Nobyembre 7–13

Oseas 1–6; 10–14; Joel

“Higugmaon Nako Sila sa Walay Sukod”

Samtang ikaw magtuon sa mga kasulatan ug mangandam nga motudlo, tinguhaa ang inspirasyon gikan sa Espiritu Santo. Unsa man ang gibati nimo nga giaghat nga tutokan atol sa klase niini nga semana?

Irekord ang Imong mga Impresyon

Dapita ang Pagpaambit

Ipakita ang usa ka hulagway sa Manluluwas, ug dapita ang mga bata sa pagpaambit og usa ka butang nga ilang nahibaloan o nakat-onan mahitungod Kaniya niini nga semana. Papuli-puliha sila og gunit sa hulagway samtang mopaambit sila.

Itudlo ang Doktrina: Mas Gagmay nga mga Bata

Oseas 10:12

Ako makapangita sa Ginoo.

Ang Oseas 10:12 naggamit og mga hulagway sa pagpugas, pag-ani, panahon, ug ulan aron sa pagdapit kanato sa pagpangita sa Ginoo. Samtang imong basahon kini nga bersikulo, unsa nga mamugnaon nga mga ideya ang mosantop sa hunahuna nga makadasig sa mga bata sa pagpangita Kaniya?

Posible nga mga Kalihokan

• Basaha ang Oseas 10:12 ngadto sa mga bata, ug dapita sila sa pagbuhat og yano nga mga aksiyon aron matabangan sila nga makasabot sa bersikulo, sama sa pagpakaaron-ingnon nga mananom og mga liso, mamupo og mga utanon gikan sa usa ka tanom, o magbarog ilawom sa ulan. O ipakita ang mga hulagway sa mga liso, mga tanom, ug ulan. Tabangi ang mga bata sa pagtandi sa pagtanom og liso ug sa pag-ani og maayo nga pagkaon ngadto sa matarong nga pagpuyo ug sa pagdawat sa mga panalangin sa Ginoo. Pagpamatuod sa mga panalangin nga gipaulan sa Ginoo diha kanimo samtang naningkamot ka sa pagpangita Kaniya.

• Pagdrowing og orasan diha sa pisara, ug hangyoa ang mga bata sa pagpaambit og mga paagi nga kita makapangita sa Ginoo sa lahi-lahi nga mga panahon sa adlaw. Dapita ang mga bata sa pagsubli uban kanimo sa pulongan nga “Panahon na nga pangitaon ninyo ako, ang Ginoo” (Oseas 10:12). Tabangi sila nga makasabot nga panahon gayod kanunay sa pagpangita sa Ginoo. Ipaambit kon unsay imong gibuhat aron makahinumdom Kaniya sa tanang panahon.

Si Jesukristo mao ang atong Manluluwas ug Manunubos.

Oseas 13:4, 14

Si Jesukristo mao ang akong Manluluwas.

Samtang magtudlo ka mahitungod sa Manluluwas ug sa Iyang Pag-ula, pagpamatuod sa Iyang gugma alang sa matag usa sa mga bata.

Posible nga mga Kalihokan

• Ipakita ang mga hulagway sa pipila ka tawo, lakip ni Jesus, ug hangyoa ang mga bata sa pagpangita hain niini nga mga tawo ang atong Manluluwas. Basaha ang Oseas 13:4, ug ipasabot pag-ayo nga walay lain nga Manluluwas gawas kang Jesukristo. Pagpamatuod nga tungod sa Pag-ula ni Jesukristo, makabalik kita sa pagpuyo uban sa Langitnong Amahan pag-usab.

