I le Vaieli, saunia e Crystal Suzanne

I le Vaieli,, saunia e Crystal Suzanne

12 Fepuari

E Mafai Faapefea Ona Ou Faaleleia La’u Tapuaiga i le Atua?

Ioane 2–4

aikona o le fefautuaai faatasi

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. Na faapefea ona tatou faalatalata atili i le Faaola? O faapefea ona tatou taumafai ia avea atili e faapei o Ia?

• Tausia o i latou e lē tagolima. O ai na i ai i o tatou mafaufau talu ai nei? E mafai faapefea ona tatou fesoasoani i nei tagata taitoatasi?

• Valaaulia tagata uma ia talia le talalelei. E faapefea ona tatou tali atu i fesili a tatou uo e uiga i le Ekalesia i se auala e faamalosia ai lo latou faatuatua i le Faaola?

• Tuufaatasia o aiga mo le faavavau. O a nisi o auala e mafai ona tatou faaleleia atili ai a tatou sootaga ma tagata o le aiga lautele, e pei o matua o matua ma tausoga?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

aikona o le aoao atu le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O le fafine o Samaria o loo faamatalaina i le Ioane 4 atonu na alu soo i le vaieli e aumai ni vai. Ae o le taimi lenei sa ese. Sa ia feiloai i se alii Iutaia sa fesili atu ia te ia mo se vaiinu. O lena lava mea e le masani ai aua o Iutaia e masani lava e le fegalegaleai ma tagata Samaria. Ae sa i ai se isi mea e le masani ai e uiga i lenei tagata. I le iloaina ai atonu o Ia o se perofeta, sa ia fesili atu ai ia te Ia ni fesili e uiga i le tapuai atu i le Atua. Pe sa taliaina ea le tapuai atu i le Atua iina i Samaria? Pe e tatau i tagata ona tapuai i Ierusalema, e pei ona fai mai ai tagata Iutaia? (tagai i le Ioane 4:19–20). Sa faamalamalama mai e le tagata o le mea tatou te tapuai ai e le taua tele e pei o le ala tatou te tapuai ai: “E tapuai tagata tapuai moni i le Tama i le agaga ma le upumoni: aua ua saili e le Tama i latou faapena e ifo atu ia te ia” (Ioane 4:23). Ona ta‘u atu lea e le tagata ia te ia po o ai Ia—O Ia o le Keriso, o le Faaola o le lalolagi (tagai i le Ioane 4:25–26).

Pe o malamalama le autalavou o loo e aoaoina i le uiga o le tapuai i le Tama Faalelagi? E faaopoopo atu i tapuaiga i le lotu (tagai i le Mataup Faavae ma Feagaiga 59:9–10), o a isi avanoa ua latou maua e tapuai ai ia te Ia, e aofia ai ma avanoa atonu latou te le iloaina o ni tapuaiga? O punaoa nei e mafai ona fesoasoani ia te oe e saunia ai e aoao atu i latou e uiga i le auala e faaleleia ai la latou tapuaiga i le Atua: Salamo 95:1–7; Mataio 4:8–10; Alema 32:4–11; Mataupu Faavae ma Feagaiga 20:17–19; 93:19–20, ma le savali a Epikopo Dean M. Davies “O Faamanuiaga o le Tapuai” (Liahona, Nov. 2016, 93–95).

Aoao Faatasi

Ina ia amata se talanoaga e uiga i le faaleleia o le tapuai, e mafai ona e valaaulia tagata o le vasega po o le korama e iloilo taitoatasi le Ioane 4:19–26 ma tusi tali i fesili e pei o nei: Aisea ou te tapuai ai i le Atua? O le a le uiga ia te au o le tapuai i le Atua? E ono fesoasoani foi le iloilo faatasi o le faauigaga i lalo o le “Tapuai” i le Taiala i Tusitusiga Paia (scriptures.ChurchofJesusChrist.org). A uma ua lava se taimi e mafaufau loloto ai i nei fesili, valaaulia i latou e faasoa mai o latou manatu. O gaoioiga nei e mafai ona fesoasoani ia i latou e maua ai uunaiga a le Agaga Paia.

