“Ang Iyang mga palakaw maingon man sa kanhing panahon” (Habacuc 3:6). Sa Sinugdanan Mao ang Pulong, ni Eva Timothy

Nobyembre 28–Disyembre 4

Nahum; Habacuc; Sofonias

“Ang Iyang mga Palakaw maingon man sa Kanhing Panahon”

Makatuon ka sa mga kasulatan sulod sa tibuok kinabuhi ug sa gihapon makakaplag og bag-ong mga panabot. Ayaw hunahunaa nga kinahanglan imong masabtan ang tanan karon dayon. Pag-ampo alang sa panabang sa pag-ila sa mga mensahe nga imong gikinahanglan karon.

Irekord ang Imong mga Impresyon

Ang pagbasa sa Daang Tugon sa kasagaran nagpasabot sa pagbasa sa mga panagna mahitungod sa kalaglagan. Kanunay ang Ginoo mitawag og mga propeta sa pagpahimangno sa daotan nga ang Iyang mga paghukom anaa diha kanila. Ang mga pagpangalagad ni Nahum, Habacuc, ug Sofonias mga maayo nga mga ehemplo. Sa makuyaw nga mga detalye, kini nga mga propeta nanagna sa pagkapukan sa mga siyudad nga, niana nga panahon, ingon og lig-on ug gamhanan––Ninive, Babelonia, ug bisan ang Jerusalem. Apan kana liboan ka mga tuig na ang milabay. Ngano nga bililhon ang pagbasa niini nga mga panagna karon?

Bisan tuod kadtong mapagarbohon, daotan nga mga siyudad gilaglag, ang garbo ug pagkadaotan nagpadayon. Sa kalibotan karon, kita usahay mobati nga gilibotan sa mga daotan nga gipanghimaraot sa karaang mga propeta. Gani kita makamatikod og mga ginagmay niini diha sa atong mga kasingkasing. Kining Daang Tugon nga mga panagna nagpadayag kon unsa ang pagbati sa Ginoo mahitungod sa garbo ug pagkadaotan, ug kini nagtudlo nga kita makapalayo gikan niini nga mga daotan. Tingali kana usa ka rason nga mabasa gihapon nato kining karaang mga panagna karon. Sila ni Nahum, Habacuc, ug Sofonias ug ang uban dili lamang mga propeta bahin sa kalaglagan––sila mga propeta bahin sa kaluwasan. Ang mga paghulagway sa kalaglagan naminusan pinaagi sa mga pagdapit sa pagduol ngadto ni Kristo ug sa pagdawat sa Iyang kalooy: “Pangitaa ninyo ang Ginoo …; pangitaa ang pagkamatar[o]ng, pangitaa ang pagkamaagh[o]p” (Sofonias 2:3). Kini mao ang palakaw sa Ginoo sa karaan, ug kini mao ang Iyang palakaw karon. “Ang Iyang mga palakaw maingon man sa kanhing panahon” (Habacuc 3:6).

Alang sa mga kinatibuk-ang pagtan-aw niini nga mga basahon, tan-awa sa “Nahum” “Habacuc,” ug “Sofonias” diha sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Nahum 1

Ang Ginoo gamhanan ug maloloy-on.

Ang misyon ni Nahum mao ang pagpanagna sa kalaglagan sa Ninevi–– ang ulohan sa mapintas nga emperyo nga Asiria, nga mitibulaag sa Israel ug bangis nga mimaltratar sa Juda. Misugod si Nahum pinaagi sa paghulagway sa kasuko ug dili katupngan nga gahom sa Dios, apan siya usab namulong mahitungod sa kalooy ug kaayo sa Dios. Mahimo nimong hunahunaon ang pag-ila sa mga bersikulo sa kapitulo 1 nga nagtabang kanimo sa pagsabot sa matag usa niini nga mga hiyas––ug ang ubang mga hiyas sa Dios nga imong namatikdan. Ngano kaha nga importante nga makahibalo sa matag usa niini nga mga butang mahitungod sa Ginoo?

