O le Faaaogaina o le Sau, Mulimuli Mai ia te A’u—Mo Korama a le Perisitua Arona ma Vasega a Tamaitai Talavou

O a Faamoemoega o a Tatou Fonotaga a le Vasega ma le Korama?

Ua tuuina atu e le Alii ia te oe se faatuatuaga paia: Ua Ia valaauina oe e te auauna atu i se au peresitene o vasega a Tamaitai Talavou po o se au peresitene o le korama o le Perisitua Arona. O se vaega o lou tiute o le taʻitaʻia ma faafoeina o fonotaga a lau vasega poʻo le korama i le Aso Sa. Ina ia faia lenei mea, e fesoasoani le malamalama pe aisea tatou te faia ai nei fonotaga.

O fonotaga a le vasega a Tamaitai Talavou ma le korama o le Perisitua Arona e ese mai vasega a le Ekalesia e pei o le Aoga Sa po o le seminare. I totonu o fonotaga a le vasega po o le korama, e tele atu mea tatou te faia nai lo na’o le suesue o se autu o le talalelei. Tatou te aoao e uiga i le galuega ua tuu mai e le Atua ia i tatou, ma tatou te faatulaga tagata o la tatou vasega po o le korama e faia lena galuega i o tatou aiga, i le Ekalesia, ma i totonu o tatou nuu. I nei fonotaga, tatou te le na ona talanoa e uiga i le galuega—tatou te faia ni fuafuaga e faataunuu ai o tatou matafaioi o se vaega o le autau talavou a le Alii, e aofia ai le fesoasoani e faapotopoto Isaraelu.

I fonotaga a vasega ma korama, tatou te faia ai ni fuafuaga e faataunuu ai a tatou matafaioi o se vaega o le autau talavou a le Alii.

Ae o lenei faamamafa i le galuega e le o le uiga e faapea e tatou te tuua ai talanoaga o mataupu faaleaoaoga faavae e mo nao le Aoga Sa. O le mea moni, o le aoaoina o aoaoga faavae i fonotaga a vasega a Tamaitai Talavou ma le korama a le Perisitua Arona e taua tele—e fesoasoani ia i tatou e faamalosia ai la tatou sootaga ma Iesu Keriso, malamalama ai i le fuafuaga a le Tama Faalelagi, ma auai i le La galuega. A o tatou suesue faatasi i le talalelei, o upumoni tatou te aoaoa e mafai ona suia ai o tatou loto ma fesoasoani ia tatou iloa ai auala e galulue atili ai i auala faa-Keriso. E mafai ona tatou maua musumusuga e uiga i ala e tuputupu a’e ai “i le poto ma le tino, ma ua alofagia e le Atua atoa ma tagata” (Luka 2:52). A o tatou liua atili ia Iesu Keriso ma Lana talalelei, o le a tatou maua le fiafia ma lagona manaoga e fesoasoani i isi i luga o le ala o feagaiga.

O ai e Taitaia Nei Fonotaga?

Ua valaauina outou e le Atua e avea o ni au peresitene o vasega ma korama ma ua tuu atu ia te outou le pule e taitai ai. O le mafuaaga lena o fonotaga uma o le tou vasega po o le korama e tatau ona taitaia e se sui o le au peresitene o la outou vasega po o le korama. E tatau i taitai matutua ona ofo atu le taitaiga ma le lagolago, ae e le tatau ona latou taitaia mo oe. Tagai i le vaega o loo faaulutalaina “Fefautuaai Faatasi” o loo i le amataga o taiala taitasi i totonu o lenei punaoa mo manatu e fesoasoani ia te outou ia iloa ai le ala e taitai ai se sauniga/fonotaga ma ausia ai ona faamoemoega moni. Faaaoga fonotaga a au peresitene e fuafua ai le ala o le a outou taitaia ai nei sauniga/fonotaga o le Aso Sa.

O ai e Tatau Ona Aoaoina Atu le Lesona?

