O Outou o le Malamalama o le Lalolagi, saunia e Simon Dewey

O Outou o le Malamalama o le Lalolagi, saunia e Simon Dewey

22 Ianuari

Ua Avea Faapefea Iesu Keriso ma se Malamalama i Lo‘u Olaga?

Ioane 1

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a ni aafiaga lata mai ua faamalosia ai a tatou molimau?

• Tausia o i latou e lē tagolima. O ai e manaomia la tatou fesoasoani ma tatalo? O le a se mea ua musuia i tatou e fai e fesoasoani atu ai ia i latou?

• Valaaulia tagata uma ia talia le talalelei. E faapefea ona avea i tatou ma malamalama i tagata o aiga po o uo e le tutusa o tatou talitonuga?

• Tuufaatasia o aiga mo le faavavau. E faapefea ona faaalia le tele o le alofa ma le lagolago mo tatou aiga ma faia se eseesega lelei i totonu o o tatou aiga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Na tatalaina e le Aposetolo o Ioane lana Evagelia i le faatusatusaina o Iesu Keriso i se malamalama e “susulu i le pouliuli” (Ioane 1:5). O loo tuputupu ae tagata o lau vasega po o le korama i se taimi o le pogisa faaleagaga. Ae o se taimi foi ua avanoa ai le “malamalama ofoofogia” o le Faaola e fesoasoani ai ia i latou ia iloa manino ma saili lo latou ala (1 Peteru 2:9).

A o e faitauina le Ioane 1 i lenei vaiaso, mafaufau loloto pe aisea e taua tele ai le malamalama ma pe faapefea ona avea le Faaola ma se malamalama i lou olaga (tagai foi i le Faaliliuga a Iosefa Samita, Ioane 1:1–34 [i le faaopoopoga i le Tusi Paia]). E mafai faapefea e Lona malamalama ona faamanuiaina i latou o loo e aoaoina? E mafai faapefea ona e musuia i latou e savavali i Lona malamalama? Ina ia fesoasoani ia te oe e mafaufau loloto i nei fesili, e mafai ona e suesue i le Mataupu Faavae ma Feagaiga 88:5–13, 67; 93:2–9 ma le savali a Sister Sharon Eubank “O Keriso: O Le Malamalama e Susulu i le Pouliuli” (Liahona, Me 2019, 73–76).

Aoao Faatasi

E masani ona fesoasoani le amata o lau talanoaga e ala i le tuuina atu i le vasega po o le korama o se avanoa e talanoa ai e uiga i mea sa latou aoaoina mai a latou suesuega o tusitusiga paia. Mo se faataitaiga, o le vaiaso lenei e mafai ona e fai atu ia i latou e faasoa mai se upu po o se fasifuaitau mai le Ioane 1:1–17 o loo aoao ai i latou i se mea e uiga i le Faaola. Tuu atu ia i latou e talanoa e uiga i le mafuaaga na latou filifilia ai a latou upu po o fasifuaitau ma mea o loo aoao mai ai i latou e uiga ia Iesu Keriso. Faasoa atu ia i latou pe faapefea ona avea Iesu Keriso o se malamalama i lou olaga. O gaoioiga o loo i lalo e mafai ona fesoasoani ia te oe e faaauau ai lau talanoaga.

• Ina ia fesoasoani ia i latou o loo e aoaoina ia talisapaia le malamalama o le Faaola, atonu e mafai e se tagata o le vasega po o le korama ona faasoa mai pe faapei le lagona o le i ai i le pogisa. E i ai se tala e mafai ona fesoasoani i le amataga o le savali a Elder Timothy J. Dyches “O Le Malamalama e Pipii i le Malamalama” (Liahona, Me 2021, 112–15). Aisea e fefefe ai tagata i nisi taimi i le pogisa? Aisea tatou te manaomia ai le malamalama? Aisea na taʻua ai Iesu Keriso o le Malamalama o le Lalolagi? E mafai ona e fai atu i le autalavou e suesue le savali a Elder Dyches e amata i le “Sei ou fautua atu atonu o le taimi lenei e fesili ifo ai ia te oe lava.” E mafai ona latou vaavaai mo mea e mafai ona tatou faia e aumaia atoatoa ai le malamalama o le Faaola i o tatou olaga.

• O mau o loo lisiina i lalo o “Punaoa Lagolago” e mafai ona fesoasoani i lau vasega po o le korama ia malamalama atili ai i le malamalama o loo ofoina mai e Iesu Keriso. E mafai ona e faitau ma talanoaina faatasi o se vasega ni nai seti muamua o mau. Ona tusi lea E mafai faapefea ona tatou aumaia le malamalama o le Faaola i o tatou olaga? i luga o le laupapa, ma valaaulia le autalavou e lisi tali latou te maua i seti lona lua o mau. E mafai ona e tuuina le autalavou i ni paga ma fai atu ia i latou e fefaasoaai le tasi ma le isi pe na faapefea ona avea Iesu Keriso ma se malamalama i o latou olaga.

• Fai mai Sister Sharon Eubank, “O se tasi o manaoga autu ua tatou maua ina ia tuputupu ae ai o le tumau lea ona fesootai i lo tatou puna o le malamalama—o Iesu Keriso” (“Keriso: O Le Malamalama e Susulu i le Pogisa,” 73). Atonu e te faapupulaina lenei mea i se lesona faatino—atonu e ala i le faaali atu o se moliuila po o se masini feaveai ma talanoaina pe aisea e taua ai lona puna malosi. Ona mafai lea e tagata o le vasega po o le korama ona iloilo le savali a Sister Eubank, ma vaavaai mo auala o loo taumafai Satani e “vavae ese [la tatou] sapalai o le malosiaga.” E faapefea ona tatou faatumauina se sootaga malosi ia Iesu Keriso? O a ni fautuaga o tatou mauaina i le savali a Tuafafine Eubank?

• O viiga e pei o le “O Iesu Lo’u Sulu” ma le “Sulu e Alofa, Ta’i Mai” (Viiga, nu. 49, 56) o loo molimau mai ai o Iesu Keriso o lo tatou malamalama. Mafaufau e usu faatasi (po o isi e te iloa) ma faailoa mai upu po o fasifuaitau o loo aoao ai i tatou i le ala e pei ai Iesu Keriso o se malamalama. Na faapefea ona aumaia e isi le malamalama o le Faaola i o tatou olaga? E mafai faapefea ona tatou faasoa atu Lona malamalama i isi?

O Se Meaalofa o le Malamalama, saunia e Eva Timothy

O Se Meaalofa o le Malamalama, saunia e Eva Timothy

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Salamo 27:1; Isaia 60:19–20; Ioane 8:12; 3 Nifae 18:16, 24 (O le Faaola o se malamalama)

• Faataoto 4:18–19; 1 Ioane 2:8–11; Mataupu Faavae ma Feagaiga 50:23–24; 93:26–28; 138:20–24 (O le ala tatou te aumaia ai le malamalama o le Faaola i o tatou olaga)

• “Patterns of Light: The Light of Christ” vitio), ChurchofJesusChrist.org

Aoao Atu i le Ala a le Faaola

Ao e taulai atu i mea o loo tupu i totonu o olaga o tagata o lau vasega, po o korama, o le a e maua avanoa silisili e aoao atu ai. O faamatalaga e faia e tagata aoao po o fesili latou te fesili ai e mafai foi ona taitai atu i ni avanoa e aoao atu ai.