Ang Pan nga Naghatag sa Kinabuhi, ni Chris Young

Nobyembre 14–20

Amos; Abdias

“Pangitaa ninyo ang Ginoo ug Kamo Mangabuhi”

Samtang motutok ka sa pagtudlo og tinuod nga doktrina sa yano nga mga paagi, mohatag ka og mga oportunidad sa Espiritu Santo nga magpamatuod ngadto sa mga bata. Gamita ang mga kalihokan niini nga latid—o paghimo og imong kaugalingon—aron matabangan ka sa pagtudlo sa mga baroganan sa ebanghelyo sa yano nga mga paagi.

Irekord ang Imong mga Impresyon

Dapita ang Pagpaambit

Hangyoa ang mga bata sa pagpaambit og usa ka butang nga bag-ohay lang nilang nakat-onan sa panimalay o sa simbahan. Sama pananglit, pangutana kon nakakaplag ba sila og bisan unsang bag-o nga paborito nga kasulatan o nakadungog og mensahe nga ilang mapaambit sa klase.

Itudlo ang Doktrina: Mas Gagmay nga mga Bata

Amos 3:7; 7:14–15

Ang mga propeta mao ang mga mensahero ni Jesukristo.

Usa sa labing importante nga mga butang nga mahimong mahibaloan sa mga bata mahitungod sa mga propeta mao nga sila mga mensahero ni Jesukristo. Ang mga ideya sa ubos makatabang kanimo sa pagtudlo nila niini nga mahinungdanon nga kamatuoran.

Posible nga mga Kalihokan

• Ihunghong sa usa sa mga bata ang usa ka mensahe alang sa tibuok klase (sama sa paghangyo sa mga bata nga mobarog gamit ang usa ka tiil o motuyok sa usa ka lingin), ug hangyoa siya sa pagpaambit sa mensahe ngadto sa ubang mga bata. Balika kini nga kalihokan, nga himoong mensahero ang pipila sa ubang mga bata. Tabangi sila nga makasabot kon sa unsang paagi ang mensahero niini nga kalihokan sama sa usa ka propeta, kinsa mopaambit kanato sa mensahe sa Dios. Pagpaambit og pipila ka ehemplo sa bag-ohay lang nga mga mensahe gikan sa buhi nga propeta nga nakatabang kanimo nga mas maduol kang Jesukristo.

• Dapita ang usa ka bata nga mobarog sa atubangan sa lawak ug magpakaaron-ingnon nga si propeta Amos. Samtang magpaambit ka og pipila ka kamatuoran mahitungod kang Amos gikan sa Amos 7:14–15, hatagi ang bata og mga hulagway o mga butang nga gunitan nga mobagay sa matag kamatuoran, sama sa mga hulagway sa usa ka karnero, usa ka prutas, ug ang Ginoo. Ipasabot nga si Amos usa ka magbalantay og karnero nga gitawag sa Ginoo nga mahimong mensahero Niya. Dayon ipakita ang mga hulagway sa Ginoo ug sa buhi nga propeta, ug ipasabot nga ang Ginoo nagpadayon sa pagtawag og mga mensahero karon. Basaha og kusog ang Amos 3:7, ug hangyoa ang mga bata nga itudlo ang tukma nga hulagway kon madungog nila ang mga pulong nga “Ginoo” ug “mga propeta.” Ipaambit ang imong pagpamatuod nga sama lang sa mga adlaw ni Amos, si Jesukristo nakig-istorya kanato pinaagi sa Iyang mga propeta.

• Pagpaambit og istorya gikan sa usa ka bag-ohay lang nga magasin sa Simbahan mahitungod sa buhi nga propeta o mahitungod sa mga kasinatian sa mga miyembro sa Simbahan sa dihang misunod sila sa tambag sa propeta.

