Kay alang Kanato ang usa ka Bata Natawo, ni Simon Dewey

Disyembre 19–25

Pasko

“Kita Nanaghulat Kaniya, ug Siya Magaluwas Kanato”

Atol niiining panahon sa Pasko, hunahunaa kon giunsa sa Daang Tugon paglig-on sa imong pagpamatuod ni Jesukristo sa tibuok tuig.

Irekord ang Imong mga Impresyon

Ang Daang Tugon nagdala og espiritu sa kahinam nga pagpaabot. Niana nga paagi, kini sama og gamay sa panahon sa Pasko. Nagsugod ni Adan ug Eva, ang Daang Tugon nga mga patriyarka, mga propeta, mga mambabalak, ug mga katawhan nagpaabot sa maarang-arang nga mga adlaw, napuno sa paglaom alang sa pagbag-o ug pagluwas pinaagi sa Mesiyas. Ug ang mga Israelita kanunay nanginahanglan niana nga paglaom––maanaa man sila sa pagkabihag sa Ehipto o Babelonia o nabihag pinaagi sa ilang kaugalingon nga sala o pagsukol. Ngadto niining tanan, mipahinumdom kanila ang mga propeta nga usa ka Mesiyas, usa ka Tigluwas, moabot “aron sa pagmantala sa kagawasan sa mga binihag” (Isaias 61:1).

Kana nga paglaom misugod sa pagkatuman sa dihang si Jesukristo natawo sa Betlehem. Ang gamhanang Tigluwas sa Israel natawo sa usa ka kamalig sa mga hayop ug gipahigda sa pasongan (tan-awa sa Lucas 2:7). Apan Siya dili lamang ang Tigluwas sa karaang mga Israelita. Mianhi Siya sa pagluwas kanimo––sa pagdala sa imong kaguol, sa pagpas-an sa imong mga kasubo, pagabunalan alang sa imong mga kadaotan, aron nga uban sa Iyang mga samad ikaw mamaayo (tan-awa sa Isaias 53:4–5). Kini mao ngano nga ang Pasko puno kaayo sa malipayong pagpaabot bisan karon. Ang Mesiyas mianhi kapin sa 2,000 ka tuig ang milabay, ug siya nagpadayon sa pagsulod sa atong mga kinabuhi bisan kanus-a kita mangita Kaniya.

Mga Ideya alang sa Personal nga Pagtuon sa Kasulatan

Ako nagmaya diha sa akong Manluluwas.

Ang Pasko nailhan isip usa ka malipayong panahon tungod sa hingpit nga kalipay nga gidala ni Jesukristo sa kalibotan. Bisan ang mga tawo kinsa wala magsimba ni Jesus isip ang Anak sa Dios mobati kanunay sa kalipay sa Pasko. Palandonga ang hingpit nga kalipay nga imong gibati tungod kay ang Langitnong Amahan mipadala sa Iyang Anak.

Gatosan ka mga tuig sa wala pa ang Manluluwas matawo, ang mga propeta sa Daang Tugon mibati usab sa hingpit nga kalipay samtang sila mihisgot kabahin sa pag-anhi sa Mesiyas. Basaha ang pipila sa mosunod nga mga tudling, ug hunahunaa kon nganong kini bililhon unta ngadto niadtong kinsa nagpaabot sa misyon sa Manluluwas: mga Salmo 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Nganong bilihon kini nga mga tudling nganha kanimo?

Tan-awa usab sa Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 81–84.

Ang mga simbolo makatabang kanako sa paghinumdom ni Jesukristo.

Daghang mga tradisyon nga kauban sa Pasko makabaton og simbolikanhong mga kahulogan nga nagtudlo kanato ngadto ni Kristo. Mga dekorasyon nga giporma og bitoon nagrepresentar sa mahayag nga bitoon nga midan-ag sa gabii sa pagkatawo ni Jesus (tan-awa sa Mateo 2:2). Ang mga mananaygon nagpahinumdom kanato sa mga anghel kinsa mipakita ngadto sa mga magbalantay sa karnero (tan-awa sa Lucas 2:13–14). Sa imong pagtuon sa Daang Tugon niini nga tuig, tingali imong namatikdan ang daghang mga simbolo sa Manluluwas. Ang pipila gilista sa ubos. Hunahunaa ang pagtuon niini ug pagrekord sa unsay gitudlo niini kanimo mahitungod Kaniya.

• Nating karnero (Genesis 22:8; Exodo 12:5; 1 Pedro 1:18–20).

• Mana (Exodo 16:4, 12–21, 31; Deuteronomio 8:3; Juan 6:30–40).

• Tubig (Exodo 17:1–6; Jeremias 2:13; Ezequiel 47:1–12; Juan 4:7–14).

• Bitin nga tumbaga (Numeros 21:4–9; Juan 3:14–15).

• Bato (1 Samuel 2:2; 2 Samuel 22:2–3; Salmo 118:22–23; Isaias 28:16; Mga Taga-Efeso 2:20).

• Sanga (Isaias 11:1–2; Jeremias 23:5; 33:15).

• Kahayag (Salmo 27:1; Isaias 9:2; 60:19; Miqueas 7:8; Juan 8:12).

