Daniel Interprets Nebuchadnezzar’s Dream [Gihubad ni Daniel ang Damgo ni Nabucodonosor], ni Grant Romney Clawson

Oktubre 31–Nobyembre 6

Daniel 1–6

“Walay Laing Dios Nga Makaluwas”

Samtang imong basahon ang Daniel 1–6, isulat ang mga kamatuoran nga nadasig ka nga tabangan ang mga bata nga makadiskobre.

Irekord ang Imong mga Impresyon

Dapita ang Pagpaambit

Ipakita ang mga hulagway sa mga panghitabo sa Daniel 1–6 (tan-awa sa latid niini nga semana sa Dali, Sunod Kanako—Alang sa mga Indibidwal ug mga Pamilya o sa Libro sa mga Hulagway sa Ebanghelyo, nu. 23, 24, 25, 26). Hangyoa ang mga bata sa pagpaambit sa unsay ilang nahibaloan mahitungod sa mga panghitabo diha sa mga hulagway. Dapita sila sa pagpaambit og higayon sa dihang mipili sila sa pagsunod sa Manluluwas, sama sa gibuhat ni Daniel ug sa iyang mga higala.

Itudlo ang Doktrina: Mas Gagmay nga mga Bata

Daniel 1:1–17

Gusto sa Langitnong Amahan nga atimanon nako ang akong lawas.

Si Daniel ug ang iyang mga higala mibalibad sa karne ug bino nga gitanyag sa hari kanila tungod kay gusto nilang mosunod sa mga sugo sa Dios ug malikayan nga madaot ang ilang mga lawas. Karon ang Pulong sa Kaalam motabang kanato sa paglikay sa mga butang nga makadaot sa atong mga lawas.

Posible nga mga Kalihokan

• Ipaambit sa mga bata ang “Daniel ug Iyang mga Higala” (diha sa Mga Istorya sa Daang Tugon), o ilaktod ang Daniel 1:1–17. Dapita ang mga bata nga idrama-drama ang istorya. Tabangi sila nga makasabot kon sa unsang paagi ang Ginoo mipanalangin ni Daniel ug sa iyang mga higala tungod sa pagpili sa pagsunod Kaniya (tan-awa sa bersikulo 17). Unsa nga mga panalangin ang atong madawat gikan sa Dios kon mopili kita sa husto?

• Ipakita sa mga bata ang mga hulagway sa mga butang nga gitudlo sa Pulong sa Kaalam nga kan-on o gamiton nato ug sa mga butang nga gisulti niini nga dili nato kan-on o gamiton (tan-awa sa Doktrina ug mga Pakigsaad 89). Dapita ang mga bata nga magpakaaron-ingnon nga mokaon sa maayo nga mga butang ug mobalibad sa dili maayo nga mga butang. Pagpamatuod nga ang Ginoo mopanalangin kanato kon kita moatiman sa atong mga lawas. Kantaha og dungan ang usa ka awit mahitungod sa pag-atiman sa atong mga lawas, sama sa “Ang Ginoo Naghatag Kanako og Templo” (Songbook sa mga Bata, 73). Unsa man ang gitudlo niini nga awit kanato?

Paghulagway kang Daniel ug sa iyang mga higala nga mibalibad sa pagkaon sa hari, ni Brian Call

Daniel 1; 3; 6

Ang Dios mopanalangin kanako samtang mopili ako sa pagsunod ni Jesukristo.

Ang basahon ni Daniel naglangkob og mga istorya sa mga tawo nga mipili sa pagsunod sa mga kasugoan sa Dios bisan kon ang pagbuhat sa ingon lisod. Unsaon nimo pagtabang ang mga bata nga makat-on gikan niini nga mga ehemplo?