Ang pipila tingali makakita niini nga malisod nga magkauyon ang pagtulon-an sa kasulatan nga “ang Ginoo maayo” (Nahum 1:7) ngadto sa pagtulon-an nga Siya “magapanimalos sa iyang mga kabatok” (Nahum 1:2). Diha sa Basahon ni Mormon, ang anak nga lalaki ni Alma nga si Corianton adunay susama nga mga pangutana “mahitungod sa kaangayan sa Dios diha sa pagsilot sa makasasala” (Alma 42:1). Aron makakat-on pa og dugang mahitungod sa kalooy sa Dios ug sa unsang paagi kini kalabot ngadto sa iyang kaangayan, basaha ang tubag ni Alma ngadto ni Corianton sa Alma 42.

“Ang Ginoo maayo man, malig-on nga dalangpanan sa adlaw sa kasamok” (Nahum 1:7).

Habacuc

Ako makasalig sa kabubut-on sa Ginoo ug sa Iyang tukma nga panahon.

Bisan ang mga propeta usahay adunay mga pangutana mahitungod sa mga palakaw sa Ginoo. Si Habacuc, kinsa nagpuyo sa panahon nga ang kadaotan nagkaylap sa Juda, misugod sa iyang rekord uban sa pangutana ngadto sa Ginoo (tan-awa sa Habacuc 1:1–4). Unsaon nimo sa pag-summarize ang mga kabalaka ni Habacuc? Ikaw sukad aduna bay susama nga mga pagbati?

Ang Ginoo mitubag ngadto sa mga pangutana ni Habacuc pinaagi sa pag-ingon nga Siya mopadala sa mga Caldeahanon (ang mga taga Babelonia) sa pagsilot sa Juda (tan-awa sa Habacuc 1:5–11). Apan si Habacuc sa gihapon nasamok, kay ingon dili makiangayon alang sa Ginoo sa dili pagtabang “sa diha nga ang tawong daotan [Babelonia] nagalamoy sa tawo nga labing matarong [Juda]” (tan-awa sa mga bersikulo 12–17). Unsa ang imong nakaplagan sa Habacuc 2:1–4 nga nagdasig kanimo sa pagsalig sa Ginoo kon ikaw adunay dili matubag nga mga pangutana?

Ang Kapitulo 3 sa Habacuc maoy usa ka pag-ampo sa pagdayeg ngadto sa Dios ug usa ka pahayag sa hugot nga pagtuo diha Kaniya. Unsa ang nakapadani kanimo mahitungod sa mga pulong ni Habacuc sa mga bersikulo 17–19? Sa unsa nga paagi nga ang estilo sa pagpahayag niini nga mga bersikulo lahi gikan sa Habacuc 1:1–4? Pamalandonga kon sa unsa nga paagi ikaw makapalambo og mas dako nga hugot nga pagtuo sa Dios, bisan og ang kinabuhi ingon og dili patas.

Tan-awa usab sa Mga Hebreohanon 10:32–39; 11; Doktrina ug mga Pakigsaad 121:1–6; Robert D. Hales, “Nagahulat sa Ginoo: Matuman ang Imong Kabubut-on,” Liahona, Nob. 2011, 71–74.

Sofonias

“Pangitaa ninyo ang Ginoo, kamong tanan nga mga maagh[o]p sa yuta.”