• Papuli-puliha ang mga bata sa paggunit og hulagway ni Jesus diha sa krus o diha sa lubnganan ug usa ka hulagway ni Jesus sa gawas sa walay sulod nga lubnganan. Dapita ang mga bata sa paghisgot mahitungod sa unsay gipakita sa mga hulagway. Basaha gikan sa Oseas 13:14 ang pulongan nga “Pagalukaton ko sila gikan sa gah[o]m sa [lubnganan]; pagatubson ko sila gikan sa kamatayon.” Pagpamatuod nga si Jesukristo miluwas kanato gikan sa kamatayon ug nga kita mahimong mabanhaw. Kantaha og dungan ang usa ka awit mahitungod sa Pagkabanhaw, sama sa “Nabuhi ba Gay[o]d Pag-usab si Jesus?” (Songbook sa mga Bata, 45). Tabangi ang mga bata nga mailhan ang Espiritu samtang manganta sila.

Joel 2:28

Ang Espiritu Santo makagiya kanako.

Samtang magtudlo ka mahitungod sa panagna ni Joel sa Joel 2:28, hunahunaa kon sa unsang paagi nimo matabangan ang mga bata nga makapangandam sa pagdawat sa gasa sa Espiritu Santo human sila mabunyagan.

Posible nga mga Kalihokan

• Basaha ang Joel 2:28 ngadto sa mga bata, ug ipasabot nga ang mga pulong nga “tanang katawhan” nagpasabot sa matag usa, lakip sa “mga anak nga lalaki ug babaye” sama kanila. Dapita ang mga bata sa pagdrowing og mga hulagway sa mga tawo nga gihisgotan niini nga bersikulo (mga anak nga lalaki ug babaye, tigulang ug batan-on nga mga lalaki, tigulang ug batan-on nga mga babaye), lakip sa ilang mga kaugalingon. Ipasabot nga usa ka paagi nga ibubo sa Langitnong Amahan ang Iyang Espiritu mao ang paghatag kanato sa gasa sa Espiritu Santo kon kita mabunyagan.

• Dapita ang mga bata sa pagpaambit sa unsay ilang nahibaloan mahitungod sa Espiritu Santo. Tabangi sila nga makasabot nga ang Espiritu Santo makatudlo kanato mahitungod sa Langitnong Amahan ug ni Jesukristo ug makatabang kanato nga mahibalo kon unsay tinuod (tan-awa sa Juan 14:26; Doktrina ug mga Pakigsaad 42:17). Pagpaambit og mga kasinatian aron matabangan ang mga bata nga makasabot sa mga paagi nga ang Espiritu makatabang kanato.

Itudlo ang Doktrina: Mas Dagko nga mga Bata

Oseas 2:19–20

Ako matinud-anong makatuman sa akong mga pakigsaad.

Sa basahon sa Oseas, gitandi sa Ginoo ang Iyang mga pakigsaad ngadto sa mga Israelihanon sa usa ka kaminyoon. Bisan sa pagkadili matinud-anon sa mga Israelihanon, Iyahang gihigugma gihapon sila ug gusto nga mobalik sila. Kini nga pagtandi makatabang kanimo sa pagtudlo sa mga bata mahitungod sa importansiya sa pagtuman sa atong mga pakigsaad sa Ginoo.

Posible nga mga Kalihokan

• Sultihi ang mga bata nga sa basahon sa Oseas, gitandi sa Ginoo ang Iyang mga pakigsaad ngadto sa Israel sa usa ka kaminyoon. Ipakita sa mga bata ang hulagway sa usa ka pangasaw-onon ug pamanhonon. Unsay gusto sa Langitnong Amahan nga pagtratar sa bana ug asawa sa usag usa? Sa unsang paagi kita makapakita sa Ginoo nga kita nahigugma Kaniya ug magmatinud-anon ngadto Kaniya?

• Tabangi ang mga bata nga makasabot nga ang mga pakigsaad nga atong himoon ngadto sa Ginoo gituyo nga molungtad hangtod sa kahangtoran. Dapita ang usa sa mga bata sa pagbasa sa Oseas 2:19–20, nga mangita og mga pulong nga naghulagway kon unsay gibati sa Ginoo mahitungod sa Iyang mga pagkigsaad kanato. Unsay ipakigsaad nato nga buhaton kon kita mabunyagan? Unsaon nato sa pagtuman niini nga pakigsaad nga gihimo nato ngadto sa Ginoo?