Unsa ang ubang mga simbolo, mga tudling, ug mga asoy ang imong nakaplagan diha sa mga kasulatan nga nagpamatuod ni Jesukristo?

Tan-awa usab sa 2 Nephi 11:4; Mosiah 3:14–15; Moises 6:63; “Mga Matang o mga Simbolo ni Kristo,” sa Giya ngadto sa mga Kasulatan, “Jesukristo,” scriptures.ChurchofJesusChrist.org.

“Iyang ngalan pagatawgon og Kahibulongan.”

Gitawag si Jesukristo sa daghang nagkalain-laing mga ngalan ug mga titulo. Unsa nga mga titulo ang imong makaplagan sa mosunod nga mga bersikulo? Mga Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Unsa ang ubang mga titulo nga imong mahunahunaan? Tingali gani ikaw malingaw sa paglista og mga titulo ni Jesukristo nga imong makaplagan diha sa mga himno sa Pasko. Giunsa sa matag titulo pag-impluwensya ang paagi sa imong paghunahuna mahitungod Kaniya?

Mga Ideya alang sa Pamilya nga Pagtuon sa Kasulatan ug Home Evening

Ang mga tradisyon sa Pasko makatudlo ngadto ni Jesukristo.Ang Israelita nga mga pamilya adunay mga tradisyon sama sa Pagpalabay ug ubang mga kasaulogan, nga gituyo aron sa pagtudlo sa ilang mga kasingkasing ug mga hunahuna ngadto sa Ginoo (tan-awa sa Exodo 12). Unsa nga mga tradisyon ang imong pamilya aduna sa panahon sa Pasko nga nagtabang kanimo sa pagpunting diha ni Jesukristo? Unsa nga mga tradisyon ang imong nahibaloan gikan sa kasaysayan sa imong pamilya? Mahimo nimong hunahunaon ang paghisgot isip usa ka pamilya ang pipila ka mga tradisyon nga imong gusto nga sugdan. Ang pipila ka mga ideya mahimong mag-apil sa pagserbisyo sa usa ka tawo nga nanginahanglan (alang sa mga ideya, tan-awa sa ComeuntoChrist.org/light-the-world), pagdapit og higala sa pagtan-aw sa First Presidency Christmas Devotional [Unang Kapangulohan nga Debosyonal sa Pasko] uban kanimo (broadcasts.ChurchofJesusChrist.org), pagsulat sa imong kaugalingong awit sa Pasko, o sa pagpangita og mamugnaong paagi sa pagpakigbahin sa mensahe sa pagkatawo ni Kristo.

“The Christ Child: A Nativity Story [Ang Batang Kristo: Usa ka Istorya sa Pagkatawo].”Unsaon nimo pagtabang ang mga sakop sa pamilya sa pagbati og ligdong nga pagtahod ug hingpit nga kalipay sa pagkatawo ni Kristo? Pagdungan og basa sa Mateo 1:18–25; 2:1–12; Lucas 1:26–38; 2:1–20. Ang matag sakop sa pamilya makapili og tawo gikan sa asoy sa kasulatan ug sa pakigbahin kon unsa ang gibati niana nga tawo mahitungod sa Manluluwas. Ang mga sakop sa pamilya mahimo usab nga makigbahin sa ilang kaugalingon nga mga pagbati mahitungod Kaniya.

Pagpangita sa Manluluwas diha sa Daang Tugon.Samtang ikaw nag-andam sa pagtuon sa kinabuhi ni Jesukristo diha sa Bag-ong Tugon sa sunod tuig, hunahunaa ang pagrebyo uban sa imong pamilya kon unsa ang ilang nakat-onan mahitungod Kaniya niini nga tuig diha sa Daang Tugon. Mahimo kang moribyo sa mga latid dinhi niini nga kapanguhaan ug bisan unsang personal nga tun-anan nga mugbong mga sinulat sa pagtabang kanimo sa paghinumdom kon unsay imong nakat-onan. Ang mas gagmay nga mga bata tingali makakuha og kaayohan gikan sa pagtan-aw pinaagi sa Mga Istorya sa Daang Tugon o sa mga hulagway dinhi niini nga kapanguhaan. Unsa nga mga panagna o mga istorya ang mahinungdanon ngari kanato? Unsa ang atong nakat-onan mahitungod sa Manluluwas?

Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.

Gisugyot nga awit: “Gamay nga Lungsod sa Bethlehem,” Mga Himno, nu.126.

Pagpalambo sa Atong Pagtudlo

Paminawa ang imong sakop sa pamilya. “Ang pagpaminaw usa ka buhat sa gugma. Kini nagkinahanglan nga mas amumahon nato kon unsay anaa sa kasingkasing sa laing tawo kay sa unsay sunod diha sa atong agenda o outline. … Samtang hatagan nimo og mainampingong pagtagad ang [mga sakop sa pamilya] nga gipamulong ug wala gipamulong nga mga mensahe, mas makasab[o]t ka sa ilang mga panginahanglan, sa ilang mga kabalaka, ug sa ilang mga tinguha. Ang Espiritu motabang kanimo nga mahibalo kon unsaon pagtudlo kanila” (Pagtudlo sumala sa Paagi sa Manluluwas, 34).

Ang Pagkatawo, ni N. C. Wyeth