9 Ianuari

O A Ni Auala E Finagalo le Atua Ou te Tausia ai Ana Foafoaga, e aofia ai Lo’u Tino?

Kenese 1–2; Mose 2–3; Aperaamo 4–5

Fefautuaai Faatasi

E taitaiina e se sui o le korama po o le au peresitene o le vasega; 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o le Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o a oe lava fesili (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai na valaaulia po o tofiga?

• Tausia o i latou e lē tagolima. O le a se mea tatou te ta’u atu pe faia e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia maua le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Tuufaatasia o aiga mo le faavavau. O a manatu e mafai ona tatou fefaasoaai i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le taimi o le fonotaga.

Aoao Atu le Aoaoga Faavae

E taitaia e se taitai matua po o se talavou; 25–35 minute

Aoao Faatasi

Ina ia fesoasoani i le autalavou e mafaufau i mea e mafai ona latou faia e faalelei atili ai lo latou tausia o foafoaga a le Atua, tusi ulutala nei i le laupapa: O le Foafoa, O le Foafoaga, ma le O a Tatou Matafaioi. Fai atu ia i latou e iloilo le Kenese 1–2 ma tusi mea ua latou iloa e uiga i le Foafoa ma le Foafoaga. O a mea ua tatou aoao ai e uiga i a tatou matafaioi? (faapitoa le tagai i le Kenese 1:26–28; 2:15). O manatu nei e mafai ona fesoasoani i le autalavou e talanoa ai ia tatou matafaioi i le tausia o foafoaga a le Atua.

• E mafai faapefea ona e fesoasoani ia i latou e te aoaoina ina ia malamalama o o latou tino o foafoaga paia a le Atua? Mo se faataitaiga, atonu e te fesili ia i latou pe o a mea ua tatou aoaoina e uiga i o tatou tino mai le 1 Korinito 6:19–20; Mose 2:26–27; Aperaamo 4:26–27. O a uiga o upu “faatusa” ma “foliga”? Galulue faatasi e fai se lisi o mea e mafai ona tatou faia e tausia ai o tatou tino. (Tagai “Soifua Maloloina Faaletino ma le Faalelagona,” i le Mo Le Malosi o le Autalavou [tamaitusi, 2011], 25–27.)

• E masani ona fetaiai le autalavou ma sāvali ia e mafua ai ona latou lagona le le mautonu e uiga i o latou tino. Valaaulia le autalavou e matamata i le vitio “God’s Greatest Creation” (ChurchofJesusChrist.org). Fai atu i ai e vaavaai mo savali e fesoasoani ia i latou e lagona ai le lotofaafetai mo o latou tino (tagai foi i le savali a Russell M. Nelson, “O Lou Tino o se Meaalofa Maoae e Faapelepele,” Liahona, Aok. 2019, 2–7). O a mea e mafai ona tatou faasoa atu e fesoasoani ai i se uo po o se tagata o le aiga ua lagona le le mautonu e uiga i lona tino?

• Valaaulia le autalavou ia faitau le leoa se tasi pe sili atu o fuaiupu nei, vaavaai mo ni malamalamaaga e uiga i le mafuaaga na foafoa ai e le Atua le lalolagi ma le ala ua Ia finagalo ai ia i tatou ia tausia lelei: Kenese 1:26–28; 2:15; 1 Nifae 17:36; Mataupu Faavae ma Feagaiga 49:19–21; 59:15–20; 104:13–18; Mose 2:26–31; 3:15. Fai atu ia i latou e faasoa mai o latou manatu e uiga i nei fuaitau taitasi o mau. Ona valaaulia lea o i latou e galulue faatasi e faia se lisi o mea e mafai ona latou faia taitoatasi pe o se vaega e faataunuu ai o latou matafaioi i le tausia o le lalolagi (tagai i manatu i le “Punaoa Lagolago”). O a ni suiga e manaomia ona tatou faia i o tatou manatu ma faatinoga ia faalelei atili ai lo tatou tausia o le lalolagi?

• Mafaufau e valaaulia tagata o le vasega po o le korama e o mai i le fonotaga ma se mea e faailoa ai le matagofie o le lalolagi na foafoaina e le Atua, e pei o se atatusi, atapue, po o se solo. Valaaulia i latou e faasoa mai mea na latou aumaia ma lagona ua latou maua e uiga i foafoaga a le Atua. Faaali le vitio “Our Home” (ChurchofJesusChrist.org), ma fai atu ia i latou e faalogologo mo mea o loo faaalia ai lagona o le Atua e uiga i le lalolagi ma ia uunaia ai i latou ia tausia lelei.

Faatino i le Faatuatua

Ia uunaia tagata o le vasega po o le korama e mafaufau loloto ma tusifaamaumau le mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

O auala e mafai ona tatou tausia ai le lalolagi:

• Totō ni fatulaau, laau, po o se togalaau.

• Taalao le otaota i lou alalafaga.

• Faatulaga se galuega mo le faamamaina o le pitonuu po o se galuega faatino o le toe liliuga o mea e le manaomia i mea e toe faaaoga.

• Alu i se savaliga sopo ma mafaufau i mea e te faafetai ai.

• Fatufatuai ni faatufugaga mai aitema atonu e te tiaia, ma faasoa atu i se faaaliga o faatufugaga.

• Fuafua ni auala e mafai ona e sefeina ai le paoa ma le vai.

Aoao Atu i le Ala a le Faaola

Tuu atu i tagata o le vasega po o le korama ni avanoa se tele e aoao ai e le tasi le isi i le vasega, ona e masani lava ona sili atu lo latou aoao mai i le tasi ma le isi ma mai aafiaga o le aoao atu.