23 Ianuari

E Mafai Faapefea ona Fesoasoani Mai le Alii ia te A’u ia Auauna atu ma le Faamaoni Atili?

Kenese 5; Mose 6

Fefautuaai Faatasi

E taitai e se uso o le korama po o le au peresitene o le vasega; 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e faia e fesoasoani atu ai?

• Valaaulia tagata uma ia talia le talalelei. E mafai faapefea ona avea i tatou ma se malamalama i tagata o le aiga po o uo o e le tutusa o tatou talitonuga?

• Tuufaatasia o aiga mo le faavavau. E faapefea ona tatou faaali le alofa sili atu ma le lagolago mo tatou aiga ma faia se eseesega lelei i o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

Aoao Atu le Aoaoga Faavae

E taitaia e se taitai matua po o se talavou; 25–35 minute

Saunia Oe Lava Faaleagaga

Ina ua maua e Enoka lona valaauga e auauna atu i le Alii, na ia lagonaina lona matuai le atoatoa (tagai Mose 6:31). Ae sa le nao na auina atu e le Alii o Enoka e faia Lana galuega; sa ia folafola atu ia Enoka o le a Ia puipui ma fesoasoani ia te ia (tagai Mose 6:32–34).

Masalo e mafai ona e malamalama i lagona o le le atoatoa o Enoka i a oe lava taumafaiga e auauna atu. O nisi o a tatou auaunaga e tuuina atu e ala i valaauga o le Ekalesia. I isi taimi, tatou te iloa lelei le manaomia ma lagonaina le uunaia e le Agaga e faaali atu lo tatou alofa ma le lagolago. Peitai e oo mai le avanoa, e mafai ona tatou lototetele, e pei ona sa faia e Enoka, i le iloa ai o le a fesoasoani mai le Alii ia i tatou ao tatou taliaina Lana valaaulia e “savali faatasi ma a’u” (Mose 6:34).

Ao e sauni e aoao atu e uiga i le fesoasoani e mafai ona tatou maua mai le Alii ao tatou auauna atu i isi, iloilo le Mose 6 ma mafaufau i aafiaga sa e mauaina i le auauna atu i isi. Na faapefea ona fesoasoani le Alii i au taumafaiga? O le a se mea e te faamoemoe o le a aoao e tagata o lau vasega po o le korama mai faataitaiga a Enoka ma isi? E mafai foi ona e faitau i se tasi o savali a Peresitene Henry B. Eyring: “Savali Faatasi ma A’u” (Liahona, Me 2017, 82–85) po o le “O Tamaitai o le Feagaiga i Faigapaaga ma le Atua” (Liahona, Nov. 2019, 70–73).

E mafai ona tatou mulimuli i le faataitaiga a le Faaola ao tatou auauna atu o se vaega o o tatou olaga i aso taitasi.

Aoao Faatasi

O le auauna atu i isi e maua ai le avanoa mo i tatou e “savali faatasi ma [le Atua],” ma o le a tatou maua Lana fesoasoaniga ao tatou auauna atu (Mose 6:34). Ina ia fesoasoani i tagata o le vasega po o le korama e amata talanoaina lenei mea, e mafai ona e fai atu e suesue le Mose 6:32–39 mo auala na faatasi ai le Alii ma Enoka i lana auaunaga. E faapefea ona fesoasoani le Alii ia i tatou ao tatou auauna atu ia te Ia? O manatu nei e mafai ona fesoasoani ia oe e taitai ai se talanoaga e uiga i le fesoasoani faalelagi e mafai ona tatou maua ao tatou auauna atu i isi.

• Ua faatumulia tusitusiga paia i aoaoga e uiga i auaunaga (tagai, mo se faataitaiga, Mataio 25:31–40; Luka 10:25–37; Mosaea 2:17). Mafaufau e valaaulia i latou o loo e aoaoina e faasoa mai fuaitau o mau ia e musuia ai i latou e auauna atu i isi. E mafai ona e muai faafesootaia i latou ia o mai saunia e faasoa mai fuaitau o mau e uiga i le auauna atu po o faataitaiga o le auauna atu. Afai latou te manaomia le fesoasoani, uunaia i latou e tagai i le vaega o le “Auauna” i le Taiala i Tusitusiga Paia (scriptures.ChurchofJesusChrist.org). O le a se mea ua uunaia i tatou e fai ona o mea ua tatou faitau ai?

• Sa auauna atu le Faaola i isi i le taimi atoa o Lana auaunaga. O le a se mea ua tatou aoao mai Lana faataitaiga e mafai ona fesoasoani ia i tatou ao tatou auauna atu? Ina ia tali lenei fesili, e mafai e tagata taitoatasi o le vasega po o le korama ona faitau mau nei, vaavaai mo se mea o loo aoao mai e uiga i le faataitaiga a le Faaola o le auauna atu: Mataio 14:13–21; Ioane 9:1-11, 35–38; 13:4–5, 12–17; 3 Nifae 17:5–9. Valaaulia tagata uma e faasoa mai se mea na latou mauaina. Tuu atu ni taimi mo tagata uma e mafaufau ai i se tasi e mafai ona latou auauna i ai ma le ala latou te mulimuli ai i le faataitaiga a le Faaola i la latou auaunaga.

• O nisi taimi tatou te mafaufau ai o le auaunaga o le faia o se mea telē ma alu ai se taimi tele. Atonu o le tasi lena o mafuaaga e le auauna atu ai nisi o i tatou i le tele tatou te mafaia. Atonu e te faamanatu atu na masani ona auauna atu le Faaola i tagata na Ia maitauina i le taimi atoa o Lona soifuaga (tagai, mo se faataitaiga, Mataio 12:9–13; Mareko 5:21–34; Luka 19:1–10; Ioane 4:3–26). Ina ia fesoasoani i tagata o le vasega po o le korama e mafaufau i ni auala faigofie e mafai ona latou auauna atu ai i isi i taimi uma o latou olaga, e mafai ona e faaali atu se tasi o vitio nei: “When Ye Are in the Service—YM” po o le “When Ye Are in the Service—YW” (ChurchofJesusChrist.org). Fai atu i le autalavou e faasoa mai o latou manatu. O a ni faatinoga laiti o auaunaga ua tatou vaaia o fai e isi? O le a se mea ua musuia i tatou e fai? Valaaulia tagata taitasi e tusi i lalo auala e faauma ai faamatalaga nei: “E mafai ona ou auauna atu i isi e ala i …” ma le “O le a ou sailia le fesoasoaniga a le Alii i a’u taumafaiga e auauna atu e ala i …” Ona fai atu lea i nai tagata e faasoa mai mea na latou tusia.

Faatino i le Faatuatua

Ia uunaia tagata o le vasega po o le korama e mafaufau loloto ma tusi le mea o le a latou fai e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe na faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• “Opportunities to Do Good,” “Teachings of Thomas S. Monson: Rescuing Those in Need” (vitio), ChurchofJesusChrist.org

• Bonnie L. Oscarson, “O Manaoga i o Tatou Luma” (Liahona, Nov. 2017, 25–27)

Aoao Atu i le Ala a le Faaola

“I le faaopoopo atu i le fesoasoani i tagata aoao ia lagona ma iloa le Agaga, fesoasoani ia i latou e faatino i luga o musumusuga latou te maua” (Aoao Atu i le Ala a le Faaola [2016], 10).