• Kantaha o ipatukar ang rekording sa usa ka awit mahitungod sa mga propeta, sama sa “Sunda ang Propeta” (Songbook sa mga Bata, 58–59), samtang buhaton sa mga bata ang pahina sa kalihokan niining semanaha. Ipasabot sa mga bata ang mga pulongan sa awit nga nagtudlo kon sa unsang paagi ang mga propeta nangulo sa agianan padulong kang Jesukristo.

Amos 5:14

Kon pangitaon nako ang maayo, ang Ginoo mag-uban kanako.

Gidapit ni Amos ang mga Israelihanon nga “pangita[on] … ang maayo ug dili ang daotan” ug misaad nga kon ilang buhaton, “ang Ginoo … mag-uban gayod kaninyo.” Sa unsang paagi nimo matabangan ang mga bata nga mosanong niini nga pagdapit ug modawat niini nga saad?

Posible nga mga Kalihokan

• Ipakita ang pipila ka hulagway sa mga bata nga nagbuhat og maayo nga mga butang, sama sa pagtabang sa uban o sa pag-ambit sa sakramento. Papuli-puliha ang matag bata sa paghulagway sa usa sa mga litrato samtang ang uban nga mga bata motag-an kon hain nga litrato ang iyang gihulagway. Basaha ang Amos 5:14, ug tabangi ang mga bata nga maghunahuna og mga paagi nga sila “[mangita og] maayo” kada adlaw.

• Dapita ang mga bata sa pagdrowing og mga hulagway sa ilang mga kaugalingon nga nagbuhat og usa ka butang nga maayo. Basaha ang Amos 5:14, ug ipasabot pag-ayo ang saad sa Ginoo nga Siya mag-uban kanato kon kita mangita sa maayo. Dapita ang mga bata sa pagdugang ngadto sa ilang mga drowing og hulagway ni Jesus nga nagbarog uban kanila.

Itudlo ang Doktrina: Mas Dagko nga mga Bata

Ang Ginoo mopadayag sa mga kamatuoran ngadto sa Iyang mga propeta.

Amos 3:7

Ang mga propeta mao ang mga mensahero ni Jesukristo.

Ang Amos 3:7 usa ka nindot nga tudling sa kasulatan aron sa pagtabang sa mga bata nga mahibalo nga kon kita maminaw sa propeta, kita naminaw sa usa ka mensahero ni Jesukristo.

Posible nga mga Kalihokan

• Tabangi ang mga bata nga makasag-ulo sa tanan o bahin sa Amos 3:7. Sama pananglit, hatagi sila og pipila ka minuto sa pagbasa sa bersikulo sa pipila ka higayon samtang imong isulat ang matag sunod nga pulong sa bersikulo sa pisara. Dapita ang mga bata nga isirado ang ilang mga kasulatan ug dungan nga isulti og kusog ang bersikulo, gamit ang mga timaan sa pisara. Dayon papasa ang pipila ka pulong sa matag higayon hangtod ang mga bata makasubli sa tibuok bersikulo nga walay bisan unsang mga timaan. Unsa ang gitudlo kanato niini nga bersikulo mahitungod sa mga propeta? Sa unsang paagi nga ang atong buhi nga propeta mitabang kanato nga mahibalo sa unsay gusto nga ipabuhat sa Manluluwas kanato?

• Pagsulat og pipila ka pangutana mahitungod sa mga propeta diha sa mga piraso sa papel, sama sa mosunod: Nganong aduna kitay mga propeta? Unsa ang buhat sa mga propeta? Nganong mosunod kamo sa propeta? Unsa ang gitudlo sa mga propeta? Hangyoa ang mga bata nga magpares-pares, ug papilia og pangutana ang usa ka bata gikan sa matag pares ug hangyoa ang iyang kauban sa pagtubag niini. Kon ang mga bata magkinahanglan og tabang sa pagtubag og usa ka pangutana, mahimo silang motan-aw sa “Propeta” diha sa Giya ngadto sa mga Kasulatan (scriptures.ChurchofJesusChrist.org). Human ang kauban motubag sa pangutana, mahimong magbaylo og mga tahas ang mga bata ug mopili og lain nga pangutana.