O taitai matutua, o se sui o le au peresitene o le vasega po o le korama, po o soo se isi sui o le vasega po o le korama e mafai ona aoaoina atu lesona. I le avea ma se au peresitene o le vasega po o le korama, ia felogonai ma o outou taitai matutua po o ai e tatau ona tofia e aoao atu lesona. Manatua o outou taitai matutua e tele ni mea e mafai ona latou ofoina atu. Saili e aoao mai o latou aafiaga ma molimau. E i ai foi tulaga lelei o le fai atu i talavou e aoao atu—e mafai e le aoao atu ona fesoasoani e faalolotoina lo latou liua ma fausia fesootaiga malolosi ma isi uso o korama po o vasega. O lea, tuu atu ia i latou avanoa talafeagai e aoao atoa atu ai po o se vaega o se lesona, a e tuu i le mafaufau manaoga ma gafatia o tagata o loo i totonu o lau vasega po o le korama. Mo se faataitaiga, o taitai matutua e mafai ona tele taimi e aoao atu ai i totonu o vasega po o korama faatasi ma talavou laiti po o talavou o e e itiiti le poto masani i le aoao atu o le talalelei. Pe a valaaulia le autalavou e aoao atu, o se matua po o se faufautua matua e tatau ona fesoasoani ia i latou ia saunia pe a manaomia.

O i latou o e ua tofia e aoao atu e mafai ona faaaoga le vaega o loo faaulutalaina o le “Aoao atu le Aoaoga Faavae” o loo i totonu o taiala taitasi i lenei punaoa e fesoasoani ia i latou e saunia. O lenei vaega o loo i ai fautuaga mo le aoaoina ma le talanoaina o le aoaoga faavae mo lena vaiaso, ae e tatau i faiaoga ona le faatapulaaina o latou lagona i nao nei fautuaga. Pe a taiala e le Agaga, e mafai e faiaoga ona fetuunai nei manatu pe faaaoga a latou lava ala e aoao atu ai i se ala sili ona lelei ma fetaui ma manaoga o tagata o le vasega po o le korama ma fesoasoani ia latou malamalama ma faaaoga le aoaoga faavae.

O a Autu Faaleaoaoga Faavae o le a Tatou Talanoaina i a Tatou Fonotaga?

O le autu o le taiala o vaiaso taitasi o se mataupu faavae lea sa filifilia ina ia o gatusa ma le faitauga fautuaina o le Feagaiga Tuai mo lena vaiaso, o loo maua i le Sau, Mulimuli Mai ia te A’u—Mo Tagata Taitoatasi ma Aiga. I lenei ala, o talanoaga faaleaoaoga faavae i fonotaga a korama ma vasega o le a lagolagoina mea o loo aoaoina e talavou i o latou fale.

E tusa lava pe tatau ona aoaoina ia taiala i Aso Sa faatulagaina, o le a ia te oe lava le filfiliga e talanoaina ai isi autu faaleaoaoga faavae e tusa ma manaoga o lau vasega po o le korama.

O lenei punaoa ua aofia ai otootoga mo vaiaso uma pe a faia sauniga/fonotaga a vasega a Tamaitai Talavou ma korama a le Perisitua Arona. Mai lea taimi i lea taimi, atonu e te ono manaomia ona faamisi se lesona ona o konafesi a le siteki po o isi mafuaaga.

O Le a Le Matafaioi a o Tatou Taitai Matutua?

O o outou taitai matutua e taua le latou matafaioi i totonu o vasega a Tamaitai Talavou ma korama a le Perisitua Arona. O le a latou taialaina ma fautuaina oe i ou valaauga faaletaitai. O le a latou lagolago ma uunaia oe ao e faia le galuega a lau vasega po o le korama. O le a latou aoao oe i aoaoga faavae, ma o le a latou faamanuia oe e ala i a latou faataitaiga, aafiaga, ma molimau.