“Disyembre 5–11. Haggeo; Zacarias 1–3; 7–14: “Pagkabalaan ngadto sa Ginoo,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Disyembre 5–11. Haggeo; Zacarias 1–3; 7–14,” Dali, Sunod Kanako—Alang sa mga Individual ug mga Pamilya: 2022
Templo sa Laie Hawaii
Disyembre 5–11
Haggeo; Zacarias 1–3; 7–14
“Pagkabalaan ngadto sa Ginoo”
Ang pagbasa sa mga kasulatan nagdapit og pagpadayag. Dawata ang mga mensahe nga gipadayag sa Espiritu Santo nganha kanimo samtang ikaw nagbasa sa Haggeo ug Zacarias.
Irekord ang Imong mga Impresyon
Human sa mga dekada nga pagkabihag, usa ka pundok sa mga Israelita, tingali apil ang mga propeta nga si Haggeo ug Zacarias, gitugotan sa pagbalik ngadto sa Jerusalem. Ang pipila dinhi niini nga pundok nahinumdom unsa ang hitsura kaniadto sa Jerusalem sa wala pa kini malaglag. Handurawa ang ilang mga pagbati sa ilang pagkakita sa mga dugmok nga mga bato nga sa kaniadto ilang mga panimalay, ilang mga dapit nga ampoanan, ug ilang templo. Ngadto niadto kinsa nagduha-duha kon ang templo mahimo pa ba kaha nga mabalik susama sa “balay sa [Ginoo] sa iyang himaya kanhi” (Haggeo 2:3), namulong si propeta Haggeo sa mga pulong sa Ginoo sa pag-awhag: “Pagmalig-on, kamong tanang katawhan sa yuta, miingon ang Ginoo, ug pagbuhat: kay ako magauban man kaninyo, … ayaw kamo kahadlok.” “Kining balaya pun-on ko sa himaya, … ug niining dapita igahatag ko ang pakigdait.” (Hageo 2:4–5, 7,9.)
Apan kini dili lamang ang balaang templo nga nagkinahanglan nga tukoron pag-usab. Sa daghan nga mga paagi, ang mga katawhan sa Dios diha sa espirituhanong pagkalaglag. Ug ang pagtukod og usab sa balaang mga katawhan mas lisod pa kay sa pagtabas og mga bato ug sa paghan-ay niini aron sa pagtukod sa paril sa templo. Karon, ang mga templo nagdala sa kinulit nga “Pagkabalaan ngadto sa Ginoo,” ug kana nga mga pulong magamit dili lamang ngadto sa gambalay apan ngadto sa paagi sa kinabuhi. Ang pagkulit niini nga mga pulong diha “sa mga lingganay sa mga kabayo” ug sa “tanang kolon sa Jerusalem” (Zacarias 14:20–21) makatabang lamang kon kini gikulit usab diha sa matag kasingkasing. Ang tinuod nga pagkabalaan nagkinahanglan nga ang mga pulong ug mga balaod sa Ginoo “makaab[o]t” (Zacarias 1:6) diha kanato, nagtugot sa Iyang gahom sa pag-usab sa atong mga kinaiyahan aron kita mahimo nga balaan sama Kaniya (tan-awa sa Levitico 19:2).
Alang sa kinatibuk-ang pagsabot sa mga basahon ni Haggeo ug Zacarias, tan-awa sa “Haggeo” ug “Zacarias” sa Giya ngadto sa mga Kasulatan.
Mga Ideya alang sa Personal nga Pagtuon sa Kasulatan
“Palandonga ang inyong mga dalan.”