Nanagna si Sofonias nga ang mga tawo sa Juda malaglag sa hingpit sa mga taga Babelonia tungod sa ilang pagkadaotan. “Akong pagaut-uton sa hingpit gay[o]d ang tanang mga butang gikan sa nawong sa yuta, nagaingon ang Ginoo” (Sofonias 1:2). Ug gani miingon usab si Sofonias nga usa ka “salin” ipatunhay (Sofonias 3:13). Samtang ikaw nagbasa niini nga mga panagna alinggati ang mga matang sa mga kinaiya ug mga pamatasan nga migiya sa Juda ug sa ubang mga grupo ngadto sa pagkalaglag––tan-awa ilabi na sa Sofonias 1:4–6,12; 2:8, 10,15; 3:1–4. Dayon pangita alang sa mga kinaiyahan sa mga katawhan nga ipatunhay sa Dios––tan-awa sa Sofonias 2:1–3; 3:12–13, 18–19. Unsa nga mensahe sa imong paminaw aduna ang Ginoo alang kanimo dinhi niini nga mga bersikulo?

Ang Sofonias 3:14–20 naghulagway sa hingpit nga kalipay sa matarong human “gipapahawa ang imong kaaway” sa Ginoo (bersikulo 15). Unsa nga mga panalangin nga gisaad dinhi niini nga mga bersikulo ang importante nganha kanimo? Nganong importante kini nganha kanimo nga mahibalo mahitungod niini nga mga panalangin? Mahimo nimong itandi kini nga mga bersikulo ngadto sa mga kasinatian nga gihulagway sa 3 Nephi 17 ug mamalandong kon giunsa ni Jesukristo pagbati ang mahitungod sa Iyang mga katawhan––lakip kanimo.

Mga Ideya alang sa Pamilya nga Pagtuon sa Kasulatan ug Home Evening

Nahum 1:7.Sa unsang paagi nga ang Ginoo sama sa “usa ka malig-on nga dalangpanan”? Tingali ang imong pamilya makatukod og usa ka yano nga lig-ong dalangpanan o kota diha sa inyong panimalay ug makahisgot sa Nahum 1:7 samtang anaa sulod niini. Unsay naghimo sa atong adlaw og usa ka “adlaw sa kasamok”? Sa unsang paagi si Jesukristo ug ang Iyang ebanghelyo naglig-on kanato? Unsaon nato pagpakita nga kita “mosalig kaniya”?

Habacuc 2:14.Unsaon nato pagtabang nga matuman ang panagna niini nga bersikulo?

Habacuc 3:17–19.Unsay atong nakat-onan gikan sa ehemplo ni Habacuc niini nga mga bersikulo?

Sofonias 2:3.Makadula kamo nga ang mga sakop sa pamilya kinahanglang mangita sa mga pulong “pagkamatarong” ug “pagkamaaghop” diha sa pahina nga daghan og ubang mga pulong. Dayon sila makahisgot mahitungod og mga ehemplo sa pagkamatarong ug pagkamaaghop nga ilang nakita sa usag usa. Unsay buot ipasabot nga maningkamot sa pagkamatarong ug pagkamaaghop?

Sofonias 3:14–20.Unsa ang atong makaplagan sa Sofonias 3:14–20 nga naghimo kanato sa “pag-awit, … pagmalipayon ug pagmaya uban sa tibuok nga kasingkasing”? Tingali ang imong pamilya makakanta og mga himno o mga awit nga moabot sa hunahuna samtang sila nagbasa niini nga mga bersikulo.

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Sayo Kong Mangita sa Ginoo,” Songbook sa mga Bata, 67.

Pagpalambo sa Personal nga Pagtuon

Pagmapailobon. Usahay kita gusto dayon og mga tubag sa atong mga pangutana, apan ang espiritwal nga mga panabut nagkinahanglan og panahon ug dili mapugos. Sama sa gisulti sa Ginoo ni Habacuc, “Paab[o]ta kini, kay kini moab[o]t gay[o]d” (Habacuc 2:3).

“Ang Ginoo nga imong Dios nga anaa sa imong kinataliwad-an usa ka makagagah[o]m” (Sofonias 3:17). He Comes Again to Rule and Reign [Moanhi siya Pag-usab aron sa Pagmando ug Paghari] ni Mary R. Sauer