Disyembre 12–18

Malaquias

“Kamo Gihigugma Ko, Nagaingon ang Ginoo”

Ang ngalang Malaquias nagpasabot og “akong mensahero” (Bible Dictionary, “Malachi”). Samtang ikaw nagtuon sa mensahe ni Malaquias, unsa nga mga mensahe ang imong nakaplagan alang sa imong kinabuhi? Sa unsa nga paagi ang mga pulong ni Malaquias may kalabotan sa atong panahon?

Irekord ang Imong mga Impresyon

“Kamo Gihigugma Ko,” ang Ginoo nagsulti sa Iyang mga katawhan pinaagi ni propeta Malaquias. Apan ang mga Israelita, kinsa miantos og mga henerasyon nga kasakit ug pagkabihag, nangutana sa Ginoo, “Sa unsang pagkaagi nga ikaw nahigugma kanamo?” (Malaquias 1:2). Human sa tanan nga nasinati sa Israel, tingali sila natingala kon ang kasaysayan ba sa karaang Israel usa ka tinuod nga istorya sa gugma sa Dios alang sa Iyang mga katawhan sa pakigsaad.

Samtang ikaw namalandong sa unsay imong nabasa diha sa Daang Tugon niini nga tuig, unsa nga ebidensya sa gugma sa Dios ang imong nakaplagan? Sayon kini nga makakita og daghang mga ehemplo sa tawhanong kahuyang ug pagsukol. Bisan pa nianang tanan, wala gayod ang Dios mihunong sa pagtabang pinaagi sa gugma. Sa dihang gimaltrato sa anak nga mga lalaki ni Jacob ang ilang igsoong lalaki nga si Jose, ang Ginoo sa gihapon miandam og paagi sa pagluwas kanila gikan sa kagutom (tan-awa sa Genesis 45:4–8). Sa dihang ang Israel nanagbagulbol didto sa kamingawan, gipakaon sila sa Dios og mana (tan-awa sa Exodo 16:1–4). Bisan sa dihang ang Israel mibiya Kaniya, misimba ngadto sa ubang mga dios, ug nagkatibulaag, ang Dios wala gayod sa hingpit mibiya kanila apan misaad nga kon sila mohinulsol, Siya mopundok ug motubos kanila “uban sa dak[o] uyamot nga mga kalooy” (tan-awa sa Isaias 54:7).

Gitan-aw niini nga paagi, ang Daang Tugon usa ka istorya sa mapailobon, malahutayon nga gugma sa Dios. Ug kini nga istorya nagpadayon karon. “Ang Adlaw sa Pagkamatar[o]ng [mo]subang nga adunay kaluwasan sa iyang mga pako,” nanagna si Malaquias (Malaquias 4:2). Mianhi gayod si Jesukristo, nagdala og pisikal ug espiritwal nga pagkaayo ngadto sa tanan kinsa moduol ngadto Kaniya. Siya ang labing mahinungdanong ebidensya sa gugma sa Dios alang sa karaang Israel ug alang kanatong tanan.

Alang sa dugang pa nga impormasyon mahitungod sa basahon ni Malaquias, tan-awa sa “Malaquias” diha sa Giya ngadto sa mga Kasulatan.

Mga Ideya alang sa Personal nga Pagtuon sa Kasulatan

Malaquias 1–4

“Bumalik kamo kanako ug Ako mobalik nganha kaninyo.”

Sa panahon ni Malaquias, ang mga Israelita nakatukod na pag-usab sa templo sa Jerusalem, apan isip usa ka katawhan gikinahanglan gihapon nila ang pagtukod og usab sa ilang relasyon ngadto sa Ginoo. Samtang ikaw magtuon sa Malaquias, pangitaa ang mga gipangutana sa Ginoo sa mga Israelita o ang ilang gipangutana Kaniya. Hunahunaa ang pagpangutana sa imong kaugalingon og sama nga mga pangutana (ang pipila ka mga ehemplo gisugyot diha sa ubos) aron sa pagtabang kanimo sa pagtimbang-timbang sa imong relasyon ngadto sa Ginoo ug mas magpaduol ngadto Kaniya.

• Sa unsang paagi ako mibati sa gugma sa Ginoo alang kanako? (tan-awa sa Malaquias 1:2).

• Ang mga paghalad ko ngadto sa Ginoo tinuod ba nga nagpasidungog Kaniya? (tan-awa sa Malaquias 1:6–11).

• Sa unsa nga mga paagi ako nagkinahanglan sa “pagbalik” ngadto sa Ginoo? (tan-awa sa Malaquias 3:7).

• Ako ba nangawat sa Dios sa bisan unsa nga paagi? (tan-awa sa Malaquias 3:8–11).

• Sa unsang paagi ang akong kinaiya atol sa malisod nga mga panahon nagpakita sa akong mga pagbati ngadto sa Ginoo? (tan-awa sa Malaquias 3:13–15; tan-awa usab sa 2:17).

Tan-awa usab sa D.Todd Christofferson, “Ako Nagabadlong ug Nagapanton sa akong Gihigugma,” Liahona, Mayo 2011, 97–100.

Malaquias 1:6–14

Ang Ginoo nangayo alang sa “usa ka ulay nga halad.”