Dihay daghang importanting mga butang nga buhaton sa pagtukod pag-usab sa Jerusalem. Apan kapin o kulang sa 15 ka mga tuig ang milabay sukad sa pagbalik sa mga Israelita, ang Ginoo wala mahimuot nga ang pagtukod pag-usab sa templo wala hatagi og dakong prayoridad (tan-awa sa Haggeo 1:2–5; tan-awa usab sa Esdras 4:24). Samtang ikaw magbasa sa Haggeo 1; 2:1–9, paghunahuna og mga pangutana sama niini: Unsa nga mga sangpotanan ang giatubang sa mga Israelita tungod kay wala nila humana ang templo? Unsa nga mga panalangin ang gisaad sa Ginoo kanila kon ilang humanon ang pagtukod sa Iyang balay? Mahimong gamiton nimo kini nga oportunidad sa “pagpalandong sa inyong mga dalan”––sa paghunahuna mahitungod sa imong mga prayoridad ug unsaon nimo sa paghan-ay niini uban ang iya sa Ginoo.
Tan-awa usab sa Doktrina ug mga Pakigsaad 95; Terence M. Vinson, “Tinuod nga mga Disipulo sa Manluluwas,” Liahona, Nob. 2019, 9–11.
Ang Ginoo makahimo kanako nga balaan.
Si Sister Carol F. McConkie mitudlo: “Ang pagkabalaan mao ang paghimo sa mga pagpili nga magpabilin sa Espiritu Santo isip atong giya. Ang pagkabalaan mao ang pagsalikway sa atong kinaiyanhong pagkatawo ug mahimong usa ka santos pinaagi sa pag-ula ni Kristo ang Ginoo’ [Mosiah 3:19]. … Ang atong pagla[o]m sa pagkabalaan nasentro diha ni Kristo, sa Iyang kalooy ug sa Iyang grasya” (“Ang Katah[o]m sa Pagkabalaan,” Liahona, Mayo 2017, 9–10). Ibutang kini nga mga pagtulon-an sa hunahuna samtang ikaw nagbasa sa mga pulong sa Ginoo, gihatag pinaagi ni propeta Zacarias, nag-awhag sa Israel nga mahimong mas balaan: Zacarias 1:1–6; 3:1–7; 7:8–10; 8:16–17. Timan-i ang mga butang nga gihangyo sa Ginoo nga ipabuhat sa Israel aron Siya makahimo kanila nga balaan. Giunsa Niya pagtabang kanimo nga mahimong mas mabalaan?
Zacarias 2:10–11; 8:1–8; 14:9–11, 20–21 ihulagway kon sama sa unsa ang kinabuhi sa usa ka adlaw nga umaabot kon kitang tanan magpuyo uban sa Ginoo diha sa usa ka kahimtang sa pagkabalaan. Unsa kaha ang kahulogan niini nga mga paghulagway ngadto niadtong nagtukod pag-usab sa Jerusalem sa panahon ni Zacarias? Unsa ang kahulogan niini nganha kanimo?
“Ania karon, ang imong hari nagaanhi kanimo: siya matar[o]ng man, ug adunay kaluwasan; mapaubsanon, ug nagkabayo sa asno” (Zacarias 9:9). Madaogong Pagsulod, ni Harry Anderson
Zacarias 9:9–11; 11:12–13; 12:10; 13:6–7; 14:1–9
Si Jesukristo mao ang gipanagna nga Mesiyas.
Daghan sa mga sinulat ni Zacarias nagpakita sa yutan-ong pangalagad ni Jesukristo ug usab sa Iyang mahinabo nga Ikaduhang Pag-anhi. Itandi ang mosunod nga mga panagna gikan ni Zacarias nga adunay kalabot nga mga tudling gikan sa ubang mga basahon sa kasulatan:
-
Zacarias 9:9–11 (tan-awa sa Mateo 21:1–11; 1 Pedro 3:18–19)
-
Zacarias 11:12–13 (tan-awa sa Mateo 26:14–16; 27:1–7)
-
Zacarias 12:10 (tan-awa sa Juan 19:37; Pinadayag 1:7)
-
Zacarias 13:6–7; 14:1–9 (tan-awa sa Mateo 26:31; Doktrina ug mga Pakigsaad 45:47–53)
Unsa ang imong nakat-onan mahitungod sa Manluluwas sa imong pagtuon niini nga mga tudling? Nganong importante kini nganha kanimo ang pagsabot niini nga mga tudling?