Posible nga mga Kalihokan

• Pangita og mga hulagway sa mga istorya sa Daniel 1, 3, ug 6 (tan-awa ang pahina sa kalihokan niini nga semana, latid niini nga semana sa Dali, Sunod Kanako—Alang sa mga Indibidwal ug mga Pamilya, o Libro sa mga Hulagway sa Ebanghelyo, nu. 23, 25, 26). Ibutang ang mga hulagway nga magtalikod diha sa pisara o diha sa salog. Dapita ang usa ka bata sa pagbaliktad sa usa sa mga hulagway, ug tabangi siya sa pagsaysay sa istorya nga girepresentar niini. (Alang sa tabang, tan-awa ang “Daniel ug Iyang mga Higala,” “Shadrach, Meshach, ug Abednego,” ug “Daniel ug ang Dugmonan sa mga Leon” sa Mga Istorya sa Daang Tugon.) Human sa matag istorya, hisgoti ang mga pangutana sama niini: Unsay gibuhat sa mga tawo aron sa pagsunod sa Ginoo? Giunsa sila sa pagpanalangin sa Ginoo? Ipaambit kon sa unsang paagi ikaw napanalanginan tungod sa pagpili nga mosunod ni Jesukristo. Dapita ang mga bata sa pagpaambit sa ilang mga kasinatian.

• Dapita ang mga bata sa pagdrama-drama og mga sitwasyon diin ilang mapakita ang ilang hugot nga pagtuo sa Dios pinaagi sa pagtuman sa Iyang mga kasugoan. Mahimo kining maglakip sa pagkamabination ngadto sa usa ka igsoon, pag-istorya mahitungod sa Manluluwas ngadto sa usa ka tawo, o pag-ampo sa matag gabii. Ipakita ang hulagway ni Sadrac, Mesac, ug Abednego diha sa nagdilaab nga hudno (tan-awa sa Libro sa mga Hulagway sa Ebanghelyo, nu. 25), ug hangyoa ang mga bata sa pag-ihap sa mga tawo diha sa hudno. Basaha ang Daniel 3:24–25 aron mahibaloan kon kinsa pa ang anaa diha sa hudno. Ipaambit ang imong pagpamatuod nga ang Ginoo magauban kanato kon kita mosunod Kaniya.

Daniel 6

Gusto sa Langitnong Amahan nga mag-ampo ako kanunay.

Andam si Daniel nga irisgo ang iyang kinabuhi aron makaampo siya ngadto sa Langitnong Amahan kada adlaw. Sa unsang paagi nimo matabangan ang mga bata nga makapalambo og susama nga tinguha sa pag-ampo?

Posible nga mga Kalihokan

• Isaysay ang istorya sa Daniel 6 (tan-awa ang “Daniel ug ang Dugmonan sa mga Leon” sa Mga Istorya sa Daang Tugon), ug dapita ang mga bata sa pagdrowing og hulagway sa istorya. Hangyoa sila sa paggamit sa ilang mga hulagway sa pagsaysay sa istorya ngadto sa usag usa. Nganong gusto man sa Langitnong Amahan nga mag-ampo kita ngadto Kaniya? Ipaambit kon nganong importante ang pag-ampo alang kanimo.

• Hisgoti sa mga bata ang mahitungod sa mga panahon nga sila mahimong mag-ampo, sama kon sila mahadlok, kon makahimo sila og mga sayop, o kon magkinahanglan sila og tabang sa eskwelahan. Nganong maayo man nga mag-ampo niini nga mga sitwasyon? Tudloi ang mga bata nga bisan asa pa man sila, mahimo silang mag-ampo kanunay sa ilang mga kasingkasing.

• Kantaha og dungan ang usa ka awit mahitungod sa pag-ampo, sama sa “Iduko ang Atong Ulo” (Songbook sa mga Bata, 18B). Hisgoti sa mga bata ang mahitungod sa mga butang nga atong mahimong iampo.

Itudlo ang Doktrina: Mas Dagko nga mga Bata

Daniel 1; 3; 6

Ako makabuhat sa unsay husto bisan kon kini lisod.

Ang mga istorya sa Daniel 1, 3, ug 6 makahatag og kaisog ug hugot nga pagtuo sa mga bata nga imong gitudloan aron makahimo og maayo nga mga pagpili, bisan kon mobati sila nga nag-inusara.