• Ipaambit sa mga bata ang pipila ka kamatuoran mahitungod sa usa ka propeta sa Daang Tugon nga ilang nakat-onan niini nga tuig (sama ni Noe, Moises, o Isaias). Hangyoa sila sa pagtag-an kinsa nga propeta ang imong gihulagway. Balika kini alang sa uban nga mga propeta.

Amos 5:4–15

Kon pangitaon nako ang maayo, ang Ginoo mag-uban kanako.

Ang mga bata adunay daghang oportunidad sa pagpili tali sa husto ug sayop. Hunahunaa kon unsaon nimo sila sa pagdasig nga “pangita[on] … ang maayo ug dili ang daotan” (bersikulo 14).

Posible nga mga Kalihokan

• Dapita ang mga bata sa pagsiksik sa Amos 5:4–15, nga mangita sa pulong nga “pangitaa.” Unsa ang gusto sa Ginoo nga pangitaon nato, ug unsa nga saad ang Iyang himoon alang niadtong kinsa mobuhat niini? Sa unsang paagi nato pangitaon ang Ginoo?

• Tabangi ang mga bata nga masag-ulo ang kataposang kapahayag sa ikanapulo ug tulo nga artikulo sa hugot nga pagtuo. Unsaon nato “sa pagpangita niining mga butanga”?

Amos 8:11–12

Ang Pagpahiuli sa ebanghelyo mitapos sa kagutom sa hingpit nga pagbiya o apostasiya.

Ang pagsabot sa unsay gitudlo ni Amos mahitungod sa hingpit nga pagbiya makatabang sa mga bata nga mobati nga mapasalamaton alang sa Pagpahiuli sa ebanghelyo.

Posible nga mga Kalihokan

• Dapita ang mga bata sa pagbasa sa Amos 8:11–12, ug hisgoti kon unsay mahitabo kon ang mga tawo walay pulong sa Ginoo. Tabangi ang mga bata nga makahatag og kahulogan sa mga pulong nga hingpit nga pagbiya ug kagutom, gamit ang Giya ngadto sa mga Kasulatan (scriptures.ChurchofJesusChrist.org) o usa ka diksyonaryo. Sa unsang paagi nga ang hingpit nga pagbiya sama sa usa ka kagutom?

• Aron matabangan ang mga bata nga makasabot sa Dakong Apostasiya o Hingpit nga Pagbiya, rebyoha sa ilaha ang “Human sa Bag-ong Tugon,” (sa Mga Istorya sa Bag-ong Tugon, 167–70). Dayon hisgoti ang mga pangutana nga sama niini: Nganong adunay Hingpit nga Pagbiya? Unsa ang nahitabo isip sangpotanan sa Hingpit nga Pagbiya? Nganong gipahiuli sa Ginoo ang Iyang ebanghelyo? (tan-awa usab sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalib[o]tan sa Ikaduhang Siglo nga Kasaulogan,” ChurchofJesusChrist.org). Awhaga ang mga bata sa pagsulat niini nga mga pangutana ug ilang mga tubag ug sa pagpaambit niini sa ilang mga pamilya sa panimalay.

Awhaga ang Pagkat-on diha sa Panimalay

Hatagi ang mga bata og pipila ka gutlo sa paghunahuna mahitungod sa usa ka butang nga ilang nakat-onan karon nga gusto nilang ipaambit ngadto sa usa ka sakop sa pamilya. Awhaga sila sa paghukom kon kinsa ang ilang paambitan niini ug unsaon nila sa pagpaambit niini.

Pagpalambo sa Atong Pagtudlo

Ipaabot ang mga pagdapit nga nagtahod sa kabubut-on. Pangutana sa paagi nga makatabang sa mga bata nga maghunahuna og personal nga mga paagi sa paggamit sa unsay ilang nakat-onan. Sama pananglit, mahimo kang mangutana, “Unsa ang usa ka butang nga gibati nimo nga kinahanglan nimong buhaton base sa unsay atong nahisgotan karon?”