Tan-awa usab sa Giya ngadto sa mga Kasulatan, “Mesiyas” (scriptures.ChurchofJesusChrist.org).
Mga Ideya alang sa Pamilya nga Pagtuon sa Kasulatan ug Home Evening
-
Haggeo 1:2–7.Kini nga mga bersikulo mahimong moaghat sa imong pamilya nga “palandonga ang inyong mga dalan.” Tingali ang mga sakop sa pamilya makahimo og aksyon sa mga hugpong sa mga pulong sa bersikulo 6. Unsa ang gitudlo niini nga bersikulo mahitungod sa paghatag og bili sa mga butang sa kalibotan labaw sa mga butang sa Dios? Mahimo kamong mag-uban sa pagtinambagay mahitungod sa mga prayoridad sa pamilya. Ang pagkanta og usa ka awit sama sa “Maninguha Kong Mahimong Mahisama Kang Jesus” (Songbook sa mga Bata, 40–41) makatabang sa imong pamilya sa pagtimbang-timbang kon unsa ang inyong nabuhat nga maayo ug ang mga dapit diin kamo makahimo sa paglambo.
-
Haggeo 2:1–9.Sa pagpaila niini nga mga bersikulo, mahimo ka nga makigbahin sa istorya kabahin sa Templo sa Provo City Center, nga gitukod pag-usab gikan sa usa ka gimahal nga tabernakulo nga nasunog (tan-awa ang video “Provo City Center Temple Completed [Ang Templo sa Provo City Center Nahuman],” ChurchofJesusChrist.org). Samtang nagbasa ang imong pamilya sa Haggeo 2:1–9, mahimo kang mohangyo og sakop sa pamilya sa paghunahuna og usa ka butang sa atong mga kinabuhi nga tingali susama sa trabaho nga pagtukod pag-usab sa templo nga naguba. Giunsa kita pagtukod pag-usab sa Ginoo human sa trahedya o kalisdanan?
-
Zacarias 3:1–7.Samtang kamo magbasa niini nga mga bersikulo, makapakita ka sa imong pamilya og pipila ka hugaw nga mga sapot. Unsa kaha ang gibati ni Josue sa dihang siya mibarog sa atubangan sa anghel nga hugaw og mga sapot? Sa unsa nga paagi ang sala sama sa hugaw nga mga sapot? Unsa ang gitudlo sa Zacarias 3:1–7 mahitungod sa pagpasaylo? Dayon makalimpyo kamo og dungan sa mga sapot ug maghisgot mahitungod sa makalimpyo nga gahom sa Pag-ula sa Manluluwas.
-
Zacarias 8:1–8.Unsa ang nakapadani kanato mahitungod sa panan-awon ni Zacarias sa kaugmaon sa Jerusalem? Unsa ang atong nakaplagan didto nga gusto natong makita sa atong komunidad? Unsaon nato pagdapit ang Manluluwas sa “pagpuyo diha taliwala [kanato]”? (tan-awa sa Gary E. Stevenson, “Sagrado nga mga Panimalay, Sagrado nga mga Templo,” Liahona, Mayo 2009, 101–3).
Alang sa dugang nga mga ideya sa pagtudlo sa mga bata, tan-awa sa latid niini nga semana sa Dali, Sunod Kanako—Alang sa Primary.
Gisugyot nga awit: “Maninguha Kong Mahimong Mahisama Kang Jesus,” Songbook sa mga Bata, 40–41.
Pagpalambo sa Personal nga Pagtuon
Paghimo og oportunidad sa pagtimbang-timbang sa kaugalingon. Samtang ikaw magtuon sa mga kasulatan, kasagaran ka nga madasig sa pagpamalandong sa imong kaugalingon nga pasalig ngadto sa Langitnong Amahan ug ni Jesukristo. Lihok diha sa mga panghunahuna nga imong nadawat.