• O le a i ai i tagata o lau vasega po o le korama ni malamalamaaga taua e uiga i le tapuai i le Atua. E mafai ona e fai atu ia i latou e faasoa mai se aafiaga na latou lagonaina ai o loo latou tapuai i le Atua. O fuaitau o mau e pei o nei e mafai ona faaopoopo i lo latou malamalamaaga ma avatu ia i latou ni manatu e uiga i le ala e faia ai a latou tapuaiga i le Atua ia sili atu ona anoa: Salamo 95:1–7; Mataio 4:8–10; Alema 32:4–11; Mataupu Faavae ma Feagaiga 20:17–19; 93:19–20. E mafai foi ona latou talanoaina le saunoaga a Elder Bruce R. McConkie i le “Punaoa Lagolago.”

• Ina ia fesoasoani i le autalavou e faaleleia a latou tapuaiga i le Atua, mafaufau e tusi ulutala nei i luga o le laupapa: O Ai, Aisea, O Fea, ma le E Faapefea. Fai atu ia i latou e toe iloilo mau o loo lisiina i le “Tapuai” i le Taiala i Tusitusiga Paia (scriptures.ChurchofJesusChrist.org), ma vaavaai mo fuaiupu lea e fesoasoani latou te malamalama ai po o ai, aisea, o fea, ma pe faapefea ona tatou tapuai. A o latou mauaina se fuaiupu e fesootai i ai, valaaulia i latou e talanoaina ma le vasega po o le korama ma tusi le mau faasino i lalo o le ulutala talafeagai. Fautuaina i latou e faasoa mai ni aafiaga i se taimi na latou lagona ai le latalata atili atu i le Atua e ala i le tapuai.

• O le savali a Epikopo Dean M. Davies “O Faamanuiaga o le Tapuai,” o loo i ai faataitaiga o tagata o loo tapuai i le Atua. Atonu e mafai ona outou faitau faatasi le vaega “O Le A Le Tapuaiga?” Ona mafai lea e tagata taitoatasi ona iloilo se tasi o faataitaiga o tagata o loo tapuai o loo maua i isi vaega e tolu e sosoo ai o le savali. O le a le mea o aoao mai ia i tatou e ia faataitaiga taitasi e uiga i le tapuai i le Atua? O le a le mea o aoao mai e le vaega mulimuli o le savali e uiga i faamanuiaga e oo mai i le tapuai atu ia te Ia ma le tuuto? O a mea ua musuia i tatou e fai e faaleleia atili ai la tatou tapuaiga i le Atua?

alii talavou o loo faitau

O le tapuai e aofia ai le suesue i tusitusiga paia ma isi faiga e faaalia ai le tuuto ma le alofa mo le Atua.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• “O Elemene o Tapuaiga,” Aoaoga a Peresitene o le Ekalesia: Tavita O. MaKei (2003), 29–37

• Donald L. Hallstrom, “O Le Liuaina o Fanau a le Atua” (Faasalalauga o Seminare ma Inisitituti o Mataupu Faalelotu, 13 Iuni, 2017), broadcasts.ChurchofJesusChrist.org

• Sa aoao mai e Elder Bruce R. McConkie: “O le tapuaiga moni ma le atoatoa e aofia ai le mulimuli i laasaga o le Alo o le Atua; e aofia ai le tausiga o poloaiga ma le usitaia o le finagalo o le Tama i le tulaga lea tatou te siisii atu ai mai lea alofa tunoa i lea alofa tunoa seia iu ina faamamaluina i tatou ia Keriso e faapei ona i ai o Ia i Lona Tama. E matuai sili atu nai lo le tatalo ma lauga ma pese. O le ola ai ma le faia ma le usiusitai. O le faaaoao i le soifuaga o le Faataitai sili” (“How to Worship,” Ensign, Tes. 1971, 130: mataitusi tetele faaonapo nei).

Aoao Atu i le Ala a le Faaola

O aoaoga faavae o loo maua i totonu o tusitusiga paia ma i upu o perofeta o aso e gata ai e i ai le mana e suia ai loto ma faateleina le faatuatua. Ao e, ma i latou e te aoaoina “faataitaia le mana o le afioga a le Atua,” o le a e iloa e i ai lona “uiga malosi e taitai atu ai tagata ia latou faia le mea [e] tonu” (Alema 31:5).