Vakayagataki ni Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa

Na Cava na iNaki ni Noda Soqoni ni Kalasi kei na Kuoramu?

Na Turaga e solia vei iko na veivakabauti tabu: E kacivi iko mo veiqaravi vaka mataveiliutaki ni kalasi ni goneyalewa se na mataveiliutaki ni kuoramu ni Matabete i Eroni. E tiki ni nomu itavi mo liutaka ka qarava na nomu soqoni ni kalasi se kuoramu ena Sigatabu. Me caka oqo, ena veivuke ni kilaimatata na vuna eda sota kina ena veisoqoni oqo.

Na soqoni ni kalasi ni Goneyalewa kei na kuoramu ni Matabete i Eroni e duidui mai vei ira na kalasi ni Lotu me vaka na Wilivola ni Sigatabu se semineri. Ena soqoni ni kalasi se kuoramu, eda cakava e levu cake na ka mai na vulici walega ni dua na ulutaga ni kosipeli. Eda vulica me baleta na cakacaka sa solia vei keda na Kalou, ka da cokonaki ira na lewe ni noda kalasi se kuoramu mera na cakava na cakacaka o ya ena noda veivale, ena loma ni Lotu, kei na noda itikotiko raraba. Ena veisoqoni oqo, eda sega walega ni veivosakitaka na cakacaka—eda tuvatuva me da vakayacora na noda itavi vaka tiki ni mataivalu ni itabagone ni Turaga, oka kina na veivuke me vakasoqoni o Isireli.

Ena soqoni ni kalasi kei na kuoramu, eda tuvana me da vakayacora na noda itavi vaka tiki ni mataivalu ni itabagone ni Turaga.

Ia na vakabibitaki oqo ni cakacaka e sega ni kena ibalebale ni sa biu tu na veivosaki vakaivunau me baleta walega na Matawilivola ni Sigatabu. E dina sara, ni sa ka bibi na vulici ni ivunau ena kalasi ni Goneyalewa kei na soqoni ni kuoramu ni Matabete i Eroni—e vukea meda vaqaqacotaka na noda veimaliwai kei Jisu Karisito, kila vinaka na ituvatuva nei Tamada Vakalomalagi, ka vakaitavi ena Nodrau cakacaka. Ni da vulica vata na kosipeli, na dina eda vulica e rawa ni veisautaka na yaloda ka vukei keda me da kila na ivakarau me da cakacaka kina ena sala va-Karisito vakalevu cake. E rawa ni da ciqoma na sala veivakauqeti eso me vakalevutaka noda “vuku kei na yagoda talega, a sa vinakati keda vakalevu cake tikoga na Kalou kei ira na tamata” (Luke 2:52). Ni da saumaki vakalevu cake vei Jisu Karisito kei na Nona kosipeli, eda na kunea na reki ka vakila na gagadre me da vukei ira na tani ena salatu ni veiyalayalati.

O Cei e Liutaka na Veisoqoni Oqo?

Sa kacivi iko na Kalou mo lewe ni mataveiliutaki ni kalasi kei na kuoramu ka solia vei iko na lewa mo liutaka. Oqori na vuna e dodonu me liutaka e dua na lewe ni nomu mataveiliutaki ni kalasi se kuoramu na vei soqoni yadua ni nomu kalasi se kuoramu. O ira na iliuliu qasecake e dodonu mera solia na veituberi kei na veitokoni, ia mera kakua ni taura vei iko. Raica na wase ka kena ulutaga na “Veivosaki Vata” ena itekivu ni ituvatuva yadua ena ivola oqo me baleta na vakasama eso ena vukei iko mo kila na sala me liutaki kina e dua na soqoni ka vakayacori rawa kina na kena inaki dina. Vakayagataka na bose ni mataveiliutaki mo tuvana kina na sala ko na veiliutaki kina ena veisoqoni ni Sigatabu vaka oqo.

O Cei E Dodonu Me Vakavulica na Lesoni?