Oseas 13:4, 14

Si Jesukristo mao ang akong Manluluwas ug Manunubos.

Sa unsang paagi nimo magamit ang mga pulong ni Oseas aron sa paglig-on sa mga pagpamatuod sa mga bata sa ilang Manluluwas ug Manunubos? Samtang ikaw magtudlo, tabangi ang mga bata nga mabati ang kalipay ug gugma sa Pag-ula ni Jesukristo.

Posible nga mga Kalihokan

• Dapita ang mga bata sa pagbasa sa Oseas 13:4, 14, nga mangita og mga pulong o mga pulongan nga naghulagway ni Jesukristo. Unsa ang gitudlo niini nga mga pulong kanato mahitungod Kaniya? Dapita ang mga bata sa paggamit sa Giya ngadto sa mga Kasulatan sa pagpangita ug pagpaambit og uban nga mga kasulatan nga nagtudlo mahitungod ni Jesukristo isip Manluluwas ug Manunubos. Ipaambit ang imong pagpamatuod sa Manluluwas, ug hatagi ang mga bata og kahigayonan sa pagbuhat sa ingon.

Joel 2:28–29

Ang Espiritu Santo makagiya kanako.

Daghan sa mga bata nga imong gitudloan lagmit nabunyagan ug nakadawat na sa gasa sa Espiritu Santo. Sa unsang paagi nimo magamit kini nga mga kasulatan aron sa pagtabang kanila nga makasabot sa gahom ug mga panalangin nga naggikan sa pagpaminaw sa tingog sa Espiritu?

Posible nga mga Kalihokan

• Dapita ang mga bata sa pagbasa og dungan sa Joel 2:28–29, nga ipuli ang ilang mga ngalan sa pulongan nga “inyong mga anak nga lalaki ug babaye.” Isulat sa pisara ang usa ka kapahayag sama sa Ang Espiritu Santo maka… ug dapita ang mga bata nga magpuli-puli sa pagkompleto sa kapahayag. Awhaga sila sa paglakip sa mga butang nga ilang nakat-onan gikan sa Juan 14:16; Moroni 10:5; Doktrina ug mga Pakigsaad 42:17, ug ubang mga kasulatan.

• Ibutang sa panaksan ang usa ka butang, ug papuli-puliha ang mga bata sa pagbubo og tubig niini. Ipasabot nga ang butang nagrepresentar kanato, ug ang tubig nagrepresentar sa Espiritu Santo. Kon kita mabunyagan, kita makadawat sa gasa sa Espiritu Santo, nga usa ka paagi nga gituman sa Ginoo ang Iyang saad nga “ibubo ko ang akong espiritu.” Unsay kinahanglan natong buhaton aron madawat ang Espiritu Santo? Dapita ang mga bata sa pagpaambit og mga panahon sa dihang nabati nila ang impluwensiya sa Espiritu.

Awhaga ang Pagkat-on diha sa Panimalay

Tabangi ang mga bata nga makatino og usa ka butang nga ilang nakat-onan sa klase karon mahitungod sa Langitnong Amahan, ni Jesukristo, o sa Espiritu Santo. Awhaga sila sa pagpaambit niini ngadto sa ilang mga pamilya.

Pagpalambo sa Atong Pagtudlo

Pagtinguha og pagpadayag matag adlaw. Samtang ikaw mangandam sa pagtudlo, pag-ampo ug pamalandong sa mga kasulatan sa tibuok semana. Ang mga ideya ug mga impresyon mahitungod kon unsaon sa pagtudlo mahimong moabot kanimo bisan kanus-a ug bisan asa. (Tan-awa sa Pagtudlo sumala sa Pamaagi sa Manluluwas, 12.)