Posible nga mga Kalihokan

• Pagdrowing sa pisara og pipila ka panâ nga nagpunting tanan sa sama nga direksiyon ug dayon usa ka panâ nga nagpunting sa sukwahi nga direksiyon. Sa unsang paagi si Daniel ug ang iyang mga higala sama niining usa ka panâ? Dapita ang mga bata sa paghatag og mga ehemplo gikan sa mga istorya sa Daniel 1, 3, ug 6 (tan-awa sa “Daniel ug Iyang mga Higala,” “Shadrach, Meshach, ug Abednego,” ug “Daniel ug ang Dugmonan sa mga Leon” sa Mga Istorya sa Daang Tugon). Pangutan-a ang mga bata kon nganong sa ilang hunahuna tingali lisod alang kang Daniel ug sa iyang mga higala nga mohimo og maayo nga mga pagpili. Sa unsang paagi ang Ginoo mipanalangin kanila tungod sa pagpili sa husto?

• Tabangi ang mga bata sa paghunahuna og mga sitwasyon kon sila mahimong pugson sa paghimo og sayop nga pagpili. Dapita sila sa pagpaambit og mga kasinatian sa dihang napanalanginan sila tungod sa pagpili sa husto bisan kon kini lisod. Kantaha og dungan ang usa ka awit nga may kalabotan niini nga hilisgotan, sama sa “Pilia ang Matar[o]ng” (Mga Himno, nu. 146).

Daniel 2

Ang Simbahan ni Jesukristo sa mga Santos sa Ulahing mga Adlaw mao ang gingharian sa Dios dinhi sa yuta.

Sa dihang si Daniel mihatag sa dinasig nga hubad sa damgo ni Nabucodonosor, nakakita siya og bato nga “gisapsap sa dili kamot sa tawo gikan sa usa ka bukid” (Daniel 2:45). Kini nga bato nagrepresentar sa Ang Simbahan ni Jesukristo sa mga Santos sa Ulahing mga Adlaw, nga gitagana sa pagpuno sa yuta.

Posible nga mga Kalihokan

• Basaha ang Daniel 2:31–35, 44–45 uban sa mga bata, ug dapita sila sa pagdrowing og hulagway sa unsay nakita ni Nabucodonosor sa iyang damgo. Pangutan-a ang mga bata kon unsay ilang nakat-onan gikan niini nga mga bersikulo mahitungod sa bato diha sa damgo. Ipasabot nga kini nga bato nagrepresentar sa Ang Simbahan ni Jesukristo sa mga Santos sa Ulahing mga Adlaw. Hangyoa ang mga bata sa paghingalan og pipila ka butang nga gibuhat sa Langitnong Amahan aron sa pagtukod sa Iyang Simbahan sa ulahing mga adlaw. Aron sa paghatag kanila og mga ideya, ipakita ang mga hulagway sa mga panghitabo sa Pagpahiuli sa Simbahan (tan-awa sa Libro sa mga Hulagway sa Ebanghelyo, nu. 90–95).

• Hatagi ang matag bata og kinumot nga piraso sa papel aron sa pagrepresentar sa bato sa damgo ni Nabucodonosor. Hangyoa ang matag bata sa pagpaambit kon giunsa niya pagkahibalo nga ang Simbahan gipahiuli sa Dios. Samtang mopaambit ang mga bata, dapita sila sa paghatag sa ilang “mga bato” nganha kanimo. Pusta ang mga bato gamit ang tape o lambo aron sa pagporma og usa ka dako nga bato. Pagpamatuod nga kon atong palig-onon ang atong mga pagpamatuod ug ipaambit ang ebanghelyo ngadto sa uban, atong gihiusa ang atong hugot nga pagtuo aron sa pagtabang sa gingharian sa Dios sa “[paglukop] sa tibuok kalibotan” (Daniel 2:35).

Awhaga ang Pagkat-on diha sa Panimalay

Dapita ang mga bata sa pagbuhat og usa ka butang niining semanaha nga magpakita sa ilang hugot nga pagtuo kang Jesukristo.

Pagpalambo sa Atong Pagtudlo

Tabangi ang mga bata nga makaila sa Espiritu. Samtang makabaton ka og espirituhanon nga mga kasinatian uban sa mga bata, tabangi sila nga makaila sa impluwensiya sa Espiritu Santo.