Ang mga pulong sa Ginoo diha sa Malaquias 1 nagpakita nga ang mga pari nga Israelita nanaghalad sa daotan ug masakiton nga mga hayop isip mga sakripisyo diha sa templo, diin gidili sa Ginoo (tan-awa sa Levitico 22:17–25). Unsa ang gisugyot niini nga mga sakripisyo mahitungod sa mga pagbati sa mga pari ngadto sa Ginoo? (tan-awa sa Malaquias 1:13). Ngano nga ang Ginoo naghangyo kanato sa paghatag Kaniya sa atong labing maayo nga mga halad? Paghunahuna mahitungod sa mga sakripisyo nga gihangyo sa Ginoo kanimo nga himoon. Unsa ang imong mahimo sa paghatag Kaniya og “usa ka ulay nga halad”? (Malaquias 1:11; tan-awa usab sa 3:3).

Tan-awa usab sa Moroni 7:5–14.

Malaquias 3–4

Ang mga panagna ni Malaquias nangatuman sa ulahing mga adlaw.

Sa dihang mibisita ang Manluluwas sa mga Amerika, gikutlo niya ang Malaquias 3–4 ngadto sa mga Nephite (tan-awa sa 3 Nephi 24–25). Niadtong 1823, ang anghel Moroni mipakigbahin og mga bahin niining sama nga mga kapitulo ngadto ni Joseph Smith (tan-awa sa Joseph Smith––Kasaysayan 1:36–39; tan-awa usab sa Doktrina ug mga Pakigsaad 2). Ngano kaha nga gibalik-balik kanunay ang mga pulong ni Malaquias diha sa mga kasulatan? (tan-awa usab sa Doktrina ug mga Pakigsaad 27:9; 110:13–16; 128:17–18). Sa imong opinyon, unsa nga mga mensahe gikan sa Malaquias 3–4 ingon og ilabi ka importante alang sa atong panahon?

Sa dihang gikutlo ni Moroni ang Malaquias 4:5–6 ngadto ni Joseph Smith, siya mibuhat sa mao nga “adunay gamay nga kausaban kon kini basahon” diha sa Biblia (Joseph Smith––Kasaysayan 1:36). Unsa ang gidugang sa kang Moroni nga kausaban sa atong pagsabot niini nga panagna? Sa pagkat-on pa mahitungod sa pag-anhi ni Elias ug giunsa niini nga panagna sa pagtuman karon, tan-awa sa Doktrina ug mga Pakigsaad 110:13–16 ug sa mensahe ni Elder David A. Bednar, “Ang mga Kasingkasing sa mga Anak Mobati” (Liahona, Nob. 2011, 24–27). Nganong mapasalamaton ka nga mianhi si Elijah?

Paghulagway ni Elijah nga nagpakita ngadto nila ni Joseph Smith ug Oliver Cowdery sa Templo sa Kirtland, ni Robert T. Barret

Malaquias 3:8–12

Ang pagbayad sa ikapulo nag-abli sa mga bintana sa langit.

Samtang ikaw nagbasa sa Malaquias 3:8–12, paghunahuna mahitungod sa imong kaugalingong mga kasinatian sa pagbayad og ikapulo. Unsa ang hugpong sa mga pulong “buksan ko kaninyo ang mga tamboanan sa langit” (bersikulo 10) nangahulogan nganha kanimo?

Mga Ideya alang sa Pamilya nga Pagtuon sa Kasulatan ug Home Evening

Malaquias 1:2.Unsaon sa imong pamilya pagtubag ang pangutana nga makaplagan diha sa Malaquias 1:2––“Sa unsang pagkaagi [ang Ginoo] nahigugma kanato?” Unsa ang pipila ka mga ebidensya sa gugma sa Ginoo alang kanato?

Malaquias 3:8–12.Samtang ikaw nagbasa sa Malaquias 3:8–12, dapita ang mga sakop sa pamilya sa pagpakigbahin sa ilang mga hunahuna o mga pagbati mahitungod sa ikapulo. Unsa ang temporal ug espiritwal nga mga panalangin ang atong nakita gumikan sa pagbayad sa ikapulo? (tan-awa sa David A. Bednar, “Ang mga Tamboanan sa Langit,” Liahona, Nob. 2013, 17–20). Ang mga sakop sa pamilya mahimong malingaw sa pagdrowing og mga hulagway nga morepresentar niini nga mga panalangin ug sa pagbitay sa mga hulagway diha sa usa ka bintana.

Malaquias 3:13–18.Unsa ang kahulogan niini ngari kanato nga mapasakop ngadto sa Ginoo ug mahimong usa sa Iyang “mga bahandi”?

Malaquias 4:5–6.Human mabasa kini nga mga bersikulo, ang imong pamilya makaila sa mga tubag ngadto sa mosunod nga mga pangutana mahitungod sa panagna ni Malaquias: Kinsa? Unsa? Kanus-a? Diin? Ngano? (tan-awa usab sa Doktrina ug mga Pakigsaad 2).

Unsaon nato sa pagpabalik sa atong mga kasingkasing ngadto sa atong mga katigulangan? Sa unsang paagi kita mapanalanginan kon atong buhaton? Unsay atong buhaton isip pamilya aron madawat kini nga mga panalangin?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Family History—Naghimo Ako,” Songbook sa mga Bata, 100.

Pagpalambo sa Personal nga Pagtuon

Pangutana samtang ikaw nagtuon. Samtang ikaw nagtuon sa mga kasulatan, tingali adunay mga pangutana nga mosulod sa imong hunahuna. Palandonga kini nga mga pangutana, ug pangitaa ang mga tubag.

Mourning’s Hosanna [Hosanna ni Mourning], ni Rose Datoc Dall. Usa ka babaye nga ginganlan og Mourning nagbarog didto sa kalibotan sa espiritu, giliyokan sa iyang mga katigulangan. Nagsaulog siya sa ilang kaluwasan gikan sa espiritwal nga pagkabihag.