Na iliuliu qasecake, e dua na lewe ni mataveiliutaki ni kalasi se kuoramu, se dua tale na lewe ni kalasi se kuoramu e rawa ni vakavulica na lesoni. Vaka mataveiliutaki ni kalasi se kuoramu, veitalanoa vata kei ira na nomu iliuliu qasecake me baleta o cei e dodonu me lesi me vakavulica na lesoni. Nanuma tiko ni levu na ka era rawa ni cau kina na nomu iliuliu qasecake. Saga mo vuli mai na nodra kilaka kei na ivakadinadina. Era tu talega na kena yaga ni ra kerei na itabagone mera veivakavulici—na veivakavulici ena rawa ni vakatitobutaka na nodra saumaki ka tara cake na veimaliwai vata kei ira na lewe ni kalasi se kuoramu tale eso. Okoya gona solia vei ira na madigi veiganiti mera vakavulica taucoko se tiki ni dua na lesoni, ia mo nanuma tiko na nodra gagadre kei na rawa-ka na lewe ni nomu kalasi se kuoramu. Me kena ivakaraitaki, e rawa ni veivakavulici wasoma cake na iliuliu qasecake ena kalasi se kuoramu ka ra tiko kina na itabagone gone sobu se o ira na itabagone ka lailai nodra kila ena kena vakavulici na kosipeli. Ni ra sureti na itabagone mera veivakavulici, e dua na itubutubu se daunivakasala qasecake me na vukei ira mera vakavakarau me vaka e gadrevi.

O ira era lesi mera veivakavulici e rawa ni ra vakayagataka na wase ka kena ulutaga na “Vakatavulica na iVunau” ena ituvatuva yadua ni vurevure oqo me vukei ira me vakavakarau. Na wase oqo e tu kina na vakatutu eso ni veivakavulici kei na veivosakitaki ni ivunau ni macawa o ya, ia mera kakua ni yalani mai vei ira na qasenivuli ki na veivakatutu ga oqo. Ena veituberi ni Yalotabu, e rawa vei ira na qasenivuli me moica na vakasama se vakayagataka na nodra sala ni veivakavulici vakai ira me sotava vakavinaka na nodra gagadre na lewe ni kalasi se kuoramu ka na vukei ira mera kila ka bulataka na ivunau.

Na Ulutaga Vakaivunau Cava Meda na Veivosakitaka ena Noda Veisoqoni?

Na ulutaga ni ituvatuva ni macawa yadua sa ikoya na ivakavuvuli vakaivunau sa digitaki tu me salavata kaya na wiliwili ni Veiyalayalati Makawa ni macawa oya, e kunei ena Lako Mai, Mo Muri Au—Me Baleta na Tamata Yadua kei na Matavuvale. Ena sala oqo, na veivosaki vakaivunau ena kalasi se kuoramu ena tokona na veika era sa vulica tiko na itabagone mai vale.

Dina ga ni tiko na ituvatuva me vakavulici ena vei-Sigatabu vakatabakidua eso, ena tiko ga na nomu digidigi mo veivosakitaka eso na iulutaga vakaivunau e yavutaki ena nodra gagadre na nomu kalasi se kuoramu.

Na ivurevure oqo e oka kina na ituvatuva ni veimacawa ena gauna e vakayacori kina na soqoni ni kalasi ni Goneyalewa kei na kuoramu ni Matabete i Eroni. Ena so na gauna, o na gadreva beka mo levea e dua na lesoni me baleta na koniferedi ni iteki se dua tale na vuna.

Na Cava na Nodra iTavi na Noda iLiuliu Qasecake?

O ira na nomuni iliuliu qasecake era qarava e dua na itavi bibi ena kalasi ni Goneyalewa kei na kuoramu ni Matabete i Eroni. Era na tuberi ka vakasalataki iko ena nomu veikacivi ni veiliutaki eso. Era na tokona ka vakayaloqaqataki iko ni ko qarava na cakacaka ni nomu kalasi se kuoramu. Era na vakavulici iko ena ivunau, ka ra na vakalougatataki iko ena nodra ivakaraitaki, kilaka, kei na ivakadinadina.