Sa tuuina atu e Maria se molimau mamana i le misiona a le Faaola (tagai i le Luka 1:46–55). E Tusa ai ma Lau Fetalaiga, saunia e Elspeth Young

8 Ianuari

E Mafai Faapefea Ona Ou Faamanuiaina Isi i La’u Molimau ia Iesu Keriso?

Mataio 1; Luka 1

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10-20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o a oe lava fesili (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai,, 10.2, 11.2, ChurchofJesusChrist.org). Fuafua ni auala e faatino ai mea tou te talanoaina.

• Ola i le talalelei. O a mea na tatou talanoaina talu ai, ma o a valaaulia po o tofiga na faia? O le a se mea ua tatou faia e faatino ai nei valaaulia po o tofiga?

• Tausia o i latou e lē tagolima. O le a se mea e mafai ona tatou faia pe ta’u atu e aapa atu ai ia i latou o e atonu ua lagona le tuuatoatasi pe ua taumamao mai le Tama Faalelagi?

• Valaaulia tagata uma ia talia le talalelei. O a nisi auala e mafai ona tatou fesoasoani ai i isi ia lagona le alofa o Iesu Keriso?

• Faatasia o aiga mo le faavavau. O a ni manatu e mafai ona tatou faasoa atu i le tasi ma le isi e fesoasoani e faamalosia ai o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

E pei o le toatele o Iutaia faamaoni i lona taimi, sa mautinoa lava le faananau o Maria mo le afio mai o le Mesia. Ina ua uma ona aoao mai se agelu e faapea, sa toeitiiti uma le faatalitali—ma o le a avea o ia ma tina o le Togiola folafolaina—sa tuuina atu e Maria se molimau matagofie o le “Atua lo‘u Faaola.” O lenei molimau o loo tusia i le Luka 1:46–55, ma e pele i Kerisiano i le lalolagi atoa. A o e faitauina nei fuaiupu, mafaufau i tagata o lau vasega po o le korama. O i latou, e pei o Maria, o loo sauniuni mo le afio mai o Iesu Keriso—i le taimi nei, mo Lona Afio Mai Faalua mamalu. Ma e pei foi o Maria, o a latou molimau e mafai ona i ai se faatosinaga mamana i le faatuatua o i latou o siomiaina i latou.

O a ni lagona o tagata o loo e aoaoina e uiga ia Iesu Keriso? E mafai faapefea e a latou molimau ia te Ia ona faamanuia ai isi? A o e sauni e aoao atu, e mafai foi ona e suesue i le 2 Nifae 25:23–26 ma le savali a Elder Neil L. Andersen “Ua Matou Tautalatala e Uiga ia Keriso” (Liahona, Nov. 2020, 88–91).

Aoao Faatasi

O se auala sili e fesoasoani ai i le autalavou e mafaufau e uiga i a latou molimau ia Iesu Keriso o le suesue faatasi lea o le molimau a Maria i le Luka 1:46–55. Atonu e mafai ona latou faasoa atu i le tasi ma le isi ia fasifuaitau o loo faamatala ai le mea na talitonu ma lagonaina e Maria e uiga i le Faaola. O fea o nei fasifuaitau o loo faamatala mai ai foi o tatou lagona e uiga ia te Ia? Mo se faataitaiga, o le a le mea e mafua ai ona “[olioli] o tatou agaga i le Atua”? (fuaiupu 47). O a ni “mea tetele” ua Ia faia mo i tatou? (fuaiupu 49). Na faapefea ona Ia faaalia Lona malosi i o tatou olaga? (tagai i le fuaiupu 51). O manatu mo gaoioiga o loo i lalo e mafai ona taitai atu ai i talanoaga e uiga i le ala e mafai ai e a tatou molimau ia Keriso ona faamanuiaina isi.

• E fesoasoani le savali a Neil L. Andersen “Ua Matou Tautalatala e Uiga ia Keriso” e faamalamalama ai le mafuaaga e tatau ai ona tatou talanoa lautele atili e uiga i le Faaola—ma le auala e mafai ona tatou faia ai. E mafai ona outou faitauina faatasi vaega o le savali a Elder Andersen. E mafai e tagata o le vasega po o le korama ona talanoaina mafuaaga na ia tuuina mai mo le faasoaina atu o a tatou molimau ia Iesu Keriso ma lana fautuaga i le ala e faia ai. O a ni mea patino e mafai ona tatou faia e talanoa lautele atili ai e uiga ia Keriso?

• I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua tatou iloa upumoni taua e uiga ia Iesu Keriso e mafai ona tatou faasoa atu. E mafai faapefea ona e fesoasoani i le autalavou e mafaufau e uiga i nei upumoni? E mafai ona e fai atu ia i latou e suesue le “O Le Keriso Soifua: O Le Molimau a Aposetolo” taitoatasi pe i ni vaega, ma vaavaai mo tali i le fesili “O a upumoni e uiga i le Faaola e i ai se uiga faapitoa ia te oe?” Fai atu ia i latou e faasoa mai upumoni na latou maua ma faamatala le pogai e anoa ai nei upumoni ia i latou. E mafai ona latou faasoa atu tusitusiga paia ma o latou lava aafiaga a o latou faia. Atonu e mafai lea ona latou talanoaina po o le fea o upumoni e uiga i le Faaola e mafai ona latou faasoa atu i luga o ala o faasalalauga faaagafesootai, ma se uo o loo tauivi ma se molimau, po o se tasi e le o se tagata o la tatou Ekalesia.

• E faaopoopo atu i le Luka 1:46–55, o loo i ai i tusitusiga paia le tele o isi fuaitau e mafai ona musuia ai i tatou e faasoa atu mea ua tatou iloa e uiga ia Iesu Keriso. O nisi o faataitaiga o loo lisiina atu i totonu o “Punaoa Faaopoopo.” Mafaufau e faitau faatasi nei mau. O le a se mea ua latou aoao mai ia i tatou e uiga i le auala e faasoa atu ai a tatou molimau ia Iesu Keriso i isi? O le a se isi mea ua tatou aoao mai i nei fuaiupu? E mafai foi e tagata o le vasega po o le korama ona faasoa mai ni mea sa latou aoaoina mai tagata latou te iloa o e faasoa saoloto atu lo latou faatuatua ia Iesu Keriso.

A o tatou aoao ia iloa ma alolofa i le Faaola, tatou te maua auala e faasoa atu ai a tatou molimau e uiga ia te Ia.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Mataio 5:14–16; 1 Peteru 3:15; 2 Nifae 25:26; Alema 5:43–50; Mataupu Faavae ma Feagaiga 100:5–8

• Russell M. Nelson, “Ia Faaali Atu Lou Faatuatua” (Liahona, Me 2014, 29-31)

• Cristina B. Franco, “Mauaina o le Olioli i le Faasoaina Atu o le Talalelei” (Liahona, Nov. 2019, 83–86)

Aoao Atu i le Ala a le Faaola

O le faia o fesili e uunaia ai tagata aoao e tuu mai a latou molimau e mafai ona avea o se ala mamana e valaaulia ai le Agaga. E mafai ona e fai atu ni fesili e pei o le “Na faapefea ona e oo mai i le iloa sa togiola Iesu Keriso mo au agasala?” po o le “Na faapefea ona e oo mai i le talisapaia o le mea na faia e le Faaola mo i tatou i Ketesemane?”