga sala sa atbang nga bahin. Pagdapit og sakop sa pamilya sa pagbanos-banos og atubang sa timaan ug dayon sa pagtuyok paingon sa Manluluwas samtang sila nakigbahin og mga butang nga makatabang kanato sa pagbalik ngadto Kaniya “uban ang bug-os [natong] kasingkasing.” Awhaga ang mga sakop sa pamilya sa paghunahuna mahitungod sa tanang mga bahin sa ilang mga kinabuhi, lakip ang mga kalihokan, trabaho, eskwelahan, ug mga relasyon.

Joel 2:28–29.Unsa ang ipasabot nga “igabu-bo” ang Espiritu diha kanato? Tingali mahimo nga imong ikapakita kini pinaagi sa pagbu-bo og tubig ug dayon ipakita ang kalahi niini sa usa ka tulo o patak.

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Duol Kang Jesus,” Mga Himno, nu. 66.

Pagpalambo sa Atong Pagtudlo

Itudlo ang doktrina. “Dili gay[o]d mopalabay og usa ka kahigayonan sa pagpundok sa mga anak aron pagkat-on sa doktrina ni Jesukristo. Kini nga mga higayon panagsa ra kaayo kon itandi sa mga paningkamot sa kaaway” (Henry B. Eyring, “The Power of Teaching Doctrine [Ang Gahom sa Pagtudlo sa Doktrina],” Ensign, Mayo 1999, 74).

Jesus nagtindog sa pultahan

Duol ngari Kanako, ni Kelly Pugh